Ħelsien Qrib Għal Nies taʼ Devozzjoni Lejn Alla!

“Jehovah jaf kif jeħles lil nies taʼ devozzjoni lejn Alla ’l barra mit-​tiġrib, imma jirriserva lil nies mingħajr tjieba għal jum il-​ġudizzju biex jiġu maqtugħin.”—2 PIETRU 2:9.

1. (a) Liema kundizzjonijiet taʼ niket jiffaċċjaw lill-​umanità fi żmienna? (b) Minħabba dan, x’mistoqsijiet se nikkunsidraw?

PROBLEMI tal-​ħajja qed jiżdiedu għall-​umanità kollha. Dan hu veru kemm jekk wieħed igħix fejn l-​affarijiet materjali huma kotrana jew fejn huma skarsi. In-​nuqqas taʼ sigurtà teżisti kullimkien. Bħal li kieku kundizzjonijiet ekonomiċi mhux stabbli m’humiex biżżejjed biex joħolqu tħassib, problemi serji tal-​ambjent qed jattakkaw lill-​pjaneta Art, billi jhedhdu l-​ħajja kollha taʼ fuqha. Il-​mard dejjem jiżdied. Mard li jittieħed, mard tal-​qalb, u l-​misħut kanċer qed jagħmlu tagħhom. L-​immoralità ħarbtet l-​emozzjonijiet umani u l-​ħajja tal-​familja. Minbarra dan kollu, id-​dinja hija mgħaddsa fil-​vjolenza. Minħabba dak li qed tiffaċċja s-​soċjetà umana, aħna b’mod rejalistiku nistaqsu: Hemm bażi soda biex nistennew ħelsien bikri? Jekk iva, kif se jiġi, u għal min?—Qabbel Ħabakkuk 1:2; 2:1-3.

2, 3. (a) Għala nsibuh taʼ serħan il-​moħħ aħna llum dak li ntqal fit-​2 Pietru 2:9? (b) Lejn liema atti speċifiċi taʼ ħelsien tipponta l-​Bibbja bħala bażi taʼ nkuraġġiment?

² Dak li qed jiġri fi zmienna jfakkarna f’ċerti zminijiet oħra bil-​wisq sinjifikanti fl-​istorja umana. L-​appostlu Pietru jiġbed l-​attenzjoni lejn l-​atti taʼ ħelsien li Alla wettaq f’dawk l-​okkażjonijiet u mbagħad jasal għal din il-​konklużjoni taʼ serħan il-​moħħ: “Jehovah jaf kif jeħles lil nies taʼ devozzjoni lejn Alla ’l barra mit-​tiġrib.” (2 Pietru 2:9) Innota l-​kuntest taʼ dik l-​istqarrija, fit-​2 Pietru 2:4-10:

³ “Ċertament jekk Alla ma żammx lura milli jikkastiga lill-​anġli li dinbu, imma, billi tefagħhom ġewwa Tartarus, telaqhom f’ħofor taʼ dlam ċappa biex ikunu riservati għall-​ġudizzju; u ma żammx lura milli jikkastiga dinja tal-​qedem, imma żamm lil Noè, predikatur tat-​tjieba, qawwi u sħiħ flimkien maʼ sebgħa oħra meta ġieb dulluvju fuq dinja taʼ nies mingħajr Alla. u billi rriduċa lill-​ibliet taʼ Sodom u Gomorra għal irmied hu kkundannahom, billi qiegħed mudell tal-​affarijiet li ġejjin għal nies taʼ mingħajr Alla; u ħeles lit-​twajjeb Lot, li kien imnikket ferm bit-​tfigħ bla rażan tan-​nies li jisfidaw il-​liġi f’kondotta laxka—għax dak ir-​raġel twajjeb b’dak li ra u samaʼ waqt li għammar fosthom minn jum għal jum kien qed jitturmenta lir-​ruħ twajba tiegħu minħabba l-​egħmejjel taʼ bla liġi tagħhom—Jehovah jaf kif jeħles lil nies taʼ devozzjoni lejn Alla ’l barra mit-​tiġrib, imma jirriserva lil nies taʼ mingħajr tjieba għal jum il-​ġudizzju biex jiġu maqtugħin, speċjalment, madankollu, dawk li jmorru wara l-​laħam bix-​xewqa li jniġġsuh u li jmaqdru l-​ħakma.” Bħalma juru dawk l-​iskritturi, dak li seħħ fi żmien Noè u fi żmien Lot hu mimli b’tifsir għalina.

L-​Ispirtu Prevalenti fi Żmien Noè

4. Fi żmien Noè, Alla għala ħares lejn l-​art bħala li kienet irrovinata? (Salm 11:5)

⁴ Ir-​rakkont storiku f’Ġenesi kapitlu 6 jinfurmana li fi zmien Noè l-​art kienet saret rovina fil-​ħarsa tal-​veru Alla. Għala? Minħabba l-​vjolenza. Din ma kinetx kwistjoni taʼ każi iżolati taʼ vjolenza kriminali. Ġenesi 6:11 jirrapporta li “l-​art saret mimlija bil-​vjolenza.”

5. (a) Liema attitudni min-​naħa tal-​bnedmin ikkontribwiet għall-​vjolenza taʼ żmien Noè? (b) Enok x’kien wissa rigward l-​indifferenza lejn Alla?

⁵ X’kien hemm warajha? L-​iskrittura kkwotata mit-​2 Pietru tirreferi għal nies taʼ mingħajr Alla. Iva, spirtu taʼ indifferenza lejn Alla kien prevalenti fil-​ħajja umana. Dan kien jinvolvi mhux sempliċement ksur ġenerali tal-​liġi divina imma wkoll attitudni taʼ sfida lejn Alla nnifsu.a U meta bnedmin jisfidaw lil Alla, kif tistaʼ tistenna li se jittrattaw b’qalb tajba maʼ bnedmin sħabhom? Diġà qabel it-​twelid taʼ Noè, din l-​indifferenza lejn Alla tant kienet kbira li Jehovah kien ġiegħel lil Enok jipprofetizza rigward x’kien se jiġri. (Ġuda 14, 15) L-​isfidar tagħhom lil Alla ċertament li kien se jġib esekuzzjoni taʼ ġudizzu divin.

6, 7. Liema sitwazzjoni li tinvolvi l-​anġli kienet fattur ewlieni fil-​kundizzjonijiet ħżiena li żviluppaw qabel il-​Għarqa?

