Napprezzaw l-​Iskop tad-​Dixxiplina

X’JIĠIK f’moħħok meta tismaʼ l-​kelma “dixxiplina”? Dizzjunarju wieħed jispjega d-​dixxiplina bħala “l-​prattika li wieħed iġiegħel lin-​nies jobdu regoli jew livelli taʼ mġiba, u jikkastigahom meta ma jagħmlux hekk.” Għalkemm din bl-​ebda mod m’hi l-​unika definizzjoni aċċettata, ħafna nies illum jattribwixxu ħsieb negattiv bħal dan f’dak kollu li għandu x’jaqsam mad-​dixxiplina.

Madankollu, il-​Bibbja tippreżenta d-​dixxiplina minn angolu differenti. “Ibni, tistmerrx [“id-​dixxiplina,” NW] tal-​Mulej, u tiddejjaqx bit-​twiddib tiegħu,” kiteb l-​għaref Sultan Salamun. (Proverbji 3:11) Dan il-​kliem mhux qed jirreferi għad-​dixxiplina in ġenerali, imma għad-​“dixxiplina tal-​Mulej” Jehovah, jiġifieri, dixxiplina li hi bbażata fuq il-​prinċipji għoljin t’Alla. Dixxiplina bħal din biss iġġib benefiċċji spiritwali​—saħansitra hija taʼ min jixtieqha. B’kuntrast, id-​dixxiplina li hi bbażata fuq il-​ħsieb tal-​bniedem, li hu f’konflitt mal-​prinċipji għoljin taʼ Jehovah, ħafna drabi hi abbużiva u tweġġaʼ. Dan jispjega għala ħafna għandhom attitudni negattiva lejn id-​dixxiplina.

Għala niġu mħeġġin biex naċċettaw id-​dixxiplina taʼ Jehovah? Fl-​Iskrittura, id-​dixxiplina divina tiġi deskritta bħala espressjoni taʼ l-​imħabba t’Alla għall-​ħlejjaq umani tiegħu. Għalhekk, Salamun kompla jgħid: “Għax il-​Mulej iwiddeb lil min iħobb, u jgħakkes ’l ibnu l-​maħbub.”​—Proverbji 3:12.

Dixxiplina jew Kastig​ —Liema Minnhom?

Id-​dixxiplina kif tintwera fil-​Bibbja fiha ħafna aspetti​—gwida, istruzzjoni, taħriġ, twiddib, korrezzjoni, u saħansitra kastig. Madankollu, f’kull każ, id-​dixxiplina taʼ Jehovah hija mqanqla mill-​imħabba, u l-​iskop tagħha huwa li min jirċiviha jibbenefika. Id-​dixxiplina korrettiva mingħand Jehovah qatt ma tkun biss biex jagħti kastig.

Mill-​banda l-​oħra, il-​kastigi li jiġu minn Alla mhux dejjem jingħataw biex jikkoreġu jew jgħallmu lil min jirċivihom. Per eżempju, minn dik il-​ġurnata stess li dinbu Adam u Eva, huma bdew ibatu l-​konsegwenzi tad-​diżubbidjenza tagħhom. Jehovah keċċiehom mill-​ġnien meraviljuż taʼ l-​Għeden, u huma sfaw vittmi taʼ l-​effett taʼ l-​imperfezzjoni, il-​mard, u x-​xjuħija. Wara mijiet taʼ snin taʼ ħajja mimlija tbatija, huma mietu għal dejjem. Dan kollu tassew kien kastig minn Alla, imma din ma kinitx dixxiplina korrettiva. B’ras iebsa u bla ndiema, Adam u Eva ma setgħux jiġu koreġuti.

