Meditazzjoni bit-Talb—Neċessarja Biex Inkunu Ministri Żelużi
1. X’għen lil Ġesù ma jaljenax ruħu mix-xogħol primarju tiegħu?
1 Ġesù kien qattaʼ l-lejla jfejjaq lin-nies u jkeċċi d-demonji. L-għada, meta sabuh id-dixxipli tiegħu, huma qalu: “Kulħadd qed ifittxek,” u ħeġġewh ikompli l-għemejjel taʼ qawwa li kien qed jagħmel. Però, Ġesù ma riedx jaljena ruħu mix-xogħol primarju tiegħu tal-ippritkar tal-aħbar tajba. Hu wiġibhom: “Ejja mmorru xi mkien ieħor, fl-irħula fil-qrib, sabiex inkun nistaʼ nippriedka hemmhekk ukoll, għax għalhekk ħriġt.” X’għen lil Ġesù jibqaʼ ffokat? Hu kien qam kmieni biex jitlob u jimmedita. (Mk. 1:32-39) Kif tistaʼ l-meditazzjoni bit-talb tgħin lilna wkoll biex inkunu predikaturi żelużi?
2. Fuqiex nistgħu nimmeditaw biex nibqgħu żelużi għall-ministeru?
2 Fuqiex Timmedita? Ġesù ra li n-nies kienu “maltrattati u mferrxin bħal nagħaġ mingħajr ragħaj.” (Mt. 9:36) B’mod simili nistgħu nimmeditaw dwar kemm in-nies għandhom bżonn l-aħbar tajba. Nistgħu nimmeditaw dwar l-urġenza taż-żminijiet. (1 Kor. 7:29) Nistgħu naħsbu dwar l-għemejjel u l-kwalitajiet taʼ Ġeħova, il-privileġġ tagħna li aħna Xhieda taʼ Ġeħova, u t-teżori spiritwali prezzjużi li tgħallimna mill-Kelma t’Alla u li n-nies fit-territorju tagħna għadhom ma jafuhomx.—Salm 77:11-13; Is. 43:10-12; Mt. 13:52.
3. Meta nistgħu nimmeditaw?
3 Meta Timmedita? Bħalma għamel Ġesù, xi wħud iqumu kmieni meta jkun hemm is-skiet. Oħrajn iħossuhom aħjar jimmeditaw filgħaxija qabel imorru jorqdu. (Ġen. 24:63) Anki bi skeda mimlija nistgħu nsibu ħin għall-meditazzjoni. Xi wħud jagħmlu dan meta jkunu rekbin fuq it-trasport pubbliku. Oħrajn jużaw parti mill-brejk tagħhom biex jimmeditaw mingħajr tfixkil. Ħafna jħossu li l-meditazzjoni qabel joħorġu fil-ministeru, anki għal ftit ħin, tgħinhom jippritkaw b’iktar żelu u qlubija.
4. Għala għandna nimmeditaw?
4 Il-meditazzjoni bit-talb tkabbar ix-xewqa tagħna biex naqdu lil Ġeħova, tgħinna nagħtu l-ewwel post lill-affarijiet spiritwali, u ssaħħaħ id-determinazzjoni tagħna biex inkomplu nippritkaw. Il-Ministru Ewlieni t’Alla, Ġesù, ibbenefika mill-meditazzjoni, u l-istess aħna.