⁶ Kien hemm ukoll influwenza oħra li kkontribwiet għall-​vjolenza taʼ dak iż-​żmien. Ġenesi 6:1, 2 jiġbed l-​attenzjoni lejha meta jgħid: “Issa ġara li meta l-​bnedmin bdew jiżdiedu fil-​għadd fuq wiċċ l-​art u wlied bniet bdew jitwildulhom, imbagħad ulied il-​veru Alla bdew jinnotaw lill-​ulied bniet tal-​bnedmin, li dawn kienu sbieħ; u bdew jieħdu nisa għalihom infushom, jiġifieri, dawk kollha li għażlu.” Min kienu dawn ulied il-​veru Alla? Mhux sempliċi bnedmin. Irġiel għal sekli sħaħ kienu qed jinnotaw lil nisa sbieħ u jiżżewġuhom. Dawn ulied Alla kienu anġli li mmaterjalizzaw. F’Ġuda 6, huma deskritti bħala “anġli li ma żammewx il-​pożizzjoni oriġinali tagħhom imma abbandunaw il-​post xieraq tagħhom fejn igħammru.”−Qabbel 1 Pietru 3:19, 20.

⁷ Meta dawn il-​ħlejjaq superumani li mmaterjalizzaw bħala rġiel kellhom relazzjonijiet mal-​bniet tal-​bnedmin, x’kien ir-​riżultat? “In-​Nefilim urew li kienu fl-​art f’dawk il-​jiem, u wkoll wara dan, meta wlied il-​veru Alla komplew ikollhom x’jaqsmu mal-​ulied bniet tal-​bnedmin u dawn welldu subien għalihom, huma kienu l-​uħud setgħana tal-​qedem, l-​irġiel taʼ fama.” Iva, in-​nisel taʼ dik il-​għaqda mhix naturali kien in-​Nefilim, uħud setgħana li wżaw il-​qawwa superjuri tagħhom biex jisfidaw lil oħrajn.—Ġenesi 6:4.

8. Jehovah kif irreaġixxa għall-​kundizzjonijiet ħżiena fuq l-​art?

⁸ Is-​sitwazzjoni kemm saret ħażina? Waslet sal-​punt li “Jehovah ra li l-​ħażen tal-​bniedem kien kotran fl-​art u kull xaqliba tal-​ħsibijiet taʼ qalbu kienet biss ħażina l-​ħin kollu.” Alla kif irreaġixxa għal dan? “Jehovah ħassu ddispjaċut li kien għamel lill-​bnedmin fl-​art, u ħassu mweġġaʼ f’qalbu.” Dan ma jfissirx li Alla ħass li kien għamel żball meta ħalaq l-​umanità. Minflok, hu ddispjaċih li wara li kien għamel il-​bnedmin, il-​kondotta tagħhom saret tant mill-​agħar li hu kien obbligat li jeqridhom.—Ġenesi 6:5-7.

Il-​Korsa li Wasslet Għall-​Ħelsien

9. (a) Alla għala tratta b’mod favorevoli maʼ Noè? (b) Liema informazzjoni bil-​quddiem ta Alla lil Noè?

⁹ Inkwantu għal Noè, hu “sab favur f’għajnejn Jehovah. . . . Noè kien raġel twajjeb. Hu wera li kien bla ħtija fost in-​nies taʼ żmienu. Noè mexa mal-​veru Alla.” (Ġenesi 6:8, 9) Mela Jehovah ta lil Noè twissija bil-​quddiem li Hu kien se jġib dulluvju globali u kkmandah biex jibni arka. L-​umanità kollha, minbarra Noè u l-​familja tiegħu, kienet se tiġi miknusa minn fuq wiċċ l-​art. Saħansitra l-​annimali kienu se jiġu meqrudin, minbarra dawk il-​ftit li jirrappreżentaw kull għamla bażika li Noè kellu jdaħħal ġewwa l-​arka.—Ġenesi 6:13, 14, 17.

10. (a) Xi preparazzjoni riedet issir bil-​ħsieb li jibqgħu ħajjin, u kemm kienet biċċa xogħol kbira? (b) X’inhu notevoli rigward il-​mod kif Noè ħa ħsieb l-​inkarigu tiegħu?

¹⁰ Dan il-​għarfien bil-​quddiem poġġa responsabbiltà tqila fuq Noè. L-​arka trid tinbena. Kellha tiġi mogħtija l-​forma taʼ kaxxa, xi 1,400,000 pied kubu fil-​volum totali. Noè kellu jimlieha bl-​ikel u mbagħad jiġbor annimali u agħsafar, “kull xorta taʼ laħam,” biex jiġu ppreservati. Kien proġett li kellu jinvolvi snin taʼ xogħol. Noè kif wieġeb? Hu “ssokta jagħmel skond dak kollu li Alla kien ikkmandah. Għamel preċiż hekk.”−Ġenesi 6:14-16, 19-22; Ebrej 11:7.

11. Rigward in-​nies taʼ daru stess, x’responsabbiltà vitali waqgħet fuq Noè?

¹¹ Fil-​waqt li kien jagħmel dak ix-​xogħol, Noè ried jiddedika wkoll ħin biex jibni l-​ispiritwalità tan-​nies taʼ daru. Huma kellhom bżonn li jiġu mħarsin milli jaddottaw il-​modi vjolenti u l-​attitudni taʼ sfida tan-​nies taʼ madwarhom. Kien importanti li huma ma jsirux involuti żżejjed fl-​affarijiet tal-​ħajja taʼ kuljum. Alla kellu xogħol għalihom x’jagħmlu, u kien vitali li huma jibnu l-​ħajjiet tagħhom madwaru. Nafu li l-​familja taʼ Noè aċċettat id-​direzzjoni tiegħu u kellhom l-​istess fidi bħalu għaliex Noè, martu, it-​tliet subien tagħhom, u n-​nisa taʼ wliedhom—tmien persuni b’kollox—jiġu msemmijin b’approvazzjoni fl-​Iskrittura.—Ġenesi 6:18; 1 Pietru 3:20.

12. Kif muri fit-​2 Pietru 2:5, x’responsabbiltà wettaq Noè bil-​fedeltà?

¹² Noè kellu wkoll responsabbiltà oħra—biex iwissi dwar id-​Dulluvju li kien ġej u biex igħarrafhom għala kien ġej. Huwa evidenti li hu wettaq bil-​fedeltà dik ir-​responsabbiltà, għax fil-​Kelma t’Alla huwa rreferut bħala “predikatur tat-​tjieba.”−2 Pietru 2:5.