Rakkonti oħra taʼ meta Jehovah ikkastiga lil xi ħadd jinkludu d-​Dilluvju fi żmien Noè, il-​qerda taʼ Sodoma u Gomorra, u l-​qerda taʼ l-​armata Eġizzjana fil-​Baħar l-​Aħmar. Dawn lazzjonijiet taʼ Jehovah ma kinux maħsuba biex jipprovdu gwida, istruzzjoni jew taħriġ għal dawk li rċivewhom. Dwar azzjonijiet bħal dawn li Alla ħa biex jikkastiga lil xi ħadd, l-​appostlu Pietru kiteb: ‘Ma ħafirhiex lid-​dinja tal-​qedem​—barra minn Noè, il-​ħabbâr tal-​ġustizzja, u sebgħa min-​nies oħra​—meta bagħat id-​dulluvju fuq id-​dinja tal-​ħażen; ikkundanna l-​bliet taʼ Sodoma u Gomorra biex ikunu maħruqa sa ma jsiru rmied u bihom ħalla tagħlima għal dawk il-​ħżiena li kellhom jiġu wara.’​—2 Pietru 2:5, 6.

Dawn il-​kastigi li ngħataw, f’liema sens ‘ħallew tagħlima għal dawk il-​ħżiena li kellhom jiġu wara’? Fl-​ittra taʼ Pawlu lit-​Tessalonikin, hu jipponta lejn żmienna bħala ż-​żmien li fih Alla, permezz taʼ Ibnu, Ġesù Kristu, se “jħallas lil dawk li ma jagħrfux lil Alla, u ’l dawk li ma jobdux l-​Evanġelju.” Pawlu jżid jgħid: “Dawn għad jitħallsu bil-​piena tat-​telfien taʼ dejjem.” (2 Tessalonikin 1:​8, 9) Ovvjament, kastig bħal dan m’huwiex intenzjonat li jgħallem jew jirfina lil dawk li jirċivuh. Madankollu, meta Jehovah jistieden lill-​aduraturi tiegħu biex jaċċettaw id-​dixxiplina tiegħu, hu ma jkunx qed jirreferi għall-​kastig taʼ wħud midinba li ma jindmux.

Huwa sinifikanti li l-​Bibbja ma tiddeskrivix lil Jehovah primarjament bħala wieħed li jikkastiga. Minflok, ħafna drabi hu jiġi deskritt bħala mgħallem kollu mħabba u wieħed li jħarreġ bil-​paċenzja. (Ġob 36:22; Salm 71:17; Isaija 54:13) Iva, id-​dixxiplina li tingħata minn Alla bħala korrezzjoni hija dejjem akkumpanjata mill-​imħabba u l-​paċenzja. Iktar ma l-​Kristjani jifhmu l-​iskop tad-​dixxiplina iktar se jkunu jistgħu jaċċettaw u jagħtu d-​dixxiplina b’attitudni xierqa.

Id-​Dixxiplina taʼ Ġenituri li Jħobbu

Fil-​familja u fil-​kongregazzjoni Kristjana, hemm bżonn li kulħadd jifhem l-​iskop tad-​dixxiplina. Dan jgħodd speċjalment għal dawk li għandhom pożizzjonijiet t’awtorità, bħalma huma l-​ġenituri. Proverbji 13:24 jistqarr: “Min iżomm lura l-​bastun jobgħod lil ibnu, imma min iħobbu jieħu ħsieb iwiddbu.”

Il-ġenituri kif għandhom jagħtuha d-​dixxiplina? Il-​Bibbja tispjega: “Intom il-​missirijiet, iġġarrbuhomx iżżejjed lil uliedkom; iżda rabbuhom fid-​dixxiplina u t-​twiddib tal-​Mulej.” (Efesin 6:4) Din it-​twissija tiġi ripetuta f’dan il-​kliem: “Intom, missirijiet, la ddejjqux lil uliedkom, għax inkella jistgħu jaqtgħu qalbhom.”​—Kolossin 3:​21.

Ġenituri Kristjani li jifhmu l-​iskop tad-​dixxiplina ma jkunux ħorox. Il-​prinċipju mistqarr fit-​2 Timotju 2:24 jistaʼ jiġi applikat bil-​mod li bih dawn jagħtu d-​dixxiplina. Pawlu kiteb: “Min hu qaddej tal-​Mulej m’għandux joqgħod jitlewwem; imma għandu jkun ħlejju maʼ kulħadd, jinqalaʼ biex jgħallem.” Rabja bla rażan, għajât, u insulti jew xi kummenti li jċekknu lil dak li jkun żgur li ma jaqgħux taħt id-​dixxiplina bl-​imħabba u m’għandu jkollhom ebda post fil-​ħajja Kristjana.​—Efesin 4:31; Kolossin 3:8.

