“Faħħru lil Jah!”

“Kull ma jieħu n-​nifs, ħa jfaħħar il-​Mulej!”—SALM 150:6.

1, 2. (a) Il-​vera Kristjanità sa liema punt iffjorixxiet fl-​ewwel seklu? (b) L-​appostli liema twissija bil-​quddiem kienu taw? (ċ) Kif żviluppat l-​apostasija?

ĠESÙ organizza lid-​dixxipli tiegħu bħala l-​kongregazzjoni Kristjana, li ffjorixxiet fl-​ewwel seklu. Minkejja oppożizzjoni reliġjuża ħarxa, “l-​Evanġelju . . . tħabbar lill-​ħlejjaq kollha taħt is-​smewwiet.” (Kolossin 1:23) Imma wara l-​mewt taʼ l-​appostli taʼ Ġesù Kristu, Satana baxx baxx introduċa l-​apostasija.

² L-​appostli kienu taw twissija minn qabel dwar dan. Per eżempju, Pawlu qal lill-​anzjani minn Efesu: “Ħudu ħsieb tagħkom infuskom u tal-​merħla kollha li l-​Ispirtu s-​Santu għamilkom għassiesa tagħha biex tirgħu l-​Knisja taʼ Alla li hu kiseb b’demm [Ibn]u stess. Jiena naf li, wara li nitlaq jien, jidħlu fostkom ilpup qalila li lill-​merħla ma jaħfruhilhiex. U minn fostkom stess għad iqumu xi wħud li jgħallmu dak li hu kontra s-​sewwa, bil-​ħsieb li jdawru d-​dixxipli għal warajhom.” (Atti 20:28-30; ara wkoll 2 Pietru 2:1-3; 1 Ġwann 2:18, 19.) B’hekk, fir-​rabaʼ seklu, il-​Kristjanità apostata bdiet issir ħaġa waħda maʼ l-​Imperu Ruman. Xi ftit tas-​sekli wara l-​Imperu Qaddis Ruman, b’rabtiet mal-​papa taʼ Ruma, beda jaħkem fuq sezzjoni kbira taʼ l-​umanità. Maż-​żmien, ir-​Riforma Protestanta rribellat kontra l-​eċċessi mill-​agħar tal-​Knisja Kattolika, imma naqset li terġaʼ ġġib il-​vera Kristjanità.

3. (a) L-​aħbar tajba meta u kif ġiet ippridkata lill-​ħolqien kollu? (b) Liema stennijiet ibbażati fuq il-​Bibbja twettqu fl-​1914?

³ Minkejja dan, hekk kif qorob it-​tmiem tas-​seklu 19, grupp sinċier taʼ studenti tal-​Bibbja kien għal darb’oħra attiv jippriedka u jestendi ‘lill-​ħolqien kollu taħt is-​sema t-​tama taʼ l-​aħbar tajba.’ Fuq il-​bażi taʼ l-​istudju tagħhom taʼ profezija Biblika, dan il-​grupp indika bil-​quddiem ’il fuq minn 30 sena qabel lejn is-​sena 1914 bħala li timmarka t-​tmiem taʼ “żmien il-​ġnus [“iż-​żminijiet maħturin tal-​ġnus,” NW],” perijodu taʼ “sebaʼ żminijiet,” jew 2,520 sena, li beda bil-​ħerba taʼ Ġerusalemm fis-​sena 607 Q.E.K. (Luqa 21:24; Danjel 4:13 [Danjel 4:16, NW]) Bħalma kien mistenni, is-​sena 1914 uriet li kienet żmien taʼ bidla sinjifikanti fil-​ġrajjiet tal-​bniedem fuq l-​art. Ġrajjiet storiċi seħħew fis-​sema wkoll. Kien dak in-​nhar li s-​Sultan taʼ l-​eternità poġġa lis-​Sultan soċi tiegħu, Ġesù Kristu, fuq tron fis-​sema, bi tħejjija biex jiġi miknus il-​ħażen kollu minn fuq wiċċ din l-​art u tiġi stabbilita mill-​ġdid il-​Ġenna.—Salm 2:6, 8, 9; 110:1, 2, 5.

