Ibqgħu Mexjin Bħalma Mexa Ġesù Kristu
“Min jgħid li għadu f’unjoni [m’Alla] għandu l-obbligu li hu wkoll jibqaʼ miexi bħalma mexa hu [Ġesù].”—1 ĠWANNI 2:6.
1, 2. X’jinvolvi li nħarsu fiss lejn Ġesù?
L-APPOSTLU PAWLU kiteb: “Ħa niġru bis-sabar it-tiġrija li tqiegħdet quddiemna, waqt li nħarsu fiss lejn Ġesù, l-Aġent Ewlieni u Dak li jipperfezzjona l-fidi tagħna.” (Ebrej 12:1, 2) Il-mixi fit-triq tal-fedeltà jirrikjedi li nħarsu fiss lejn Ġesù Kristu.
2 Il-kelma bil-lingwa oriġinali għal “ħares fiss,” bħalma ntużat fl-Iskrittura Griega Kristjana, tfisser “li tidderieġi l-attenzjoni taʼ dak li jkun mingħajr aljenazzjoni,” “biex tħares lil hinn minn ħaġa sabiex tħares lejn oħra,” “li tikkonċentra l-ħarsa fuq xi ħaġa.” Xogħol taʼ referenza wieħed josserva: “Hekk kif il-ġerrej Grieg fl-istadju jdawwar l-attenzjoni tiegħu mit-triq tat-tiġrija u mill-mira li qed jiġri lejha għal fuq il-folol taʼ spettaturi, il-veloċità tiegħu tonqos. L-istess ħaġa jistaʼ jiġri lill-Kristjani.” L-aljenazzjonijiet jistgħu jtellfu l-progress spiritwali tagħna. Għandna nħarsu fiss lejn Ġesù Kristu. U x’qed infittxu fl-Aġent Ewlieni? It-terminu Grieg tradott “aġent ewlieni” jfisser “mexxej ewlieni, wieħed li jieħu t-tmexxija fi kwalunkwe ħaġa, u b’hekk iħalli l-eżempju.” Li nħarsu fiss lejn Ġesù jirrikjedi li nsegwu l-eżempju tiegħu.
3, 4. (a) Li nimxu kif mexa Ġesù Kristu x’jirrikjedi min-naħa tagħna? (b) Liema mistoqsijiet jeħtieġu l-attenzjoni tagħna?
3 Il-Bibbja tgħid: “Min jgħid li għadu f’unjoni [m’Alla] għandu l-obbligu li hu wkoll jibqaʼ miexi bħalma mexa hu [Ġesù].” (1 Ġwanni 2:6) Irridu nibqgħu f’unjoni m’Alla billi nosservaw il-kmandamenti taʼ Ġesù bħalma hu osserva dawk taʼ Missieru.—Ġwanni 15:10.
4 Għalhekk, biex nimxu kif mexa Ġesù jirrikjedi li nosservawh bir-reqqa bħala l-Mexxej Ewlieni u li nsegwu l-passi tiegħu mill-qrib. Il-mistoqsijiet importanti li għandna nikkunsidraw f’dan ir-rigward huma: Kristu kif imexxina llum? Kif għandna niġu effettwati meta nimitaw il-mod kif mexa hu? X’inhuma l-benefiċċji li ngawdu jekk inżommu mal-mudell li ħalla Ġesù Kristu?
Kif Kristu Jmexxi lis-Segwaċi Tiegħu
5. Qabel ma telaʼ fis-smewwiet, Ġesù liema wegħda għamel lis-segwaċi tiegħu?
5 Qabel ma telaʼ fis-smewwiet, Ġesù Kristu rxoxtat deher lid-dixxipli tiegħu u tahom xogħol importanti. Hu qal: “Għalhekk, morru u agħmlu dixxipli min-nies tal-ġnus kollha.” F’din l-okkażjoni l-Mexxej Ewlieni wiegħed ukoll li kien se jkun magħhom hekk kif iwettqu dan l-inkarigu, billi qal: “Ara, jien magħkom il-jiem kollha sa tmiem is-sistema.” (Mattew 28:19, 20) Ġesù Kristu kif qiegħed mas-segwaċi tiegħu f’dan iż-żmien tal-konklużjoni taʼ din is-sistema dinjija?
