Tagħtix Wisaʼ lix-​Xitan

“Tagħtux ċans lix-​Xitan.”—EFESIN 4:​27, Byington.

1. Ħafna għala bdew jiddubitaw jekk ix-​Xitan jeżistix jew le?

GĦAL sekli sħaħ, ħafna nies kienu jaħsbu li x-​Xitan għandu l-​qrun, liebes l-​aħmar, u juża furkettun biex jitfaʼ lin-​nies ħżiena fl-​infern tan-​nar. Il-​Bibbja ma turix li dan huwa minnu. Madankollu, bla dubju taʼ xejn, dawn l-​ideat żbaljati ġagħlu lil miljuni taʼ nies jiddubitaw jekk ix-​Xitan jeżistix verament jew jekk dan it-​terminu jirreferix biss għall-​prinċipju tal-​ħażen.

2. X’inhuma xi fatti li tagħti l-​Iskrittura dwar ix-​Xitan?

² Il-​Bibbja tipprovdi evidenza taʼ xhieda li raw b’għajnejhom stess u testimonjanza ċara li x-​Xitan jeżisti. Ġesù Kristu rah fil-​qasam taʼ l-​ispirti u tkellem miegħu meta kien fuq l-​art. (Ġob 1:6; Mattew 4:​4-11) Għalkemm l-​Iskrittura ma turix x’inhu l-​isem oriġinali tiegħu, din issejjaħlu x-​Xitan (li jfisser “Kalunnjatur”) minħabba li hu kkalunnja lil Alla. Hu jissejjaħ ukoll Satana (li jfisser “Avversarju”), ladarba hu jopponi lil Ġeħova. Satana x-​Xitan huwa msejjaħ “is-​serp oriġinali,” milli jidher minħabba li uża s-​serp biex iqarraq b’Eva. (Rivelazzjoni 12:9; 1 Timotju 2:14) Hu magħruf ukoll bħala l-​“Ħażin.”—Mattew 6:13.a

3. Liema mistoqsija se nikkunsidraw?

³ Bħala qaddejja taʼ Ġeħova, qatt ma rridu nkunu b’xi mod jew ieħor bħal Satana, l-​akbar għadu taʼ luniku Alla veru. Għalhekk, irridu nisimgħu mill-​parir taʼ l-​appostlu Pawlu: “Tagħtux ċans lix-​Xitan.” (Efesin 4:​27, Byington) Mela allura, liema huma xi karatteristiki li għandu Satana u li m’għandniex nimitaw?

Timitax lill-​Kalunnjatur il-​Kbir

4. Il-​“Ħażin” kif ikkalunnja lil Alla?

⁴ Il-​“Ħażin” jistħoqqlu jissejjaħ ix-​Xitan, għax hu kalunnjatur. Kalunnja hija stqarrija falza, mimlija mibegħda, u tħassar ir-​reputazzjoni taʼ xi ħadd. Alla kkmanda lil Adam: “Mis-​siġra taʼ tagħrif it-​tajjeb u l-​ħażin, la tikolx minnha, għax dak in-​nhar li tiekol minnha żgur li tmut.” (Ġenesi 2:17) Eva kienet taf dwar dan, imma permezz tas-​serp, ix-​Xitan qalilha: “Le, żgur ma tmutux. Imma Alla jaf li dak in-​nhar li tieklu minnu jinfetħu għajnejkom u ssiru bħal allat, li jafu t-​tajjeb u l-​ħażin.” (Ġenesi 3:​4, 5) Din kienet kalunnja kollha mibegħda kontra Alla Ġeħova!

