Kapitlu 17

‘Inbnew fuq il-​Fidi l-​Iktar Qaddisa Tagħkom’

“Billi tinbnew fuq il-​fidi l-​iktar qaddisa tagħkom, . . . żommu ruħkom fl-​imħabba t’Alla.”—ĠUDA 20, 21.

1, 2. Liema proġett taʼ bini int involut fih, u l-​kwalità taʼ xogħlok għala hija daqstant importanti?

TINSAB taħdem qatigħ fi proġett tal-​bini. Il-​bini ilu għaddej għal xi żmien u se jkompli sew fil-​futur. S’issa, ix-​xogħol kien taʼ sfida però sodisfaċenti. Jiġri x’jiġri, int determinat li qatt ma taqtaʼ qalbek jew tittraskurah, għax il-​kwalità taʼ xogħlok se teffettwa lil ħajtek, saħansitra l-​futur tiegħek. Għala? Għax il-​bini li qed taħdem fuqu hu int!

² Id-​dixxiplu Ġuda enfasizza x-​xogħol tal-​bini li nagħmlu fuqna nfusna. Meta ħeġġeġ lill-​Kristjani biex ‘iżommu ruħhom fl-​imħabba t’Alla,’ fl-​istess silta rrivela wkoll iċ-​ċavetta biex nagħmlu dan: “Billi tinbnew fuq il-​fidi l-​iktar qaddisa tagħkom.” (Ġuda 20, 21) Liema huma xi modi kif tistaʼ tibni lilek innifsek, jiġifieri li tagħmel il-​fidi tiegħek iktar b’saħħitha sabiex tibqaʼ fl-​imħabba t’Alla? Ejja niffokaw fuq tliet aspetti tal-​proġett tal-​bini spiritwali li jinsab quddiemek.

IBQAʼ IBNI L-​FIDI FIL-​ĦTIĠIJIET ĠUSTI TAʼ ĠEĦOVA

3-5. (a) Satana jixtieq jiżvijak biex ikollok liema ħarsa lejn il-​ħtiġijiet taʼ Ġeħova? (b) X’għandha tkun il-​ħarsa tagħna lejn il-​ħtiġijiet t’Alla, u liema effett għandu jkollha fuq kif inħossuna? Agħti tixbiha.

³ L-​ewwelnett, irridu nsaħħu l-​fidi tagħna fil-​liġi divina. Waqt l-​istudju taʼ dan il-​ktieb, int ikkunsidrajt għadd taʼ ħtiġijiet ġusti taʼ Ġeħova rigward il-​kondotta. Int kif tħares lejhom? Satana jixtieq iqarraq bik billi tikkunsidra l-​liġijiet, il-​prinċipji, u l-​livelli taʼ Ġeħova bħala li huma restrittivi, saħansitra oppressivi. Ilu juża din it-​tattika minn mindu ħadmet b’mod tant effettiv lura fl-​Għeden. (Ġenesi 3:1-6) It-​tattika tiegħu se taħdem fuqek? Se jiddependi ħafna mill-​attitudni tiegħek.

⁴ Biex nagħtu tixbiha: Hekk kif tkun għaddej bil-​mixi fi ġnien sabiħ, tinnota ċint għoli u sod li qed jagħlaqlek biċċa mill-​ġnien. Ix-​xenarju wara ċ-​ċint jattirak. Għall-​ewwel, forsi taħseb li ċ-​ċint huwa restrizzjoni bla bżonn għal-​libertà tiegħek. Però, hekk kif tittawwal tilmaħ iljun feroċi jfittex il-​priża fuq in-​naħa l-​oħra! Issa tistaʼ tara li ċ-​ċint hu fil-​fatt taʼ protezzjoni. Hemm xi predatur perikoluż ifittex biex jaħtfek issa? Il-​Kelma t’Alla twissi: “Ibqgħu f’sensikom, oqogħdu għassa. L-​avversarju tagħkom, ix-​Xitan, iħuf bħal iljun jgħajjat, jipprova jiblaʼ lil xi ħadd.”—1 Pietru 5:8.

