Żgħażagħ, Faħħru lil Ġeħova!

“Faħħru l-​Mulej minn fuq l-​art, . . . iż-​żgħażagħ u x-​xbejbiet ukoll.”​—SALM 148:​7, 12.

1, 2. (a) Ħafna miż-​żgħażagħ dwar liema restrizzjonijiet huma konxji? (b) Iż-​żgħażagħ għala m’għandhomx għalfejn jobogħdu r-​restrizzjonijiet li l-​ġenituri jagħmlulhom?

IŻ-​ŻGĦAŻAGĦ spiss huma konxji dwar dak li ħaddieħor ma jħallihomx jagħmlu. Ħafna minnhom jistgħu jgħidulek kemm irid ikollhom età qabel ma jitħallew jaqsmu t-​triq waħedhom, qabel ma jkunu jistgħu jibqgħu mqajmin sa ċertu ħin, jew qabel ma jkunu jistgħu jsuqu l-​karozza. Xi drabi, għandu mnejn li żagħżugħ iħossu li ħafna mill-​affarijiet li jixtieq jagħmel jiġu mweġbin bl-​istess mod, “Stenna sakemm tikber.”

² Intom iż-​żgħażagħ tafu li l-​ġenituri tagħkom iħossu li hija xi ħaġa għaqlija li jagħmlu dawn ir-​restrizzjonijiet, u dan jistaʼ jkun għall-​ġid tagħkom stess. Żgur tafu wkoll li Ġeħova huwa ferħan meta tobdu lill-​ġenituri tagħkom. (Kolossin 3:20) Madankollu, ġieli tħossok li għadek ma bdejtx tgħix ħajtek minħabba dawn ir-​restrizzjonijiet? Huma l-​affarijiet importanti kollha projbiti sakemm tkun akbar fl-​età? Żgur li le! Bħalissa qed isir xogħol li huwa iktar importanti minn kwalunkwe privileġġ ieħor li qed tistenna biex tagħmel. Tistgħu intom iż-​żgħażagħ tagħmluh dan ix-​xogħol? Mhux talli tistgħu​—intom mistiedna mill-​Alla l-​Iktar Għoli nnifsu biex tagħmlu dan ix-​xogħol!

3. Ġeħova liema privileġġ qed jistieden liż-​żgħażagħ ikollhom, u liema mistoqsijiet se nikkunsidraw?

³ Dwar liema xogħol qegħdin nitkellmu? Innota l-​iskrittura prinċipali għal dan l-​artiklu: “Faħħru l-​Mulej minn fuq l-​art, . . . iż-​żgħażagħ u x-​xbejbiet ukoll, ix-​xjuħ flimkien mat-​tfal.” (Salm 148:​7, 12) Hawnhekk fl-​iskrittura jsemmi l-​privileġġ kbir li għandek: Tistaʼ tfaħħar lil Ġeħova. Bħala żagħżugħ, ferħan int li tistaʼ tieħu sehem f’dan ix-​xogħol? Ħafna huma ferħanin. Biex tara għala huwa tajjeb li tħossok b’dan il-​mod, ejja nikkunsidraw tliet mistoqsijiet. L-​ewwel, għala għandek tfaħħar lil Ġeħova? It-​tieni, kif tistaʼ tfaħħru b’mod effettiv? It-​tielet, meta huwa ż-​żmien addattat biex tibda tfaħħar lil Ġeħova?

Għala Għandna Nfaħħru lil Ġeħova?

4, 5. (a) Skond Salm kapitlu 148, f’liema sitwazzjoni sabiħa ninsabu? (b) Kif jistgħu l-​ħlejjaq li la jitkellmu u lanqas jirraġunaw ifaħħru lil Ġeħova?