13. X’kundizzjonijiet iffaċċjaw lil Noè hekk kif ħa ħsieb l-​inkarigu li kien tah Alla?

¹³ Issa aħseb ftit dwar iċ-​ċirkostanzi li fihom Noè wettaq dak l-​inkarigu. Poġġi lilek innifsek fil-​pożizzjoni tiegħu. Li kieku int kont Noè jew xi membru tal-​familja tiegħu, kont tkun imdawwar bil-​vjolenza li kienet issir min-​Nefilim u minn bnedmin taʼ mingħajr Alla. Kont tkun iffaċċjat direttament mill-​influwenza taʼ anġli ribellużi. Hekk kif tkun qed taħdem fuq l-​arka, kont tkun imwaqqaʼ għaċ-​ċajt. U sena wara l-​oħra hekk kif twissi dwar id-​Dulluvju li ġej, kont issib li n-​nies tant kienu mhedijin fl-​affarijiet tal-​ħajja taʼ kuljum li “ma tawx kas”—jiġifieri—“sakemm ġie d-​dulluvju u kinishom ilkoll.”−Mattew 24:39; Luqa 17:26, 27.

Xi Tfisser Għalik l-​Esperjenza taʼ Noè?

14. Aħna llum għala ma nsibuhiex diffiċli biex nifhmu s-​sitwazzjoni li ffaċċjat lil Noè u lill-​familja tiegħu?

¹⁴ Sitwazzjoni bħal din mhix diffiċli għall-​biċċa l-​kbira mill-​qarrejja tagħna biex jimmaġinawha. Għala le? Għaliex il-​kundizzjonijiet fi żmienna huma simili ħafna għal dawk li kienu jeżistu fi żmien Noè. Ġesù Kristu qal li dan kellu jkun mistenni. Fil-​profezija kbira tiegħu dwar iż-​żmien tal-​preżenza tiegħu matul il-​konklużjoni tas-​sistema taʼ affarijiet, Ġesù ħabbar: “Bħalma kienu jiem Noè, hekk se tkun il-​preżenza taʼ Bin il-​bniedem.”−Mattew 24:37.

15, 16. (a) Kif inhu veru, bħal fi żmien Noè, li l-​art illum hi mimlija bil-​vjolenza? (b) Għal liema vjolenza b’mod partikulari ġew issuġġettati l-​qaddejja taʼ Jehovah?

¹⁵ Veru li ġara hekk? Hija d-​dinja llum mimlija bil-​vjolenza? Iva! ’Il fuq minn mitt miljun ruħ mietu fi gwerer f’dan is-​seklu. Xi wħud mill-​qarrejja tagħna ħassew direttament l-​effett taʼ dan. Jerġaʼ iżjed nies ġew mhedhdin minn kriminali li riedu jeħdulhom flushom jew affarijiet oħra taʼ valur. U ż-​żgħażagħ ġew esponuti għall-​vjolenza fl-​iskola.

¹⁶ Madankollu, l-​qaddejja taʼ Jehovah iġarrbu iżjed minbarra t-​tħarbit tal-​gwerer u l-​vjolenza kriminali inġenerali. Huma jiġu wkoll suġġetti għall-​vjolenza għaliex m’humiex parti mid-​dinja imma jippruvaw ikunu nies taʼ devozzjoni lejn Alla. (2 Timotew 3:10-12) Xi drabi dik il-​vjolenza sempliċement tieħu l-​għamla taʼ mbuttar jew daqqiet; xi drabi oħra tinvolvi qerda taʼ propjetà, swat krudili, u saħansitra qtil.—Mattew 24:9.

17. Huwa n-​nuqqas taʼ tjieba kbir illum? Spjega.

¹⁷ Waqt li jieħdu sehem fi vjolenza bħal din, nies taʼ mingħajr Alla, xi drabi, ddikjaraw b’mod sfaċċat l-​istmerrija tagħhom lejn Alla. F’post fl-​Afrika, l-​pulizija ddikjaraw: “Il-​gvern huwa tagħna. Intom morru għand Alla, jekk hemm Alla, u għidulu biex jiġi jgħinkom.” F’ħabsijiet u f’kampijiet taʼ konċentrament, ix-​Xhieda taʼ Jehovah ġew iffaċċjati minn irġiel bħal Baranowsky f’Sachsenhausen, il-​Ġermanja, li sfida: “Jien qbadt ġlieda maʼ Jehovah. Naraw min hu l-​iżjed b’saħħtu, Jien jew Jehovah.” Ftit wara, Baranowsky marad u miet; imma oħrajn jibqgħu juru attitudni simili. Uffiċjali li jagħtuha għal kruċjata taʼ persekuzzjoni m’humiex l-​uniċi li jisfidaw lil Alla. Mad-​dinja kollha, qaddejja t’Alla jisimgħu u jaraw affarijiet li jagħtu evidenza li dawk li jieħdu sehem fihom m’għandhom l-​ebda biżaʼ t’Alla fi qlubhom.

18. L-​ispirti mill-​agħar b’liema modi qed jikkontribwixxu lejn l-​istat aġitat tal-​umanità?

¹⁸ F’dawn iż-​żminijiet li tant huma bħaż-​żminijiet taʼ Noè, aħna nixhdu wkoll indħil minn spirti mill-​agħar. (Rivelazzjoni 12:7-9) Dawn id-​demonji huma l-​istess anġli li mmaterjalizzaw bħala bnedmin u żżewġu nisa fi żmien Noè. Meta ġie d-​dulluvju, in-​nisa u t-​tfal tagħhom inqerdu, imma dawk l-​anġli diżubbidjenti ġew imġegħlin imorru lura fil-​qasam tal-​ispirti. Huma ma kienx għad baqgħalhom post fl-​organizzazzjoni qaddisa taʼ Jehovah imma ġew mitfugħin f’Tartarus kundizzjoni taʼ dlam ċappa, maqtugħin minn dawl divin. (2 Pietru 2:4, 5) Billi jaħdmu taħt id-​direzzjoni taʼ Satana, huma komplew iżommu kuntatt mill-​qrib mal-​bnedmin u għalkemm m’għadhomx jistgħu jimmaterjalizzaw, jippruvaw jikkontrollaw irġiel, nisa, u saħansitra tfal. Ftit minn dan isir permezz taʼ prattiċi tal-​okkult. Huma jqajmu wkoll lill-​bnedmin biex jeqirdu lil xulxin f’modi li jisbqu lir-​raġuni umana. Imma dak mhux kollox.

19. (a) Id-​demonji kontra min b’mod partikulari jidderieġu l-​mibgħeda tagħhom? (b) Id-​demonji x’qed jippruvaw iġegħluna nagħmlu?