6, 7. Ġesù kif imexxina permezz taʼ l-ispirtu qaddis?
6 Ġesù qal: “L-ajjutant, l-ispirtu qaddis, li l-Missier jibgħat f’ismi, jgħallimkom kollox u jfakkarkom kulma għedtilkom.” (Ġwanni 14:26) L-ispirtu qaddis, mibgħut f’isem Ġesù, jiggwidana u jsaħħaħna llum. Ifissrilna affarijiet spiritwali u jgħinna nifhmu “saħansitra l-affarijiet profondi t’Alla.” (1 Korintin 2:10) Iktar minn hekk, il-kwalitajiet divini taʼ “l-imħabba, il-ferħ, il-paċi, is-sabar fit-tul, il-qalb tajba, it-tjubija, il-fidi, il-ħlewwa, ir-rażna” huma “l-frott taʼ l-ispirtu.” (Galatin 5:22, 23) Bl-għajnuna taʼ l-ispirtu qaddis, aħna nistgħu nikkultivaw dawn il-kwalitajiet.
7 Hekk kif nistudjaw l-Iskrittura u nistinkaw biex napplikaw dak li nitgħallmu, l-ispirtu taʼ Ġeħova jgħinna nikbru fl-għerf, id-dehen, il-fehma, it-tagħrif, il-ġustizzja, u l-għaqal. (Proverbji 2:1-11) L-ispirtu qaddis jgħinna wkoll biex nissaportu t-tentazzjonijiet u l-provi. (1 Korintin 10:13; 2 Korintin 4:7; Filippin 4:13) Il-Kristjani huma mħeġġin biex ‘jitnaddfu minn kull tinġis tal-laħam u taʼ l-ispirtu, u jipperfezzjonaw il-qdusija.’ (2 Korintin 7:1) Nistgħu aħna tassew ngħixu fi qbil maʼ dak li jirrikjedi Alla b’konnessjoni mal-qdusija, jew l-indafa, mingħajr l-għajnuna taʼ l-ispirtu qaddis? Wieħed mill-mezzi li Ġesù juża biex imexxina llum hu l-ispirtu qaddis, li Alla Ġeħova ta l-awtorità lil Ibnu biex jużah.—Mattew 28:18.
8, 9. Kristu kif juża “l-ilsir leali u għaqli” biex jipprovdi tmexxija?
8 Ikkunsidra mezz ieħor li bih Kristu jmexxi l-kongregazzjoni taʼ llum. Meta kkummenta dwar il-preżenza tiegħu u l-konklużjoni taʼ din is-sistema dinjija, Ġesù qal: “Min hu tassew l-ilsir leali u għaqli li sidu ħatru fuq in-nies taʼ daru, biex jagħtihom l-ikel fiż-żmien xieraq? Hieni hu dak l-ilsir li sidu, meta jasal, isibu jagħmel hekk! Tassew ngħidilkom, Hu jaħtru fuq kulma għandu.”—Mattew 24:3, 45-47.
9 Is-‘sid’ hu Ġesù Kristu. L-“ilsir” hu l-grupp taʼ Kristjani midlukin fuq l-art. Din il-klassi taʼ l-ilsir hi fdata bl-inkarigu biex tieħu ħsieb l-interessi taʼ Ġesù fuq l-art u biex tipprovdi ikel spiritwali fiż-żmien xieraq. Grupp żgħir taʼ indokraturi kwalifikati minn fost dawk li flimkien jissejħu “l-ilsir leali u għaqli” jifformaw il-Ġemgħa li Tiggverna, billi jaqdu bħala rappreżentanti tal-klassi taʼ l-ilsir. Huma jidderieġu x-xogħol taʼ l-ippridkar tas-Saltna madwar id-dinja u jipprovdu l-ikel spiritwali fiż-żmien xieraq. B’hekk, Kristu jmexxi l-kongregazzjoni permezz taʼ “l-ilsir leali u għaqli” u l-Ġemgħa li Tiggverna tiegħu li huma midlukin bl-ispirtu qaddis.