5. Dijotrefe għala kellu jagħti kont taʼ l-​ikkalunnjar tiegħu?

⁵ L-​Iżraelin ġew kmandati: “Tmurx ixxerred qlajjaʼ fuq niesek.” (Levitiku 19:16) L-​appostlu Ġwanni qal dan dwar kalunnjatur taʼ żmienu: “Ktibt xi ħaġa lill-​kongregazzjoni, imma Dijotrefe, li jħobb ikollu l-​pożizzjoni ewlenija fosthom, ma jilqaʼ xejn mingħandna bir-​rispett. Huwa għalhekk li, jekk niġi, infakkar l-​għemil tiegħu li qed ikompli jwettaq u l-​kliem mill-​agħar li qed ipaċpaċ fuqna.” (3 Ġwanni 9, 10) Dijotrefe kien qed jikkalunnja lil Ġwanni, u għalhekk kellu jagħti kont taʼ l-​azzjonijiet tiegħu. Liema Kristjan leali jixtieq ikun bħal Dijotrefe u jimita lil Satana, il-​kalunnjatur il-​kbir?

6, 7. Għala għandna nevitaw li nikkalunnjaw lil xi ħadd?

⁶ Spiss, isiru stqarrijiet taʼ kkalunnjar u akkużi foloz kontra l-​qaddejja taʼ Ġeħova. “Il-​qassisin ewlenin u l-​iskribi bdew iqumu bil-​wieqfa u jakkużawh [lil Ġesù] bl-​herra.” (Luqa 23:10) Pawlu kien akkużat b’mod falz mill-​Qassis il-​Kbir Ananija u oħrajn. (Atti 24:​1-8) U l-​Bibbja titkellem dwar Satana bħala li hu “l-​akkużatur taʼ ħutna, dak li lejl u nhar jakkużahom quddiem Alla tagħna.” (Rivelazzjoni 12:10) Dawk l-​aħwa li ġew akkużati b’mod falz huma l-​Kristjani midlukin li qegħdin fuq l-​art f’dawn l-​aħħar jiem.

⁷ L-​ebda Kristjan ma jrid jikkalunnja lil xi ħadd jew jagħmel xi akkużi foloz. Madankollu, dan jistaʼ jiġri jekk ma nisimgħux il-​fatti kollha qabel nixhdu kontra xi ħadd. Skond il-​Liġi Mosajka, jekk xi ħadd kien jixhed b’mod falz apposta setaʼ jingħata l-​mewt. (Eżodu 20:16; Dewteronomju 19:​15-19) Iktar minn hekk, fost l-​affarijiet li Ġeħova jobgħod hemm “fomm li jixhed bil-​qerq il-​gideb.” (Proverbji 6:​16-​19) Mela żgur li ma rridux nimitaw lil dak li hu minn taʼ quddiem biex jikkalunnja u jakkuża b’mod falz.

Warrab il-​Mogħdijiet tal-​Qattiel Oriġinali

8. Ix-​Xitan b’liema mod “kien qattiel meta beda”?

⁸ Ix-​Xitan huwa qattiel. “Dan kien qattiel meta beda,” qal Ġesù. (Ġwanni 8:44) Meta dawwar lil Adam u Eva ’l bogħod minn Alla, Satana għall-​ewwel darba sar qattiel. Hu ġab il-​mewt fuq l-​ewwel koppja umana u n-​nisel tagħha. (Rumani 5:12) Tajjeb ninnotaw li din l-​azzjoni ma tistax tiġi attribwita lil xi prinċipju tal-​ħażen, imma bilfors lil xi persuna.