⁵ Satana huwa predatur makabru. Minħabba li Ġeħova ma jridniex naqgħu vittmi taʼ Satana, Hu stabbilixxa liġijiet biex jipproteġina mill-​ħafna “tnassis” taʼ dan il-​wieħed mill-​agħar. (Efesin 6:11) Għalhekk, kulmeta nimmeditaw fuq il-​liġijiet t’Alla, għandna naraw fihom l-​imħabba taʼ Missierna tas-​sema. Meta nqisuhom b’dan il-​mod, il-​liġijiet t’Alla huma sors taʼ sigurtà u ferħ. Id-​dixxiplu Ġakbu kiteb: “Min iħares fiss lejn il-​liġi perfetta tal-​libertà u jibqaʼ jagħmel hekk . . . ikun hieni li qed jagħmilha.”—Ġakbu 1:25.

6. Liema hu l-​aqwa mod kif tibni l-​fidi fil-​liġijiet u l-​prinċipji ġusti t’Alla? Agħti eżempju.

⁶ Li ngħixu fi qbil mal-​kmandamenti t’Alla hu l-​aqwa mod kif nibnu l-​fidi tagħna fil-​Leġislatur u fl-​għerf tal-​liġijiet tiegħu. Per eżempju, “il-​liġi tal-​Kristu” tinkludi l-​kmand taʼ Ġesù biex ngħallmu lil oħrajn ‘dak kollu li [hu] ordna.’ (Galatin 6:2; Mattew 28:19, 20) Il-​Kristjani jieħdu bis-​serjetà wkoll il-​kmand biex jibqgħu jiltaqgħu flimkien għall-​qima u għal sħubija inkuraġġanti. (Ebrej 10:24, 25) Il-​kmandamenti t’Alla jinkuraġġuna wkoll biex nitolbu lil Ġeħova regolarment, spiss, u mill-​qalb. (Mattew 6:5-8; 1 Tessalonikin 5:17) Hekk kif ngħixu fi qbil maʼ dawn il-​kmandi, naraw iktar u iktar ċar liema linji taʼ gwida jipprovdu bl-​imħabba. Ubbidjenza lejhom iġġibilna ferħ u sodisfazzjon sostanzjali li ma nistgħu nsibu mkien ieħor f’din id-​dinja mimlija inkwiet. Hekk kif timmedita fuq kif int ibbenefikajt personalment billi tgħix fi qbil mal-​liġijiet t’Alla, ma tissaħħaħx il-​fidi tiegħek fihom?

7, 8. Il-​Kelma t’Alla kif tassigura lil dawk li jinkwetaw li forsi ma jirnexxilhomx jibqgħu jgħixu ħajja sewwa hekk kif igerbu s-​snin?

⁷ Kultant, xi wħud jinkwetaw li se jkun diffiċli wisq għalihom li jżommu mal-​liġijiet taʼ Ġeħova hekk kif igerbu s-​snin. Jibżgħu li b’xi mod jew ieħor ma jirnexxilhomx. Jekk xi darba tħossok b’dan il-​mod, żomm dan il-​kliem f’moħħok: “Jien, Ġeħova, jien Alla tiegħek, li ngħallmek għall-​ġid tiegħek, li mmexxik fit-​triq li għandek timxi. O li kieku fil-​fatt tagħti kas il-​kmandamenti tiegħi! Imbagħad il-​paċi tiegħek tkun bħal xmara, u s-​sewwa tiegħek bħall-​mewġ tal-​baħar.” (Isaija 48:17, 18) Qatt waqaft biex taħseb kemm dan il-​kliem iqawwi l-​qalb?

⁸ Ġeħova hawnhekk ifakkarna li jkun taʼ ġid għalina li nobduh. Hu jwiegħed żewġ barkiet jekk nagħmlu dan. L-​ewwel, il-​paċi tagħna se tkun bħal xmara—kalma, abbundanti, kontinwa. It-​tieni, il-​ġustizzja tagħna se tkun bħall-​mewġ tal-​baħar. Jekk toqgħod bil-​wieqfa f’xi bajja u tara l-​mewġ dieħel mewġa wara l-​oħra, bla dubju tħoss sens taʼ permanenza. Taf li l-​mewġ se jibqaʼ ġej, jitkisser fuq ix-​xtajta għal dejjem. Ġeħova jgħid li l-​ġustizzja tiegħek—li tagħmel it-​tajjeb—tistaʼ tkun bħal dan il-​mewġ. Sakemm tistinka biex tkun leali lejh, hu qatt m’hu se jħallik tfalli! (Salm 55:22) Wegħdi li jqawwu l-​qalb bħal dawn ma jibnux il-​fidi tiegħek f’Ġeħova u fil-​ħtiġijiet ġusti tiegħu?

