Stenna bil-​Paċenzja

IR-​RAGĦAJ li għal darba wara l-​oħra għajjat “Ġej il-​lupu!” meta ma kien hemm ebda lupu sab li l-​għajta sussegwenti tiegħu għall-​għajnuna ħadd ma taha kasha. Bl-​istess mod illum, ħafna ma jagħtux kas taʼ kemm huwa imminenti l-​jum taʼ Jehovah għaliex semgħu twissijiet bla għadd li wrew li kienu allarmi foloz. L-​istess fatt li tant nies jonqsu li jagħrfu liema twissija hija ġenwina u taʼ min jagħti kasha jieħu vantaġġ minnu Satana, l-​għadu l-​kbir t’Alla, dak l-​“anġlu tad-​dawl” falz.—2 Korintin 11:14.

Spirtu taʼ kompjaċenza jkun perikoluż saħansitra għal dawk li jkunu qdew lil Jehovah għal xi żmien. Għala? Ikkunsidra t-​twissija mill-​appostlu Pietru fl-​ewwel seklu.

Ħsibijiet Sbieħ

It-​tieni ittra mnebbħa taʼ Pietru serviet bħala tfakkira għall-​Kristjani bikrin, u sservi l-​istess għalina llum. “Din hi t-​tieni ittra li qiegħed niktbilkom, ħuti għeżież,” jikteb hu. “Fihom it-​tnejn nifhem inqajjem fikom ħsibijiet sbieħ billi nfakkarkom f’dak li diġà tafu.” (2 Pietru 3:1) X’bażi għandu Pietru għal dan it-​tħassib? Pietru jiġbed l-​attenzjoni għall-​preżenza taʼ wħud li jwaqqgħu kollox għaż-​żuffjett u li ż-​żuffjettar tagħhom idgħajjef is-​sens t’urġenza meħtieġ meta tqis iż-​żmien li fih jgħixu l-​qaddejja t’Alla. Issa huwa ż-​żmien li wieħed joqgħod attent li ma jiġix imqarraq faċilment minn dawk li jżebilħu. Pietru b’hekk iħeġġeġ lill-​qarrejja tiegħu biex ‘jiftakru fil-​kliem li diġà qalu l-​profeti qaddisa.’ (2 Pietru 3:2; Atti 3:22, 23) X’kienu qalu l-​profeti?

Il-qaddejja leali t’Alla f’ħafna okkażjonijiet kienu ġibdu l-​attenzjoni għal kif il-​ġudizzji divini ġabu l-​ħażen fi tmiem. Pietru jfakkar lill-​qarrejja tiegħu dwar l-​Għarqa taʼ żmien Noè li Alla wżaha bħala mezz biex jintervieni meta l-​art kienet mimlija ħażen. Dak id-​Dilluvju torrenzjali effettivament ġab fi tmiem id-​dinja taʼ dak iż-​żmien. Imma Alla ppreserva lil Noè u l-​familja tiegħu ġo arka flimkien maʼ ħlejjaq ħajjin u rappreżentattivi “minn kull xorta.” Leġġendi universali jixhdu favur il-​verità tar-​rakkont Bibliku.a—Ġenesi 6:19; 2 Pietru 3:5, 6.

Dak l-​intervent divin Pietru jsejjaħlu ‘fatt li huwa minsi’ minn xi nies. Imbagħad oħrajn ġew imbennin għal ġo kompjaċenza mill-​uħud taʼ dak iż-​żmien li kienu jwaqqgħu kollox għaż-​żuffjett. Aħna, iżda, ma rridu qatt nitilfu minn quddiem għajnejna dak li Jehovah għamel diġà. Pietru jgħidilna: “Bl-​istess kelma . . . s-​smewwiet u l-​art taʼ llum huma merfugħin għall-​ħruq, miżmumin sa jum il-​ġudizzju, li jkun jum it-​telfien tal-​ħżiena.” (2 Pietru 3:7) Iva, intervent divin irid iseħħ mill-​ġdid.

Alla m’Huwiex Artab

Diġà għaddew millennji sħaħ. Għala stenna daqshekk fit-​tul Alla biex isolvi l-​problemi taʼ l-​umanità? Mill-​ġdid, Pietru jiffoka fuq fatt ieħor. Jgħid: “Dan għandkom tkunu tafu, ħuti għeżież: li quddiem il-​Mulej jum wieħed hu bħal elf sena, u elf sena bħal jum wieħed.” (2 Pietru 3:8) Il-​mod taʼ kif Jehovah jqis iż-​żmien huwa differenti minn tagħna. Għal dak Alla etern, il-​perijodu mill-​ħolqien taʼ Adam s’issa lanqas biss jammonta għal ġimgħa. Imma hi liema hi l-​ħarsa tagħna lejn iż-​żmien, kull millennju u kull jum li jgħaddu jġibuna eqreb lejn it-​twettiq taʼ l-​iskop taʼ Jehovah.