10. X’għandha tkun l-attitudni tagħna lejn l-anzjani, u għala?
10 Turija oħra tat-tmexxija taʼ Kristu huma l-“irġiel bħala għotjiet”—l-anzjani, jew l-indokraturi Kristjani. Huma ngħataw “bil-ħsieb li jerġgħu jiġu aġġustati l-qaddisin, għal xogħol ministerjali, biex jinbena l-ġisem tal-Kristu.” (Efesin 4:8, 11, 12) Dwarhom, Ebrej 13:7 jgħid: “Ftakru f’dawk li qed imexxu fostkom u li ħabbrulkom il-kelma t’Alla, u imitaw il-fidi tagħhom, waqt li tosservaw bir-reqqa r-riżultat tal-kondotta tagħhom.” L-anzjani jieħdu t-tmexxija fil-kongregazzjoni. Ladarba jimitaw lil Ġesù Kristu, il-fidi tagħhom hi taʼ min jimitaha. (1 Korintin 11:1) Nistgħu nuru l-gratitudni tagħna għall-arranġament taʼ l-anzjani billi nkunu ubbidjenti u sottomessi lejn dawn l-“irġiel bħala għotjiet.”—Ebrej 13:17.
11. Kristu b’liema modi jmexxi lis-segwaċi tiegħu llum, u x’hemm involut biex nimxu bħalma mexa hu?
11 Iva, Ġesù Kristu jmexxi lis-segwaċi tiegħu llum permezz taʼ l-ispirtu qaddis, “l-ilsir leali u għaqli,” u l-anzjani tal-kongregazzjoni. Biex nimxu bħalma mexa Kristu għandna bżonn nifhmu l-modi tiegħu taʼ tmexxija u nissottomettu ruħna għalihom. Jirrikjedi wkoll li nimitaw il-mod kif hu jimxi. L-appostlu Pietru kiteb: “Għal dan il-mod taʼ ħajja kontu msejħin, għax saħansitra Kristu sofra għalikom, u ħallielkom mudell biex timxu mill-qrib wara l-passi tiegħu.” (1 Pietru 2:21) B’liema mod għandna niġu effettwati meta nsegwu l-mudell perfett taʼ Ġesù?
Kun Raġunevoli Meta Teżerċita l-Awtorità
12. Liema aspett mill-eżempju taʼ Kristu hu taʼ interess partikulari għall-anzjani fil-kongregazzjoni?
12 Għalkemm Ġesù rċieva awtorità li ma titqabbel maʼ xejn mingħand Missieru, hu kien raġunevoli bil-mod kif użaha. Kulħadd fil-kongregazzjoni—partikolarment l-indokraturi—għandhom iħallu lil kulħadd ikun jaf ‘kemm huma raġunevoli.’ (Filippin 4:5; 1 Timotju 3:2, 3) Ladarba l-anzjani għandhom ċertu ammont t’awtorità fil-kongregazzjoni, huwa essenzjali li jsegwu l-passi taʼ Kristu meta jeżerċitawha.
13, 14. L-anzjani b’liema mod jistgħu jimitaw lil Kristu hekk kif jinkuraġġixxu lil oħrajn biex jaqdu lil Alla?
13 Ġesù kkunsidra l-limitazzjonijiet tad-dixxipli tiegħu. Ma talabx mingħandhom iktar milli setgħu jagħtu. (Ġwanni 16:12) Mingħajr m’għamlilhom pressjoni, Ġesù inkuraġġixxa lis-segwaċi tiegħu biex ‘jistinkaw kemm jifilħu’ sabiex jagħmlu r-rieda t’Alla. (Luqa 13:24) Għamel dan billi ħa t-tmexxija u messilhom qalbhom. B’mod simili, l-anzjani Kristjani llum ma jintimidawx lil oħrajn biex jaqdu lil Alla minħabba mistħija jew ħtija. Minflok, jinkuraġġuhom biex jaqdu lil Ġeħova għax iħobbu lilu u lil Ġesù, kif ukoll il-proxxmu tagħhom.—Mattew 22:37-39.