9. Bħalma juri l-​1 Ġwanni 3:​15, kif nistgħu nsiru qattiela?

⁹ Wieħed mill-​Għaxar Kmandamenti li ġew mogħtija lil Iżrael kien “la toqtolx.” (Dewteronomju 5:17) L-​appostlu Pietru qalilhom hekk lill-​Kristjani: “Ħalli ħadd minnkom ma jsofri bħala qattiel.” (1 Pietru 4:15) Għalhekk, bħala l-​qaddejja taʼ Ġeħova, aħna m’aħniex se nikkommettu qtil. Madankollu, jekk aħna nobogħdu lil wieħed minn sħabna l-​Kristjani, tant li nixtiquh mejjet, inkunu ħatja quddiem Alla. “Kulmin jobgħod lil ħuh hu qattiel,” kiteb l-​appostlu Ġwanni, “u tafu li f’ebda qattiel ma tibqaʼ l-​ħajja taʼ dejjem.” (1 Ġwanni 3:15) L-​Iżraelin kienu kmandati: “La tbejjitx lil ħuk f’qalbek.” (Levitiku 19:17) Jalla ma ndumux ma nirranġaw kwalunkwe problema li għandha mnejn tqum bejnna u bejn wieħed minn sħabna fit-​twemmin, sabiex il-​qattiel Satana ma jkissirx l-​unità Kristjana li ngawdu.—Luqa 17:​3, 4.

Ibqaʼ Sod Kontra l-​Akbar Giddieb

10, 11. X’għandna nagħmlu sabiex inkunu nistgħu nieqfu sodi kontra Satana, l-​akbar giddieb?

¹⁰ Ix-​Xitan huwa giddieb. Ġesù qal: “Meta jigdeb, jitkellem skond il-​karattru tiegħu, għax hu giddieb u missier il-​gidba.” (Ġwanni 8:44) Satana gideb lil Eva, filwaqt li Ġesù ġie fid-​dinja biex jixhed għall-​verità. (Ġwanni 18:37) Jekk irridu nibqgħu sodi kontra x-​Xitan bħala segwaċi taʼ Kristu, ma nistgħux nużaw il-​gideb u l-​qerq. Irridu ‘ngħidu s-​sewwa.’ (Żakkarija 8:16; Efesin 4:25) Ġeħova li hu “Alla tas-​sewwa” jbierek biss lix-​Xhieda tiegħu li jgħidu l-​verità. Il-​ħżiena m’għandhom l-​ebda dritt jirrappreżentawh.—Salm 31:6 (31:​5, NW); 50:16; Isaija 43:10.

¹¹ Jekk ngħożżu l-​ħelsien spiritwali li għandna mill-​gideb sataniku, se naqbdu qabda soda mal-​Kristjanità, “it-​triq tal-​verità.” (2 Pietru 2:2; Ġwanni 8:32) It-​tagħlim Kristjan kollu huwa “l-​verità taʼ l-​aħbar tajba.” (Galatin 2:​5, 14) Is-​salvazzjoni tagħna tiddependi milli ‘nimxu fil-​verità’—li nżommu magħha u nibqgħu sodi kontra “missier il-​gidba.”—3 Ġwanni 3, 4, 8.

Irreżisti lill-​Ewwel Apostata

12, 13. Kif għandna nittrattawhom lill-​apostati?

¹² L-​ispirtu li sar ix-​Xitan darba kien fil-​verità. Imma “ma żammx sħiħ fil-​verità,” qal Ġesù, “għax il-​verità mhix fih.” (Ġwanni 8:44) Dan l-​ewwel apostat ma waqafx milli jopponi lill-​“Alla tas-​sewwa.” Xi Kristjani taʼ l-​ewwel seklu daħlu fin-​“nassa tax-​Xitan,” u milli jidher saru vittmi minħabba li ġew żvijati mill-​verità. Għalhekk, Pawlu ħeġġeġ lill-​ħaddiem sieħbu Timotju biex jgħallimhom bil-​ħlewwa biex b’hekk ikunu jistgħu jirkupraw spiritwalment u jinħelsu min-​nassa taʼ Satana. (2 Timotju 2:​23-26) M’għandniex xi ngħidu, huwa ħafna aħjar li nżommu sod mal-​verità minflok ma nidħlu fin-​nassa minħabba l-​irraġunar taʼ l-​apostati.