⁴ Raġuni tajba għala għandna nfaħħru lil Ġeħova hi għax huwa l-​Ħallieq. Salm kapitlu 148 jgħinna niffokaw fuq din il-​verità. Immaġina: Kieku kellek tersaq lejn grupp kbir taʼ nies li f’armonija qegħdin ikantaw għanja sabiħa u li tmiss il-​qalb, kif kont tħossok? Xi ngħidu jekk il-​lirika taʼ l-​għanja jkollha kliem li huwa minnu, li jesprimi ħsieb li int tagħraf bħala importanti, ferrieħi, u taʼ inkuraġġiment? Tħoss int li tixtieq titgħallem il-​kliem u tkanta magħhom? Ħafna minna kieku hekk inħossuna. Salm kapitlu 148 juri li int qiegħed f’sitwazzjoni li hija simili imma ħafna iktar sabiħa. Dan is-​salm jiddeskrivi ġemgħa kbira ħafna li qiegħda tfaħħar lil Ġeħova għalenija. Madankollu, hekk kif taqra s-​salm hemm mnejn li tinnota xi ħaġa mhux tas-​soltu. X’inhi?

⁵ Ħafna minn dawk li qed jagħtu tifħir lil Ġeħova, deskritti f’Salm 148, la jistgħu jitkellmu u lanqas jistgħu jirraġunaw. Per eżempju, qrajna li x-​xemx, il-​qamar, l-​istilel, is-​silġ, ir-​riħ, il-​muntanji, u l-​għoljiet qegħdin ifaħħru lil Ġeħova. Kif jistgħu dawn il-​ħlejjaq bla ħajja jagħmlu xi ħaġa bħal din? (Sa 148 Versi 3, 8, 9) Jagħmlu dan bħalma jagħmlu s-​siġar, il-​ħlejjaq tal-​baħar, u l-​annimali. (Sa 148 Versi 7, 9, 10) Qatt ħarist lejn inżul ix-​xemx mill-​isbaħ, lejn qamar sħiħ f’sema miksi stilel, ħadt gost tilgħab maʼ xi annimali, jew stagħġibt b’pajsaġġ mill-​isbaħ? Għalhekk, int “smajt” l-​għanja taʼ tifħir ġejja mill-​ħolqien. Dak kollu li Ġeħova għamel ifakkarna li hu l-​Ħallieq li jistaʼ kollox u li m’hemm ħadd fl-​univers kollu li hu tant b’saħħtu, tant għaref, jew li tant juri mħabba daqsu.​—Rumani 1:20; Rivelazzjoni 4:11.

6, 7. (a) Salm kapitlu 148 jiddeskrivi liema ħlejjaq intelliġenti li qegħdin ifaħħru lil Ġeħova? (b) Għala għandna niġu mqanqlin biex infaħħru lil Ġeħova? Agħti tixbiha.

⁶ Il-​kapitlu taʼ Salm 148 jiddeskrivi wkoll il-​ħlejjaq intelliġenti bħala li qed ifaħħru lil Ġeħova. Fit-​Sa 148 tieni vers insibu lill-​“eżerċti” ċelestjali, l-​anġli, ifaħħru lil Alla. Fil-​Sa 148 vers 11, persuni taʼ influwenza kbira, bħalma huma s-​slaten u l-​imħallfin, huma mistidnin biex jingħaqdu fit-​tifħir. Jekk l-​anġli setgħana jsibu ferħ f’li jfaħħru lil Ġeħova, liema bniedem għandu d-​dritt li jqis lilu nnifsu importanti wisq biex ifaħħar lil Ġeħova? Imbagħad fil-​Sa 148 versi 12 u 13, intom iż-​żgħażagħ mistidnin ukoll biex tingħaqdu ħalli tfaħħru lil Ġeħova. Imqanqal int biex tagħmel dan?