‘IRSISTI LEJN IL-​MATURITÀ’

9, 10. (a) Il-​maturità għala hija mira mill-​isbaħ għall-​Kristjani? (b) Ħarsa spiritwali kif tikkontribwixxi għall-​ferħ?

⁹ It-​tieni aspett fil-​proġett taʼ bini tiegħek jidher fil-​kliem ispirat: “Ħa nirsistu lejn il-​maturità.” (Ebrej 6:1) Il-​maturità hija mira mill-​isbaħ għal Kristjan. B’kuntrarju għall-​perfezzjoni, li għalissa ma tistax tinkiseb mill-​bnedmin, il-​maturità hija mira li tistaʼ tintlaħaq. Iżjed minn hekk, il-​Kristjani jsibu ferħ akbar f’li jaqdu lil Ġeħova hekk kif jimmaturaw. Dan għala hu minnu?

¹⁰ Kristjan matur huwa persuna spiritwali. Hu jara l-​affarijiet kif jarahom Ġeħova. (Ġwanni 4:23) Pawlu kiteb: “Dawk li huma f’armonija mal-​laħam jixħtu moħħhom fuq l-​affarijiet tal-​laħam, imma dawk li huma f’armonija maʼ l-​ispirtu fuq l-​affarijiet taʼ l-​ispirtu.” (Rumani 8:5) Ħarsa f’armonija mal-​laħam ftit iġġib ferħ, għax għandha t-​tendenza li tkun egoistika, bla ħsieb, u ffokata fuq affarijiet materjali. Ħarsa spiritwali ġġib il-​ferħ, għax hija ffokata fuq Ġeħova, “l-​Alla l-​hieni.” (1 Timotju 1:11) Individwu spiritwali jkun ħerqan biex jogħġob lil Ġeħova u jifraħ saħansitra fil-​prova. Għala? Il-​provi jagħtuna opportunitajiet biex noħorġu lil Satana taʼ giddieb u nibnu l-​integrità, u b’hekk inferrħu lil Missierna tas-​sema.—Proverbji 27:11; Ġakbu 1:2, 3.

11, 12. (a) Pawlu x’qal dwar is-​“sensi” taʼ Kristjan, u xi tfisser il-​kelma tradotta “mħarrġin”? (b) Liema taħriġ irid jgħaddi minnu l-​ġisem sabiex jimmatura u jsir fiżikament tas-​sengħa?

¹¹ L-​ispiritwalità u l-​maturità jiġu mit-​taħriġ. Ikkunsidra dan il-​vers: “L-​ikel solidu hu għan-​nies maturi, għal dawk li bl-​użu għandhom is-​sensi tagħhom imħarrġin biex jagħrfu jagħżlu kemm it-​tajjeb u kemm il-​ħażin.” (Ebrej 5:14) Meta Pawlu tkellem dwar li s-​sensi tagħna għandhom jiġu “mħarrġin,” hu uża l-​kelma Griega li x’aktarx kienet komuni fil-​ġinnasji tal-​Greċja fl-​ewwel seklu, għax tistaʼ tiġi tradotta ‘mħarreġ bħal ġinnasta.’ Issa aħseb dwar x’jinvolvi taħriġ bħal dan.