Araw Is-​Sultan Messjaniku!

4. Ġesù kif wettaq it-​tifsira taʼ ismu Mikiel?

⁴ Fl-​1914 dan is-​Sultan Messjaniku, Ġesù, beda jieħu azzjoni. Fil-​Bibbja jissejjaħ ukoll Mikiel, li jfisser “Min Hu Bħal Alla?,” għax hu jinsab iddeterminat li jivvindika s-​sovranità taʼ Jehovah. Bħalma huwa miktub f’Apokalissi 12:7-12, l-​appostlu Ġwanni ddeskriva f’viżjoni dak li kellu jiġri: “Qamet gwerra fis-​sema: Mikiel u l-​Anġli tiegħu jitqabdu mad-​Dragun. U d-​Dragun u l-​Anġli tiegħu tqabdu, iżda ma kellhomx ħila jegħelbu, u ma kienx hemm iżjed post għalihom fis-​sema. U ġie mwaddab id-​Dragun il-​kbir, is-​Serp tal-​qedem, li hu msejjaħ id-​Demonju u x-​Xitan, il-​qarrieq tad-​dinja kollha, kien imwaddab għal fuq l-​art, u miegħu kienu mwaddba l-​anġli tiegħu.” Waqgħa kbira tabilħaqq!

5, 6. (a) Wara l-​1914, liema proklamazzjoni eċċitanti saret mis-​sema? (b) Mattew 24:3-13 kif jorbot maʼ dan?

⁵ Leħen qawwi ħafna fis-​sema mbagħad ipproklama: “Issa ġiet is-​salvazzjoni u l-​qawwa, u s-​Saltna taʼ Alla tagħna, u s-​setgħa tal-​Kristu tiegħu, għax twaddab ’il barra dak li jixli ’l ħutna, li lejl u nhar jixlihom quddiem Alla tagħna. U huma [Kristjani leali] ħarġu rebbieħa fuqu permezz tad-​demm tal-​Ħaruf [Kristu Ġesù] u bis-​saħħa tal-​kelma li xehdu, u ma għożżewx ħajjithom, minkejja saħansitra l-​mewt.” Dan ifisser ħelsien għal dawk li żammew l-​integrità, li eżerċitaw fidi fis-​sagrifiċċju prezzjuż bħala rahan taʼ Ġesù.—Proverbji 10:2; 2 Pietru 2:9.

⁶ Il-​leħen qawwi fis-​sema kompla jiddikjara: “Għalhekk ifirħu, smewwiet, u intom li tgħammru fihom. Ħażin għalikom [“gwaj,” NW], ja art u baħar, għax fikom niżel id-​Demonju, b’korla kbira fuqu, għax jaf li żmien ftit baqagħlu.” Il-​“gwaj” li ġie b’hekk ipprofetizzat għal din l-​art deher fil-​gwerer dinjin, ġuħ, pestilenzi, terremoti, u illegalità li impestaw l-​art f’dan is-​seklu. Bħalma jirrakkonta Mattew 24:3-13, Ġesù bassar li dawn kellhom ikunu parti mis-​‘sinjal taʼ tmiem id-​dinja.’ Fi qbil mal-​profezija, mill-​1914 ’l hawn l-​umanità esperjenzat fuq l-​art gwaj bla paragun fl-​istorja umana kollha taʼ qabel.

7. Ix-​Xhieda taʼ Jehovah għala jippridkaw b’urġenza?

⁷ F’din l-​era taʼ gwaj sataniku, tistaʼ l-​umanità ssib tama għall-​futur? Tabilħaqq, iva, għax Mattew 12:21 jgħid dwar Ġesù: “F’ismu jittamaw il-​ġnus”! Il-​kundizzjonijiet trawmatiċi fost il-​ġnus jimmarkaw mhux biss ‘is-​sinjal taʼ tmiem id-​dinja’ imma wkoll ‘is-​sinjal tal-​miġja taʼ Ġesù’ bħala Sultan tas-​sema tas-​Saltna Messjanika. Rigward dik is-​Saltna, Ġesù jżid jgħid: “Din il-​Bxara t-​tajba tas-​Saltna tixxandar fid-​dinja kollha, biex il-​ġnus kollha jkollhom xhieda. Imbagħad jiġi t-​tmiem.” (Mattew 24:14) Liema poplu wieħed fuq l-​art illum qiegħed jippriedka t-​tama grandjuża tal-​ħakma tas-​Saltna t’Alla? Ix-​Xhieda taʼ Jehovah! B’urġenza, huma jipproklamaw pubblikament u minn dar għal dar li s-​Saltna t’Alla taʼ tjieba u paċi waslet biex tieħu kontroll taʼ l-​affarijiet taʼ l-​art. Qiegħed int tieħu sehem f’dan il-​ministeru? Ma jistax ikollok privileġġ akbar minn dan!—2 Timotju 4:2, 5.

