L-​Organizzazzjoni taʼ Jehovah Tappoġġja l-​Ministeru Tiegħek

“Rajt anġlu ieħor jittajjar fl-​għoli tas-​sema, bl-​Evanġelju taʼ dejjem ħalli jxandru.”—APOKALISSI 14:6.

1. Ix-​Xhieda taʼ Jehovah kif ġew imġarrbin, u għala baqgħu ħajjin?

GĦALA huwa daqstant importanti li tirrikonoxxi l-​irwol taʼ l-​organizzazzjoni tas-​sema taʼ Jehovah f’li tappoġġja l-​ministeru Kristjan? Sewwa, setgħu x-​Xhieda taʼ Jehovah jwettqu l-​ippridkar taʼ l-​aħbar tajba tas-​Saltna t’Alla f’dinja ostili mingħajr l-​appoġġ tal-​qtajjaʼ tas-​sema taʼ Jehovah? Ix-​Xhieda għamlu dan l-​ippridkar matul seklu taʼ nazzjonaliżmu estrem, sistemi politiċi totalitarji, gwerer dinjin, u diversi avversitajiet. Mingħajr l-​għajnuna taʼ Jehovah setgħu x-​Xhieda jissuperaw ir-​ruxxmata taʼ attakki internazzjonali taʼ preġudizzju, tagħwiġ taʼ ġustizzja, u spiss persekuzzjoni vjolenti li ġew immirati fuqhom?—Salm 34:8 [Salm 34:7, NW].

Sopravivenza Minkejja Oppożizzjoni mad-​Dinja Kollha

2. Liema parallel hemm bejn il-​Kristjani veri taʼ l-​ewwel seklu u dawk tal-​lum?

² F’dan is-​seklu 20, għedewwa, kemm reliġjużi u kemm politiċi, qajmu kull ostaklu possibbli, legali u mhux, biex jipprovaw ifixklu jew joħonqu x-​xogħol taʼ Jehovah. Aħwa Kristjani rġiel u nisa ġew ippersegwitati, irrappreżentati ħażin, inġurjati, u mmalafamati​—ħafna saħansitra nqatlu—​spiss kaġun tat-​tixwix tal-​kleru taʼ Babilonja l-​Kbira. Jistaʼ jingħad, bħal fil-​każ tal-​Kristjani bikrin, li “dwar din is-​setta sirna nafu li kullimkien qegħdin jeħduha kontra tagħ[h]a.” Sewwa sew bħalma l-​kleru Lhudi taʼ żmien Kristu ġġieled b’ħiltu kollha biex iwaqqaflu l-​ministeru tiegħu, hekk il-​kleru u l-​apostati, id f’id man-​namrati politiċi tagħhom, ipprovaw joħonqu x-​xogħol kbir u edukattiv taʼ xiehda tan-​nies taʼ Jehovah.—Atti 28:22; Mattew 26:59, 65-67.

3. X’nistgħu nitgħallmu mill-​integrità taʼ Henryka Żur?

³ Ħu bħala eżempju dak li ġara fil-​Polonja fl-​1 taʼ Marzu, 1946. Henryka Żur, tfajla Xhud taʼ 15-il sena minn viċin Chelm, akkumpanjat lil Xhud ieħor, biex iżuru lil nies interessati f’raħal fil-​qrib. Ġew arrestati minn membri taʼ skwadra militari Kattolika msejħa Narodowe Siły Zbrojne (Forzi Armati Nazzjonali). Il-​ħu ġie msawwat bl-​aħrax imma rnexxielu jiskansa l-​mewt. Imma Henryka ma ħelsithiex. Din ġiet ittorturata b’mod orribbli għal ħafna sigħat hekk kif ipprovaw jisforzawha trodd is-​salib. Wieħed minn dawk li tturmentawha qal: “Minn ġewwa emmen li trid, sempliċement rodd is-​salib bħall-​Kattoliċi. Inkella għandek balla tistenniek!” Iddgħajfet hi fl-​integrità tagħha? Le. Il-​beżżiegħa reliġjużi kaxkruha għal ġo foresta fil-​qrib u sparawlha. Xorta waħda, hi kienet vittorjuża! Ma rnexxilhomx ikissru l-​integrità tagħha.a—Rumani 8:35-39.