14 Ġesù m’abbużax mill-awtorità li ngħata u ma kkontrollax ħajjiet in-nies. La għamel livelli tant għoljin li ħadd ma setaʼ jilħaqhom u lanqas ma ta numru bla għadd taʼ regoli. Il-metodu tiegħu kien li jqanqal lil oħrajn billi jilħqilhom qalbhom bil-prinċipji tal-liġijiet li ngħataw permezz taʼ Mosè. (Mattew 5:27, 28) Billi jimitaw lil Ġesù Kristu, l-anzjani jżommu lura milli jagħmlu regoli jew jinsistu fuq l-opinjonijiet persunali tagħhom. Fi kwistjonijiet bħall-ilbies u d-dehra jew ir-rikreazzjoni u d-divertiment, l-anzjani jipprovaw jilħqu l-qalb billi jużaw prinċipji Bibliċi, bħal dawk imniżżlin f’Mikea 6:8; l-1 Korintin 10:31-33; u l-1 Timotju 2:9, 10.
Uri Simpatija u Maħfra
15. Ġesù kif wieġeb għan-nuqqasijiet tad-dixxipli tiegħu?
15 Kristu ħalla mudell għalina biex insegwu l-mod kif kien jittratta n-nuqqasijiet u l-iżbalji tad-dixxipli tiegħu. Ikkunsidra żewġ ġrajjiet mill-aħħar lejl tiegħu fuq l-art bħala bniedem. Wara li wasal Ġetsemani, Ġesù “ħa miegħu lil Pietru u lil Ġakbu u lil Ġwanni” u qalilhom biex ‘jibqgħu għassa.’ Imbagħad, “mexa ftit ’il quddiem, inxteħet fl-art, u beda jitlob.” X’ħin irritorna, “sabhom reqdin.” Ġesù kif wieġeb? Hu qal: “Naturalment, l-ispirtu hu ħerqan imma l-laħam dgħajjef.” (Marku 14:32-38) Minflok ma ċanfar bl-aħrax lil Pietru, Ġakbu, u Ġwanni, hu esprima simpatija! F’dik il-lejla stess, Pietru ċaħad lil Ġesù tliet darbiet. (Marku 14:66-72) Ġesù kif ittratta lil Pietru wara dan? ‘Il-Mulej ġie mqajjem u deher lil Xmun [Pietru].’ (Luqa 24:34) Il-Bibbja tgħid: “Deher lil Kefa, imbagħad lit-tnax.” (1 Korintin 15:5) Minflok ma ħassu rrabjat, Ġesù ħafer lill-appostlu li kien niedem u saħħu. Iktar tard, Ġesù fada lil Pietru b’responsabbiltajiet kbar.—Atti 2:14; 8:14-17; 10:44, 45.
16. Kif nistgħu nimxu bħalma mexa Ġesù meta sħabna fit-twemmin jonqsuna jew iweġġgħuna b’xi mod?
16 Meta sħabna fit-twemmin jonqsuna jew iweġġgħuna b’xi mod minħabba l-imperfezzjoni umana, m’għandniex aħna wkoll nuru simpatija u naħfru bħalma għamel Ġesù? Pietru ħeġġeġ lil sħabu fit-twemmin: “Intom ilkoll kunu fehma waħda, billi tħossu għal xulxin, turu affezzjoni lejn l-aħwa, tagħdru b’tenerezza, tkunu umli, u tpattux ħsara bi ħsara jew tgħajjir b’tgħajjir, imma, għall-kuntrarju, bierku.” (1 Pietru 3:8, 9) Xi ngħidu jekk xi ħadd jonqos li jittrattana bħalma kieku jittrattana Ġesù, billi ma jurix simpatija jew ma jaħfirx? Anki f’dawn iċ-ċirkustanzi aħna obbligati li nipprovaw nimitaw lil Ġesù u nwieġbu bħalma kieku jwieġeb hu.—1 Ġwanni 3:16.