¹³ Minħabba li semgħu mix-​Xitan u ma warrbux il-​gideb tiegħu, l-​ewwel koppja umana saret apostata. Mela, għandna aħna nisimgħu lill-​apostati, naqraw il-​letteratura tagħhom, jew neżaminaw il-​Web sites li għandhom fuq l-​Internet? Jekk inħobbu lil Alla u l-​verità, m’aħniex se nagħmlu hekk. M’għandniex indaħħlu lill-​apostati fi djarna jew saħansitra nsellmulhom, għax jekk nagħmlu hekk inkunu qed ‘nieħdu sehem fl-​għemejjel mill-​agħar tagħhom.’ (2 Ġwanni 9-11) Jalla qatt ma nċedu għall-​qerq tax-​Xitan billi nabbandunaw “it-​triq tal-​verità” Kristjana biex insegwu għalliema foloz li jfittxu li “jintroduċu ideat li jġibu l-​qerda,” u li jipprovaw ‘jisfruttawna bi kliem qarrieq.’—2 Pietru 2:​1-3, Byington.

14, 15. Pawlu liema twissija tahom lill-​anzjani minn Efesu u lill-​ħaddiem sieħbu Timotju?

¹⁴ Lill-​anzjani minn Efesu Pawlu qalilhom: “Oqogħdu attenti għalikom infuskom u għall-​merħla kollha li minnha l-​ispirtu qaddis ħatarkom indokraturi biex tirgħu l-​kongregazzjoni t’Alla, li xtara bid-​demm taʼ Ibnu stess. Jien naf li wara t-​tluq tiegħi jidħlu fostkom ilpup ħorox li ma jittrattawx lill-​merħla b’tenerezza, u minn fostkom stess iqumu rġiel li jitkellmu affarijiet mgħawġin biex jiġbdu lid-​dixxipli għal warajhom.” (Atti 20:​28-30) Maż-​żmien, apostati bħal dawn veru dehru u bdew “jitkellmu affarijiet mgħawġin.”

¹⁵ Madwar is-​sena 65 E.K., l-​appostlu ħeġġeġ lil Timotju sabiex ‘jimmaniġġa sew il-​kelma tal-​verità.’ Pawlu kiteb: “Imma aħrab minn diskors vojt li jipprofana dak li hu qaddis; għax huma se jkomplu jagħmlu iktar u iktar dak li hu kontra r-​rieda t’Alla, u kelmithom se tinxtered bħall-​kankru. Fost dawn hemm Imeni u Filetu. Dawn l-​irġiel tbiegħdu mill-​verità, għax jgħidu li l-​irxoxt diġà seħħ; u qed jaqilbu l-​fidi taʼ xi wħud.” L-​apostasija kienet bdiet! “Madankollu,” żied jgħid Pawlu, “il-​pedament sod t’Alla jibqaʼ wieqaf.”—2 Timotju 2:​15-19.

16. Minkejja l-​qerq taʼ l-​akbar apostat, aħna għala bqajna leali lejn Alla u l-​Kelma tiegħu?

¹⁶ Satana spiss uża lill-​apostati sabiex ikun jistaʼ jħassar il-​qima vera—imma kollu għalxejn. Madwar l-​1868, Charles Taze Russell beda jeżamina bir-​reqqa d-​duttrini li tant kienu ilhom aċċettati mill-​knejjes tal-​Kristjaneżmu u sab li l-​Iskrittura kienet qed tiġi interpretata ħażin. Russell u xi ftit uħud oħra li bdew ifittxu l-​verità fformaw klassi għall-​istudju tal-​Bibbja f’Pittsburgh, Pennsylvania, l-​Amerika. Fil-​140 sena li għaddew minn dakinhar ’l hawn, il-​qaddejja taʼ Ġeħova kisbu iktar għarfien, u l-​imħabba għal Alla u l-​Kelma tiegħu kibret. Minkejja l-​qerq taʼ l-​akbar apostat, il-​fatt li l-​ilsir leali u għaqli baqaʼ spiritwalment għassa għen lil dawn il-​Kristjani veri biex jibqgħu leali lejn Ġeħova u l-​Kelma tiegħu.—Mattew 24:45.

