Kapitlu 3

Ħobb lil Dawk li Alla Jħobb

“Min qed jimxi maʼ l-​għorrief se jsir għaref.”—PROVERBJI 13:20.

1-3. (a) Liema verità li ma tistax tiġi injorata tesprimi l-​Bibbja? (b) Kif nistgħu nagħżlu ħbieb li se jinfluwenzawna għat-​tajjeb?

F’ĊERTU sens, in-​nies huma bħal sponoż; għandhom it-​tendenza li jixorbu dak li jkun hemm madwarhom. Huwa faċli ħafna li nadottaw—saħansitra mingħajr ma nindunaw—l-​attitudnijiet, il-​livelli, u l-​kwalitajiet taʼ dawk li nassoċjaw mill-​qrib magħhom.

² Il-​Bibbja tesprimi verità li ma tistax tiġi injorata meta tgħid: “Min qed jimxi maʼ l-​għorrief se jsir għaref, imma min qed jagħmilha maʼ l-​istupidi se jaħbatlu ħażin.” (Proverbji 13:20) Dan il-​proverbju mhux qed jitkellem sempliċement dwar kuntatt taʼ darba kultant. L-​espressjoni “jimxi maʼ” tissuġġerixxi sħubija kontinwa.a Rigward dan il-​vers, xogħol taʼ referenza Biblika jgħid: “Li timxi maʼ individwu jagħti x’jifhem li hemm l-​imħabba u r-​rabta.” Ma taqbilx li għandna t-​tendenza li nimitaw lil dawk li nħobbu? Tabilħaqq, minħabba li nintrabtu emozzjonalment maʼ dawk li nħobbu, dawn jistaʼ jkollhom influwenza qawwija fuqna—għat-​tajjeb jew għall-​ħażin.

³ Sabiex nibqgħu fl-​imħabba t’Alla, huwa vitali li nfittxu ħbieb li se jinfluwenzawna għat-​tajjeb. Kif nistgħu nagħmlu dan? Fi kliem sempliċi, nistgħu nagħmlu dan billi nħobbu lil dawk li Alla jħobb, billi nagħmlu lill-​ħbieb tiegħu l-​ħbieb tagħna. Aħseb ftit. Liema ħbieb nistgħu nagħżlu aħjar minn dawk li għandhom il-​kwalitajiet li Ġeħova jfittex fil-​ħbieb tiegħu? Għalhekk, ejja neżaminaw it-​tip taʼ nies li Alla jħobb. Bil-​ħarsa taʼ Ġeħova ċara f’moħħna, se nkunu mħejjijin aħjar biex nagħżlu ħbieb li se jinfluwenzawna għat-​tajjeb.

DAWK LI ALLA JĦOBB

4. Ġeħova għala għandu dritt jagħżel lil min jikkwalifika bħala l-​ħabib tiegħu, u Ġeħova għala rrefera għal Abraham bħala “l-​ħabib tiegħi”?

⁴ Ġeħova huwa selettiv ħafna meta jiġi biex jagħżel il-​ħbieb. M’għandux dritt jagħmel dan? Wara kollox, hu l-​Mulej Sovran taʼ l-​univers, u ħbiberija miegħu hija l-​akbar privileġġ li jistaʼ jkollna. Għalhekk, lil min jagħżel bħala l-​ħbieb tiegħu? Ġeħova jersaq qrib lejn dawk li jafdawh u jpoġġu l-​fidi kollha tagħhom fih. Per eżempju, ikkunsidra l-​patrijarka Abraham, raġel magħruf għall-​fidi straordinarja tiegħu. M’hemmx prova akbar tal-​fidi għal missier uman milli jintalab joffri lil ibnu bħala sagrifiċċju.b Madankollu, Abraham “kważi offra lil Iżakk,” billi kellu fidi sħiħa “li Alla setaʼ jqajmu saħansitra mill-​imwiet.” (Ebrej 11:17-19) Minħabba li Abraham wera fidi u ubbidjenza bħal dawn, Ġeħova b’affezzjoni rrefera għalih bħala “l-​ħabib tiegħi.”—Isaija 41:8; Ġakbu 2:21-23.

5. Ġeħova kif iqis lil dawk li jobduh lealment?