Poġġi l-Interessi tas-Saltna l-Ewwel
17. X’jurina li Ġesù għamel it-twettiq tar-rieda t’Alla l-ewwel post f’ħajtu?
17 Irridu nimxu bħalma mexa Ġesù Kristu saħansitra b’mod ieħor. L-iktar ħaġa importanti fil-ħajja taʼ Ġesù kienet li jiddikjara l-aħbar tajba tas-Saltna t’Alla. Wara li ppriedka lill-mara Samaritana ħdejn il-belt taʼ Sikar fis-Samarija, Ġesù qal lid-dixxipli tiegħu: “L-ikel tiegħi hu li nagħmel ir-rieda taʼ dak li bagħatni u li ntemm xogħlu.” (Ġwanni 4:34) Il-fatt li Ġesù għamel ir-rieda taʼ Missieru sostnieh; kien nutrittiv, sodisfaċenti, u rifreskanti daqs l-ikel għalih. Se tkun ħajjitna bla skop u bla sodisfazzjon jekk nimitaw lil Ġesù billi nibqgħu ffokati fuq li nagħmlu r-rieda t’Alla?
18. Liema barkiet jirriżultaw meta tinkuraġġixxi lit-tfal biex jibdew jaqdu fis-servizz full-time?
18 Meta l-ġenituri jinkuraġġixxu lil uliedhom biex jibdew fis-servizz full-time, huma flimkien maʼ wliedhom jirċievu ħafna barkiet. Missier taʼ tewmin inkuraġġixxa lis-subien tiegħu biex jibdew fis-servizz taʼ pijunier minn mindu kienu żgħar ħafna. Wara li spiċċaw l-edukazzjoni sekulari tagħhom, it-tewmin saru pijunieri. Meta jirrifletti dwar il-ferħ li esperjenza bħala riżultat, dan il-missier jikteb: “Is-subien tagħna ma ddiżappuntawniex. Bi pjaċir nistgħu ngħidu, ‘wirt il-Mulej huma l-ulied.’” (Salm 127:3) U t-tfal kif jibbenefikaw jekk jaqdu fis-servizz full-time? Omm taʼ ħamest itfal tgħid: “Ix-xogħol taʼ pijunier għen lit-tfal tiegħi kollha biex jiżviluppaw relazzjoni iktar mill-qrib maʼ Ġeħova, tjiebu fid-drawwiet taʼ studju persunali tagħhom, għenhom jitgħallmu kif iqassmu l-ħin tagħhom bil-għaqal, u għenhom jitgħallmu jagħmlu l-affarijiet spiritwali l-ewwel post f’ħajjithom. Għalkemm ilkoll kemm huma kellhom jagħmlu aġġustamenti, ħadd minnhom ma jiddispjaċih mit-triq li għażel li jieħu.”
19. Iż-żgħażagħ liema pjanijiet għall-futur għandhom jikkunsidraw bil-għaqal?
19 Żgħażagħ, x’inhuma l-pjanijiet tagħkom għall-futur? Qed tfittxu li tibbrillaw f’xi qasam professjonali? Jew qed taħdmu bil-mira li jkollkom karriera fis-servizz full-time? Pawlu wissa: “Oqogħdu attenti bis-sħiħ li ma timxux bħal nies bla għaqal imma bħal nies għorrief, u użaw il-ħin bl-aħjar mod, għax il-jiem huma ħżiena.” Hu jżid: “Minħabba dan tibqgħux tkunu bla raġuni, imma ibqgħu ifhmu x’inhi r-rieda taʼ Ġeħova.”—Efesin 5:15-17.