⁷ Ikkunsidra dan l-​eżempju. Kieku kellek ħabib tal-​qalb li kellu talent taʼ l-​għaġeb​—forsi fl-​isport, fl-​arti, jew fil-​mużika​—kont int titkellem dwaru mal-​familja tiegħek u maʼ ħbieb oħra? Bla dubju taʼ xejn! Mela, meta nitgħallmu dwar dak kollu li Ġeħova għamel għalina, dan jistaʼ jkollu l-​istess effett fuqna. Per eżempju, Salm 19:​1, 2 (NW) jgħid li s-​smewwiet mimlijin stilel ‘iġagħlu d-​diskors ibaqbaq.’ U aħna, meta noqogħdu naħsbu dwar l-​affarijiet taʼ l-​għaġeb li Ġeħova wettaq, ma tantx nistgħu nżommu lura milli ngħidu lil oħrajn dwar l-​Alla tagħna.

8, 9. Ġeħova għal liema raġunijiet jixtieqna nfaħħruh?

⁸ Raġuni tajba oħra għala għandna nfaħħru lil Ġeħova hija għax hu hekk jixtieqna nagħmlu. Għala? Huwa dan minħabba li għandu bżonn li l-​bnedmin ifaħħruh? Le. Forsi xi drabi aħna l-​bnedmin ikollna bżonn li xi ħadd ifaħħarna, iżda Ġeħova huwa ħafna akbar minna. (Isaija 55:8) Hu m’għandux inċertezzi dwaru nnifsu jew dwar il-​kwalitajiet tiegħu. (Isaija 45:5) Madankollu, hu jridna nfaħħruh u jieħu gost meta aħna nagħmlu hekk. Għala? Ikkunsidra żewġ raġunijiet. L-​ewwel, hu jaf li għandna bżonn infaħħruh. Hu ħalaqna bi bżonn spiritwali, bżonn li nagħtuh qima. (Mattew 5:3) Li aħna nissodisfaw dan il-​bżonn iferraħ lil Ġeħova, l-​istess bħalma l-​ġenituri tiegħek jieħdu gost jarawk tiekol ikel li jafu li se jagħmillek il-​ġid.​—Ġwanni 4:34.

⁹ It-​tieni, Ġeħova jaf li hemm bżonn li oħrajn jisimgħuna nfaħħruh. L-​appostlu Pawlu kiteb dawn il-​kelmiet liż-​żagħżugħ Timotju: “Oqgħod attent il-​ħin kollu għalik innifsek u għat-​tagħlim tiegħek. Żomm maʼ dawn l-​affarijiet, għax jekk tagħmel dan issalva kemm lilek innifsek u kemm lil dawk li jisimgħuk.” (1 Timotju 4:16) Iva, meta tgħallem lil ħaddieħor dwar Alla Ġeħova billi tfaħħru, huma wkoll jistgħu jsiru jafu lil Ġeħova. Għarfien bħal dan jistaʼ jwassalhom għal salvazzjoni eterna!​—Ġwanni 17:3.

10. Għala nħossuna mqanqlin li nfaħħru lil Alla?

¹⁰ Madankollu, hemm raġuni oħra għala għandna nfaħħru lil Ġeħova. Ftakar l-​eżempju dwar il-​ħabib tiegħek li għandu talent. Jekk tismaʼ lil xi ħadd jgħid xi gideb dwaru, jew jimmalafama, ma tkunx iktar determinat biex tfaħħar lill-​ħabib tiegħek? Ġeħova huwa malafamat ħafna f’din id-​dinja. (Ġwanni 8:44; Rivelazzjoni 12:9) Għalhekk, dawk li jħobbuh iħossuhom imqanqlin biex jgħidu l-​verità dwaru, billi jikkoreġu l-​informazzjoni ħażina. Tixtieq li int ukoll tesprimi mħabbtek u l-​apprezzament tiegħek għal Ġeħova u turi li tixtieq lilu bħala l-​Ħakkiem tiegħek minflok lill-​għadu tiegħu Satana? Tistaʼ tagħmel dan kollu billi tfaħħar lil Ġeħova. Mela l-​mistoqsija li jmiss hi, kif tistaʼ tagħmel dan?