⁵ Ġeħova jqis l-​ubbidjenza leali bħala li hija taʼ valur kbir. Hu jħobb lil dawk li huma lesti jpoġġu l-​lealtà lejh fuq kull ħaġa oħra. (2 Samwel 22:26) Bħalma rajna f’Kapitlu 1 taʼ din il-​pubblikazzjoni, Ġeħova jsib ferħ kbir f’dawk li jagħżlu li jobduh għax iħobbuh. Proverbji 3:32 jgħid: “Hu għandu relazzjoni intima mar-​retti.” Dawk li lealment jilħqu l-​ħtiġijiet t’Alla jirċievu stedina taʼ qalb tajba mingħand Ġeħova: Jistgħu jkunu mistidnin fit-​“tinda” tiegħu—milqugħin biex jaqduh u jistgħu jitolbu lilu fi kwalunkwe ħin.—Salm 15:1-5.

6. Kif nistgħu nuru li nħobbu lil Ġesù, u Ġeħova kif iħossu dwar dawk li jħobbu lil Ibnu?

⁶ Ġeħova jħobb lil dawk li jħobbu lil Ġesù, l-​Iben uniġenitu tiegħu. Ġesù qal: “Jekk xi ħadd iħobbni, josserva kelmti, u Missieri jħobbu, u niġu għandu u nibqgħu noqogħdu miegħu.” (Ġwanni 14:23) Kif nistgħu nuru mħabbitna għal Ġesù? Ċertament billi nosservaw il-​kmandamenti tiegħu, fosthom l-​inkarigu li tana biex nippridkaw l-​aħbar tajba u nagħmlu dixxipli. (Mattew 28:19, 20; Ġwanni 14:15, 21) Ukoll, nuru l-​imħabba tagħna għal Ġesù meta ‘nimxu mill-​qrib wara l-​passi tiegħu,’ billi nimitawh bl-​aħjar mod li nistgħu bil-​kliem u bl-​għemil taʼ bnedmin imperfetti li aħna. (1 Pietru 2:21) Qalb Ġeħova tifraħ bl-​isforzi taʼ dawk li l-​imħabba tagħhom għal Ibnu tqanqalhom biex jimxu wara l-​passi taʼ Kristu.

7. Għala huwa għaqli li nagħmlu ħbieb mal-​ħbieb taʼ Ġeħova?

⁷ Il-​fidi, il-​lealtà, l-​ubbidjenza, u l-​imħabba għal Ġesù u l-​livelli tiegħu huma fost il-​kwalitajiet li Ġeħova jfittex fil-​ħbieb Tiegħu. Kull wieħed minna jagħmel tajjeb li jistaqsi lilu nnifsu: ‘Il-​ħbieb tal-​qalb tiegħi għandhom kwalitajiet u livelli bħal dawn? Għamilt jien il-​ħbieb taʼ Ġeħova l-​ħbieb tiegħi?’ Huwa għaqli li nagħmlu dan. Individwi li jikkultivaw kwalitajiet divini u jippridkaw l-​aħbar tajba tas-​Saltna biż-​żelu jistaʼ jkollhom effett pożittiv fuqna, billi jinfluwenzawna biex ngħixu fi qbil mad-​determinazzjoni tagħna biex nogħġbu lil Alla.—Ara l-​kaxxa “X’Inhu Ħabib Tajjeb?” f’paġna 29.

NITGĦALLMU MINN EŻEMPJU BIBLIKU

8. X’hemm li jimpressjonak dwar ir-​relazzjoni bejn (a) Nagħomi u Rut? (b) it-​tliet żgħażagħ Ebrej? (ċ) Pawlu u Timotju?

⁸ L-​Iskrittura fiha ħafna eżempji taʼ wħud li bbenefikaw minħabba li għażlu ħbieb li influwenzawhom għat-​tajjeb. Tistaʼ taqra dwar ir-​relazzjoni bejn Nagħomi u Rut, il-​mara taʼ binha, bejn it-​tliet żgħażagħ Ebrej li kellhom ħbiberija soda f’Babilonja, u bejn Pawlu u Timotju. (Rut 1:16; Danjel 3:17, 18; 1 Korintin 4:17; Filippin 2:20-22) Però, ejja niffokaw fuq eżempju ieħor li jispikka: il-​ħbiberija bejn David u Ġonatan.

9, 10. X’kienet il-​bażi għall-​ħbiberija bejn David u Ġonatan?

