L-​Ippridkar tas-​Saltna​—Privileġġ Prezzjuż

¹ Kuljum, biljuni mill-​abitanti taʼ l-​art jibbenefikaw mill-​provvedimenti ġenerużi taʼ Ġeħova għall-​ħajja. (Mt. 5:​45) Madankollu, ftit ferm huma dawk li jgawdu l-​privileġġ uniku li juru apprezzament lejn il-​Ħallieq tagħhom billi jippridkaw l-​aħbar tajba tas-​Saltna t’Alla. (Mt. 24:​14) Kemm tistmah int dan il-​privileġġ prezzjuż?

² L-​ippridkar tas-​Saltna jonora lil Alla u jagħti tama u sliem lin-​nies li huma mnikktin minħabba ż-​żmien taʼ taqlib li hawn illum. (Ebr. 13:​15) Għal dawk li jwieġbu favorevolment għall-​messaġġ, ikun ifisser ħajja taʼ dejjem. (Ġw. 17:​3) Liema karriera jew professjoni sekulari toffri daqshekk benefiċċji? L-​appostlu Pawlu wera l-​apprezzament tiegħu għall-​ministeru bil-​mod kif wettqu. Kien iqisu bħala teżor.​—Atti 20:​20, 21, 24; 2 Kor. 4:​1, 7.

³ Ngħożżu l-​Privileġġ Prezzjuż Tagħna: Mod wieħed kif nuru li napprezzaw il-​privileġġ li nippridkaw huwa billi noqogħdu attenti għall-​kwalità tas-​servizz tagħna. Nieħdu aħna l-​ħin biex nippreparaw preżentazzjoni li tmiss qalb dawk li jisimgħuna? Nistgħu ntejbu s-​sengħa tagħna fil-​mod kif nużaw l-​Iskrittura u nirraġunaw man-​nies? Naħdmuh bir-​reqqa t-​territorju li jingħatalna? Kapaċi aħna nibdew u nikkonduċu studju tal-​Bibbja? Bħall-​Kristjani leali, kemm tal-​passat u kemm tal-​preżent, aħna nagħmlu dan għax għandna ħarsa xierqa lejn din l-​attività u ngħożżu l-​privileġġ li għandna.​—Mt. 25:​14-​23.

⁴ Meta nkunu qed inbatu mill-​effetti taʼ l-​età avanzata, tal-​mard, jew taʼ ċirkustanzi diffiċli oħrajn, ikun taʼ faraġ li nkunu nafu li l-​isforzi żelużi tagħna biex nieħdu sehem fil-​ministeru huma tabilħaqq stmati ferm. Il-​Kelma t’Alla tassigurana li Ġeħova japprezza dawn l-​isforzi biex naqduh, anki dawk l-​isforzi li forsi ma jidhrux impressjonanti f’għajnejn ħaddieħor.​—Lq. 21:​1-​4.

⁵ L-​ippridkar tas-​Saltna hu sors taʼ sodisfazzjon kbir. Oħt li għandha 92 sena qalet: “Xi privileġġ li nħares lura lejn 80 sena taʼ servizz dedikat lil Alla​—u xejn ma jiddispjaċini! Kieku kelli nerġaʼ ngħix ħajti, kont ngħix l-​istess ħajja għaliex, tabilħaqq, ‘it-​tjieba t’Alla aħjar mill-​ħajja.’” (Salm 63:​4 [63:​3, NW]) Jalla aħna wkoll ngħożżu dan il-​privileġġ prezzjuż li tana Alla​—ix-​xogħol taʼ l-​ippridkar tas-​Saltna.

Nikkonduċu Studji tal-​Bibbja Progressivi—It-​Tnax-il Parti

Ngħinu lill-​Istudenti Jibdew u Jikkonduċu Studji tal-​Bibbja

¹ Meta l-​istudenti tal-​Bibbja tagħna jibdew jieħdu sehem fil-​ministeru taʼ l-​għalqa, għandu mnejn iwerwirhom il-​ħsieb li jibdew u jikkonduċu studji tal-​Bibbja huma stess. Kif nistgħu ngħinuhom jiżviluppaw attitudni pożittiva lejn din il-​parti essenzjali mill-​ministeru tagħna?​—Mt. 24:​14; 28:​19, 20.

² Meta student tal-​Bibbja jikkwalifika biex ikun pubblikatur mhux mgħammed, x’aktarx li jkun diġà qed jieħu vantaġġ sħiħ mill-​Iskola tal-​Ministeru Teokratiku. It-​taħriġ li jieħu meta jipprepara u jippreżenta t-​taħditiet li jkollu bħala student jgħinu jiżviluppa l-​abbiltajiet tat-​tagħlim li huma meħtiġin minn ‘ħaddiem li m’għandux minn xiex jistħi, billi jimmaniġġa sew il-​kelma tal-​verità.’​—2 Tim. 2:​15.

³ Għallem bl-​Eżempju Tiegħek: Ġesù ħarreġ lid-​dixxipli tiegħu billi tahom tagħlim ċar u eżempju tajjeb. Hu qal: “Kulmin jiġi mgħallem b’mod perfett ikun bħall-​għalliem tiegħu.” (Lq. 6:​40) Huwa vitali li timita lil Ġesù billi tagħti eżempju tajjeb fil-​ministeru tiegħek. Hekk kif l-​istudent josserva l-​eżempju li tagħtih fil-​ministeru, hu se jifhem li l-​objettiv taż-​żjajjar lura hu li jinbdew studji tal-​Bibbja.

⁴ Spjegalu li meta noffru studju lill-​inkwilin, ġeneralment ma jkunx hemm bżonn li niddeskrivu bid-​dettall l-​arranġament taʼ kif isir studju. Spiss ikun aħjar li sempliċement tagħmel l-​istudju billi tuża paragrafu jew forsi tnejn minn pubblikazzjoni għall-​istudju. Biex tagħmel dan, hemm xi suġġerimenti utli li tistaʼ ssibhom f’paġna 8 taʼ din il-​ħarġa u f’paġna 6 tal-​Ministeru tas-​Saltna taʼ Jannar, 2002.

⁵ Meta jkun xieraq, stieden lill-​istudent biex jiġi miegħek jew maʼ pubblikatur ieħor taʼ l-​esperjenza fuq studji tal-​Bibbja oħrajn. Hu jistaʼ jieħu sehem billi jikkummenta fuq xi paragrafu jew skrittura prinċipali. B’hekk, billi josserva, l-​istudent se jitgħallem ħafna kif jikkonduċi studji tal-​Bibbja progressivi. (Prov. 27:​17; 2 Tim. 2:​2) Agħtih il-​prosit, u iddiskuti miegħu kif jistaʼ jitjieb.

⁶ It-​taħriġ taʼ pubblikaturi ġodda biex jgħallmu l-​Kelma t’Alla se jarmahom għall-​“għemil tajjeb” taʼ li jibdew u jikkonduċu studji huma stess. (2 Tim. 3:​17) Kemm hu sodisfaċenti li taħdem spalla maʼ spalla magħhom biex flimkien toffru l-​istedina taʼ mħabba: “Kulmin jixtieq ħa jieħu l-​ilma tal-​ħajja b’xejn”!​—Riv. 22:​17.