¹⁹ Il-​Bibbja tirrivela li d-​demonji qed iqajmu gwerra kontra dawk “li jħarsu l-​kmandamenti t’Alla u li għandhom ix-​xogħol taʼ li jagħtu xiehda dwar Ġesù.” (Rivelazzjoni 12:12, 17) Dawk l-​ispirti mill-​agħar huma x-​xewwiexa ewlenin li jaqilgħu l-​persekuzzjoni tal-​qaddejja taʼ Jehovah. (Efesin 6:10-13) Huma jużaw kull mezz immaġinabbli biex iġiegħlu jew iħajru bnedmin lejali biex jiksru l-​integrità lejn Jehovah u jieqfu milli jxandru s-​Saltna taʼ Jehovah b’Ġesù bħala s-​Sultan Messjaniku.

20. Id-​demonji kif jippruvaw ifixklu lin-​nies milli jinħelsu mill-​kontroll tagħhom? (Ġakbu 4:7)

²⁰ Id-​demonji jippruvaw ifixklu lin-​nies li jixxennqu għal serħan mill-​influwenza oppressiva tagħhom. Waħda li qabel kienet spiritista fil-​Brażil tirrapporta li meta x-​Xhieda ġew għandha, ilħna demoniċi ordnawlha biex ma tiftaħx il-​bieb; imma hi fetħet, u tgħallmet il-​verità. F’ħafna nħawi d-​demonji direttament jużaw lil dawk li jipprattikaw il-​maġija biex jippruvaw iwaqqfu x-​xogħol tax-​Xhieda taʼ Jehovah. Per eżempju, f’raħal f’Suriname, nies li jopponu lix-​Xhieda taʼ Jehovah ikkuntattjaw wieħed spiritista li kien magħruf ħafna u li setaʼ jikkaġuna l-​mewt f’daqqa tan-​nies billi sempliċement jipponta l-​ħatar maġiku tiegħu lejhom. Bil-​grupp tiegħu taʼ żeffiena u daqqaqa tat-​tnabar, l-​ispiritista, ippussessat minn demonju, iffaċċja lix-​Xhieda taʼ Jehovah. Hu lissen il-​kliem maġiku tiegħu u pponta l-​ħatar lejhom. In-​nies tar-​raħal stennew li x-​Xhieda jaqaw mejtin mal-​art, imma kien l-​ispiritista li ħassu ħażin u kellu jinġarr lil hemm malajr minn dawk li kienu jżommu miegħu u li ħassewhom imbarazzati ħafna.

21. Bħal fi żmien Noè, il-​maġġoranza tan-​nies kif jirreaġixxu għall-​ippridkar tagħna, u għala?

²¹ Saħansitra fi nħawi fejn il-​maġija u s-​seħer ma jiġux ipprattikati daqshekk bil-​miftuħ, kull Xhud taʼ Jehovah ġarrab xi jfisser li tipprova tippriedka lil nies li tant huma nvoluti fl-​affarijiet tal-​ħajja taʼ kuljum u li ma jridux joqogħdu jħabblu rashom. Bħalma kien fi żmien Noè, l-​biċċa l-​kbira tan-​nies ‘ma jagħtux kas.’ (Mattew 24:37-39) Xi wħud forsi jammiraw il-​għaqda u s-​suċċess tagħna. Imma x-​xogħol tagħna taʼ bini spiritwali—li jinvolvi sigħat taʼ studju persunali, attendenza regulari għal-​laqgħat, u servizz tal-​għalqa—hu kollu bluha għalihom. Huma jirredikolaw il-​fiduċja tagħna fil-​wegħdiet tal-​Kelma t’Alla għaliex il-​ħajjiet tagħhom huma ċċentrati fuq l-​affarijiet materjali u l-​pjaċiri senswali li jistaʼ jkollhom issa.

22, 23. Il-​ġrajjiet taʼ żmien Noè kif jagħtu ċertezza soda li Jehovah se jeħles lil nies taʼ devozzjoni lejn Alla mit-​tiġrib?

²² Il-​qaddejja lejali taʼ Jehovah għal dejjem se jibqgħu jiġu ssuġġettati għall-​abbuż minn dawk li m’għandhomx imħabba lejn Alla? Bl-​ebda mod! X’ġara fi żmien Noè? Bid-​direzzjoni t’Alla, Noè u l-​familja tiegħu daħlu ġewwa l-​arka mlestija. Imbagħad, fiż-​żmien speċifikat minn Alla, “l-​għejjun kollha tal-​fond vast bl-​ilma nkisru beraħ u r-​rixtelli tal-​għarar tas-​smewwiet infetħu.” Id-​Dulluvju baqaʼ sejjer sakemm saħansitra l-​muntanji nksew. (Ġenesi 7:11, 17-20) L-​anġli li kienu abbandunaw il-​post xieraq tagħhom fejn joqogħdu ġew imġegħlin jitilqu l-​iġsma umani u mmaterjalizzati tagħhom u jmorru lura lejn il-​qasam tal-​ispirti. In-​Nefilim u dawk kollha li kien baqaʼ minn dik id-​dinja taʼ nies taʼ mingħajr Alla, inklużi dawk li kienu wisq indifferenti biex jaġixxu fuq it-​twissija taʼ Noè, ġew meqrudin. Mill-​banda l-​oħra, Noè u martu u t-​tlett itfal subien tagħhom u n-​nisa taʼ wliedhom ġew salvati. B’hekk Jehovah ħeles lil Noè u l-​familja tiegħu mit-​tiġrib li kienu ssaportew bil-​lejaltà għal tant snin.

²³ Se jagħmel Jehovah l-​istess għal nies taʼ devozzjoni lejn Alla llum? Ma hemm assolutament ebda dubju dwar dan. Hu wiegħdu, u hu ma jistax jigdeb.—Titus 1:2; 2 Pietru 3:5-7.

[Nota taʼ taħt]

Ħejji Għal Ħelsien Ġewwa Dinja Ġdida

“Ftakar f’mart Lot.”—LUQA 17:32.

1. Liema eżempju storiku taʼ ħelsien divin tenfasizza l-​lezzjoni tagħna llum, u kif tistaʼ tkun taʼ benefiċċju għalina?

WARA li tkellem dwar il-​ħelsien meraviljuż li Jehovah wettaq għan-​nom taʼ Noè u l-​familja tiegħu, l-​appostlu Pietru semma eżempju storiku ieħor. Hu ġibed l-​attenzjoni lejn il-​preservazzjoni tat-​twajjeb Lot meta Sodom u Gomorra nġabu rmied, kif naqraw fit-​2 Pietru 2:6-8. Id-​dettalji ġew ippreservati għall-​benefiċċju tagħna. (Rumani 15:4) Li ndaħħlu f’qalbna dak li ġara f’konnessjoni maʼ dak il-​ħelsien jistaʼ jgħin biex aħna niġu ppreservati għal ġod-​dinja ġdida t’Alla.