Kif Jiġi “T-​Tmiem”?

8, 9. (a) Il-​ġudizzju kif beda “mid-​dar taʼ Alla”? (b) Il-​Kristjaneżmu kif kiser il-​Kelma t’Alla?

⁸ L-​umanità daħlet f’perijodu taʼ ġudizzju. Aħna informati fl-​1 Pietru 4:17 li l-​ġudizzju beda “mid-​dar taʼ Alla”​—ġudizzju taʼ dawk li jgħidu li huma organizzazzjonijiet Kristjani li sar apparenti minn mindu “l-​aħħar jiem” bdew iseħħu bit-​tbiċċir taʼ l-​Ewwel Gwerra Dinjija matul l-​1914-18. Il-​Kristjaneżmu kif kampa f’dan il-​ġudizzju? Mela, ikkunsidra l-​waqfa tal-​knejjes f’li jappoġġjaw il-​gwerer mill-​1914 ’l hawn. M’humiex il-​membri tal-​kleru mtebbgħin bil-​marki tad-​“demm taʼ l-​erwieħ imsejknin bla ħtija” li lilhom ippridkaw biex imorru jinqatlu fil-​gwerra?—Ġeremija 2:34, KŻ.

⁹ Skond Mattew 26:52, Ġesù stqarr: “Kull min jaqbad is-​sejf, bis-​sejf jinqered.” Kemm kien veru dan fil-​gwerer taʼ dan is-​seklu! Il-​membri tal-​kleru ħeġġew irġiel żgħażagħ biex jimmassakraw irġiel żgħażagħ oħrajn, saħansitra lil dawk tar-​reliġjon tagħhom stess​—billi Kattoliku joqtol lil Kattoliku u Protestant joqtol lil Protestant. In-​nazzjonaliżmu ġie eżaltat ’il fuq minn Alla u Kristu. Riċentement, f’xi ġnus Afrikani, rabtiet etniċi tpoġġew qabel il-​prinċipji tal-​Bibbja. Fl-​Irwanda, fejn il-​biċċa l-​kbira tal-​popolazzjoni huma Kattoliċi, minn taʼ l-​inqas nofs miljun ġew imbiċċrin fi vjolenza etnika. Il-​papa ammetta fil-​gazzetta tal-​Vatikan L’Osservatore Romano: “Dan huwa ġenoċidju minn kull aspett, li għalih sfortunatament saħansitra Kattoliċi huma responsabbli.”—Qabbel Isaija 59:2, 3; Mikea 4:3, 5.

10. Jehovah liema ġudizzju se jesegwixxi fuq ir-​reliġjon falza?

¹⁰ Is-​Sultan taʼ l-​eternità kif iħares lejn reliġjonijiet li jinkuraġġixxu lin-​nies biex joqtlu lil xulxin jew li ma jagħmlu xejn meta membri tal-​merħla tagħhom joqtlu membri oħrajn? Rigward Babilonja l-​Kbira, is-​sistema dinjija taʼ reliġjon falza, Apokalissi 18:21, 24 jgħidilna: “Wieħed Anġlu taʼ saħħa kbira refaʼ ġebla, qisha ġebla kbira tal-​mitħna, waddabha fil-​baħar u qal: ‘Hekk b’saħħa tintrema Babel, il-​Belt il-​Kbira, u ma tinstabx iżjed.’ Fiha nstab id-​demm tal-​profeti u tal-​qaddisin u tal-​maqtulin kollha fuq l-​art.”

