Żomm il-​Jum taʼ Jehovah Sewwa f’Moħħok

“Fl-​aħħar jiem jiġu nies kollhom tmaqdir.”—2 PIETRU 3:3.

1. Wieħed Kristjan fi żmienna liema sens t’urġenza kellu?

MINISTRU full-time li ilu jaqdi għal iktar minn 66 sena kiteb: “Minn dejjem ħassejt sens kbir t’urġenza. Armageddon dejjem kienet pitgħada, fil-​ħsieb tiegħi. (Apokalissi 16:14, 16) Bħal missieri, u bħal missieru qablu, għext ħajti bħalma ħeġġeġ l-​appostlu [Pietru], ‘waqt li tistennew b’ħerqa kbira [“żżommu sewwa f’moħħkom,” NW] l-​miġja tal-​Jum t’Alla.’ Id-​dinja ġdida mwiegħda dejjem qistha bħala ‘xi ħaġa reali li m’aħniex naraw.’”—2 Pietru 3:11, 12; Lhud 11:1; Isaija 11:6-9; Apokalissi 21:3, 4.

2. X’ifisser li wieħed iżomm sewwa f’moħħu l-​jum taʼ Jehovah?

² L-​espressjoni “żżommu sewwa f’moħħkom,” li Pietru għamel b’referenza għall-​jum taʼ Jehovah tfisser li ma nwarrbuhx minn moħħna. M’għandniex ninsew li l-​jum meta Jehovah se jeqred lil din is-​sistema t’affarijiet bħala preliminarju biex jistabbilixxi d-​dinja ġdida mwiegħda tiegħu huwa qrib ferm. Għandu jkun tant reali għalina li narawh ċar, bħal li kieku qiegħed immedjatament quddiemna. Daqshekk kien reali għall-​profeti t’Alla tal-​qedem, u taʼ spiss tkellmu dwaru bħala li kien fil-​qrib.—Isaija 13:6; Ġoel 1:15; 2:1; Għabdija 15; Sofonija 1:7, 14.

3. Evidentement x’kien li qanqal il-​parir taʼ Pietru rigward il-​jum taʼ Jehovah?

³ Pietru għala ħeġġiġna biex inqisu l-​jum taʼ Jehovah bħal li kieku jistaʼjiġi, biex ngħidu hekk, “pitgħada”? Għaliex xi wħud bdew evidentement jirridikolaw l-​idea tal-​preżenza mwiegħda taʼ Ġesù li matulha l-​ħżiena se jiġu kkastigati. (2 Pietru 3:3, 4) Għalhekk f’kapitlu 3 tat-​tieni ittra tiegħu, li se nikkunsidraw issa, Pietru jwieġeb l-​akkużi taʼ dawn li jirridikolaw.

Appell Mill-​Qalb Biex Jiftakru

4. Pietru x’iridna niftakru?

⁴ L-​affezzjoni taʼ Pietru għal ħutu hija murija billi ripetutament jindirizzahom f’dan il-​kapitlu bħala “ħuti għeżież.” Billi jappellalhom mill-​qalb biex ma jinsewx dak li kienu ġew mgħallmin, Pietru jibda: “Ħuti għeżież. . . . Nifhem inqajjem fikom ħsibijiet sbieħ billi nfakkarkom f’dak li diġà tafu. Ftakru fil-​kliem li diġà qalu l-​profeti qaddisa, u wkoll fil-​kmandament tal-​Mulej u s-​Salvatur tagħna, li wasslulkom l-​appostli tagħkom.”—2 Pietru 3:1, 2, 8, 14, 17; Ġuda 17.

5. Xi profeti x’qalu dwar il-​jum taʼ Jehovah?

⁵ Pietru liema “kliem li diġà qalu l-​profeti qaddisa” qiegħed iħeġġeġ lill-​qarrejja biex jiftakru? Iva, dak dwar il-​preżenza taʼ Kristu fil-​qawwa tas-​Saltna u dwar il-​ġudizzju taʼ dawk li jiċħdu lil Alla. Pietru kien qabel ġibed l-​attenzjoni lejn dan il-​kliem. (2 Pietru 1:16-19; 2:3-10) Ġuda jirreferi għal Enok, li kien l-​ewwel profeta ddokumentat li wissa dwar il-​ġudizzju avvers t’Alla fuq il-​ħżiena. (Ġuda 14, 15) Profeti oħrajn segwew lil Enok, u Pietru ma jridniex ninsewh dak li kitbu huma.—Isaija 66:15, 16; Sofonija 1:15-18; Żakkarija 14:6-9.