Qatt Tħalli lill-​Ħakkiem tad-​Dinja Jkollu Setgħa Fuqek

17-19. X’inhi d-​dinja li qiegħda taħt il-​qawwa tax-​Xitan, u għala m’għandniex inħobbuha?

¹⁷ Mod ieħor kif Satana jfittex li jaqbadna fin-​nassa tiegħu hu billi jħajjarna nħobbu din id-​dinja—is-​soċjetà umana li mhix sewwa u li tinsab ’il bogħod minn Alla. Ġesù sejjaħ lix-​Xitan “il-​ħakkiem tad-​dinja” u qal: “Hu m’għandu ebda setgħa fuqi.” (Ġwanni 14:30) Jalla Satana qatt ma jkollu setgħa fuqna! M’għandniex xi ngħidu, aħna nirrikonoxxu li “d-​dinja kollha qiegħda taħt il-​qawwa tal-​Ħażin.” (1 Ġwanni 5:19) Kien għalhekk li x-​Xitan setaʼ joffri lil Ġesù “s-​saltniet kollha tad-​dinja” għal att apostata wieħed taʼ qima—xi ħaġa li Iben Alla rrifjuta li jagħmel b’mod ċar u sod. (Mattew 4:​8-10) Id-​dinja li jaħkem Satana tobgħodhom lis-​segwaċi taʼ Kristu. (Ġwanni 15:​18-21) Mhux taʼ b’xejn li l-​appostlu Ġwanni wissiena biex ma nħobbux id-​dinja!

¹⁸ Ġwanni kiteb: “Tħobbux id-​dinja u lanqas dak li hemm fid-​dinja. Jekk xi ħadd iħobb id-​dinja, l-​imħabba tal-​Missier mhix fih; għax kulma hemm fid-​dinja—ix-​xewqa tal-​laħam u x-​xewqa taʼ l-​għajnejn u l-​iffanfrar bil-​mezzi tal-​ħajja—ma joriġinax mill-​Missier, imma mid-​dinja. Iktar minn hekk, id-​dinja tgħaddi u x-​xewqa tagħha wkoll, imma min jagħmel ir-​rieda t’Alla jibqaʼ għal dejjem.” (1 Ġwanni 2:​15-17) M’għandniex inħobbu d-​dinja għax il-​mod taʼ ħajja tagħha jappella għall-​ġisem midneb u huwa totalment l-​oppost tal-​livelli t’Alla Ġeħova.

¹⁹ Xi ngħidu jekk f’qalbna nħobbu lil din id-​dinja? Jekk inhu l-​każ, ejja nitolbu lil Alla biex jgħinna negħlbu din l-​imħabba u x-​xewqat tal-​laħam li huma konnessi magħha. (Galatin 5:​16-21) Żgur li jekk inżommu f’moħħna li “l-​ispirti mill-​agħar” huma “l-​ħakkiema dinjin” inviżibbli taʼ din is-​soċjetà umana li mhix sewwa se nkomplu nistinkaw biex nibqgħu “mingħajr tebgħa mid-​dinja.”—Ġakbu 1:27; Efesin 6:​11, 12; 2 Korintin 4:4.