11. Liema affarijiet orribbli ġraw u għadhom jiġru fil-​Kristjaneżmu?

¹¹ Bi twettiq tal-​profezija tal-​Bibbja, affarijiet orribbli seħħew u għadhom iseħħu fil-​Kristjaneżmu. (Qabbel Ġeremija 5:30, 31; 23:14.) Fil-​parti l-​kbira minħabba l-​attitudni permissiva tal-​membri tal-​kleru, il-​merħliet tagħhom huma miżgħudin bl-​immoralità. Fl-​Istati Uniti, li suppost huwa nazzjon Kristjan, madwar nofs iż-​żwiġijiet kollha jispiċċaw f’divorzju. It-​tqala fost it-​teenagers u l-​omosesswalità huma abbundanti fost membri tal-​knejjes. Qassisin qegħdin jabbużaw sesswalment minn tfal żgħar​—u mhux biss f’xi każi rari. Intqal li kumpensi ordnati mill-​qrati li jinvolvu dawn il-​każi jistgħu jiswew lill-​Knisja Kattolika fl-​Istati Uniti biljun dollaru fi żmien għaxar snin. Il-​Kristjaneżmu injora t-​twissija taʼ l-​appostlu Pawlu misjuba fl-1 Korintin 6:9, 10: “Ma tafux li l-​inġusti ma jirtuhiex is-​saltna taʼ Alla? La titqarrqux! La żienja, la idolatri, la adulteri, la effeminati, la omosesswali, la ħallelin, la rgħiba, la skaren, la qassiesa fuq in-​nies, la ħattafa, ma jirtu s-​saltna taʼ Alla!”

12. (a) Is-​Sultan taʼ l-​eternità kif se jieħu azzjoni kontra Babilonja l-​Kbira? (b) F’kuntrast mal-​Kristjaneżmu, in-​nies t’Alla għal liema raġuni se jkantaw ritornelli taʼ “Hallelujah”?

¹² Fi żmien qasir, is-​Sultan taʼ l-​eternità, Jehovah, billi jaġixxi permezz tal-​Kmandant tiegħu tas-​sema, Kristu Ġesù, se jagħti bidu għat-​tribulazzjoni l-​kbira. L-​ewwel, il-​Kristjaneżmu u l-​fergħat l-​oħrajn kollha taʼ Babilonja l-​Kbira se jsofru l-​esekuzzjoni tal-​ġudizzju taʼ Jehovah. (Apokalissi 17:16, 17) Huma wrew lilhom infushom indenji tas-​salvazzjoni li Jehovah ipprovda permezz tas-​sagrifiċċju bħala rahan taʼ Ġesù. Huma bagħdu l-​isem qaddis t’Alla. (Qabbel Eżekjel 39:7.) X’falzità li jkantaw ritornelli taʼ “Hallelujah” fit-​tempji reliġjużi għonja tagħhom! Huma jneħħu l-​isem prezzjuż taʼ Jehovah mit-​traduzzjonijiet tagħhom tal-​Bibbja imma donnhom li jinsew il-​fatt li “Hallelujah” tfisser “Faħħru lil Jah”​—li “Jah” hija għamla mqassra taʼ “Jehovah.” Bix-​xieraq, Apokalissi 19:1-6 jiddokumenta r-​ritornelli taʼ “Hallelujah” li dalwaqt jitkantaw bħala ċelebrazzjoni taʼ l-​esekuzzjoni taʼ ġudizzju t’Alla fuq Babilonja l-​Kbira.

13, 14. (a) Liema ġrajjiet notevoli jiġru wara? (b) X’inhu r-​riżultat hieni għal bnedmin li għandhom il-​biżaʼ t’Alla?

