Tistaʼ Tirsisti Biex Tgħin Sieħeb li Mhuwiex tal-​Istess Twemmin?

¹ Hemm xi pubblikaturi fil-​kongregazzjoni tiegħek li għandhom ir-​raġel jew il-​mara li mhijiex tal-​istess twemmin? Jekk inhu hekk, żgur li dawn il-​pubblikaturi jixtiequ li l-​imseħbin tagħhom jingħaqdu magħhom fil-​qima vera. Imma mhux huma biss jixtiquh dan. Bħal Alla, il-​kongregazzjoni kollha tixtieq li “bnedmin taʼ kull xorta jiġu salvati u jaslu għall-​għarfien eżatt dwar il-​verità.” (1 Tim. 2:4) Kif għandna mnejn nipprovaw nirsistu biex ngħinu l-​imseħbin li mhumiex tal-​istess twemmin taʼ xi pubblikaturi fil-​kongregazzjoni tagħna?

² L-​ewwel, irridu nipprovaw naraw l-​affarijiet mill-​ħarsa tal-​wieħed li ma jemminx. Ħafna minn dawn l-​imseħbin iħobbu lill-​familja tagħhom u jipprovaw ikunu mseħbin tajbin fiż-​żwieġ u ġenituri tajbin. Forsi għandhom twemmin reliġjuż sinċier li hu differenti minn tagħna. Huma forsi ma tantx jafu dwar ix-​Xhieda taʼ Ġeħova ħlief dak li qalulhom xi ħbieb li ma jkunux informati jew li jkunu preġudikati. Xi wħud minnhom jiddejqu li l-​imseħbin jieħdu mill-​ħin li kienu jħallu għall-​familja biex jużawh għall-​qima. Id-​dehen jgħinna nittrattaw sieħeb li ma jemminx b’qalb tajba u b’rispett u nevitaw li nkunu ansjużi bla bżonn fil-​preżenza tiegħu.—Prov. 16:20-​23.

³ Interess Persunali: L-​aħjar mod kif niġbdu sieħeb li ma jemminx lejn il-​verità, għall-​inqas fil-​bidu, jistaʼ jkun permezz t’għemilna u mhux permezz taʼ diskussjoni fuq il-​Bibbja. (1 Pt. 3:1, 2) Għal din ir-​raġuni, hu importanti li nuru interess persunali. L-​aħwa nisa fil-​kongregazzjoni jistgħu juru interess fil-​mara li ma temminx taʼ xi pubblikatur, u l-​aħwa rġiel jistgħu jagħmlu l-​istess dwar ir-​raġel li ma jemminx. Kif?

⁴ Jekk għadek ma ltqajtx mas-​sieħeb, forsi tistaʼ tagħmel dan wara li tiddiskuti s-​sitwazzjoni mas-​sieħba Kristjana. Tħossokx diżappuntat jekk għall-​ewwel il-​wieħed li ma jemminx ma tantx ikun dħuli. Il-​fatt li aħna nkunu dħulin u nuru interess persunali jistaʼ jqanqlu jħares lejn ix-​Xhieda taʼ Ġeħova b’mod iktar pożittiv. (Rum. 12:20) Xi Kristjani maturi jistiednu sieħeb li ma jemminx u l-​familja tiegħu għal xi ikla, bil-​ħsieb li jsiru jafu lil xulxin aħjar u jneħħulu kwalunkwe preġudizzju li jistaʼ jkollu. Huma jitkellmu dwar dak li jinteressah minflok ma jisforzaw il-​konversazzjoni biex tkun dwar affarijiet spiritwali. Iktar tard, meta l-​wieħed li ma jemminx iħossu iktar komdu, forsi jkun possibbli li jaqbdu konversazzjoni Skritturali. Jew forsi jkun lest li jaċċetta stedina għal waħda mil-​laqgħat tagħna ħalli jara x’inhi titgħallem martu, speċjalment minħabba li diġà jkun jaf lil xi wħud fil-​kongregazzjoni. Anki jekk għadu mhuwiex lest biex jistħarreġ il-​verità, żgur li jistaʼ jiġi mfaħħar għall-​appoġġ li jagħti lis-​sieħba tiegħu li temmen.

⁵ L-​anzjani b’mod speċjali għandhom jirsistu biex jgħinu lill-​imseħbin li ma jemmnux u joqogħdu attenti għal opportunitajiet biex jagħtu xhieda. Xi ħadd li ma jemminx u li ma kienx interessat f’diskussjoni fuq il-​Bibbja forsi jkun lest jagħti widen għal inkuraġġiment Skritturali meta jkun l-​isptar jew meta jiffaċċja problemi serji taʼ saħħa. Jekk dar maqsuma tesperjenza kriżi, bħall-​mewt taʼ membru tal-​familja, l-​anzjani jistgħu jistiednu lill-​wieħed li ma jemminx biex jibqaʼ ħdejhom meta jfarrġu l-​familja.

⁶ Immaġina x’ferħ jistaʼ jesperjenza Kristjan fil-​kongregazzjoni tagħna jekk is-​sieħeb jew is-​sieħba tiegħu taċċetta l-​verità! Ġrajja taʼ ferħ bħal din iġġib ferħ kbir ukoll lil Ġeħova, lill-​anġli, u lill-​bqija tal-​kongregazzjoni. (Lq. 15:7, 10) Madankollu, jekk il-​wieħed li ma jemminx għall-​ewwel ma jkunx interessat, xorta nistgħu nifirħu li l-​isforzi tagħna jkomplu jogħġbu lil Ġeħova, li “ma jixtieqx li xi ħadd jinqered imma jixtieq li kulħadd jasal għall-​indiema.”—2 Pt. 3:9.

[Mistoqsijiet taʼ Studju]

1. Il-​Kristjani li l-​imseħbin tagħhom mhumiex tal-​istess twemmin għala mhumiex l-​uniċi interessati f’li jgħinuhom jaċċettaw il-​verità?

2. Il-​fatt li jkollna d-​dehen kif jgħinna nkunu t’għajnuna għal sieħeb li ma jkunx tal-​istess twemmin?

3. X’għandu mnejn ikun l-​aħjar mod kif tiġbed lil xi ħadd li ma jemminx lejn il-​verità?

4. Kif nistgħu nuru interess persunali?

5. L-​anzjani kif għandhom mnejn jirsistu biex jgħinu lil xi ħadd li ma jemminx?

6. Liema raġunijiet hemm biex nirsistu ħalli ngħinu mseħbin li ma jemmnux?

[Kumment f’paġna 6]

L-​aħjar mod kif niġbdu sieħeb li ma jemminx lejn il-​verità, għall-​inqas fil-​bidu, jistaʼ jkun permezz t’għemilna u mhux permezz taʼ diskussjoni fuq il-​Bibbja