Kif Xi Żgħażagħ Faħħru lil Ġeħova

11. Liema eżempji mill-​Bibbja juru li ż-​żgħażagħ jistgħu jkunu effettivi ħafna f’li jfaħħru lil Ġeħova?

¹¹ Il-​Bibbja turi li spiss iż-​żgħażagħ huma effettivi ħafna f’li jfaħħru lil Ġeħova. Per eżempju, kien hemm tfajla Iżraelija li ttieħdet bħala lsiera mis-​Sirjani. Hi tat xiehda bil-​kuraġġ lis-​sinjura tagħha dwar Elija, il-​profeta taʼ Ġeħova. Il-​kliem tagħha wassal biex isir miraklu, u ngħatat xiehda qawwija. (2 Slaten 5:​1-17) Ġesù wkoll ta xiehda bil-​kuraġġ meta kien żgħir. Mill-​ġrajjiet kollha li setgħu ġew imniżżlin fl-​Iskrittura dwar it-​tfulija tiegħu, Ġeħova għażel il-​waħda taʼ meta Ġesù kellu 12-il sena u bil-​kuraġġ staqsa xi mistoqsijiet lill-​għalliema reliġjużi fit-​tempju f’Ġerusalemm u ħalliehom b’ħalqhom miftuħ bil-​fehma li kellu dwar il-​modi taʼ Ġeħova.​—Luqa 2:​46-49.

12, 13. (a) Ġesù x’għamel fit-​tempju ftit qabel mewtu, u dan x’effett kellu fuq in-​nies hemmhekk? (b) Ġesù kif ħassu dwar it-​tifħir tas-​subien?

¹² Bħala raġel matur, Ġesù ispira wkoll lit-​tfal biex ifaħħru lil Ġeħova. Per eżempju, ftit ġranet qabel ma miet, Ġesù qattaʼ xi ħin fit-​tempju f’Ġerusalemm. Il-​Bibbja tgħid li hemmhekk Ġesù għamel “meravilji.” Hu tefaʼ ’l barra lil dawk li kienu qegħdin jagħmlu l-​post qaddis bħala għar tal-​ħallelin. Hu fejjaq ukoll lill-​għomja u liz-​zopop. Kulmin kien hemm, speċjalment il-​mexxejja reliġjużi, messhom tqanqlu biex ifaħħru lil Ġeħova u lil Ibnu, il-​Messija. Madankollu, b’dispjaċir ħafna minn dawk l-​uħud ma għamlux hekk. Huma kienu jafu li Ġesù kien mibgħut minn Alla, iżda beżgħu mill-​mexxejja reliġjużi. Madankollu, kien hemm grupp wieħed taʼ nies li tkellmu b’kuraġġ. Taf min kienu? Il-​Bibbja tgħid: “Il-​qassisin ewlenin u l-​iskribi għadbu ferm meta raw il-​meravilji li għamel [Ġesù] u s-​subien li kienu qed jgħajtu fit-​tempju u jgħidu: ‘Salva, nitolbuk, lil Bin David!’ u qalulu [lil Ġesù]: ‘Qed tismaʼ x’qed jgħidu dawn?’”​—Mattew 21:​15, 16; Ġwanni 12:42.

¹³ Dawk il-​qassisin kienu qegħdin jittamaw li Ġesù kien se jsikket lis-​subien li kienu qegħdin ifaħħruh. Għamel hekk? Dażgur li le! Ġesù wieġeb lill-​qassisin: “Iva. Qatt ma qrajtuh dan, ‘Minn fomm iċ-​ċkejknin u t-​trabi tal-​ħalib int ipprovdejt it-​tifħir’?” Bla dubju, Ġesù u Missieru kienu ferħanin bit-​tifħir tas-​subien. Dawn it-​tfal kienu qegħdin jagħmlu dak li l-​adulti kollha suppost kienu qed jagħmlu. Wisq probabbli, fl-​imħuħ żgħar tagħhom kien jidher kollox ċar. Raw lil dan ir-​raġel iwettaq affarijiet meraviljużi, jitkellem bil-​kuraġġ u l-​fidi, u juri mħabba kbira għal Alla u għal niesu. Hu kien dak li stqarr li kien​—“Bin David” l-​imwiegħed, il-​Messija. Imberkin għall-​fidi tagħhom, is-​subien kellhom ukoll il-​privileġġ li jwettqu l-​profezija.​—Salm 8:3 (8:​2, NW).