4. Elementi politiċi u reliġjużi kif ipprovaw joħonqu x-​xogħol taʼ l-​ippridkar tas-​Saltna?

⁴ Għal iktar minn mitt sena, il-​qaddejja t’Alla taʼ żmienna ġew ittrattati bi ħruxija u bla rispett. Minħabba li x-​Xhieda taʼ Jehovah m’humiex, u ma jixtiqux ikunu, parti mir-​reliġjonijiet ewlenin taʼ Satana, huma meqjusin bħala priża addattata għal taħt difrejn kwalunkwe kritiku ppreġudikat jew opponent fanatiku. Huma ġew attakkati b’mod aħrax mill-​elementi politiċi. Ħafna Xhieda ngħataw il-​martirju minħabba l-​fidi tagħhom. Saħansitra l-​hekk imsejħin demokraziji pprovaw jostakolaw l-​ippridkar taʼ l-​aħbar tajba. Sa lura fl-​1917 fil-​Kanada u l-​Istati Uniti, il-​kleru qanqal akkużi taʼ sovversjoni kontra l-​Istudenti tal-​Bibbja, bħalma kienu magħrufin ix-​Xhieda dak iż-​żmien. Uffiċjali tal-​Watch Tower Society ġew mitfugħin il-​ħabs inġustament, u kien biss iktar tard li ġew eżonerati.—Apokalissi 11:7-9; 12:17.

5. Liema kliem serva biex jinkuraġġixxi ’l-qaddejja taʼ Jehovah?

⁵ Satana uża kull mezz għad-​dispożizzjoni tiegħu biex jipprova jwaqqaf ix-​xogħol taʼ għoti taʼ xiehda taʼ ħut Kristu u taʼ l-​imseħbin leali tagħhom. Iżda, bħalma juru tant u tant esperjenzi, la theddid, la intimidazzjoni, la vjolenza fiżika, la ħabsijiet, la kampijiet tal-​konċentrament, u lanqas saħansitra l-​mewt ma sikktu lix-​Xhieda taʼ Jehovah. U dan kien il-​każ matul l-​istorja kollha. Għal darba wara l-​oħra, il-​kliem taʼ Eliżew serva taʼ inkuraġġiment: “La tibżax! hemm . . . aktar magħna milli magħhom.” Raġuni waħda hi li anġli leali jissuperaw fl-​għadd lill-​qtajjaʼ tax-​Xitan!—2 Slaten 6:16; Atti 5:27-32, 41, 42.

Jehovah Jbierek Ippridkar Żeluż

6, 7. (a) Liema sforzi bikrin saru biex tiġi ppridkata l-​aħbar tajba? (b) Liema bidla taʼ benefiċċju seħħet fl-​1943?

⁶ Matul is-​seklu 20, ix-​Xhieda taʼ Jehovah wżaw ħafna avvanzi fit-​teknoloġija sabiex iżidu u jgħaġġlu x-​xogħol kbir taʼ għoti taʼ xiehda qabel jiġi t-​tmiem. Lura fl-​1914, Pastor Russell, l-​ewwel president tal-​Watch Tower Bible and Tract Society, ippromwova l-​użu bikri taʼ slajds u stampi jiċċaqalqu, issinkronizzati maʼ kummentarju bbażat fuq il-​Bibbja fuq diski fonografiċi, fi produzzjoni dwar il-​Bibbja, twila tmien sigħat, imsejħa “The Photo-Drama of Creation.” Din għaġġbet lil udjenzi f’ħafna pajjiżi f’dak iż-​żmien. Iktar tard, fis-​snin tletin u erbgħin, ix-​Xhieda saru magħrufin għall-​ippridkar tagħhom minn dar għal dar b’fonografi li jinġarru, u kienu jużaw rikordings taʼ taħditiet Bibliċi ppreżentati minn J. F. Rutherford, it-​tieni president tas-​Soċjetà.