⁹ Il-​Bibbja tgħid li wara li David qatel lil Gulija, “ruħ Ġonatan intrabtet maʼ ruħ David, u Ġonatan beda jħobbu bħalu nnifsu.” (1 Samwel 18:1) B’hekk, inbdiet ħbiberija dejjiema li, minkejja differenza kbira fl-​età, damet sakemm Ġonatan miet f’battalja.c (2 Samwel 1:26) X’kienet il-​bażi għall-​għaqda b’saħħitha taʼ ħbiberija li fformat bejn dawn iż-​żewġt iħbieb?

¹⁰ David u Ġonatan kienu magħqudin flimkien bl-​imħabba tagħhom għal Alla u x-​xewqa kbira li kellhom biex jibqgħu leali lejh. Dawn iż-​żewġt irġiel kellhom rabta spiritwali. It-​tnejn li huma kellhom kwalitajiet li għamluhom għeżież għal xulxin. Ġonatan bla dubju kien impressjonat bil-​kuraġġ u ż-​żelu taż-​żagħżugħ li bla biżaʼ ddefenda l-​isem taʼ Ġeħova. David bla dubju rrispetta r-​raġel akbar minnu li lealment appoġġa l-​arranġamenti taʼ Ġeħova u bla egoiżmu poġġa l-​interessi taʼ David qabel tiegħu stess. Per eżempju, ikkunsidra x’ġara meta David kien qed iħossu skuraġġit ħafna hu u jgħix bħala maħrub fix-​xagħri biex jaħrab il-​korla tas-​sultan mill-​agħar Sawl, missier Ġonatan. F’turija rimarkevoli taʼ lealtà, Ġonatan ħa l-​inizjattiva u “mar għand David . . . sabiex isaħħaħlu l-​fiduċja tiegħu f’Alla.” (1 Samwel 23:16) Immaġina kif ħassu David meta l-​ħabib għażiż tiegħu mar u tah l-​appoġġ u l-​inkuraġġiment!d

11. X’titgħallem dwar il-​ħbiberija mill-​eżempju taʼ Ġonatan u David?

¹¹ X’nitgħallmu mill-​eżempju taʼ Ġonatan u David? Fuq kollox, naraw li l-​iktar ħaġa importanti li l-​ħbieb għandu jkollhom komuni bejniethom hija l-​valuri spiritwali. Meta nersqu qrib lejn dawk li għandhom l-​istess twemmin, valuri morali, u xewqa li jibqgħu leali lejn Alla, nistgħu naqsmu ħsibijiet, sentimenti, u esperjenzi li jinkuraġġuna u jibnuna. (Rumani 1:11, 12) Insibu ħbieb bħal dawn li huma interessati f’affarijiet spiritwali fost sħabna fit-​twemmin. Iżda jfisser dan li kulmin jattendi l-​laqgħat fis-​Sala tas-​Saltna huwa ħabib tajjeb? Le, mhux bilfors.

KIF NAGĦŻLU L-​ĦBIEB TAL-​QALB TAGĦNA

12, 13. (a) Għala għandna nkunu selettivi meta nagħżlu l-​ħbieb anki fost il-​Kristjani sħabna? (b) Liema sfida ffaċċjaw xi kongregazzjonijiet taʼ l-​ewwel seklu, u minħabba f’hekk Pawlu ta liema twissijiet qawwijin?

¹² Anki fil-​kongregazzjoni, għandna nkunu selettivi jekk irridu li l-​ħbieb tagħna jibnuna spiritwalment. Għandu jissorprendina dan? Mhux neċessarjament. Xi Kristjani fil-​kongregazzjoni forsi jdumu iktar biex jilħqu l-​maturità spiritwali, sewwasew bħalma xi frott fuq siġra jistaʼ jdum iktar biex isir. B’hekk, f’kull kongregazzjoni nsibu Kristjani li huma f’livelli differenti taʼ maturità spiritwali. (Ebrej 5:12–6:3) M’għandniex xi ngħidu, aħna nuru paċenzja u mħabba lejn dawk li huma iktar ġodda jew iktar dgħajfin, għaliex irridu ngħinuhom jikbru spiritwalment.—Rumani 14:1; 15:1.