14. Id-​doni fiż-​żgħażagħ kif jgħinuhom ifaħħru lil Alla?

¹⁴ X’nistgħu nitgħallmu minn eżempji bħal dawn? Li t-​tfal jistgħu jfaħħru lil Ġeħova b’mod effettiv. Spiss għandhom id-​don li jaraw il-​verità b’mod ċar u sempliċi, u jesprimu l-​fidi tagħhom b’sinċerità u b’entużjażmu. Għandhom ukoll id-​don imsemmi fi Proverbji 20:29: “Il-​foħrija taż-​żgħażagħ hi saħħithom.” Iva, intom iż-​żgħażagħ imberkin bis-​saħħa u l-​enerġija​—affarijiet li se jgħinukom tfaħħru lil Ġeħova. B’mod speċifiku, kif tistgħu tużaw dawn id-​doni b’mod effettiv?

Kif Tistaʼ Tfaħħar lil Ġeħova?

15. Liema motiv hemm bżonn biex tfaħħar lil Ġeħova b’mod effettiv?

¹⁵ It-​tifħir b’mod effettiv jiġi mill-​qalb. Ma tistax tfaħħar lil Ġeħova b’mod effettiv jekk qed tagħmel dan biss minħabba li ħaddieħor iridek tagħmel hekk. Ftakar li l-​akbar kmandament huwa dan: “Ħobb lil Ġeħova Alla tiegħek b’qalbek kollha u b’ruħek kollha u b’moħħok kollu.” (Mattew 22:37) Sirt taf lil Ġeħova personalment permezz taʼ l-​istudju li għamilt dwar il-​Kelma tiegħu? Ir-​riżultat li joħroġ minn dan huwa li ssir tħobb lil Ġeħova. Il-​mod naturali kif tesprimi din l-​imħabba huwa billi tfaħħru. Meta l-​motiv tiegħek ikun ċar u b’saħħtu, int tkun lest biex b’entużjażmu tfaħħar lil Ġeħova.

16, 17. Xi rwol għandha l-​kondotta biex tfaħħar lil Ġeħova? Agħti eżempju.

¹⁶ Issa, saħansitra qabel ma tikkunsidra dak li se tgħid, ikkunsidra kif se taġixxi. Li kieku t-​tfajla Iżraelija taʼ żmien Elija kienet dejjem pastaża, turi diżrispett, jew diżonesta, taħseb li s-​Sirjani li ħaduha bħala lsiera kienu se joqogħdu jisimgħu dak li kellha x’tgħid dwar il-​profeta taʼ Ġeħova? Wisq probabbli li le. Bl-​istess mod, in-​nies għandhom mnejn jisimgħuk iktar jekk jarawk li qed turi rispett, int onest, u edukat. (Rumani 2:21) Ikkunsidra dan l-​eżempju.