6. Liema kliem taʼ Ġesù u l-​appostli tiegħu jitfaʼ dawl fuq il-​jum taʼ Jehovah?

⁶ Iżjed minn hekk, Pietru jgħid lill-​qarrejja tiegħu biex jiftakru “fil-​kmandament tal-​Mulej u s-​Salvatur tagħna.” Il-​kmandament taʼ Ġesù jinkludi l-​eżortazzjoni: ‘Oqogħdu attenti, li ma titmewtilkomx qalbkom, li ma ssibuhx dak il-​Jum fuqkom għal għarrieda.’ “Kunu għajnejkom miftuħa, ishru, għax ma tafux meta se jasal il-​waqt.” (Luqa 21:34-36; Mark 13:33) Pietru jħeġġiġna wkoll biex nagħtu kas il-​kliem taʼ l-​appostli. L-​appostlu Pawlu, per eżempju, kiteb: “Jum il-​Mulej jiġi għal għarrieda bħal ħalliel billejl. Għalhekk ma għandniex norqdu bħall-​oħrajn, iżda nishru u ngħixu bil-​qjies.”—1 Tessalonikin 5:2, 6.

Ix-​Xewqat Taʼ Dawk Li Jirridikolaw

7, 8. (a) X’tip taʼ nies huma dawk li jirridikolaw il-​messaġġi taʼ twissija t’Alla? (b) X’isostnu dawk li jirridikolaw?

⁷ Bħalma ġie nnotat qabel, ir-​raġuni għat-​twissija taʼ Pietru hija li xi wħud bdew iwaqqgħu għaċ-​ċajt twissijiet bħal dawn, saħansitra bħalma l-​Iżraeliti tal-​qedem kienu żżuffjettaw bil-​profeti taʼ Jehovah. (2 Kronaki 36:16) Pietru jispjega: “Dan għandkom tkunu tafu, l-​ewwelnett: li fl-​aħħar jiem jiġu nies kollhom tmaqdir u jwaqqgħu kollox għaż-​żufjett, nies li jaġixxu skond ix-​xewqat ħżiena tagħhom.” (Korsiv tagħna.) (2 Pietru 3:3) Ġuda jgħid li x-​xewqat taʼ dawn li jirridikolaw huma għal “ġibdiet ħżiena tagħhom.” Hu jsejħilhom “nies li jgħixu ħajja taʼ din l-​art [“annimalistiċi,” “NW”], li m’għandhomx l-​Ispirtu fihom.” (Korsiv tagħna.)—Ġuda 17-19.

⁸ L-​għalliema foloz li Pietru qal “li jgħixu skond il-​ġibdiet tal-​ġisem” huma x’aktarx fost dawk li jirridikolaw u li m’għandhom ebda spiritwalità. (2 Pietru 2:1, 10, 14) Biż-​żuffjett jistaqsu lil Kristjani leali: “Fejn hi l-​wegħda tal-​miġja tiegħu? Għax sa minn meta mietu missirijietna, kollox baqaʼ miexi kif kien sa mill-​bidu tal-​ħolqien.”—2 Pietru 3:4.

9. (a) Għala dawk li jirridikolaw jipprovaw idgħajfu s-​sens t’urġenza li jinsab ħafna fil-​Kelma t’Alla? (b) Li nibqgħu nżommu sewwa f’moħħna l-​jum taʼ Jehovah kif inhu taʼ protezzjoni għalina?

⁹ Għala dan l-​irridikolar? Għala qed jiġi ssuġġerit li l-​preżenza taʼ Kristu għandha mnejn li qatt ma se sseħħ, li Alla qatt ma interviena fil-​kwistjonijiet umani u qatt ma se jintervieni? Sewwa, billi jdgħajfu s-​sens t’urġenza li jinsab ħafna fil-​Kelma t’Alla, dawn li jirridikolaw annimalistiċi jfittxu li jbennu lil oħrajn għal ġo stat t’apatija spiritwali u b’hekk jagħmluhom priża faċli għal seduzzjonijiet egoistiċi. X’inkuraġġiment qawwi għalina llum biex nibqgħu mqajmin spiritwalment! Jalla nibqgħu nżommu sewwa f’moħħna l-​jum taʼ Jehovah u dejjem niftakru li għajnejh huma fuqna! B’hekk niġu mqanqlin biex naqdu lil Jehovah b’żelu u nżommu s-​safa morali tagħna.—Salmi 11:4; Isaija 29:15; Eżekjel 8:12; 12:27; Sofonija 1:12.