¹³ Kultant jistaʼ jkun hemm sitwazzjoni fil-​kongregazzjoni li minħabba fiha jkollna noqogħdu attenti maʼ min nissieħbu. Xi individwi forsi jinvolvu ruħhom f’kondotta dubjuża. Oħrajn forsi jiżviluppaw attitudni taʼ stmerrija jew taʼ tgergir. Xi kongregazzjonijiet fl-​ewwel seklu E.K. ffaċċjaw sfida simili. Filwaqt li l-​biċċa l-​kbira mill-​membri kienu leali, xi individwi m’aġixxewx b’mod xieraq. Minħabba li xi wħud fil-​kongregazzjoni taʼ Korintu ma żammewx maʼ ċertu tagħlim Kristjan, l-​appostlu Pawlu wissa lill-​kongregazzjoni: “Titqarrqux. Kumpanija ħażina tħassar id-​drawwiet siewja.” (1 Korintin 15:12, 33) Pawlu wissa lil Timotju li anki fost sħabu l-​Kristjani jistaʼ jkun hemm xi wħud li ma jaġixxux b’mod xieraq. Lil Timotju ntqallu biex iżomm ’il bogħod minn dawn l-​uħud, billi ma jagħmilhomx il-​ħbieb tal-​qalb tiegħu.—2 Timotju 2:20-22.

14. Kif nistgħu napplikaw il-​prinċipju wara t-​twissijiet taʼ Pawlu dwar is-​sħubija?

¹⁴ Kif nistgħu napplikaw il-​prinċipju wara t-​twissijiet taʼ Pawlu? Billi nevitaw sħubija mill-​qrib maʼ kwalunkwe persuna—ġewwa jew barra l-​kongregazzjoni—li jistaʼ jkollha influwenza ħażina. (2 Tessalonikin 3:6, 7, 14) Aħna rridu nipproteġu l-​ispiritwalità tagħna. Ftakar li bħal sponża, aħna nixorbu l-​attitudnijiet u l-​livelli tal-​ħbieb tal-​qalb tagħna. Sewwasew bħalma ma nistgħux indaħħlu sponża fil-​ħall u nistennewha timtela bl-​ilma, hekk ukoll ma nistgħux nissieħbu maʼ dawk li għandhom influwenza negattiva u nistennew li nimtlew b’dak li hu pożittiv.—1 Korintin 5:6.

15. X’tistaʼ tagħmel biex issib ħbieb spiritwali fil-​kongregazzjoni?

¹⁵ B’ferħ, il-​possibbiltà li nsibu ħbieb siewja fost sħabna fit-​twemmin hija tassew kbira. (Salm 133:1) Kif tistaʼ ssib ħbieb spiritwali fil-​kongregazzjoni? Hekk kif tikkultiva kwalitajiet u mġiba li japprova Alla, bla dubju oħrajn li qed jagħmlu l-​istess sforzi biex jogħġbuh se jinġibdu lejk. Fl-​istess ħin, għandu mnejn ikollok tieħu xi passi prattiċi u tieħu l-​inizjattiva biex tagħmel ħbieb ġodda. (Ara l-​kaxxa “Kif Sibna Ħbieb Tajbin,” f’paġna 30.) Fittex lil dawk li juru l-​kwalitajiet li int tixtieq timita. Applika l-​parir tal-​Bibbja biex ‘twessaʼ qalbek,’ billi tfittex ħbiberiji maʼ sħabek fit-​twemmin minkejja r-​razza, in-​nazzjonalità, jew il-​kultura. (2 Korintin 6:13; 1 Pietru 2:17) Tagħmilhiex biss maʼ dawk li huma taʼ l-​età tiegħek. Ftakar li Ġonatan kien ħafna akbar minn David. Ħafna wħud akbar fl-​età jistgħu jsaħħu l-​ħbiberija bl-​esperjenza u l-​għerf tagħhom.

META JQUMU D-​DIFFIKULTAJIET

16, 17. Jekk seħibna fit-​twemmin iweġġagħna b’xi mod, għala m’għandniex nitilqu mill-​kongregazzjoni?

¹⁶ Ladarba fil-​kongregazzjoni hemm varjetà kbira taʼ personalitajiet u wħud li jiġu minn ambjenti differenti, minn żmien għal żmien jistgħu jqumu l-​problemi. Sieħeb fit-​twemmin għandu mnejn jgħid jew jagħmel xi ħaġa li tweġġaʼ s-​sentimenti tagħna. (Proverbji 12:18) Kultant iqumu diffikultajiet minħabba differenzi fil-​personalità, nuqqas taʼ ftehim, jew opinjonijiet differenti. Se nitfixklu minħabba dawn l-​isfidi, u b’hekk inżommu ’l bogħod mill-​kongregazzjoni? Mhux jekk għandna mħabba ġenwina għal Ġeħova u għal dawk li jħobb hu.