“Min jistenna kull minuta jaraha siegħa” huwa qawl li jimplika illi li wieħed sempliċement joqgħod jistenna xi ġrajja donnu li jtawwal iż-​żmien taʼ meta sseħħ. Madankollu, Pietru jirrakkomanda li ‘nistennew b’ħerqa kbira l-​miġja tal-​Jum t’Alla.’ (2 Pietru 3:12) Kif nistgħu niżviluppaw attitudni mentali li żżommna attenti għall-​imminenza taʼ intervent divin?

Mill-​Kliem għall-​Fatti Hemm Raġel b’Xiber Mustaċċi

Pietru jiffoka l-​attenzjoni fuq għemejjel u fatti. Hu jirreferi għal “atti qaddisin taʼ kondotta” kif ukoll “għemejjel taʼ devozzjoni lejn Alla.” (2 Pietru 3:11, New World Translation) Dawn x’jinvolvu?

Il-qaddej veru t’Alla jaġixxi b’tali mod li jogħġob Lilu. Il-​fidi t’adoratur veru bħal dan hija riflessa fil-​kondotta tiegħu. Dan jiddistingwih minn dawk li sempliċement jitkellmu dwar twemmin f’Alla u fil-​wegħdi tiegħu. Forsi int innotajt li l-​ministeru pubbliku tax-​Xhieda taʼ Jehovah jqegħedhom apparti bħala differenti. Huma jżuruk f’darek biex jiġbdulek l-​attenzjoni għall-​wegħdi t’Alla spjegati fil-​Bibbja. Imma jagħtu xiehda wkoll dwar it-​tamiet u t-​twemmin tagħhom kulfejn jiltaqgħu man-​nies.

Ix-Xhud li jokkupa ruħu b’li jiddikjara l-​fidi tiegħu lil ħaddieħor ikollu t-​twemmin tiegħu rrinforzat u msaħħaħ. L-​espressjoni tipprofondixxi l-​impressjoni u fl-​istess waqt iġġib ferħ u kuntentizza ġewwinin. Meta nħabbru l-​aħbar tajba tas-​Saltna t’Alla, inkunu qegħdin nogħġbu lil Jehovah wkoll. Aħna nafu li hu ‘m’hux se jkun hekk inġust li jinsa dak li nagħmlu u l-​imħabba li nuru lejn ismu,’ bħalma jiddikjara Pawlu l-​appostlu sieħeb Pietru.—Lhud 6:10; Rumani 10:9, 10.

X’inhu r-​riżultat taʼ din il-​preokkupazzjoni b’li nxerrdu l-​aħbar tajba tas-​Saltna matul il-​jiem moribondi taʼ din is-​sistema mill-​agħar preżenti? Mijiet t’eluf taʼ nies taʼ qalb onesta qegħdin jitgħallmu kif jidħlu f’relazzjoni intima maʼ Jehovah, biex jibbenefikaw mill-​qalb tajba mhix mistħoqqa tiegħu u jsibu l-​veru hena fil-​prospett taʼ ħajja eterna fuq art magħmula ġenna.

Għarfien bil-​Quddiem

Għalkemm nafu mill-​Bibbja li Alla Jehovah se jintervieni fiż-​żmien xieraq tiegħu, għandna bżonn nagħtu kas twissija oħra li jagħti Pietru. “Ladarba tafu dan, għassu sewwa li ma tisfgħux maħkuma mill-​iżbalji taʼ dawn in-​nies bla rażan u taqgħu mnejn tinsabu fis-​sod.”—2 Pietru 3:17.

Jehovah żgur li kien jaf minn qabel li xi wħud neqsin mill-​fidi soda setgħu jiskuraġġixxu ruħhom minn dak li donnu hu ttardjar taʼ l-​intervent divin. Hu kien jaf ukoll li l-​influwenza taʼ nies ħżiena setgħet tikkorrompi lill-​qaddejja veri tiegħu jew, għallinqas, iddgħajjef it-​twemmin tagħhom li l-​issantifikar taʼ l-​isem t’Alla huwa qrib. Kemm tkun ħaġa traġika li ma nibqgħux sodi f’dawn il-​jiem finali!