Apposta u Taʼ Min Jistmerrhom

10. Pietru kif jagħti prova li dawk li jirridikolaw huma żbaljati?

¹⁰ Uħud bħal dawn li jirridikolaw jinjoraw fatt vitali. Huma jinjorawh deliberatament u jipprovaw iġagħlu lil oħrajn jinsewh. Għala? Sabiex ikunu jistgħu jisseduċu lin-​nies iżjed faċilment. “Għax iridu,” jikteb Pietru, “dawn jinsew.” Liema fatt? “Li sa minn żmien ilu kienu s-​smewwiet u l-​art, li saret mill-​ilma u żżomm bl-​ilma bis-​saħħa tal-​kelma taʼ Alla; kien ukoll bl-​ilma li d-​dinja taʼ dak iż-​żmien tgħarrqet u ntilfet.” (Korsiv tagħna.) (2 Pietru 3:5, 6) Iva, Jehovah ħelisha l-​art mill-​ħażen matul id-​Dilluvju fi żmien Noè, fatt li Ġesù enfasizzah ukoll. (Mattew 24:37-39; Luqa 17:26, 27; 2 Pietru 2:5) Mela, kuntrarju għal dak li jgħidu dawk li jirridikolaw, l-​affarijiet kollha ma baqgħux mexjin “kif kien sa mill-​bidu tal-​ħolqien.”

11. Liema stennijiet prematuri tal-​Kristjani bikrin ġagħlu lil xi wħud jirridikolawhom?

¹¹ Dawk li jirridikolaw għandu mnejn li żżuffjettaw bil-​Kristjani leali minħabba li kellhom stennijiet mhux imwettqin. Ftit qabel ma miet Ġesù, id-​dixxipli tiegħu “kien mingħalihom li s-​Saltna taʼ Alla kienet se tidher minnufih.” Imbagħad, wara l-​irxoxt tiegħu staqsew jekk is-​Saltna kellhiex tiġi stabbilita dak il-​ħin. Ukoll, madwar għaxar snin qabel ma Pietru kiteb it-​tieni ittra tiegħu, xi wħud kienu ‘maħsudin’ minħabba “xi kelma” jew “xi ittra,” li jaħsbu li kienet ġejja mingħand l-​appostlu Pawlu jew sħabu, “bħallikieku l-​miġja taʼ jum il-​Mulej qorbot.” (Luqa 19:11; 2 Tessalonikin 2:2; Atti 1:6) Dawn l-​istennijiet tad-​dixxipli taʼ Ġesù, madankollu, ma kinux foloz, kienu biss prematuri. Il-​jum taʼ Jehovah kien se jiġi!

Il-​Kelma T’Alla Hija Taʼ Min Jorbot Fuqha

12. Il-​Kelma t’Alla kif tat prova li hija taʼ min jorbot fuqha fil-​profeziji li fiha dwar “Jum il-​Mulej”?

¹² Bħalma ġie nnotat qabel, il-​profeti taʼ qabel l-​era Kristjana taʼ spiss wissew li jum il-​vendetta taʼ Jehovah kien qrib. “Jum il-​Mulej” fuq skala żgħira ġie fis-​sena 607 Q.E.K. meta Jehovah esegwixxa vendetta fuq il-​poplu xxellerat tiegħu. (Sofonija 1:14-18) Iktar tard, ġnus oħrajn, inklużi Babilonja u l-​Eġittu, għaddew minn “Jum il-​Mulej” bħal dan. (Isaija 13:6-9; Ġeremija 46:1-10; Għabdija 15) It-​tmiem tas-​sistema Lhudija t’affarijiet taʼ l-​ewwel seklu kien ukoll ġie mbassar, u dan seħħ meta l-​armati Rumani għamlu ħerba lil Ġudea fis-​sena 70 E.K. (Luqa 19:41-44; 1 Pietru 4:7) Imma Pietru jipponta lejn “Jum il-​Mulej” fil-​futur, wieħed li se jagħmel saħansitra lid-​Dilluvju globali jidher li m’hu xejn daqskemm se jkun kbir!