¹² Meta twelidna, ġisimna ma kienx imħarreġ. Per eżempju, tarbija bilkemm tistaʼ tifhem il-​pożizzjoni taʼ idejha u saqajha. Għalhekk, meta tarbija xxejjer idejha bl-​addoċċ, billi anki tolqot lilha nfisha f’wiċċha, dan iħawwad u jaħsad lit-​tarbija. Maż-​żmien, bl-​użu, il-​ġisem jiġi mħarreġ. It-​tarbija timxi fuq irkopptejha, it-​tifla ċkejkna timxi, it-​tifla tiġri.a Imma, xi ngħidu dwar ġinnasta? Meta tara atleta bħal dan jaqbeż u jdur fl-​arja bi grazzja u bi preċiżjoni li ma bħalha, m’hemm ebda dubju f’moħħok li l-​ġisem hu bħal magna li taħdem b’armonija. L-​abbiltà tal-​ġinnasta ma ġietx b’kumbinazzjoni—kien hemm bżonn taʼ sigħat bla għadd. Il-​Bibbja tgħid li taħriġ tal-​ġisem bħal dan huwa taʼ “benefiċċju għal ftit.” Kemm huwa iktar taʼ valur it-​taħriġ tas-​sensi spiritwali tagħna!—1 Timotju 4:8.

13. Kif nistgħu nħarrġu s-​sensi tagħna?

¹³ F’dan il-​ktieb, iddiskutejna ħafna għajnuniet li se jgħinuk tħarreġ is-​sensi tiegħek sabiex tkun tistaʼ tibqaʼ leali lejn Ġeħova bħala persuna spiritwali. Bit-​talb ikkunsidra prinċipji divini u liġijiet hekk kif tieħu deċiżjonijiet fil-​ħajja tiegħek taʼ kuljum. F’kull deċiżjoni li tiffaċċja, staqsi lilek innifsek: ‘Liema liġijiet jew prinċipji Bibliċi għandhom x’jaqsmu maʼ din il-​kwistjoni? Kif nistaʼ napplikahom? Liema għażla se togħġob lil Missieri tas-​sema?’ (Proverbji 3:5, 6; Ġakbu 1:5) Kull deċiżjoni li tieħu b’dan il-​mod se tkompli tħarreġ is-​sensi tiegħek. Taħriġ bħal dan se jgħinek issir u tibqaʼ verament persuna spiritwali.

14. Liema aptit irridu niksbu sabiex nikbru spiritwalment, però liema prekawzjoni rridu nżommu f’moħħna?

¹⁴ Filwaqt li nistgħu niksbu l-​maturità, dejjem hemm fejn nistgħu nikbru spiritwalment. It-​tkabbir jiddependi mill-​ikel. Pawlu b’hekk qal: “L-​ikel solidu hu għan-​nies maturi.” Ċavetta biex tibni l-​fidi tiegħek hi li tibqaʼ tieħu ikel solidu spiritwali. Hekk kif bix-​xieraq tapplika dak li titgħallem, dan jissejjaħ għerf, u l-​Bibbja tgħid: “L-​għerf hu l-​aqwa ħaġa.” B’hekk, irridu niżviluppaw xenqa ġenwina għall-​veritajiet prezzjużi li Missierna jagħtina. (Proverbji 4:5-7; 1 Pietru 2:2) M’għandniex xi ngħidu, li tikseb l-​għarfien u l-​għerf divin m’huwiex raġuni biex tintefaħ jew titkabbar. Irridu neżaminaw lilna nfusna regolarment sabiex ma nħallux il-​kburija jew xi nuqqas ieħor irabbi l-​għeruq u jikber f’qalbna. Pawlu kiteb: “Ibqgħu għarblu jekk intomx fil-​fidi, ibqgħu agħtu prova taʼ x’intom.”—2 Korintin 13:5.

15. L-​imħabba għala hija essenzjali għat-​tkabbir spiritwali?

¹⁵ Il-​bini taʼ dar jistaʼ jitlesta, imma x-​xogħol fiha jibqaʼ għaddej. Huwa essenzjali li jkun hemm manutenzjoni u tiswijiet, u jistaʼ jkun hemm bżonn taʼ tibdil hekk kif jinbidlu ċ-​ċirkustanzi. X’għandna bżonn sabiex nimmaturaw u nżommu l-​ispiritwalità tagħna? Fuq kollox, l-​imħabba. Irridu nibqgħu nikbru fl-​imħabba għal Ġeħova u għal sħabna fit-​twemmin. Jekk m’għandniex l-​imħabba, l-​għarfien u l-​għemejjel kollha tagħna ma jkunu jfissru xejn—bħal ħafna storbju bla sens. (1 Korintin 13:1-3) Bl-​imħabba, nistgħu niksbu l-​maturità Kristjana u nkomplu nikbru spiritwalment.