¹⁷ Bħala l-​Ħallieq tagħna u Dak li jagħtina l-​ħajja, Ġeħova jistħoqqlu l-​imħabba u d-​devozzjoni sħiħa tagħna. (Rivelazzjoni 4:11) Flimkien maʼ dan, il-​kongregazzjoni li jogħġbu juża jistħoqqilha l-​appoġġ leali tagħna. (Ebrej 13:17) Għalhekk, jekk wieħed minn sħabna fit-​twemmin iweġġagħna jew jiddiżappuntana b’xi mod, m’aħniex se nitilqu mill-​kongregazzjoni bħala protesta. Kif qatt nistgħu nagħmlu hekk? Ma kienx Ġeħova li weġġagħna. L-​imħabba tagħna għal Ġeħova qatt ma tistaʼ tħallina nagħtu daharna lilu u lill-​poplu tiegħu!—Salm 119:165.

18. (a) X’nistgħu nagħmlu biex nippromwovu l-​paċi fil-​kongregazzjoni? (b) Liema barkiet ingawdu jekk nagħżlu li naħfru meta jkun hemm bażi soda għal dan?

¹⁸ Imħabba għal sħabna fit-​twemmin tqanqalna biex nippromwovu l-​paċi fil-​kongregazzjoni. Ġeħova ma jistenniex perfezzjoni minn dawk li jħobb, u lanqas m’għandna aħna. L-​imħabba tgħinna ninjoraw nuqqasijiet żgħar, billi niftakru li aħna lkoll imperfetti u niżbaljaw. (Proverbji 17:9; 1 Pietru 4:8) L-​imħabba tgħinna biex inkomplu ‘naħfru lil xulxin mill-​qalb.’ (Kolossin 3:13) M’huwiex dejjem faċli napplikaw dan il-​parir. Jekk inħallu emozzjonijiet negattivi jegħlbuna, għandna mnejn nibqgħu nżommu kontra dak li jkun, forsi billi nħossu li r-​rabja tagħna b’xi mod qed tikkastiga lil dak li weġġagħna. Però, fir-​realtà li nibqgħu nżommu kontrih huwa taʼ ħsara għalina. Se ngawdu barkiet kbar jekk nagħżlu li naħfru meta jkun hemm bażi soda għal dan. (Luqa 17:3, 4) Dan l-​aġir iġib serħan tal-​moħħ u l-​qalb, iżomm il-​paċi fil-​kongregazzjoni u, fuq kollox, jgħassilna r-​relazzjoni tagħna maʼ Ġeħova.—Mattew 6:14, 15; Rumani 14:19.

META GĦANDEK TIEQAF TISSIEĦEB MAʼ XI ĦADD

19. Liema sitwazzjonijiet jistgħu jqumu li minħabba fihom ikollna nieqfu nissieħbu maʼ xi ħadd?

¹⁹ Kultant, niġu mitlubin biex ma nibqgħux nissieħbu maʼ xi ħadd li darba kien membru tal-​kongregazzjoni. Din is-​sitwazzjoni tqum meta individwu, li jikser il-​liġi t’Alla u ma jindimx, jiġi maqtugħ mis-​sħubija jew meta wieħed jiċħad il-​fidi billi jgħallem tagħlim falz jew billi jiddiżassoċja lilu nnifsu mill-​kongregazzjoni. Il-​Kelma t’Alla tgħidilna b’mod ċar biex ‘ma nibqgħux nagħmluha’ maʼ dawn l-​uħud.e (1 Korintin 5:11-13; 2 Ġwanni 9-11) Jistaʼ jkun verament taʼ sfida li nevitaw lil xi ħadd li forsi kien ħabib tagħna jew jiġi minna. Se nieħdu waqfa soda, u b’hekk nuru li npoġġu l-​lealtà lejn Ġeħova u l-​liġijiet ġusti tiegħu qabel kollox? Ftakar li Ġeħova jqis il-​lealtà u l-​ubbidjenza bħala li għandhom valur kbir.

20, 21. (a) L-​arranġament tal-​qtugħ mis-​sħubija għala huwa wieħed taʼ mħabba? (b) Għala huwa vitali li nagħżlu l-​ħbieb tagħna bl-​għaqal?