Kif Nirreaġixxu għall-​Mod taʼ Ħajja tad-​Dinja

2. Liema kondotta f’Sodom u Gomorra wasslet għall-​qerda tagħhom minn Alla?

² Dawk l-​ibliet u l-​abitanti tagħhom għala ġew meqrudin? L-​appostlu Pietru jsemmi waqgħa f’“kondotta laxka.” (2 Pietru 2:7) Kif indikat mill-​użu tat-​termini Griega li minnha tiġi tradotta dik l-​espressjoni, in-​nies taʼ Sodom u Gomorra ħadu sehem f’atti taʼ ħażen f’manjiera li wriet nuqqas sfaċċat taʼ rispett, saħansitra stmerrija, lejn il-​liġi u lejn l-​awtorità. Ġuda 7 igħid li huma “żnew b’mod eċċessiv u telqu wara l-​laħam għal użu mhux naturali.” Il-​ħażen kbir tal-​kondotta tagħhom intwera meta l-​irġiel taʼ Sodom, “minn tifel sa raġel xiħ, in-​nies kollha f’marmalja waħda,” dawru d-​dar taʼ Lot u riedu li hu jagħti l-​mistednin tiegħu lill-​irġiel taʼ Sodom biex dawn ipaxxu l-​aptiti perverti tagħhom. U huma għajtu tgħajjir lil Lot għaliex hu rreżista għax-​xewqat baxxi tagħhom.—Ġenesi 13:13; 19:4, 5, 9.

3. (a) Lot u l-​familja tiegħu kif spiċċaw igħixu f’ambjent daqstant korrott bħal Sodom? (b) X’kienet ir-​reazzjoni taʼ Lot għall-​kondotta laxka tan-​nies f’Sodom?

³ Lot kien oriġinalment mar igħix fl-​inħawi taʼ ħdejn Sodom minħabba l-​potenzjal tagħhom għal prosperità materjali. Maż-​żmien, hu mar igħix fil-​belt infisha. (Ġenesi 13:8-12; 14:12; 19:1) Imma hu ma kienx jaqbel mal-​prattiċi oxxeni tal-​irġiel tal-​belt, u dawk l-​irġiel ma kinux iqisuh bħala wieħed minnhom, milli jidher għaliex Lot u l-​familja tiegħu ma kinux jieħdu seħem magħhom fil-​ħajja soċjali tagħhom. Kif igħid it-​2 Pietru 2:7, 8: “Lot . . . kien imnikket ferm bit-​tfigħ bla rażan tan-​nies li jisfidaw il-​liġi f’kondotta laxka—għax dak ir-​raġel twajjeb b’dak li ra u samaʼ waqt li għammar fosthom minn jum għal jum kien qed jitturmenta lir-​ruħ twajba tiegħu minħabba l-​egħmejjel taʼ bla liġi tagħhom.” Dawk il-​kundizzjonijiet iffurmaw prova ħarxa għal Lot għaliex, bħala raġel twajjeb, hu kien jistmerr kondotta bħal dik.

4. (a) B’liema mod il-​kundizzjonijiet illum huma bħal dawk f’Sodom tal-​qedem? (b) Jekk aħna bħat-​twajjeb Lot, kif nirreaġixxu għall-​kundizzjonijiet korrotti preżenti?

⁴ Fi żmienna wkoll, il-​livell morali tas-​soċjetà umana therra. F’ħafna artijiet, iktar u iktar nies jieħdu sehem f’sess qabel jew barra miż-​żwieġ. Saħansitra ħafna żgħażagħ fl-​iskola huma involuti fil-​fond f’dan il-​mod taʼ ħajja, u huma jirredikolaw lil dawk li ma jingħaqdux magħhom. L-​omossesswali bla tlaqliq jidentifikaw lilhom infushom u jimmarċjaw mat-​toroq taʼ bliet kbar biex jiġu rikonoxxoti. Il-​kleru ngħaqad fix-​xalar. Uffiċċjalment, mhux ħafna knejjes jordnaw omosesswali u żienja magħrufin. Madankollu, fil-​fatt, kif urew ripetutament rapporti tal-​gazzetti, m’hu xejn diffiċli biex issib omosesswali, żienja, u adulteri fost il-​kleru. Fil-​fatt, xi mexxejja reliġjużi ġew ittrasferiti lejn bliet oħra jew ġew saħansitra mġegħlin jirriżenjaw minħabba skandli taʼ sess. Dawk li jħobbu t-​tjieba ma jissimpatizzawx maʼ ħażen bħal dan; huma ‘abborrew dak li hu ħażin.’ (Rumani 12:9) Huma jitnikktu b’mod speċjali meta l-​kondotta taʼ nies li jgħidu li qed jaqdu ’l Alla ġġib tmaqdir fuq ismu u ġġiegħel lil nies li m’humiex infurmati tajjeb li jitbiegħdu ddiżgustati minn kull reliġjon.—Rumani 2:24.

5. Il-​qerda taʼ Sodom u Gomorra mingħand Jehovah x’mistoqsija twieġeb għalina?

⁵ Sena wara sena s-​sitwazzjoni tmur għall-​agħar. Se jkun hemm tmiem għal dan? Iva, se jkun hemm! Dak li Jehovah għamel lil Sodom u Gomorra tal-​qedem juri b’mod ċar li, fiż-​żmien maħtur tiegħu, hu se jesegwixxi ġudizzju. Hu se jeqred għalkollox lill-​ħżiena, imma se jeħles lill-​qaddejja lejali tiegħu.

Min jew Liema Ħaġa Tiġi l-​Ewwel fil-​Ħajja?

6. (a) X’lezzjoni f’waqtha hemm fir-​rakkont dwar l-​irġiel żgħażagħ li kellhom jiżżewġu lill-​bniet taʼ Lot? (b) L-​attitudni tal-​imseħbin prospettivi tagħhom kif ippruvat lill-​bniet taʼ Lot?