⁷ Fis-​sena 1943 ittieħed pass kuraġġuż taħt id-​direzzjoni taʼ Nathan H. Knorr, it-​tielet president tas-​soċjetà, meta ġie deċiż li titwaqqaf skola għal ministri f’kull kongregazzjoni. Ix-​Xhieda kienu se jiġu mħarrġin jippridkaw u jgħallmu minn dar għal dar mingħajr l-​użu tar-​rikordings fonografiċi. Minn dakinhar ’l hawn ġew organizzati skejjel oħrajn għat-​taħriġ tal-​missjunarji, ministri pijunieri full-time, anzjani tal-​kongregazzjoni, u indokraturi responsabbli fil-​fergħat tal-​Watch Tower Society. X’kien ir-​riżultat?

8. Ix-​Xhieda kif urew fidi kbira fl-​1943?

⁸ Lura fl-​1943, f’nofs it-​Tieni Gwerra Dinjija, kien hemm biss 129,000 Xhud attiv f’54 pajjiż. Iżda dawn kellhom fidi u determinazzjoni li Mattew 24:14 kien se jitwettaq qabel jiġi t-​tmiem. Kienu konvinti li Jehovah kien se jġiegħel li l-​messaġġ importanti taʼ twissija jiġi pproklamat l-​ewwel qabel is-​sekwenza taʼ ġrajjiet li kienu se jtemmu lil din is-​sistema t’affarijiet korrotta. (Mattew 24:21; Apokalissi 16:16; 19:11-16, 19-21; 20:1-3) Ġew ippremjati l-​isforzi tagħhom?

9. Liema fatti juru li x-​xogħol taʼ għoti taʼ xiehda rnexxa?

⁹ Hemm issa minn taʼ l-​inqas 13-il pajjiż li għandhom iktar minn 100,000 Xhud attiv kull wieħed. Għadd ġmielu minnhom huma pajjiżi ddominati mill-​Knisja Kattolika. Madankollu, ħares lejn is-​sitwazzjoni. Il-​Brażil għandu madwar 450,000 pubblikatur taʼ l-​aħbar tajba, u ’l fuq minn 1,200,000 attendew għall-​Mafkar tal-​mewt taʼ Kristu fl-​1997. Il-​Messiku huwa eżempju ieħor, bi kważi 500,000 Xhud u ’l fuq minn 1,600,000 fiċ-​ċelebrazzjoni tal-​Mafkar. Pajjiżi Kattoliċi oħrajn huma l-​Italja (xi 225,000 Xhud), Franza (madwar 125,000), Spanja (’il fuq minn 105,000), u l-​Arġentina (iktar minn 115,000). Fl-​Istati Uniti, fejn ir-​reliġjonijiet Protestanti, Kattoliċi, u Lhud huma predominanti, hemm xi 975,000 Xhud u ’l fuq minn 2,000,000 attendew għall-​Mafkar. Ċertament li folol kbar qed joħorġu bi ħġarhom minn Babilonja l-​Kbira, l-​imperu dinji taʼ reliġjon falza, bit-​tagħlim mistiku tagħha u qed iduru lejn il-​wegħdi sempliċi u ċerti t’Alla dwar “smewwiet ġodda u art ġdida.”—2 Pietru 3:13; Isaija 2:3, 4; 65:17; Apokalissi 18:4, 5; 21:1-4.