¹³ Wara dan imiss il-​‘wasla’ taʼ Ġesù biex jippronunzja u jesegwixxi ġudizzju fuq il-​ġnus u l-​popli. Hu nnifsu pprofetizza: “Meta jiġi Bin il-​Bniedem [Kristu Ġesù] fil-​glorja tiegħu u bl-​anġli kollha miegħu, imbagħad joqgħod fuq it-​tron glorjuż [taʼ ġudizzju] tiegħu. U quddiemu jinġabru l-​ġnus kollha [fuq l-​art], u hu jifridhom minn xulxin, bħalma r-​ragħaj jifred in-​ngħaġ mill-​mogħoż: in-​ngħaġ iqegħidhom fuq il-​lemin tiegħu u l-​mogħoż fuq ix-​xellug. Imbagħad is-​Sultan igħid lil dawk taʼ fuq il-​lemin tiegħu, ‘Ejjew, imberkin minn Missieri, ħudu b’wirt tagħkom is-​Saltna li thejjiet għalikom sa mill-​ħolqien tad-​dinja.’” (Mattew 25:31-34) Vers 46 jissokta jirrakkonta li l-​klassi tal-​mogħoż “imorru fit-​tbatija [“qtugħ,” NW] taʼ dejjem u l-​ġusti fil-​ħajja taʼ dejjem.”

¹⁴ Il-​ktieb Bibliku taʼ l-​Apokalissi jiddeskrivi kif is-​“Sultan tas-​slaten u Sid tas-​sidien,” il-​Mulej tagħna tas-​sema, Ġesù Kristu, f’dak iż-​żmien se jiġi riekeb għall-​battalja f’Armageddon, billi jeqred lill-​elementi politiċi u kummerċjali tas-​sistema taʼ Satana. B’hekk Kristu se jkun ferraʼ r-​rabja “tal-​korla taʼ Alla li jistaʼ kollox” fuq id-​dominju kollu taʼ Satana fuq l-​art. Hekk kif dawn ‘il-​ħwejjeġ taʼ qabel jgħibu,’ bnedmin li jkollhom il-​biżaʼ t’Alla se jiġu mdaħħlin fid-​dinja ġdida glorjuża fejn Alla se “jixxottalhom kull demgħa minn għajnejhom.”—Apokalissi 19:11-16; 21:3-5.

Żmien Biex Infaħħru Lil Jah

15, 16. (a) Għala huwa vitali li nagħtu kas tal-​kelma profetika taʼ Jehovah? (b) Il-​profeti u l-​appostli x’jindikaw li rridu nagħmlu biex insalvaw, u dan x’jistaʼ jfisser illum għal kotriet taʼ nies?

¹⁵ Dak il-​jum għal esekuzzjoni taʼ ġudizzju huwa fil-​qrib! Nagħmlu tajjeb, għalhekk, li nagħtu kas tal-​kelma profetika tas-​Sultan taʼ l-​eternità. Lil dawk li għadhom maqbudin fit-​tagħlim u d-​drawwiet tar-​reliġjon falza, leħen tas-​sema jiddikjara: “Oħorġu minnha, popli tiegħi, biex ma jkollkomx x’taqsmu magħha fi dnubietha, u biex mill-​kastigi tagħha ma tiħdux sehem.” Imma fejn iridu jmorru dawk li jaħarbu? Jistaʼ jkun hemm biss verità waħda, għalhekk biss reliġjon vera waħda. (Apokalissi 18:4; Ġwann 8:31, 32; 14:6; 17:3) Li niksbu l-​ħajja taʼ dejjem jiddependi fuq li nsibu dik ir-​reliġjon u nobdu lil Alla tagħha. Il-​Bibbja tidderiġina lejh f’Salm 83:18 [KŻ], li jaqra: “Int, li ismek biss hu JEĦOVAH, int waħdek il-​Għoli fuq l-​art kollha.”

¹⁶ Madankollu, jeħtiġilna nagħmlu iżjed milli sempliċement inkunu nafu l-​isem tas-​Sultan taʼ l-​eternità. Għandna bżonn nistudjaw il-​Bibbja u nitgħallmu dwar il-​kwalitajiet u l-​iskopijiet grandjużi tiegħu. Imbagħad għandna bżonn nagħmlu r-​rieda tiegħu għal dan iż-​żmien preżenti, bħalma huwa indikat f’Rumani 10:9-13. L-​appostlu Pawlu kkwota lill-​profeti ispirati u kkonkluda: “Kull min isejjaħ isem il-​Mulej isalva.” (Ġoel 3:5 [Ġoel 2:32, NW]; Sofonija 3:9) Salvati? Iva, għaliex kotriet taʼ nies illum li jeżerċitaw fidi fil-​provvediment taʼ Jehovah taʼ rahan permezz taʼ Kristu se jinħelsu mit-​tribulazzjoni l-​kbira li ġejja, meta ġudizzju fuq id-​dinja korrotta taʼ Satana jiġi esegwit.—Apokalissi 7:9, 10, 14.