¹⁷ Tifla taʼ 11-il sena mill-​Portugall ġiet iffaċċjata minn pressjoni fl-​iskola biex tieħu sehem f’ċelebrazzjonijiet li kienu jmorru kontra l-​kuxjenza tagħha mħarrġa fuq il-​Bibbja. Hi b’rispett spjegat lill-​għalliema tagħha għala għandha tirrifjuta, iżda l-​għalliema waqqgħatha għaċ-​ċajt. Hekk kif għadda ż-​żmien, l-​għalliema pprovat tumiljaha iktar billi bdiet twaqqaʼ għaċ-​ċajt ir-​reliġjon tagħha. Madankollu, it-​tifla baqgħet turi rispett. Snin wara, l-​oħt żagħżugħa kienet qiegħda taqdi bħala pijuniera regulari, ministru full-time. Waqt il-​konvenzjoni bdiet tara lin-​nies jitgħammdu u għarfet lil xi ħadd minnhom. Kienet l-​għalliema tagħha! Wara tgħanniqa kommoventi, il-​mara qalet liż-​żagħżugħa li hi qatt ma nsiet ir-​rispett li t-​tifla kienet uriet. Waħda oħt kienet marret għandha, u l-​għalliema tkellmet dwar il-​kondotta taʼ l-​istudenta li kellha. Bħala riżultat, inbeda studju tal-​Bibbja, u l-​mara aċċettat il-​verità tal-​Bibbja. Iva, il-​kondotta tiegħek tistaʼ tkun mod importanti ħafna biex tfaħħar lil Ġeħova!

18. X’għandu mnejn jagħmel żagħżugħ jekk isibha bi tqila biex jibda konversazzjoni dwar il-​Bibbja u dwar Alla Ġeħova?

¹⁸ Ġieli ssibha diffiċli biex tibda xi diskussjoni dwar il-​fidi tiegħek fl-​iskola? M’intix waħdek. Madankollu, tistaʼ tagħmilha iktar faċli biex ħaddieħor jistaqsik dwar il-​fidi tiegħek. Per eżempju, jekk hu legali u jekk tistaʼ tagħmel hekk, għala ma tiħux miegħek xi pubblikazzjonijiet u toqgħod taqrahom waqt il-​brejk jew waqt ħinijiet li tistaʼ tagħmel hekk? Għandu mnejn li sħabek taʼ l-​iskola jistaqsuk x’int taqra. Billi tweġibhom u tgħidilhom x’sibt interessanti dwar l-​artiklu jew il-​ktieb, għandu mnejn li tibda konversazzjoni malajr. Ftakar biex tistaqsi xi mistoqsijiet, billi ssir taf x’jemmnu sħabek taʼ l-​iskola. Ismaʼ b’rispett, billi taqsam dak li tkun tgħallimt mill-​Bibbja. Bħalma juru l-​esperjenzi f’paġna 29, ħafna żgħażagħ qegħdin ifaħħru lil Alla fl-​iskola. Dan iġib ferħ kbir u jgħin lil ħafna biex isiru jafu lil Ġeħova.

19. Iż-​żgħażagħ kif jistgħu jsiru iktar effettivi fil-​ministeru tagħhom minn dar għal dar?

¹⁹ Is-​servizz minn dar għal dar huwa mod effettiv ħafna biex infaħħru lil Ġeħova. Jekk m’intix tieħu sehem f’dan, għala ma tagħmilhiex mira? Jekk qed tieħu sehem, hemm miri oħra li tistaʼ tagħmel għalik innifsek? Per eżempju, minflok ma tgħid l-​istess ħaġa fuq kull bieb, ara kif tistaʼ tagħmel progress, billi tistaqsi lill-​ġenituri tiegħek u oħrajn t’esperjenza għal suġġerimenti tajbin. Tgħallem kif tuża iktar il-​Bibbja, kif tagħmel żjajjar lura b’mod iktar effettiv, u kif tibda studju tal-​Bibbja. (1 Timotju 4:15) Iktar ma tfaħħar lil Ġeħova b’dan il-​mod, iktar se ssir effettiv u se tieħu gost iktar fil-​ministeru tiegħek.

Meta Għandek Tibda Tfaħħar lil Ġeħova?