Issa m’huwiex iż-​żmien li jkollna dubji jew inċertezzi dwar dak li se jagħmel Jehovah. (Lhud 12:1) Pjuttost, issa huwa ż-​żmien li nikbru fl-​apprezzament għal dak li ġabet il-​paċenzja taʼ Jehovah​—il-​prospett taʼ salvazzjoni lil miljuni li jsiru parti mill-​folla kbira internazzjonali u jħarsu ’l quddiem lejn li jibqgħu ħajjin wara t-​tribulazzjoni l-​kbira li ġejja. (Apokalissi 7:9, 14) Pietru jħeġġeġ: “Ikbru fil-​grazzja u fl-​għarfien taʼ Sidna u s-​Salvatur tagħna Ġesù Kristu. Lilu glorja issa u għal dejjem.”—2 Pietru 3:18.

“Żommu Rwieħkom fl-​Imħabba taʼ Alla”

Li nkunu okkupati fl-​ippridkar tas-​Saltna u nattendu regolarment għal-​laqgħat Kristjani għall-​qima u l-​istudju tal-​Kelma t’Alla joffrulna protezzjoni. B’hekk, mhux se jkollna ħin biex insiru mħassbin iżżejjed dwar il-​kundizzjonijiet li sejrin mill-​ħażin għall-​agħar fis-​sistema mill-​agħar tal-​lum. Il-​biżaʼ u l-​ansjetajiet m’għandhomx għalfejn jokkupaw ħafna spazju fil-​ħajja taʼ Kristjani veri. (1 Korintin 15:58) Iktar ma jkollna x’nagħmlu f’li naqdu lil Jehovah, iktar jgħaddi malajr il-​ħin.

Ġuda, li kien jgħix fi żmien Pietru u kien ħu tar-​rispett taʼ Ġesù, iħeġġiġna: “Intom, għeżież, ibnu lilkom infuskom fuq il-​fidi l-​aktar qaddisa tagħkom; itolbu fl-​Ispirtu s-​Santu; żommu rwieħkom fl-​imħabba taʼ Alla, stennew il-​ħniena taʼ Sidna Ġesù Kristu għall-​ħajja taʼ dejjem.” (Ġuda 20, 21) Innota l-​importanza t’attitudni pożittiva li tiġi mqanqla permezz taʼ perseveranza fit-​talb. (1 Tessalonikin 5:17) Ġuda mbagħad iżid: “Uru ħniena maʼ dawk li għadhom fid-​dubju; salvawhom u aħtfuhom min-​nar; l-​oħrajn, ħennu għalihom, bil-​biżaʼ, waqt li tistkerrhu saħansitra l-​libsa mċappsa b’ġisimhom.” (Ġuda 22, 23) Kemm huwa vitali li nsaħħu lil xulxin matul dawn iż-​żminijiet diffiċli! U kemm huwa importanti li ma naqgħux fit-​tentazzjoni, billi nużaw dan “jum is-​salvazzjoni” mtawwal bħala skuża għal “żína,” li tant hija prevalenti issa fid-​dinja moralment korrotta tal-​lum.—Ġuda 4; 2 Korintin 6:1, 2.

Billi tagħti kas il-​pariri bl-​imħabba taʼ Pietru, Pawlu, u Ġuda u billi tkun okkupat u attiv fis-​servizz t’Alla, int tistaʼ tistenna bil-​paċenzja l-​intervent minn Jehovah. Imma hekk se tagħmel?

Taħsibhiex darbtejn biex tikkuntattja lix-​Xhieda fil-​lokalità tiegħek għall-​għajnuna biex issaħħaħ il-​fidi tiegħek fil-​wegħda taʼ ħajja taʼ dejjem mill-​Ħallieq. Tgħallem x’inhu meħtieġ biex tikkwalifika ħalli tieħu sehem f’dan ix-​xogħol t’għoti taʼ xiehda globali li qatt ma se jerġaʼ jiġi rripetut u li se jkun konkluż fit-​tribulazzjoni l-​kbira li riesqa. (Mark 13:10) Int imbagħad se jkollok il-​prospett li tgħix fid-​dinja l-​ġdida taʼ tjieba mwiegħda minn Jehovah. (2 Pietru 3:13) Agħti kas it-​tfakkiriet tiegħu! Stenna bil-​paċenzja! Kun okkupat!

[Nota taʼ taħt]

[Stampa f’paġna 7]

Tgħallem issa dwar il-​wegħda minn Alla taʼ Ġenna taʼ l-​Art

[Sors taʼ l-​Istampa f’paġna 5]

Lupu: Animals/Jim Harter/Dover Publications, Inc.; ragħaj żagħżugħ: Children: A Pictorial Archive from Nineteenth-Century Sources/Grafton/Dover Publications, Inc.