13. Liema eżempju storiku juri ċ-​ċertezza tat-​tmiem taʼ din is-​sistema t’affarijiet?

¹³ Pietru jintroduċi d-​deskrizzjoni tiegħu taʼ dik il-​qerda li ġejja, billi jgħid: “Hekk ukoll bl-​istess kelma.” Kien għadu kif qal li “bis-​saħħa tal-​kelma taʼ Alla” l-​art taʼ qabel id-​Dilluvju ħarġet “mill-​ilma u żżomm bl-​ilma.” Din is-​sitwazzjoni, deskritta fil-​Bibbja fir-​rakkont tal-​ħolqien, għamlet l-​Għarqa possibbli meta l-​ilmijiet niżlu bil-​qliel skond id-​direzzjoni jew il-​kelma t’Alla. Pietru jkompli: “Bl-​istess kelma taʼ Alla is-​smewwiet u l-​art taʼ llum huma merfugħin għall-​ħruq, miżmumin sa jum il-​ġudizzju, li jkun jum it-​telfien tal-​ħżiena.” (2 Pietru 3:5-7; Ġenesi 1:6-8) Għandna l-​kelma taʼ min jorbot fuqha taʼ Jehovah! Hu se jġib fi tmiem is-​“smewwiet u l-​art”​—din is-​sistema t’affarijiet—​fil-korla tħeġġeġ tal-​jum il-​kbir tiegħu! (Sofonija 3:8) Imma meta?

Ħerqa Biex Jiġi T-​Tmiem

14. Għala nistgħu nkunu fiduċjużi li issa qegħdin ngħixu fl-​“aħħar tad-​dinja”?

¹⁴ Id-​dixxipli taʼ Ġesù riedu jkunu jafu meta kien se jiġi t-​tmiem, u għalhekk staqsewh: “X’se jkun is-​sinjal tal-​miġja tiegħek u taʼ tmiem id-​dinja [“konklużjoni tas-​sistema t’affarijiet,” NW]?” Huma evidentement kienu qegħdin jistaqsu dwar meta kellha tintemm is-​sistema Lhudija, imma t-​tweġiba taʼ Ġesù ffokat primarjament fuq meta s-​‘sema u l-​art’ preżenti kellhom jinqerdu. Ġesù bassar affarijiet bħal gwerer kbar, nuqqas taʼ ikel, terremoti, mard, u kriminalità. (Mattew 24:3-14; Luqa 21:5-36) Mill-​1914 ’l hawn, rajna s-​sinjal li Ġesù ta għall-​“konklużjoni tas-​sistema t’affarijiet” qiegħed jiġi mwettaq kif ukoll l-​affarijiet li l-​appostlu Pawlu semma li kellhom jidentifikaw “l-​aħħar tad-​dinja.” (2 Timotju 3:1-5) Verament, l-​evidenza li qegħdin ngħixu fiż-​żmien tat-​tmiem taʼ din is-​sistema t’affarijiet hija abbundanti!

15. Il-​Kristjani x’kellhom it-​tendenza li jagħmlu minkejja t-​twissija taʼ Ġesù?

¹⁵ Ix-​Xhieda taʼ Jehovah kienu u għadhom ħerqanin biex ikunu jafu meta l-​jum taʼ Jehovah se jseħħ. Minħabba l-​ħerqa tagħhom xi drabi pprovaw jikkalkulaw meta x’aktarx li se jiġi. Imma billi għamlu hekk, huma, bħalma għamlu d-​dixxipli bikrin taʼ Ġesù, naqsu li jieħdu t-​twissija tas-​Sid tagħhom li aħna ‘ma nafux meta sa jasal il-​waqt.’ (Mark 13:32, 33) Dawk li jirridikolaw iżżuffjettaw bil-​Kristjani leali minħabba l-​istennijiet prematuri li kellhom. (2 Pietru 3:3, 4) Minkejja dan, il-​jum taʼ Jehovah żgur se jiġi, jafferma Pietru, skond l-​iskeda Tiegħu.