⁶ Dawk biss li juru devozzjoni vera lejn Alla se jiġu meħlusin. F’dan ir-​rigward, ikkunsidra x’qalu l-​anġli taʼ Jehovah lil Lot qabel Sodom u Gomorra ġew meqrudin. “Għandek lil xi ħadd ieħor hawn? Ħaten u wliedek subien u bniet u dawk kollha li huma tiegħek fil-​belt, oħroġhom mill-​post! Għax se nġibu l-​post f’rovina.” Mela Lot kellem lill-​irġiel żgħażagħ li kellhom jiżżewġu lill-​bniet tiegħu. Heġġiġhom b’mod ripetut: “Qumu! Oħorġu minn dan il-​post, għaliex Jehovah se jġib il-​belt rovina!” Ir-​relazzjoni tagħhom man-​nies tad-​dar taʼ Lot ipprovditilhom opportunità speċjali għall-​ħelsien, imma huma personalment riedu jieħdu azzjoni. Riedu jagħtu prova konkreta taʼ ubbidjenza lejn Jehovah. Minflok, f’għajnejhom Lot “deher qisu raġel li kien qed jiċċajta.” (Ġenesi 19:12-14) Tistaʼ timmaġina kif ħassewhom il-​bniet taʼ Lot meta saru jafu x’kien ġara. Dan poġġa l-​lejaltà tagħhom lejn Alla taħt prova.

7, 8. (a) Meta l-​anġli ħeġġew lil Lot biex jieħu l-​familja tiegħu u jaħrab, hu kif irreaġixxa, u dan għala ma kienx għaqli? (b) Biex jinħelsu, x’kien vitali għal Lot u l-​familja tiegħu?

⁷ L-​għada fil-​għodu fi tlugħ ix-​xemx, l-​anġli bdew ikunu urġenti maʼ Lot. Qalu: “Qum! Ħu lil martek u lill-​ulied bniet tiegħek li jinsabu hawn, minħabba l-​biżaʼ li int tiġi miknus fl-​iżball tal-​belt!” Imma “hu qagħad jitnikker.” (Ġenesi 19:15, 16) Għala? X’kien qed iżommu? Forsi l-​interessi materjali li kellu hemm f’Sodom—l-​istess ħaġa li kienet ħajritu biex imur f’dawn l-​inħawi fil-​bidu? Jekk se jibqaʼ mqabbad maʼ dawn, kien se jiġi meqrud maʼ Sodom.

⁸ B’mogħdrija, l-​anġli ħatfu lil dawk tal-​familja tiegħu minn idhom u għaġġluhom ’il barra mill-​belt. Fit-​tarf tal-​belt, l-​anġlu taʼ Jehovah ikkmanda: “Aħrab għal ruħek! Tħarisx warajk u tiqafx fid-​Distrett kollu! Aħrab lejn ir-​reġjun muntanjuż minħabba l-​biżaʼ li tiġi miknus!” Lot baqaʼ jaħsibha. Fl-​aħħar, wara li ftehmu li hu setaʼ jmur f’post li ma kienx daqshekk ’il bogħod, hu u l-​familja tiegħu ħarbu. (Ġenesi 19:17-22) Ma setax ikun hemm iktar dewmien; l-​ubbidjenza kienet vitali.

9, 10. (a) Li kienet maʼ żewġha għala ma kienx suffiċjenti biex jiżżgura l-​ħelsien għall-​mara taʼ Lot? (b) Meta nqatlet il-​mara taʼ Lot, liema prova oħra ġiet fuq Lot u l-​bniet tiegħu?

⁹ Madankollu, il-​ħelsien kien għadu mhux komplet meta telqu minn Sodom. Ġenesi 19:23-25 igħidilna: “Ix-​xemx kienet telgħet fuq l-​art meta Lot wasal Żoar. Imbagħad Jehovah għamel xita taʼ kubrit u nar mingħand Jehovah, mis-​smewwiet, fuq Sodom u fuq Gomorra. Mela mar ’il quddiem jegħleb lil dawn l-​ibliet, saħansitra d-​Distrett kollu kemm hu u lill-​abitanti kollha tal-​ibliet u lill-​pjanti tal-​art.” Imma fejn kienet mart Lot?

¹⁰ Hi kienet ħarbet maʼ żewġha. Madankollu, kienet fi qbil għalkollox maʼ dak li kien qed jagħmel? M’hemm xejn li jindika li hi b’xi mod approvat l-​immoralità taʼ Sodom. Imma kienet l-​imħabba tagħha lejn Alla iżjed qawwija mir-​rabta tagħha maʼ darha u mal-​affarijiet materjali li kellha hemm? (Qabbel Luqa 17:31, 32.) Taħt pressjoni, dak li kien hemm f’qalbha ħareġ fil-​beraħ. Milli jidher kienu diġà waslu ħdejn Żoar, forsi fil-​punt li jidħlu ġewwa l-​belt, meta hi b’mod diżubbidjenti daret u ħarset lura. U r-​rakkont tal-​Bibbja jgħid, “saret pilastru tal-​melħ.” (Ġenesi 19:26) Issa prova oħra taʼ lejaltà iffaċċjat lil Lot u lill-​bniet tiegħu. Kienet il-​ġibda taʼ Lot lejn martu li ġiet nieqsa jew is-​sentiment tat-​tfajliet għal ommhom li mietet iktar qawwija mill-​imħabba tagħhom lejn Jehovah, li kien ikkaġuna dan il-​gwaj? Kienu se jibqgħu jobdu lil Alla avolja xi ħadd qrib ħafna tagħhom wera nuqqas taʼ lejaltà lejh? B’fiduċja sħiħa f’Jehovah, huma ma ħarsux lura.

11. X’tgħallimna hawn dwar il-​ħelsien li jipprovdi Jehovah?

¹¹ Iva, Jehovah jaf kif jeħles lil nies taʼ devozzjoni lejn Alla mit-​tiġrib. Hu jaf kif jeħles familji sħaħ li huma magħqudin fil-​qima vera; hu jaf ukoll kif jeħles individwi. Meta huma verament iħobbuh, hu juri konsiderazzjoni kbira fil-​mod kif jittratta magħhom. “Hu nnifsu jaf tajjeb it-​tiswir tagħna, billi jiftakar li aħna trab.” (Salm 103:13, 14) Imma l-​ħelsien tiegħu hu biss għal dawk li huma nies taʼ devozzjoni lejn Alla, dawk li d-​devozzjoni tagħhom hija ġenwina, dawk li l-​ubbidjenza tagħhom hija espressjoni taʼ lejaltà.