20. Intom iż-​żgħażagħ, għala m’għandkomx għalfejn taħsbu li intom żgħar wisq biex tfaħħru lil Ġeħova?

²⁰ Mit-​tliet mistoqsijiet fid-​diskussjoni, it-​tweġiba għal din l-​aħħar waħda hija l-​eħfef waħda. Innota t-​tweġiba diretta fil-​Bibbja: “Ftakar f’min ħalqek f’jiem żgħożitek.” (Koħèlet 12:1) Iva, iż-​żmien li tibda tfaħħar lil Ġeħova huwa issa. Huwa wisq faċli li tgħid: “Jien żgħir wisq biex infaħħar lil Ġeħova. M’għandix esperjenza. Għandi nistenna sakemm nikber.” Ma tkunx l-​ewwel wieħed li ħaseb b’dan il-​mod. Per eżempju, iż-​żagħżugħ Ġeremija qal dan lil Ġeħova: “Ah, Sidi Mulej, ma nafx nitkellem, għadni żgħir.” Ġeħova assigurah li ma kellux għalfejn jinkwieta. (Ġeremija 1:​6, 7) Bl-​istess mod, aħna wkoll m’għandniex nibżgħu nfaħħru lil Ġeħova. M’hemm ebda ħsara li tistaʼ tiġi fuqna li Ġeħova ma jistax ineħħi.​—Salm 118:6.

21, 22. Iż-​żgħażagħ li jfaħħru lil Ġeħova, għala huma mqabblin maʼ qtar tan-​nida, u dan ix-​xebh għala hu inkuraġġanti?

²¹ Għalhekk, inħeġġu lilkom iż-​żgħażagħ: Titnikkrux biex tfaħħru lil Ġeħova! Issa li għadkom żgħar huwa l-​aħjar żmien biex tieħdu sehem fl-​iktar xogħol importanti li qed isir fuq l-​art issa. Meta tagħmlu dan, issiru parti minn xi ħaġa sabiħa​—il-​familja universali taʼ dawk li jfaħħru lil Ġeħova. Ġeħova ferħan ħafna li din il-​familja tinkludi lilek. Innota dan il-​kliem ispirat li s-​salmista qal lil Ġeħova: “[“Il-​poplu tiegħek minn rajh joffri lilu nnifsu f’dak il-​jum li fih int tmexxi l-​eżerċtu tiegħek fuq il-​għoljiet imqaddsa,” KŻ]. Sa minn qabel is-​sebħ bħan-​nida jien nissiltek.”​—Salm 110:3.

²² Il-​qtar tan-​nida fid-​dawl taʼ fil-​għodu jpinġi stampa sabiħa, hux tassew? Huwa rifreskanti, vivaċi, u ma tistax tgħoddu daqs kemm hemm minnu. Dan huwa l-​mod kif Ġeħova jħares lejkom iż-​żgħażagħ li lealment qegħdin tfaħħruh f’dawn iż-​żminijiet kritiċi. Bla dubju, l-​għażla tagħkom biex tfaħħru lil Ġeħova jagħmel lil qalbu ferħana. (Proverbji 27:11) Għalhekk, intom iż-​żgħażagħ, faħħru lil Ġeħova!

Int Kif Twieġeb?

• X’inhuma xi raġunijiet importanti għala għandna nfaħħru lil Ġeħova?

• Liema eżempji mill-​Bibbja juru li ż-​żgħażagħ jistgħu jkunu effettivi ħafna f’li jfaħħru lil Ġeħova?

• Illum iż-​żgħażagħ kif jistgħu jfaħħru lil Ġeħova?

• Iż-żgħażagħ meta għandhom jibdew ifaħħru lil Ġeħova, u għala?

[Stampi f’paġna 25]

Jekk ħabib tiegħek ikollu don taʼ l-​għaġeb, ma kontx tgħid lil ħaddieħor b’dan?

[Stampa f’paġna 27]

Sħabek taʼ l-​iskola forsi jkunu interessati li jisimgħu dwar it-​twemmin tiegħek

[Stampa f’paġna 28]

Jekk tixtieq ittejjeb il-​ministeru tiegħek, staqsi lil xi Xhud t’esperjenza għal xi suġġerimenti tajbin