Kun Leali
20, 21. Ġesù b’liema mod wera l-lealtà, u kif nistgħu nimitaw il-lealtà tiegħu?
20 Biex timxi bħalma mexa Ġesù jirrikjedi li timita l-lealtà tiegħu. Rigward il-lealtà taʼ Ġesù, il-Bibbja tistqarr: “Għalkemm kien jeżisti fis-sura t’Alla, ma qagħadx jaħseb li għandu jaħtaf, jiġifieri, li għandu jkun ugwali m’Alla. Le, iżda xejjen lilu nnifsu u ħa s-sura taʼ lsir u sar jixbah lill-bnedmin. Iktar minn hekk, meta sab ruħu f’għamla taʼ bniedem, umilja ruħu u sar ubbidjenti sal-mewt, iva, sal-mewt fuq zokk tat-tortura.” Ġesù b’lealtà żamm mas-sovranità taʼ Ġeħova billi ssottometta ruħu għal dak li Alla ried minnu. Hu sar ubbidjenti sal-punt li sofra l-mewt fuq zokk tat-tortura. Aħna għandna ‘nżommu din l-attitudni mentali’ u b’lealtà nissottomettu ruħna biex nagħmlu r-rieda t’Alla.—Filippin 2:5-8.
21 Ġesù wera lealtà wkoll maʼ l-appostli leali tiegħu. Minkejja d-dgħjufijiet u l-imperfezzjonijiet tagħhom, Ġesù ħabbhom “sa l-aħħar.” (Ġwanni 13:1) B’mod simili, m’għandniex inħallu l-imperfezzjonijiet taʼ ħutna jġagħluna nadottaw attitudni li nikkritikaw.
Żomm mal-Mudell li Ħalla Ġesù
22, 23. X’inhuma l-benefiċċji taʼ li nżommu mal-mudell li ħalla Ġesù?
22 M’għandniex xi ngħidu, bħala bnedmin imperfetti, aħna ma nistgħux nimxu preċiżament fil-passi tax-Xempju perfett tagħna. Madankollu, nistgħu nistinkaw biex insegwu l-passi tiegħu mill-qrib. Biex nagħmlu dan jirrikjedi li nifhmu u nissottomettu ruħna għall-mod taʼ tmexxija taʼ Kristu u nżommu mal-mudell li hu ħalla.
23 Jekk insiru nimitaw lil Kristu dan se jwassalna għal ħafna barkiet. Il-ħajja tagħna se jkollha iktar tifsir u sodisfazzjon għaliex inkunu ffokati fuq li nagħmlu r-rieda t’Alla minflok tagħna stess. (Ġwanni 5:30; 6:38) Se ngawdu kuxjenza tajba. Il-mod kif nimxu se jsir taʼ min jimitah. Ġesù stieden lil dawk kollha li kienu mħabbtin u mgħobbijin biex imorru għandu u jsibu serħan għal ruħhom. (Mattew 11:28-30) Meta nsegwu l-eżempju taʼ Ġesù, aħna wkoll nistgħu nserrħu lil oħrajn bis-sħubija tagħna. Għalhekk, ejja nkomplu nimxu bħalma mexa Ġesù.
Tiftakar Int?
• Kristu kif imexxi lis-segwaċi tiegħu llum?
• L-anzjani kif jistgħu jsegwu t-tmexxija taʼ Kristu f’li jeżerċitaw l-awtorità tagħhom mogħtija minn Alla?
• Kif nistgħu nsegwu l-eżempju taʼ Ġesù meta nittrattaw man-nuqqasijiet t’oħrajn?
• Iż-żgħażagħ kif jistgħu jpoġġu l-interessi tas-Saltna l-ewwel?
[Stampa f’paġna 23]
L-anzjani Kristjani jgħinuna nsegwu t-tmexxija taʼ Kristu
[Stampi f’paġna 24]
Żgħażagħ, liema pjanijiet qed tagħmlu sabiex ikollkom ħajja Kristjana sodisfaċenti?