Il-korrezzjoni li tingħata mill-​ġenituri ħafna drabi tinvolvi iktar milli sempliċement jingħata kastig malajr malajr u b’mod deċiżiv. Ħafna tfal għandhom bżonn twiddiba wara l-​oħra biex jirranġaw il-​ħsieb tagħhom. B’hekk, il-​ġenituri jridu jqattgħu ħin magħhom, ikollhom paċenzja, u jaħsbu fil-​fond dwar il-​mod kif huma qegħdin jagħtu d-​dixxiplina. Iridu jżommu ġo moħħhom li t-​tfal għandhom jitrabbew “fid-​dixxiplina u t-​twiddib tal-​Mulej.” Dan ifisser taħriġ li jdum sejjer snin sħaħ.

Rgħajja Kristjani Jiddixxiplinaw bil-​Ħlewwa

L-​istess prinċipji jgħoddu għall-​anzjani Kristjani. Bħala rgħajja kollhom imħabba, huma jaħdmu iebes biex isaħħu lill-​merħla billi jipprovdu istruzzjoni, direzzjoni, u twiddib meta jkun hemm bżonn. Billi jagħmlu hekk, iżommu f’moħħhom l-​iskop veru tad-​dixxiplina. (Efesin 4:11, 12) Jekk jiffokaw biss fuq li jagħtu l-​kastig, huma jkunu sempliċement qed jikkastigaw lil dak li żbalja u xejn iktar. Id-​dixxiplina divina tinvolvi ħafna iktar minn hekk. Imqanqlin mill-​imħabba, l-​anzjani mhux biss jagħtuhom il-​parir imma jkomplu jagħtuhom l-​għajnuna. Minħabba li huma interessati ġenwinament, ħafna drabi huma jagħmlu skeda ħalli jiltaqgħu diversi drabi magħhom biex ikunu jistgħu jinkuraġġuhom u jħarrġuhom.

Skond it-​twissija li nsibu fit-​2 Timotju 2:​25, 26, anki meta l-​anzjani jkunu qed jittrattaw maʼ dawk li ma jaċċettawx id-​dixxiplina mill-​ewwel, huma għandhom iwiddbuhom “bil-​ħlewwa.” L-​iskrittura mbagħad tistqarr l-​iskop tad-​dixxiplina: “Għandu mnejn Alla jagħtihom l-​indiema, u hekk jagħrfu l-​verità u jiġu f’sensihom, u jeħilsu mix-​xbiek tax-​Xitan.”

Kultant, ikun hemm bżonn li dawk li ma jindmux mill-​ħażin li jkunu għamlu jinqatgħu mis-​sħubija tal-​kongregazzjoni. (1 Timotju 1:18-​20) Anki azzjoni ħarxa bħal din xorta għandha tiġi kunsidrata bħala dixxiplina, mhux biss kastig. Minn żmien għal żmien, l-​anzjani jagħmlu mira li jżuru lil dawk maqtugħin mis-​sħubija li ma jkunux qegħdin jieħdu sehem b’mod attiv f’xi ħaġa mhix xierqa. Waqt żjajjar bħal dawn, l-​anzjani jaġixxu fi qbil maʼ l-​iskop proprju tad-​dixxiplina billi juru x’passi huma meħtieġa biex persuna terġaʼ lura lejn il-​kongregazzjoni Kristjana.

Jehovah Huwa l-​Imħallef Perfett

Il-​ġenituri, ir-​rgħajja Kristjani, kif ukoll oħrajn li għandhom awtorità mill-​Iskrittura biex jamministraw id-​dixxiplina għandhom jieħdu din ir-​responsabbiltà bis-​serjetà. M’għandhomx jiġġudikaw lil oħrajn bħala li huwa impossibbli li jiġu koreġuti. Għalhekk, id-​dixxiplina tagħhom qatt m’għandha tkun kastig kontrihom personalment jew tingħata bħala vendikazzjoni.