Naddattaw għall-​Bżonnijiet tan-​Nies

10. Kif inbidlu ċ-​ċirkostanzi f’xi nħawi?

¹⁰ Ħafna minn dawk li daru lejn Jehovah permezz taʼ Kristu Ġesù nstabu minn dar għal dar. (Ġwann 3:16; Atti 20:20) Imma ntużaw ukoll metodi oħrajn. Iż-​żminijiet inbidlu, u kundizzjonijiet ekonomiċi huma tali li ħafna nisa issa jaħdmu barra mid-​dar. Spiss, matul il-​ġimgħa, ftit nies issibhom id-​dar. B’hekk, ix-​Xhieda taʼ Jehovah addattaw għas-​sitwazzjoni. Bħal Ġesù u d-​dixxipli bikrin, huma jmorru fejn u meta jsibu n-​nies.—Mattew 5:1, 2; 9:35; Mark 6:34; 10:1; Atti 2:14; 17:16, 17.

11. Ix-​Xhieda taʼ Jehovah fejn qed jippridkaw illum, u b’liema riżultat?

¹¹ Ix-​Xhieda qed jieħdu l-​inizjattiva u qed jippridkaw b’mod diskret lil nies f’postijiet kbar taʼ parking, ċentri tal-​ħwienet, fabbriki, uffiċini u postijiet tan-​negozju, skejjel, għases tal-​pulizija, pompi tal-​petrol, lukandi u restoranti, u fit-​triqat. Fil-​fatt, huma jippridkaw kulfejn isibu n-​nies. U meta n-​nies ikunu d-​dar, imbagħad ix-​Xhieda jkomplu jżuruhom hemmhekk. Dan il-​metodu adattabbli u prattiku qed jirriżulta f’distribuzzjoni miżjuda taʼ letteratura tal-​Bibbja. Uħud bħal nagħaġ qegħdin jinstabu. Qed jinbdew studji ġodda tal-​Bibbja. L-​akbar xogħol edukattiv fl-​istorja umana qed jitwettaq b’mod żeluż minn ’il fuq minn ħames miljun u nofs ministru volontier! Għandek int il-​privileġġ li tkun wieħed minnhom?—2 Korintin 2:14-17; 3:5, 6.

X’Iqanqal lix-​Xhieda taʼ Jehovah?

12. (a) Jehovah kif qed jgħallem lill-​poplu tiegħu? (b) Dan it-​tagħlim x’effett għandu?

¹² Liema rwol għandha l-​organizzazzjoni tas-​sema f’dan kollu? Isaija pprofetizza: “Uliedek ilkoll ikunu mgħallma mill-​Mulej, kbir għad ikun ġid [“il-​paċi taʼ,” NW] uliedek.” (Isaija 54:13) Jehovah qed jgħallem lil din il-​fratellanza dinjija magħquda permezz taʼ l-​organizzazzjoni viżibbli tiegħu fuq l-​art​—fis-​Swali tas-​Saltna, fil-​konvenzjonijiet, u fl-​assembleat. Dan jirriżulta f’unità u paċi. It-​tagħlim taʼ Jehovah pproduċa poplu uniku, nies mgħallmin biex iħobbu lil xulxin u lill-​ġâr tagħhom bħalhom infushom, biex ma jobogħdux lill-​ġirien tagħhom, jgħixu fejn jgħixu f’din id-​dinja mifruda u li tifred.—Mattew 22:36-40.