ŻOMM MOĦĦOK IFFOKAT FUQ IT-​TAMA LI JAGĦTI ĠEĦOVA

16. Satana jippromwovi liema ħsibijiet, u Ġeħova liema protezzjoni tana?

¹⁶ Ejja nikkunsidraw aspett ieħor tal-​proġett tal-​bini tiegħek. Sabiex tibni lilek innifsek bħala segwaċi ġenwin taʼ Kristu, trid tgħasses il-​mod kif taħseb. Satana, il-​ħakkiem taʼ din id-​dinja, huwa espert f’li jġiegħel lin-​nies iċedu għal ħsibijiet negattivi, pessimiżmu, nuqqas taʼ fiduċja, u disprament. (Efesin 2:2) Ħsibijiet bħal dawn huma taʼ periklu għal Kristjan daqskemm hu taʼ periklu injam imsewwes f’bini magħmul bl-​injam. B’ferħ, Ġeħova jipprovdi għodda vitali għall-​protezzjoni tagħna—it-​tama.

17. Il-​Kelma t’Alla kif turi kemm hi importanti t-​tama?

¹⁷ Il-​Bibbja ssemmi diversi biċċiet taʼ l-​armatura spiritwali li għandna bżonn fil-​ġlieda tagħna kontra Satana u din id-​dinja. Biċċa armatura prominenti hija l-​elmu, “it-​tama tas-​salvazzjoni.” (1 Tessalonikin 5:8) Suldat fiż-​żminijiet Bibliċi kien jaf li ma kienx se jdum ħaj fil-​battalja mingħajr l-​elmu tiegħu. L-​elmu, spiss magħmul minn metall u b’biċċa feltru jew ġilda minn taħt, kien jassigura li l-​biċċa l-​kbira mid-​daqqiet immirati lejn ir-​ras ma kinux se jagħmlu daqstant ħsara. Bħalma l-​elmu jipproteġi r-​ras, it-​tama tistaʼ tipproteġi lil moħħok, il-​ħsibijiet tiegħek.

18, 19. Ġesù ħalla liema eżempju f’li jżomm it-​tama, u aħna kif nistgħu nimitawh?

¹⁸ Ġesù ħalla l-​aqwa eżempju f’li jżomm it-​tama. Ftakar f’dak li ssaporta fl-​aħħar lejl taʼ ħajtu fuq l-​art. Ħabib tal-​qalb ittradieh għall-​flus. Ieħor ċaħad li saħansitra kien jafu. L-​oħrajn abbandunawh u ħarbu. In-​nies taʼ pajjiżu stess daru kontrih, billi għajtu biex jinqatel b’tortura f’idejn is-​suldati Rumani. Nistgħu ngħidu li Ġesù ffaċċja provi iktar ebsin milli aħna qatt se nesperjenzaw. X’għenu? Ebrej 12:2 iwieġeb: “Għall-​ferħ li tqiegħed quddiemu ssaporta z-​zokk tat-​tortura, u ma qiesx l-​għajb, u qagħad bil-​qiegħda fuq il-​lemin tat-​tron t’Alla.” Ġesù qatt ma naqas milli jara “l-​ferħ li tqiegħed quddiemu.”

¹⁹ Liema ferħ tqiegħed quddiem Ġesù? Hu kien jaf li billi jissaporti, kien se jikkontribwixxi għas-​santifikazzjoni taʼ l-​isem qaddis taʼ Ġeħova. Kien se jipprovdi l-​akbar prova possibbli li Satana huwa giddieb. Ebda tama ma setgħet tagħti lil Ġesù ferħ akbar! Kien jaf ukoll li Ġeħova kien se jippremja bil-​kbir il-​ħajja leali tiegħu—li eżatt quddiemu kien hemm żmien meraviljuż meta kien se jerġaʼ jingħaqad maʼ Missieru. Ġesù żamm din it-​tama sabiħa f’moħħu matul l-​iktar żminijiet koroh. Aħna rridu nagħmlu l-​istess. Aħna wkoll għandna ferħ quddiemna. Ġeħova jagħti d-​dinjità lil kull wieħed minna li għandu l-​privileġġ li jgħin biex jitqaddes l-​isem kbir tiegħu. Nistgħu nagħtu prova li Satana huwa giddieb billi nagħżlu lil Ġeħova bħala s-​Sovran tagħna u nżommu ruħna fis-​sigurtà fl-​imħabba taʼ Missierna jkunu xi jkunu l-​provi u t-​tentazzjonijiet li nistgħu niffaċċjaw.