Ħtieġa Li Nqisu Kif Iqis Jehovah

16. Liema twissija nagħtu kas bil-​għaqal?

¹⁶ Jeħtieġ li nqisu ż-​żmien kif iqisu Jehovah, bħalma Pietru jfakkarna issa: “Dan għandkom tkunu tafu, ħuti għeżież: li quddiem il-​Mulej jum wieħed hu bħal elf sena, u elf sena bħal jum wieħed.” Meta tipparagunaha, kemm hi qasira l-​ħajja tagħna taʼ 70 jew 80 sena! (2 Pietru 3:8; Salm 90:4, 10) Mela jekk it-​twettiq tal-​wegħdi t’Alla jidher li qiegħed jittardja, jeħtieġ li naċċettaw it-​twissija tal-​profeta t’Alla: “Jekk hija [waqtha] ddum ma tasal, int stennieha, għax tiġi żgur, ma tiddawwarx ma tasal!” (Korsiv tagħna.)—Ħabakkuk 2:3.

17. Għalkemm l-​aħħar jiem damu iktar milli ħafna stennew li jdumu, dwar liema ħaġa nistgħu nkunu fiduċjużi?

¹⁷ L-​aħħar jiem taʼ din is-​sistema għala damu iktar milli ħafna stennew li jdumu? Għal raġuni verament tajba, bħalma jkompli jispjega Pietru: “Mhux għax jiddawwar il-​Mulej li jtemm il-​wegħdiet tiegħu, kif jaħsbu xi wħud, imma qiegħed jistabar bikom għax ma jridx li xi ħadd jintilef, imma li kulħadd jersaq għall-​indiema.” (2 Pietru 3:9) Jehovah jqis dak li huwa l-​aħjar għall-​ispeċi umana kollha. It-​tħassib tiegħu huwa għall-​ħajjiet tan-​nies, bħalma jgħid hu: “Ma nitgħaxxaqx b’mewt il-​midneb, imma bir-​reġgħa lura tiegħu minn triqtu biex jgħix.” (Eżekjel 33:11) Mela nistgħu nkunu fiduċjużi li t-​tmiem se jiġi preċiż f’waqtu biex iwettaq l-​iskop tal-​Ħallieq kollu mħabba u għerf!

X’Se Jintemm?

18, 19. (a) Jehovah għala hu ddeterminat li jeqred lil din is-​sistema t’affarijiet? (b) Pietru kif jiddeskrivih it-​tmiem taʼ din is-​sistema, u attwalment x’se jiġi meqrud?

¹⁸ Minħabba li Jehovah verament iħobb lil dawk li jaqduh, hu se jeħles minn dawk kollha li qegħdin jikkaġunawlhom in-​niket. (Salm 37:9-11, 29) Billi jinnota, bħalma Pawlu għamel qabel, li din il-​qerda kellha tiġi għal għarrieda, Pietru jikteb: “Jasal, tabilħaqq, jum il-​Mulej bħal ħalliel; jintemmu mbagħad is-​smewwiet bi ħsejjes kbar, jinħallu bin-​nar l-​elementi tad-​dinja, u l-​art b’kull ma fiha tkun maħruqa min-​nar [“se jinkixfu,” NW].” (2 Pietru 3:10; 1 Tessalonikin 5:2) Is-​smewwiet u l-​art litterali m’għebux fl-​Għarqa, lanqas m’huma se jgħibu matul il-​Jum taʼ Jehovah. Allura, x’se ‘jintemm,’ jew jinqered?

¹⁹ Il-​gvernijiet tal-​bnedmin li ddominaw lill-​umanità bħal “smewwiet” se jintemmu u hekk ukoll se jiġrilha l-​“art,” jew is-​soċjetà umana li tiċħad lil Alla. Il-​“ħsejjes kbar” forsi jindikaw kemm is-​smewwiet se jintemmu b’ħeffa. “L-​elementi” li jifformaw is-​soċjetà umana dekadenti tal-​lum se ‘jinħallu bin-​nar,’ jew jinqerdu. U l-​“art,” inkluż “kull ma fiha,” se “jinkixfu.” Jehovah se jikxef għalkollox l-​atti mill-​agħar tal-​bnedmin hekk kif iġib lis-​sistema dinjija kollha kemm hi fit-​tmiem mistħoqq tagħha.

Ibqgħu Ffokati Fuq It-​Tama Tagħkom

20. Ħajjitna kif għandha tiġi effettwata mill-​għarfien tagħna dwar il-​ġrajjiet li jinsabu quddiemna?