20. Għala jistaʼ jingħad li aħna ‘m’aħniex parti mid-​dinja’?

²⁰ Ġesù qal hekk dwar id-​dixxipli tiegħu: “M’humiex parti mid-​dinja, bħalma jien m’iniex parti mid-​dinja.” (Ġwanni 17:16) Kemm il-​Kristjani midlukin u kemm sħabhom dedikati jistinkaw biex jibqgħu nodfa moralment u spiritwalment, separati minn din id-​dinja. (Ġwanni 15:19; 17:14; Ġakbu 4:4) Din id-​dinja mimlija ħażen tobgħodna minħabba li nżommu ’l bogħod minnha u għax aħna ‘predikaturi tal-​ġustizzja.’ (2 Pietru 2:5) Veru, aħna ngħixu qalb is-​soċjetà umana, li tinkludi wħud li huma żienja, adulteri, imbroljuni, idolatri, ħallelin, giddieba, u sakranazzi. (1 Korintin 5:​9-11; 6:​9-11; Rivelazzjoni 21:8) Imma aħna ma niġux influwenzati minn dan “l-​ispirtu tad-​dinja,” għax m’aħniex kontrollati minn din il-​qawwa li tippromwovi d-​dnub.—1 Korintin 2:12.

Tagħtix Wisaʼ lix-​Xitan

21, 22. Kif tistaʼ tapplika l-​parir taʼ l-​appostlu Pawlu li hu mniżżel f’Efesin 4:​26, 27?

²¹ Minflok ma niġu motivati mill-​“ispirtu tad-​dinja,” aħna mmexxijin mill-​ispirtu t’Alla, li jipproduċi fina kwalitajiet bħalma huma l-​imħabba u r-​rażna. (Galatin 5:​22, 23) Dawn jgħinuna nifilħu l-​attakki li x-​Xitan jagħmel fuq il-​fidi tagħna. Hu jridna ‘ninkeddu,’ imma l-​ispirtu t’Alla jgħinna biex ma ‘ninkorlawx u ma nirrabjawx.’ (Salm 37:8) Veru, kultant ikollna raġun għala nirrabjaw, imma Pawlu tana dan il-​parir: “Inkorlaw, iżda tidinbux; tħallux ix-​xemx tinżel waqt li tkunu għadkom inkorlati, u tagħtux wisaʼ lix-​Xitan.”—Efesin 4:​26, 27.

²² Imma r-​rabja tistaʼ twassal għad-​dnub jekk nibqgħu nħossuna provokati. Jekk nibqgħu nħossuna hekk inkunu qed nagħtu ċans lix-​Xitan biex joħloq nuqqas taʼ qbil fil-​kongregazzjoni jew iqanqalna nagħmlu għemejjel mill-​agħar. Għalhekk, hemm bżonn li nirranġaw malajr xi nuqqas taʼ qbil li jkollna m’oħrajn b’mod li jogħġob lil Alla. (Levitiku 19:​17, 18; Mattew 5:​23, 24; 18:​15, 16) Għalhekk, ejja nħallu lilna nfusna niġu gwidati mill-​ispirtu t’Alla, neżerċitaw ir-​rażna u qatt ma nħallu r-​rabja, lanqas meta din tkun ġustifikata, twassal għall-​imrar, il-​malizzja, u l-​mibegħda.

23. Liema mistoqsijiet se nikkunsidraw fl-​artiklu li jmiss?

²³ Aħna ddiskutejna xi karatteristiki li xXitan għandu u li m’għandniex nimitaw. Imma xi qarrejja għandhom mnejn jaħsbu: Għandna għalfejn nibżgħu minn Satana? Għala jġib il-​persekuzzjoni fuq il-​Kristjani? U kif nistgħu nevitaw li niġu megħluba mix-​Xitan?

[Nota taʼ taħt]

X’Inhi t-​Tweġiba Tiegħek?

• Għala m’għandna qatt nikkalunnjaw lil xi ħadd?

• Fi qbil maʼ l-​1 Ġwanni 3:​15, kif nistgħu nevitaw li nkunu qattiela?

• Kif għandna nqisuhom lill-​apostati, u għala?

• Għala m’għandniex inħobbu d-​dinja?

[Stampa f’paġna 23]

Aħna qatt ma se nħallu lix-​Xitan ikisser l-​unità Kristjana tagħna

[Stampi f’paġna 24]

Ġwanni għala ħeġġiġna biex ma nħobbux id-​dinja?