17. Liema tama grandjuża għandha tqanqalna biex ningħaqdu issa f’li nkantaw il-​kantiku taʼ Mosè u tal-​Ħaruf?

¹⁷ X’inhi r-​rieda t’Alla għal dawk li jittamaw li jibqgħu ħajjin? Hija li ningħaqdu saħansitra issa f’li nkantaw il-​kantiku taʼ Mosè u tal-​Ħaruf, billi nfaħħru lis-​Sultan taʼ l-​eternità b’antiċipazzjoni tar-​rebħa tiegħu. Nagħmlu dan billi ngħidu lil oħrajn dwar l-​iskopijiet glorjużi tiegħu. Hekk kif nipprogressaw fil-​fehma tal-​Bibbja, niddedikaw ħajjietna lis-​Sultan taʼ l-​eternità. Dak se jwassal biex aħna ngħixu għall-​eternità kollha taħt l-​arranġament li dan is-​Sultan setgħan jiddeskrivi, kif misjub f’Isaija 65:17, 18: “Għax, arani, se naħlaq smewwiet ġodda [is-Saltna Messjanika taʼ Ġesù] u art ġdida [soċjetà ġdida taʼ tjieba taʼ bnedmin]. Ma jitfakkarx iżjed l-​imgħoddi, f’moħħ ħadd aktar ma jiġi. Imma għad jifirħu u jaqbżu bil-​ferħ għal dejjem, minħabba f’dak li għad naħlaq jien.”

18, 19. (a) Il-​kliem taʼ David f’Salm 145 x’għandu jqanqalna biex nagħmlu? (b) X’nistgħu b’mod fiduċjuż nistennew minn id Jehovah?

¹⁸ Is-​salmista David iddeskriva lis-​Sultan taʼ l-​eternità b’dan il-​kliem: “Kbir il-​Mulej, taʼ min ifaħħru bil-​bosta, bla tarf il-​kobor tiegħu.” (Salm 145:3) Il-​kobor tiegħu huwa daqstant bla tarf daqs il-​limiti taʼ l-​ispazju u l-​eternità! (Rumani 11:33) Fil-​waqt li nkomplu nieħdu għarfien dwar il-​Ħallieq tagħna u dwar il-​provvediment tiegħu tar-​rahan permezz taʼ Ibnu, Kristu Ġesù, se nkunu rridu nfaħħru lis-​Sultan etern tagħna iżjed u iżjed. Se nkunu rridu nagħmlu bħalma jindika Salm 145:11-13: “Is-​sebħ tas-​saltna tiegħek ixandru, fuq is-​setgħa tiegħek jitkellmu, biex igħarrfu lill-​bnedmin il-​qawwa tiegħek, u s-​sebħ u l-​ġmiel tas-​saltna tiegħek. Saltnatek hi saltna għaż-​żminijiet kollha, minn nisel għal nisel il-​ħakma tiegħek.”

¹⁹ Aħna nistgħu b’mod fiduċjuż nistennew li Alla tagħna se jżomm il-​wegħda tiegħu: “Int tiftaħ idek, u xxabbaʼ ’l kulħadd bil-​ġid.” Is-​Sultan taʼ l-​eternità se jmexxina b’mod teneru sat-​tmiem taʼ dawn l-​aħħar jiem, għaliex David jiżgurana: “Iħares il-​Mulej lil ħbiebu kollha, imma lill-​ħżiena jeqridhom.”—Salm 145:16, 20.