Tħejjijiet taʼ Mħabba Għal Ħelsien Akbar

12. Xi tħejjijiet taʼ mħabba kien se jagħmel Jehovah qabel iġib il-​ħelsien li aħna tant nantiċipaw bil-​ħerqa?

¹² B’dak li kkaġuna fi żmien Noè u fi żmien Lot, Jehovah ma neħħiex il-​ħżiena kollha għal dejjem. Kif tgħid l-​Iskrittura, sempliċement stabbilixxa mudell tal-​affarijiet li jridu jiġu. Qabel kellhom jaslu dawk l-​affarijiet, Jehovah kellu ppjanat bil-​wisq iżjed li kellu f’moħħu x’jagħmel biex jibbenefikaw nies li jħobbuh. Hu kien se jibgħat l-​Iben uniġenitu tiegħu, Ġesù Kristu, fuq l-​art. Hawn, Ġesù kien se jnaddaf l-​isem t’Alla mit-​tmaqdir billi juri t-​tip taʼ devozzjoni li Adam bħala uman perfett setaʼ u kien imissu jagħti lil Alla; imma Ġesù kien se jagħmel dan taħt ċirkostanzi bil-​wisq iżjed diffiċli. Ġesù kien se jagħti l-​ħajja umana u perfetta tiegħu bħala sagrifiċċju sabiex in-​nisel taʼ Adam li jeżerċitaw fidi setgħu jkollhom dak li tilef Adam. Imbagħad, “merħla ċkejkna” taʼ bnedmin lejali kienu se jintgħażlu minn Alla biex jieħdu seħem maʼ Kristu fis-​Saltna tiegħu tas-​sema, u “folla kbira” kienet se tinġabar mill-​ġnus kollha biex tifforma l-​pedament għal soċjetà umana ġdida. (Luqa 12:32; Rivelazzjoni 7:9) B’dak imwettaq, Alla kien se jwettaq ħelsien grandjuż iffigurat bil-​quddiem mill-​ġrajjiet assoċjati mad-​Dulluvju u mal-​qerda taʼ Sodom u Gomorra.

Għala Azzjoni Deċiżiva Hija Urġenti Issa

13, 14. X’nistgħu nitgħallmu mill-​fatt li Pietru uża l-​qerda taʼ nies mingħajr Alla fi żmien Lot u fi żmien Noè bħala eżempji?

¹³ Studenti tal-​Kelma t’Alla jafu li Jehovah f’ħafna okkażjonijiet wettaq atti taʼ ħelsien għall-​qaddejja tiegħu. Madankollu, fil-​parti l-​kbira tal-​każi l-​Bibbja ma tgħidx, ‘Bħalma kien f’dak iż-​żmien, hekk se tkun il-​preżenza taʼ Bin il-​bniedem.’ L-​appostlu Pietru, imnebbaħ mill-​ispirtu qaddis, għala semma apparti żewġ eżempji biss? X’kien differenti dwar dak li ġara fi żmien Lot u fi żmien Noè?

¹⁴ Indikazzjoni ċara tinsab f’Ġuda 7, fejn naqraw li “Sodom u Gomorra u l-​ibliet taʼ madwarhom . . . huma mqiegħda quddiemna bħala eżempju taʼ twissija billi għaddew mill-​kastig ġudizzjarju tan-​nar taʼ dejjem.” Iva, il-​qerda tal-​midinbin ħorox f’dawk l-​ibliet kienet eterna, kif se tkun il-​qerda tal-​ħżiena fit-​tmiem tas-​sistema preżenti taʼ affarijiet. (Mattew 25:46) Il-​Għarqa taʼ żmien Noè hija bl-​istess mod irreferuta f’kuntesti li jiddiskutu ġudizzji eterni. (2 Pietru 2:4, 5, 9-12; 3:5-7) Mela bil-​qerda taʼ nies taʼ mingħajr Alla fi żmien Lot u fi żmien Noè, Jehovah wera li hu se jeħles lill-​qaddejja tiegħu billi jeqred għal dejjem lil dawk li jipprattikaw in-​nuqqas taʼ tjieba.—2 Tessalonkin 1:6-10.

15. (a) Liema twissija urġenti tingħata lil dawk li jieħdu sehem fi prattiċi mill-​agħar? (b) Għala se tiġi esegwita l-​ġustizzja fuq dawk kollha li jippersistu fin-​nuqqas taʼ tjieba?

¹⁵ Il-​qerda tal-​ħżiena ma ġġib l-​ebda pjaċir lil Jehovah, lanqas ma ġġib pjaċir lill-​qaddejja tiegħu. Permezz tax-​Xhieda tiegħu, Jehovah iħeġġeġ lin-​nies: “Duru lura, duru lura mill-​mogħdijiet ħżiena tagħkom, għax għala għandkom tmutu?” (Eżekjel 33:11) Madankollu, meta n-​nies ma juru l-​ebda xewqa li jagħtu kas taʼ dan l-​appell taʼ mħabba imma jippersistu fil-​mod taʼ ħajja egoistika tagħhom stess, ir-​rispett taʼ Jehovah lejn l-​isem qaddis tiegħu stess u l-​imħabba tiegħu lejn il-​qaddejja lejali tiegħu li jġarrbu abbuż minn idejn bnedmin taʼ mingħajr Alla jirrikjedu li hu jesegwixxi ġustizzja.

16. (a) Għala nistgħu nkunu fiduċjużi li l-​ħelsien imbassar hu fil-​qrib ħafna? (b) Minn liema ħaġa u għal liema ħaġa se jkun il-​ħelsien?

¹⁶ Il-​waqt għal Alla biex iġib ħelsien hu qrib ħafna! L-​attitudnijiet u l-​ġrajjiet li Ġesù bassar bħala s-​sinjal tal-​preżenza tiegħu u tal-​konklużjoni tas-​sistema taʼ affarijiet jidhru b’mod ċar. Il-​fatturi taʼ dak is-​sinjal l-​ewwel bdew jidhru ’l fuq minn 75 sena ilu, u Ġesù qal li “din il-​ġenerazzjoni” bl-​ebda mod ma kellha tgħaddi qabel ma sseħħ l-​esekuzzjoni tal-​ġudizzju t’Alla fuq din id-​dinja taʼ mingħajr Alla. Meta Jehovah jiddeċiedi li l-​messaġġ tas-​Saltna ġie mxandar sal-​punt suffiċjenti fl-​art abitata kollha bħala xiehda lill-​ġnus kollha, imbagħad se jiġi t-​tmiem taʼ din id-​dinja mill-​agħar, u maʼ dak se jiġi ħelsien għal nies taʼ devozzjoni lejn Alla. (Mattew 24:3-34; Luqa 21:28-33) Ħelsien minn xiex? Mill-​provi li huma kellhom igħaddu minnhom minn idejn il-​ħżiena, u minn ċirkostanzi li kienu taʼ kuljum sors taʼ niket għalihom bħala nies li jħobbu t-​tjieba. Se jkun ukoll ħelsien f’dinja ġdida fejn il-​mard u l-​mewt se jkunu affarijiet tal-​passat.