13. Kif nistgħu nkunu ċerti li direzzjoni anġelika hija involuta fix-​xogħol taʼ l-​ippridkar?

¹³ L-​imħabba hija dik il-​ħaġa li tqanqal lix-​Xhieda taʼ Jehovah biex jibqgħu jippridkaw minkejja l-​apatija jew il-​persekuzzjoni. (1 Korintin 13:1-8) Huma jafu li x-​xogħol tagħhom li jsalva l-​ħajja huwa ddireġut mis-​sema, bħalma jistqarr Apokalissi 14:6. X’inhu l-​messaġġ li qed jiġi pproklamat taħt direzzjoni anġelika? “Ibżgħu minn Alla u agħtuh glorja, għax ġiet is-​siegħa tal-​ħaqq tiegħu, u inxteħtu agħtu qima lil dak li għamel is-​sema u l-​art u l-​baħar u l-​għejun taʼ l-​ilmijiet.” L-​ippridkar taʼ l-​aħbar tajba tas-​Saltna jeżalta isem Jehovah. In-​nies qed jiġu mistednin biex jagħtu glorja lill-​Ħallieq, Alla, u mhux lill-​ħlejjaq jew lill-​evoluzzjoni bla direzzjoni. U x-​xogħol taʼ l-​ippridkar għala hu daqstant urġenti? Għaliex waslet is-​siegħa taʼ ġudizzju​—ġudizzju kontra Babilonja l-​Kbira u l-​aspetti l-​oħrajn kollha tas-​sistema viżibbli t’affarijiet taʼ Satana.—Apokalissi 14:7; 18:8-10.

14. Min hu involut f’din il-​kampanja kbira taʼ tagħlim?

¹⁴ L-​ebda Kristjan iddedikat m’huwa eżentat minn dan ix-​xogħol taʼ ppridkar. Anzjani spiritwali jieħdu t-​tmexxija f’li jippridkaw mal-​kongregazzjoni. Pijunieri mħarrġin huma okkupati bis-​sħiħ fix-​xogħol. Pubblikaturi żelużi tal-​messaġġ tas-​Saltna, kemm jekk jistgħu jippridkaw biss għal ftit sigħat fix-​xahar jew għal ħafna, qed jifirxu l-​messaġġ għal ġo kull rokna taʼ l-​art.—Mattew 28:19, 20; Lhud 13:7, 17.

15. X’inhu dak li jindika l-​impatt taʼ l-​ippridkar tax-​Xhieda taʼ Jehovah?

¹⁵ Dan l-​isforz kollu għamel impatt fuq id-​dinja? Evidenza sempliċi waħda li dan għamel impatt hija l-​għadd taʼ drabi li x-​Xhieda taʼ Jehovah jissemmew fi programmi televiżivi u f’artikli tal-​gazzetti. Dawn spiss jenfasizzaw il-​persistenza u d-​determinazzjoni tagħna f’li nikkuntattjaw lil kulħadd. Iva, iż-​żelu u l-​preżenza kontinwa tagħna jagħmlu impressjoni profonda, saħansitra jekk il-​maġġuranza tan-​nies jirrifjutaw il-​messaġġ u l-​messaġġiera!

Iż-​Żelu Tagħna biex Inlestu x-​Xiehda

16. Liema attitudni għandha tintwera issa fiż-​żmien limitat li baqaʼ?

¹⁶ Ma nafux kemm baqaʼ iżjed żmien għal din is-​sistema t’affarijiet, u lanqas m’għandna bżonn inkunu nafu dment li l-​motiv tagħna f’li naqdu lil Jehovah huwa pur. (Mattew 24:36; 1 Korintin 13:1-3) Imma li nafu hu li sabiex jintwerew l-​imħabba, il-​qawwa, u l-​ġustizzja taʼ Jehovah, l-​aħbar tajba trid tiġi ppridkata “l-​ewwel.” (Mark 13:10) Għalhekk, minkejja kemm snin għandna mnejn ilna nistennew bil-​ħerqa t-​tmiem taʼ din id-​dinja mill-​agħar, inġusta u vjolenti, irridu b’mod żeluż ngħixu fi qbil mad-​dedikazzjoni tagħna skond iċ-​ċirkostanzi tagħna. Jistaʼ jkun li aħna xjuħ jew morda, imma xorta waħda nistgħu naqdu lil Jehovah biż-​żelu li kellna meta konna iżgħar u iżjed b’saħħitna. Forsi m’għadniex nistgħu nqattgħu l-​istess ammont taʼ ħin bħal qabel fil-​ministeru, imma ċertament li nistgħu nżommu l-​kwalità tas-​sagrifiċċju tagħna taʼ tifħir lil Jehovah.—Lhud 13:15.