20. Kif twieġeb int għall-​istedina tas-​Sultan taʼ l-​eternità, bħalma hija mistqarra fl-​aħħar ħames salmi?

²⁰ Kull wieħed mill-​aħħar ħames salmi fil-​Bibbja jiftaħ u jagħlaq bi stedina taʼ “Hallelujah.” B’hekk, Salm 146 jistedinna: “Hallelujah! Faħħar, ruħ tiegħi, il-​Mulej! Infaħħar il-​Mulej tul ħajti kollha; ngħanni lil Alla tiegħi kemm indum ħaj.” Se twieġeb int dik is-​sejħa? Ċertament li għandek tkun trid tfaħħru! Jalla tkun fost dawk deskritti f’Salm 148:12, 13: “Iż-​żgħażagħ u x-​xbejbiet ukoll, ix-​xjuħ flimkien mat-​tfal: ħa jfaħħru isem il-Mulej, għax ismu waħdu l-​għoli, sebħu ’l fuq mill-​art u s-​sema!” Jalla nwieġbu b’qalbna kollha għall-​istedina: “Faħħru lil Jah!” Għalenija, ejjew infaħħru lis-​Sultan taʼ l-​eternità! (w96 4/1)

X’Inhu L-​Kumment Tiegħek?

◻ L-​appostli taʼ Ġesù dwar liema ħaġa wissew bil-​quddiem?

◻ B’seħħ mill-​1914, liema azzjonijiet deċiżivi ġraw?

◻ Jehovah liema ġudizzji wasal biex jesegwixxi?

◻ Dan għala huwa l-​iktar żmien importanti biex infaħħru lis-​Sultan taʼ l-​eternità?

[Kaxxa paġna 31]

Din l-​Era Katastrofika taʼ Taqlib

Li era taʼ taqlib żernqet kmieni fis-​seklu 20 ġie rrikonoxxut minn ħafna. Per eżempju, fl-​introduzzjoni tal-​ktieb Pandaemonium, mis-​Senatur taʼ l-​Istati Uniti Daniel Patrick Moynihan, ippubblikat fl-​1993, kumment fuq “il-​katastrofi taʼ l-​1914” jaqra: “Ġiet il-​gwerra u d-​dinja nbidlet​—għal kollox. Illum hemm biss tmien stati fuq l-​art li eżistew fl-​1914 u ma kellhomx l-​għamla tagħhom taʼ gvern mibdula bil-​vjolenza minn dak iż-​żmien ’l hawn. . . . Minn madwar 170 stat kontemporanju li baqaʼ, ftit minnhom inħolqu wisq riċentement biex ikunu ġarrbu ħafna mit-​taqlib riċenti.” Verament, l-​era mill-​1914 ’l hawn xehdet katastrofi fuq oħra.

Ukoll fl-​1993 ġie ppubblikat il-​ktieb Out of Control​—Global Turmoil on the Eve of the Twenty-First Century. L-​awtur hu Zbigniew Brzezinski, dak li qabel kien il-​kap tal-​Kunsill tas-​Sigurtà Nazzjonali taʼ l-​Istati Uniti. Hu jikteb: “Id-​dħul tas-​seklu għoxrin ġie milqugħ f’ħafna kummentarji bħala l-​veru bidu taʼ l-​Era tar-​Raġuni. . . . Kuntrarju għall-​wegħda tiegħu, is-​seklu għoxrin sar l-​iktar seklu mdemmi u mimli mibgħeda taʼ l-​umanità, seklu taʼ politika taʼ delużjoni u taʼ qtil mostruż. Il-​krudeltà kienet organizzata sa skala bla preċedent, il-​qtil kien organizzat fuq bażi taʼ produzzjoni bil-​massa. Il-​kuntrast bejn il-​potenzjal xjentifiku għat-​tajjeb u l-​ħażen politiku li attwalment ġie sfogat huwa taʼ tkexkix. Qatt qabel fl-​istorja ma kien il-​qtil daqstant mifrux globalment, qatt qabel ma kkonsma daqstant ħajjiet, qatt qabel il-​qerda umana ma ġiet segwita b’tant konċentrazzjoni taʼ sforz kontinwu bbażat fuq miri daqstant irrazzjonali b’mod arroganti.” Kemm huwa veru dak!

[Stampa f’paġna 28]

Mikiel tafaʼ lil Satana u lill-​qtajja tiegħu ’l isfel lejn l-​art fl-​1914