²⁰ L-​arranġament tal-​qtugħ mis-​sħubija huwa fil-​fatt provvediment taʼ mħabba mingħand Ġeħova. B’liema mod? Il-​qtugħ mis-​sħubija taʼ midneb li ma jindimx huwa turija taʼ mħabba għall-​isem qaddis taʼ Ġeħova u għal-​livelli tiegħu. (1 Pietru 1:15, 16) Il-​qtugħ mis-​sħubija jżomm lill-​kongregazzjoni fis-​sigurtà. Membri leali jiġu protetti mill-​influwenza ħażina taʼ wħud li minn jeddhom jidinbu, u b’hekk jistgħu jkomplu bil-​qima tagħhom billi jafu li l-​kongregazzjoni hija post taʼ kenn u sigurtà minn din id-​dinja mill-​agħar. (1 Korintin 5:7; Ebrej 12:15, 16) Id-​dixxiplina soda turi mħabba għal min ikun għamel il-​ħażen. Tistaʼ tkun iċ-​ċaqliqa li jkollu bżonn biex jiġi f’sensih u jieħu l-​passi meħtieġa biex idur lura lejn Ġeħova.—Ebrej 12:11.

²¹ Ma nistgħux naħarbu l-​fatt li l-​ħbieb tal-​qalb tagħna jistaʼ jkollhom effett qawwi fuqna li jistaʼ jsawwarna. Għalhekk, huwa vitali li nagħżlu l-​ħbieb tagħna bl-​għaqal. Billi nagħmlu l-​ħbieb taʼ Ġeħova l-​ħbieb tagħna, billi nħobbu lil dawk li jħobb Alla, se nkunu mdawrin bl-​aqwa ħbieb possibbli. Dak li nieħdu minnhom se jgħinna ngħixu fi qbil mad-​determinazzjoni tagħna biex nogħġbu lil Ġeħova.

[Noti taʼ taħt]

[Kaxxa/Stampa f’paġna 29]

X’INHU ĦABIB TAJJEB?

Prinċipju: “Ħabib veru jħobb il-​ħin kollu; huwa ħu mwieled għal meta jkun hemm in-​niket.”—Proverbji 17:17.

Xi mistoqsijiet biex tistaqsi lilek innifsek

▪ Il-​ħbieb tiegħi huma wkoll ħbieb taʼ Ġeħova u Ġesù?—Ġwanni 15:14, 16; Ġakbu 2:23.

▪ Il-​ħbieb tiegħi jgħinuni niżviluppa drawwiet tajbin?—1 Korintin 15:33.

▪ Il-​ħbieb tiegħi jħobbuni biżżejjed biex jikkoreġuni jekk ikun hemm bżonn?—Salm 141:5; Proverbji 27:6.

▪ Il-​kliem u l-​azzjonijiet tiegħi x’juru dwar it-​tip taʼ ħabib li jien għal oħrajn?—Proverbji 12:18; 18:24; 1 Ġwanni 3:16-18.

[Kaxxa f’paġna 30]

KIF SIBNA ĦBIEB TAJBIN

▪ “Għall-​ewwel, sibtha diffiċli biex nagħmel ħbieb fil-​kongregazzjoni. Imma skoprejt li sehem attiv fil-​ministeru għenni niżviluppa kwalitajiet bħall-​paċenzja, is-​sabar, u mħabba li tqanqalna nagħmlu sagrifiċċji. Hekk kif inkompli niżviluppa dawn il-​kwalitajiet, insib li nies b’dawn l-​istess kwalitajiet jinġibdu lejja, u issa għandi xi ħbieb tal-​qalb.”—Shivani.

▪ “Jien tlabt biex inkun nistaʼ nsib ħbieb fil-​kongregazzjoni. Imma għal żmien twil ħassejt li t-​talb tiegħi ma kienx qed jiġi mwieġeb. Maż-​żmien irrealizzajt li fir-​realtà ma kont qed nagħmel xejn biex ikolli l-​ħbieb. Ma kontx qed nieħu l-​inizjattiva. Madankollu, minn mindu bdejt naġixxi fi qbil mat-​talb tiegħi, verament inħoss li Ġeħova wieġbu.”—Ryan.

[Stampa f’paġna 33]

Int tistaʼ ssib ħbieb li jibnuk fost l-​aduraturi sħabek