20. X’jistaʼ jgħinek tibqaʼ taħseb b’mod pożittiv u mimli tama?

²⁰ Ġeħova m’huwiex biss lest li jippremja lill-​qaddejja leali tiegħu—hu ħerqan li jagħmel dan. (Isaija 30:18; Malakija 3:10) Hu jitgħaxxaq f’li jagħti lill-​qaddejja tiegħu x-​xewqat xierqa taʼ qalbhom. (Salm 37:4) Għalhekk, żomm moħħok iffokat b’mod sod fuq it-​tama li hemm quddiemek. Qatt iċċedi għall-​mod taʼ ħsieb negattiv, baxx, u mgħawweġ tad-​dinja qadima taʼ Satana. Jekk tħoss li l-​ispirtu taʼ din id-​dinja dieħel bil-​mod il-​mod f’moħħok jew f’qalbek, itlob bil-​ħerqa lil Ġeħova għall-​“paċi t’Alla li tisboq kull ħsieb.” Din il-​paċi mogħtija minn Alla se tgħassislek lil qalbek u l-​qawwiet mentali tiegħek.—Filippin 4:6, 7.

21, 22. (a) Liema tama glorjuża jgħożżu dawk tal-​“folla l-​kbira”? (b) Liema parti mit-​tama Kristjana hija l-​iktar speċjali għalik, u x’inhi d-​determinazzjoni tiegħek?

²¹ X’tama eċċitanti għandek biex taħseb dwarha! Jekk int parti mill-​“folla l-​kbira,” li se toħroġ “mit-​tribulazzjoni l-​kbira,” aħseb dwar il-​ħajja li dalwaqt se tgawdi. (Rivelazzjoni 7:9, 14) Minħabba li Satana u d-​demonji tiegħu mhux se jibqgħu mas-​saqajn, se tħoss serħan li issa jistaʼ jkun diffiċli biex timmaġinah. Wara kollox, min minna qatt esperjenza l-​ħajja mingħajr il-​pressjoni taʼ l-​influwenza ħażina taʼ Satana? Mingħajr din il-​pressjoni, kemm se jkun taʼ ferħ li naħdmu biex inbiddlu l-​art f’ġenna taħt id-​direzzjoni taʼ Ġesù u l-​144,000 li se jaħkmu miegħu fis-​sema! Kemm nifirħu bil-​prospett li naraw il-​mard kollu eliminat, li nilqgħu lura l-​maħbubin mejtin tagħna mill-​qabar, li ngħixu bil-​mod kif Alla riedna ngħixu! Aħna u resqin lejn il-​perfezzjoni, saħansitra barka akbar se tersaq iktar u iktar viċin, il-​wegħda mniżżla f’Rumani 8:21—“il-​libertà glorjuża taʼ wlied Alla.”

²² Ġeħova jridek tikseb ammont taʼ libertà akbar milli qatt tistaʼ timmaġina. L-​ubbidjenza hija t-​triq li twassal għal din il-​libertà. Ma jistħoqqilhiex kull sforz li tistaʼ tagħmel issa biex tobdi lil Ġeħova jum wara jum? Għalhekk, agħmel l-​almu tiegħek biex tibqaʼ tibni lilek innifsek fuq il-​fidi l-​iktar qaddisa tiegħek, sabiex tkun tistaʼ tibqaʼ fl-​imħabba t’Alla għall-​eternità kollha!

[Nota taʼ taħt]

[Stampa f’paġna 201]

Il-​ġisem taʼ ġinnasta jitħarreġ bl-​użu