Għajnuna Divina bil-​Ħelsien Quddiemna

17. (a) Liema mistoqsija li ġġibna f’sensina għandna nistaqsu lilna nfusna? (b) Kif nistgħu nagħtu evidenza li, bħal Noè, aħna mqanqlin minn “biżaʼ t’Alla”?

¹⁷ Il-​mistoqsija li aħna individwalment għandna bżonn nikkunsidraw hi, ‘Jien lest għal dak l-​att t’Alla?’ Jekk qed nafdaw fina nfusna jew fil-​kunċett tagħna nfusna taʼ tjieba, m’aħniex lesti. Imma jekk, bħal Noè, aħna mqanqlin minn “biżaʼ t’Alla,” allura aħna qed inwieġbu bil-​fidi għad-​direzzjoni li Jehovah jagħtina, u dan se jwassal għall-​ħelsien tagħna.—Ebrej 11:7.

18. Li nitgħallmu rispett ġenwin lejn awtorità teokratika għala hu parti importanti mit-​tħejjija tagħna għal ħelsien fid-​dinja ġdida?

¹⁸ Billi jiddeskrivi b’mod sabiħ lil dawk li jgawdu l-​protezzjoni li jagħti Jehovah saħansitra issa, Salm 91:1, 2 igħid: “Kulmin igħammar fil-​post sigriet tal-​Iktar Għoli se jikseb għalih innifsu post fejn joqgħod taħt id-​dell taʼ Dak li Jistaʼ Kollox. Jien se ngħid lil Jehovah: ‘Inti l-​kenn tiegħi u l-​fortizza tiegħi, Alla tiegħi, li fih se nafda.’” Hawn hu grupp taʼ nies li huma ssalvagwardjati minn Alla bħal frieħ taħt il-​ġwienaħ setgħana taʼ tajra. Il-​fiduċja sħiħa tagħhom hi f’Jehovah. Huma jirrikonoxxu li hu l-​Iktar Għoli, Dak li Jistaʼ Kollox. Bħala riżultat, huma jirrispettaw lill-​awtorità teokratika u jissottomettu lilhom infushom lejha, kemm jekk hi eżerċitata mill-​ġenituri jew mill-​“irsir fidil u għaqli.” (Mattew 24:45-47) Huwa dak veru dwarna individwalment? Bħal Noè, qegħdin nitgħallmu nagħmlu ‘kulma jikkmanda Jehovah’ u qed nagħmlu l-​affarijiet kif irid hu? (Ġenesi 6:22) Jekk iva, qed inwieġbu għat-​tħejjija li Jehovah qed jagħtina għall-​ħelsien fid-​dinja ġdida tiegħu taʼ tjieba.

19. (a) X’inhi l-​qalb figurattiva tagħna, u għala huwa vitali li nagħtuha attenzjoni? (Proverbji 4:23) (b) Kif nistgħu nibbenefikaw mill-​eżempju taʼ Lot rigward ir-​reazzjoni tagħna lejn ġibdiet dinjin?

¹⁹ Dik it-​tħejjija tinvolvi wkoll li nagħtu attenzjoni lejn il-​qalb figurattiva tagħna. “Jehovah hu l-​eżaminatur tal-​qlub.” (Proverbji 17:3) Hu jgħinna nirrealizzaw li mhux dak li nidhru li aħna fuq barra li jgħodd imma, minflok, il-​persuna taʼ ġewwa, il-​qalb. Fil-​waqt li ma niħdux sehem fi vjolenza jew immoralità bħad-​dinja taʼ madwarna, aħna rridu noqogħdu għassa li ma niġux imħajrin jew nitpaxxew naraw dawn l-​affarijiet. Bħal Lot, għandna nħossuna mnikktin bl-​istess eżistenza taʼ egħmejjel bla liġi bħal dawn. Dawk li jobogħdu dak li hu ħażin mhux se jfittxu modi biex jieħdu sehem fih; madankollu, nies li ma jobogħduhx jistgħu fiżikament iżommu ’l bogħod minnu fil-​waqt li f’moħħhom jixtiequ li jistgħu jieħdu sehem fih. “O maħbubin taʼ Jehovah, obogħdu dak li hu ħażin.”—Salm 97:10.

20. (a) B’liema modi l-​Bibbja twissina kontra mod taʼ ħajja materjalistiku? (b) Kif nistgħu nindunaw jekk il-​lezzjonijiet vitali tal-​Bibbja fuq il-​materjaliżmu laħqulniex lil qalbna?

²⁰ Jehovah b’imħabba qed jedukana biex naħarbu mhux biss minn kondotta immorali imma wkoll minn mod taʼ ħajja materjalistika. ‘Kun kuntent b’li għandek x’tiekol u b’li titgħatta,’ twissi l-​Kelma tiegħu. (1 Timotew 6:8) Noè u l-​ulied subien tiegħu kellhom iħallu djarhom warajhom meta daħlu fl-​arka. Lot u l-​familja tiegħu, ukoll, kellhom jabbandunaw id-​dar u l-​ġid li kellhom sabiex isalvaw il-​ħajjiet tagħhom. Aħna fejn poġġejna l-​ġibdiet tagħna? “Ftakru f’mart Lot.” (Luqa 17:32) Ġesù ħeġġeġ: “Ibqgħu, mela, fittxu l-​ewwel is-​saltna u t-​tjieba tiegħu.” (Mattew 6:33) Qegħdin nagħmluh dan? Jekk il-​livelli taʼ tjieba taʼ Jehovah jiggwidawna u jekk ix-​xandir tal-​aħbar tajba tas-​Saltna tiegħu huma l-​ewwel tħassib fil-​ħajjiet tagħna, mela aħna, tabilħaqq, qed inwieġbu għat-​tħejjija tiegħu taʼ poplu għal ħelsien għal ġod-​dinja ġdida tiegħu.

21. Għala nistgħu b’mod xieraq nantiċipaw li l-​wegħda taʼ Jehovah taʼ ħelsien dalwaqt se titwettaq?

²¹ Lil nies taʼ devozzjoni lejn Alla li kienu se jaraw it-​twettieq tas-​sinjal tal-​preżenza tiegħu fil-​qawwa tas-​Saltna, Ġesù qal: “Qumu dritti u erfgħu rjuskom ’il fuq, għaliex il-​ħelsien tagħkom qed joqrob.” (Luqa 21:28) Rajtu int dak is-​sinjal hekk kif żviluppa f’kull dettal? Mela kun fiduċjuż li t-​twettieq tal-​wegħda taʼ Jehovah taʼ ħelsien huwa qrib ħafna! Kun konvint għalkollox li “Jehovah jaf kif jeħles lil nies taʼ devozzjoni lejn Alla ’l barra mit-​tiġrib.”—2 Pietru 2:9.