Attenti Minn Dawk li Jwaqqgħu Kollox għaż-​Żuffjett!

Illum, it-​tbassir huwa kotran, u n-​negozju taʼ l-​istudji dwar il-​futur qiegħed jisplodi. “Hekk kif is-​sena 2000 tersaq iktar fil-​qrib,” tosserva The Daily Telegraph taʼ Londra, “qiegħda tiġri xi ħaġa stramba u madankollu mhux totalment mhix mistennija. Eluf taʼ nies madwar id-​dinja qegħdin jesperjenzaw viżjonijiet tal-​futur li huma bizzarri u spiss terrifikanti.” Għal bosta osservaturi dan l-​interess intens fil-​futur huwa sempliċement ripetizzjoni taʼ bidliet li qabel kienu ttamati imma li ma seħħewx.

HEKK KIF ŻDIED it-​traffiku taʼ inġenji miġbudin miż-​żwiemel fis-​seklu 19, wieħed raġel bassar li l-​ibliet Ewropej kellhom eventwalment jifgaw bid-​demel. M’għandniex xi ngħidu, it-​tbassira tiegħu wriet li kienet falza. B’hekk, biex tiġbed l-​attenzjoni għall-​mod kif it-​tbassir taʼ spiss ifalli, The Times taʼ Londra stqarret: “Il-​futur huwa sempliċement gozz demel taż-​żwiemel.”

Oħrajn iwaqqgħu għaż-​żuffjett lil dawk li jaraw il-​periklu ġej. Per eżempju, professur tan-​negozju f’università fl-​Amerka sfida lil dawk li jwissu dwar id-​degradazzjoni taʼ l-​ambjent biex jilagħbulu mħatra jekk ix-​xejra kinitx se tmur għall-​agħar. Bħalma ġie rrapportat fir-​rivista New Scientist, hu jsostni li l-​“kwalità taʼ ħajjitna qiegħda titjieb u se tkompli titjieb indefinittivament.”

Fost il-​konfużjoni taʼ x’se jiġri u x’mhux se jiġri, ħafna jemmnu li kollox se jibqaʼ bażikament l-​istess. Billi jwaqqgħu għaż-​żuffjett kwalunkwe ħsieb taʼ xi intervent divin fil-​kwistjonijiet tal-​bniedem, dawn juru attitudni bħal dik taʼ wħud fl-​ewwel seklu E.K. li kienu jwaqqgħu kollox għaż-​żuffjett.

Għadu Kollox l-​Istess?

It-​tieni ittra mnebbħa taʼ l-​appostlu Kristjan Pietru, miktuba madwar is-​sena 64 E.K., wissiet: “Fl-​aħħar jiem jiġu nies kollhom tmaqdir u jwaqqgħu kollox għaż-​żuf[f]jett, nies li jaġixxu skond ix-​xewqat ħżiena tagħhom.”—2 Pietru 3:3.

Dawk li jwaqqgħu kollox għaż-​żuffjett ifittxu li l-​oġġett taż-​żuffjettar tagħhom jagħmluh jidher tad-​daħk. Il-​persuna li ċċedi għaż-​żuffjettar għandha mnejn tkun qed tidħol f’nassa egoistika għaliex dak li jwaqqaʼ kollox għaż-​żuffjett spiss ikun irid li dawk li jagħtuh widen jadottaw l-​opinjoni tiegħu. Forsi xi wħud minn dawk li kienu jwaqqgħu kollox għaż-​żuffjett u li Pietru wissa dwarhom kienu hekk, “jaġixxu skond ix-​xewqat ħżiena tagħhom.” F’li jiġbed l-​attenzjoni tal-​qarrejja tiegħu, l-​appostlu uża għamla enfatika taʼ espressjoni. Hu wissa dwar il-​wasla taʼ “nies kollhom tmaqdir . . . jwaqqgħu kollox għaż-​żuf[f]jett.”​—Korsiv tagħna.

Dawk l-​uħud taʼ l-​ewwel seklu li kienu jwaqqgħu kollox għaż-​żuffjett iddubitaw ir-​realtà tal-​“wegħda tal-​miġja” taʼ Kristu, billi qalu: “Fejn hi l-​wegħda tal-​miġja tiegħu? Għax sa minn meta mietu missirijietna, kollox baqaʼ miexi kif kien sa mill-​bidu tal-​ħolqien.” (2 Pietru 3:4) Hekk dehrilhom huma. Madankollu, lura fis-​sena 33 E.K., Ġesù kien bassar katastrofi għall-​belt taʼ Ġerusalemm. “Għad jiġi żmien fuqek,” iddikjara hu, “meta l-​għedewwa tiegħek idawwruk b’rampa u jagħlquk minn kullimkien u jrossu fuqek minn kull naħa; u jġarrfu lilek u lil uliedek fik, u ma jħallux fik ġebla fuq oħra.” Kemm kienu żbaljati dawk li żżuffjettaw b’dik it-​twissija! Fis-​sena 70 E.K., l-​eżerċti Rumani assedjaw lil Ġerusalemm u qerdu lill-​belt, b’telf taʼ ħajjiet maʼ kullimkien għall-​abitanti tagħha. Il-​maġġuranza taʼ l-​abitanti tal-​belt għala ma kinux ippreparati għal dan id-​diżastru? Għaliex ma kinux indunaw li Alla kien spezzjonahom permezz taʼ Ibnu, Ġesù.—Luqa 19:43, 44.

L-appostlu Pietru jirreferi għal intervent futur minn Alla li Jistaʼ Kollox. “Jasal . . . jum il-​Mulej bħal ħalliel,” iwissi Pietru. (2 Pietru 3:10) F’dak iż-​żmien Alla se jwarrab lill-​ħżiena mill-​globu kollu kemm hu u jeħlisha lil dawk li jiġu ġġudikati li jkunu twajbin. Bħalma spjega taʼ sikwit dan il-​ġurnal, il-​“miġja” taʼ Kristu Ġesù bdiet fl-​1914. Imma li jieħu azzjoni bħala l-​Eżekutur t’Alla biex ineħħi l-​ħażen għad irid iseħħ. Għaldaqstant, it-​twissija taʼ l-​appostlu biex noqogħdu attenti minn dawk li jwaqqgħu kollox għaż-​żuffjett issa tapplika b’urġenza akbar.

Għandek mnejn li int diġà stennejt żmien twil għal intervent divin fil-​kwistjonijiet tal-​bniedem. X’se jgħinek tkompli tistenna bil-​paċenzja mingħajr ma ssir il-​priża taʼ dawk li jwaqqgħu kollox għaż-​żuffjett? Jekk jogħġbok kompli aqra.

[Kumment f’paġna 4]

“Għad jiġi żmien fuqek, meta l-​għedewwa tiegħek idawwruk b’rampa . . . u jrossu fuqek minn kull naħa; . . . u ma jħallux fik ġebla fuq oħra.” Dik ma kinitx twissija taʼ min iwaqqagħha għaż-​żuffjett. L-​eżerċti Rumani qerdu lil Ġerusalemm, b’telf taʼ ħajjiet maʼ kullimkien.