Veru, il-​Bibbja tirreferi għal Jehovah bħala l-​wieħed li jagħti l-​kastig aħrax u finali. Fil-​fatt, l-​Iskrittura tgħid li hi “ħaġa tal-​biżaʼ li taqaʼ f’idejn Alla l-​ħaj!” (Lhud 10:31) Imma l-​ebda bniedem m’għandu jqabbel lilu nnifsu maʼ Jehovah f’dan ir-​rigward jew fi kwalunkwe ħaġa oħra. U ħadd m’għandu għalfejn iħossu li hija xi ħaġa tal-​biżaʼ li jiġi taħt idejn xi ġenitur jew ċertu anzjan fil-​kongregazzjoni.

Jehovah għandu l-​abbiltà li meta jagħti d-​dixxiplina, din tkun bilanċjata perfettament. Il-​bnedmin m’għandhomx din l-​abbiltà. Alla jistaʼ jaqra l-​qalb u jiddetermina meta xi ħadd ma jistax jiġi koreġut, u għalhekk ikollu bżonn jirċievi kastig deċiżiv u finali. Min-​naħa l-​oħra, il-​bnedmin m’humiex kapaċi jiġġudikaw b’dan il-​mod. Minħabba f’hekk, meta jkun hemm bżonn li tingħata dixxiplina, dawk li għandhom pożizzjoni t’awtorità għandhom dejjem jagħtuha bi skop taʼ korrezzjoni.

Naċċettaw id-​Dixxiplina taʼ Jehovah

Ilkoll kemm aħna għandna bżonn id-​dixxiplina taʼ Jehovah. (Proverbji 8:33, NW) Fil-​fatt, għandna nixxennqu għal dixxiplina li hi bbażata fuq il-​Kelma t’Alla. Hekk kif nistudjaw il-​Kelma t’Alla, inkunu nistgħu naċċettaw id-​dixxiplina li tiġi direttament mingħand Jehovah permezz taʼ l-​Iskrittura. (2 Timotju 3:​16, 17) Xi drabi, però, se nirċievu dixxiplina mingħand sħabna l-​Kristjani. Jekk nifhmu l-​intenzjoni vera għalfejn tingħata dixxiplina bħal din se nkunu nistgħu naċċettawha bil-​qalb.

L-appostlu Pawlu ammetta: “Tassew li bħalissa kull twiddiba ma tferraħniex, imma tnikkitna.” Wara żied: “Iżda mbagħad, lil dawk li jkunu tħarrġu biha, hija troddilhom il-​frott taʼ ħajja mimlija bis-​sliem u l-​ġustizzja.” (Lhud 12:11) Id-​dixxiplina taʼ Jehovah hija turija taʼ l-​imħabba profonda li għandu għalina. Sew jekk nirċievu u sew jekk nagħtu d-​dixxiplina, ejja nżommu f’moħħna l-​iskop tad-​dixxiplina divina u nisimgħu mill-​parir għaqli tal-​Bibbja: ‘Żomm [“mad-​dixxiplina,” NW], u tħalliha qatt, ħarisha sewwa, għax hi ħajtek.’​—Proverbji 4:13.

[Stampi f’paġna 21]

Dawk li jidinbu u ma jindmux jirċievu l-​kastig taʼ ġudizzju mingħand Jehovah, u mhux id-​dixxiplina korrettiva tiegħu

[Stampi f’paġna 22]

Imqanqlin mill-​imħabba, l-​anzjani jqattgħu l-​ħin jagħmlu riċerka sabiex jgħinu lil dawk li jkunu żbaljaw

[Stampi f’paġna 23]

Il-​ġenituri bil-​paċenzja u bl-​imħabba jagħtu d-​“dixxiplina u t-​twiddib tal-​Mulej”