17. Irrakkonta esperjenza inkuraġġanti li tistaʼ tgħinna lkoll.

¹⁷ Għalhekk, kemm jekk aħna żgħażagħ jew xjuħ, ejjew nuru żelu u naqsmu l-​messaġġ pożittiv tagħna dwar id-​dinja l-​ġdida maʼ kulmin niltaqgħu. Ejjew inkunu bħat-​tifla mistħija, taʼ sebaʼ snin, fl-​Awstralja li marret il-​ħanut m’ommha. Kienet semgħet fis-​Sala tas-​Saltna kemm hu importanti li kulħadd jippriedka, u għalhekk poġġiet żewġ browxers dwar il-​Bibbja fil-​basket tagħha. Waqt li ommha kienet aljenata tixtri, it-​tifla ċkejkna sparixxiet. Meta ommha marret tfittixha, sabitha toffri browxer lil waħda mara! L-​omm resqet lejhom biex tiskuża ruħha għal xi inkonvenjent li bintha setgħet ikkaġunat lil dik il-​mara. Imma l-​mara kienet aċċettat il-​browxer bl-​edukazzjoni kollha. Meta l-​omm kienet għal darb’oħra waħedha maʼ bintha, staqsietha kif irnexxielha trabbi l-​kuraġġ u tavviċina mara li ma tafhiex. “Kulma għedt kien, Wieħed, Tnejn, Tlieta! U mort!”

18. Kif nistgħu nuru spirtu ammirevoli?

¹⁸ Ilkoll kemm aħna neħtieġu spirtu bħal dak tat-​tifla Awstraljana, sabiex navviċinaw bl-​aħbar tajba lil nies li ma nafuhomx jew saħansitra lil xi uffiċjali. Forsi nibżgħu li jiksruna. Ejjew ma ninsewx dak li qal Ġesù: “Toqogħdux tħabblu raskom kif sejrin twieġbu jew x’sejrin tgħidu, għax l-​Ispirtu s-​Santu jgħallimkom dak il-​ħin stess x’għandkom tgħidu.”—Luqa 12:11, 12.

19. Kif tħossok int dwar il-​ministeru tiegħek?

¹⁹ Mela afda fl-​għajnuna taʼ l-​ispirtu t’Alla hekk kif tavviċina lin-​nies bil-​ħlewwa bl-​aħbar tajba. Miljuni taʼ nies ipoġġu l-​fiduċja tagħhom fi rġiel u nisa li taʼ spiss ma jkunux jimmeritawha u li llum hawn u għada m’humiex. Aħna nafdaw f’Jehovah u fl-​organizzazzjoni tiegħu tas-​sema​—Kristu Ġesù, l-​anġli qaddisin, u Kristjani midlukin irxoxtati—​li huma ħajjin għal dejjem! Għalhekk ftakar: “Hemm . . . aktar magħna milli magħhom”!—2 Slaten 6:16.

[Nota taʼ taħt]

Int Kif Twieġeb?

◻ L-​organizzazzjoni tas-​sema t’Alla liema rwol kellha fis-​sopravivenza tan-​nies taʼ Jehovah?

◻ Liema elementi politiċi u reliġjużi attakkaw lix-​Xhieda taʼ Jehovah fis-​seklu 20?

◻ Ix-​Xhieda taʼ Jehovah kif addattaw il-​ministeru tagħhom għall-​bżonnijiet taż-​żminijiet?

◻ X’inhu dak li jimmotivak biex tippriedka?

[Stampa f’paġna 17]

Henryka Żur

[Stampi f’paġni 18]

Ġappun

Martinik

Stati Uniti

Kenja

Stati Uniti

Ix-​Xhieda taʼ Jehovah jippridkaw kulmeta u kulfejn isibu n-​nies

[Stampa f’paġna 20]

Kmieni f’dan is-​seklu, kienu jintużaw il-​fonografi biex jixxerred il-​messaġġ tas-​Saltna