²⁰ Ladarba dawn il-​ġrajjiet drammatiċi huma qrib, Pietru jgħidilna li jmissna nkunu involuti biex ‘ħajjitna tkun tajba u qaddisa waqt li nistennew b’ħerqa kbira l-​miġja taʼ Jum Alla.’ Ma jistaʼ jkun hemm ebda dubju dwar dan! “[I]s-smewwiet jinħarqu u jinħallu!” (2 Pietru 3:11, 12) Il-​fatt li dawn il-​ġrajjiet drammatiċi jistgħu jibdew iseħħu għada stess għandu jeffettwa kull ma nagħmlu jew qegħdin nippjanaw li nagħmlu.

21. X’se jieħu post is-​smewwiet u l-​art preżenti?

²¹ Pietru issa jgħidilna x’se jieħu post is-​sistema qadima billi jgħid: “Imma aħna, skond il-​wegħda tiegħu, nistennew smewwiet ġodda u art ġdida, li fihom tgħammar il-​ġustizzja.” (2 Pietru 3:13; Isaija 65:17) Aħ, x’serħan grandjuż! Kristu u l-​144,000 mexxejja sħab miegħu se jifformaw “smewwiet” governattivi “ġodda,” u n-​nies li jibqgħu ħajjin wara t-​tmiem taʼ din id-​dinja se jifformaw l-​“art ġdida.”—1 Ġwann 2:17; Apokalissi 5:9, 10; 14:1, 3.

Żommu L-​Urġenza u S-​Safa Morali

22. (a) X’se jgħinna nevitaw kwalunkwe tebgħa spiritwali jew dnub? (b) Pietru jwissi dwar liema periklu?

²² “Għalhekk, ħuti għeżież,” ikompli Pietru, “waqt li nistennew dan kollu, qisu li jsibkom fis-​sliem, bla tebgħa u bla dnub. Is-​sabar li bih il-​Mulej jeħodna qisuh bħala salvazzjoni tagħna.” Li nistennew b’antiċipazzjoni ħerqana u li nqisu kwalunkwe ttardjar tal-​jum taʼ Jehovah bħala espressjoni taʼ paċenzja divina se jgħinna nevitaw kwalunkwe tebgħa spiritwali jew dnub. Madankollu, jeżisti periklu! Pietru jwissi li l-​kitbiet taʼ “Pawlu, ħuna l-​għażiż . . . fihom ħwejjeġ tqal biex wieħed jifhimhom, u dawk li ma jifhmux u li m’humiex sħaħ biżżejjed ifissruhom ħażin għat-​telfien tagħhom stess; hekk jagħmlu wkoll mill-​kotba l-​oħra taʼ l-​Iskrittura.”—2 Pietru 3:14-16.

23. X’inhi t-​twissija li Pietru kkonkluda biha?

²³ Għalliema foloz għawġu b’mod evidenti l-​kitbiet taʼ Pawlu dwar il-​qalb tajba mhix mistħoqqa t’Alla, u wżawhom bħala skuża għal kondotta laxka. Forsi Pietru għandu dan f’moħħu meta jikteb it-​twissija tiegħu qabel ma jikkonkludi: “Intom, mela, ħuti għeżież, ladarba tafu dan, għassu sewwa li ma tisfgħux maħkuma mill-​iżbalji taʼ dawn in-​nies bla rażan u taqgħu mnejn tinsabu fis-​sod.” Imbagħad jikkonkludi l-​ittra tiegħu, billi jħeġġeġ: “Ikbru fil-​grazzja u fl-​għarfien taʼ Sidna u s-​Salvatur tagħna Ġesù Kristu.”—2 Pietru 3:17, 18.

24. Il-​qaddejja kollha taʼ Jehovah liema attitudni għandhom iħaddnu?

Kif Twieġeb Int?

◻ X’ifisser li wieħed ‘iżomm sewwa f’moħħu’ l-​jum taʼ Jehovah?

◻ Dawk li jirridikolaw x’jinjoraw apposta, u għala?

◻ Dawk li jirridikolaw għal liema raġuni żżuffjettaw bil-​Kristjani leali?

◻ Liema mod taʼ kif inqisu l-​affarijiet jeħtiġilna nżommu?

[Stampa f’paġna 31]

Żomm sewwa f’moħħok il-​jum taʼ Jehovah . . .

[Stampa f’paġna 32]

. . . u d-​dinja l-​ġdida li se tiġi wara