Għasses Kontra l-Idolatrija taʼ Kull Xorta

“Xi qbil għandu t-​tempju t’Alla mal-​idoli?”​—2 KORINTIN 6:16.

1. It-​tabernaklu u t-​tempji taʼ Izrael kienu karatteristiċi taʼ liema ħaġa?

JEHOVAH għandu tempju li ma jakkomodax lill-​idoli. Kien ikkaratterizzat mit-​tabernaklu taʼ Iżrael mibni minn Mosè u mit-​tempji mibnijin iktar tard f’Ġerusalemm. Dawk l-​istrutturi rrappreżentaw “[i]l-​vera tinda,” it-​tempju spiritwali kbir taʼ Jehovah. (Ebrej 8:​1-5) Dak it-​tempju huwa l-​arranġament li bih wieħed jersaq lejn Alla fil-​qima fuq il-​bażi tas-​sagrifiċċju tar-​rahan taʼ Ġesù Kristu.​—Ebrej 9:2-10, 23.

2. Min huma dawk li jsiru kolonni fit-​tempju spiritwali kbir t’Alla, u liema pożizzjoni hi gawduta mill-​folla kbira?

² Kull Kristjan midluk isir “kolonna fit-​tempju t’Alla,” billi jirċievi post fis-​sema. “Folla kbira” tal-​adoraturi l-​oħra taʼ Jehovah qiegħda ‘tagħti servizz sagru lil Alla’ f’dak li kien irrappreżentat mill-​bitħa tal-​Ġentili fit-tempju mibni mill-​ġdid minn Erodi. Minħabba fidi fis-​sagrifiċċju taʼ Ġesù, huma għandhom waqfa taʼ tjieba li tirriżulta f’li jinżammu ħajjin biex igħaddu minn ġot-​“tribulazzjoni l-​kbira.”—Rivelazzjoni 3:12; 7:9-15.

3, 4. Il-​kongregazzjoni taʼ Kristjani midlukin fuq l-​art maʼ liema ħaġa hi mxebbha, u trid tkun ħielsa minn liema tinġis?

³ Il-​kongregazzjoni taʼ Kristjani midlukin fuq l-​art hija mxebbha b’mod figurattiv maʼ tempju ieħor ħieles mill-​idolatrija. Lil uħud bħal dawn “[i]ssiġillati bl-​ispirtu qaddis,” l-​appostlu Pawlu qal: “Intom ġejtu mibnijin fuq il-​pedament tal-​appostli u l-​profeti, waqt li Kristu Ġesù nnifsu huwa l-​ġebla tal-​kantuniera tal-​pedament. F’għaqda miegħu l-​bini kollu kemm hu, billi huwa magħqud flimkien b’mod armonjuż, qiegħed jikber f’tempju qaddis għal Jehovah. F’għaqda miegħu intom, ukoll, qegħdin tiġu mibnijin flimkien f’post għal Alla biex jabitah bl-​ispirtu.” (Efesin 1:13; 2:20-22) Dawn il-​144,000 uħud issiġillati huma “ġebel ħaj” li qegħdin ‘jinbnew f’dar spiritwali bil-​għan taʼ saċerdozju qaddis.’—1 Pietru 2:5; Rivelazzjoni 7:4; 14:1.

⁴ Ladarba dawn is-​sotto-qassisin huma “l-​bini t’Alla,” hu ma jħallix li dan it-​tempju jsir imniġġes. (1 Korintin 3:9, 16, 17) “Tintrabtux taħt madmad li mhux indaqs maʼ dawk li ma jemmnux,” wissa Pawlu. “Għax xi sħubija hemm bejn it-​tjieba u l-​ksur tal-​liġi? Jew x’għandu x’jaqsam id-​dawl mad-​dlam? Iktar minn hekk, x’armonija hemm bejn Kristu u Beljal? Jew x’sehem għandu wieħed leali maʼ wieħed li ma jemminx? U xi qbil għandu t-​tempju t’Alla mal-​idoli?” Kristjani midlukin, li jappartjenu lil “Jehovah li Jistaʼ Kollox,” iridu jkunu ħielsa mill-​idolatrija. (2 Korintin 6:14-18) Dawk tal-​folla kbira jridu wkoll jevitaw l-​idolatrija taʼ kull xorta.

5. Konxji li Jehovah jistħoqqlu devozzjoni esklussiva, il-​veri Kristjani jagħmlu liema ħaġa?

⁵ Hemm forom taʼ idolatrija kemm diretti u kemm sottili. Le, l-​idolatrija mhix illimitata għall-​qima taʼ allat foloz irġiel u nisa. Hija l-​qima taʼ kull ħaġa jew kull wieħed minbarra Jehovah. Bħala s-​Sovran Universali, hu bi dritt jitlob u jixraqlu devozzjoni esklussiva. (Dewteronomju 4:24) Billi huma konxji taʼ dan, il-​Kristjani veri jagħtu kas it-​twissijiet Skritturali kontra l-​idolatrija kollha. (1 Korintin 10:7) Ejjew nikkunsidraw ċerti forom taʼ idolatrija li jridu jiġu evitati mill-​qaddejja taʼ Jehovah.

L-​Idolatrija tal-​Kristjaneżmu Iffigurata bil-​Quddiem

6. Eżekjel ra liema affarijiet moqżieża fil-​viżjoni?

⁶ Waqt li kien fl-​eżilju Babilonjan fis-​sena 612 Q.E.K., il-​profeta Eżekjel kellu viżjoni taʼ affarijiet moqżieża pprattikati minn Lhud apostati fit-​tempju taʼ Jehovah f’Ġerusalemm. Eżekjel ra “simbolu tal-​għira.” Sebgħin anzjan kienu osservati qegħdin joffru l-​inċens fit-​tempju. Nisa kienu jidhru qegħdin jibku minħabba alla falz. U 25 raġel kienu qegħdin iqimu lix-​xemx. Dawn l-​atti apostati taʼ liema sinjifikat kienu?

7, 8. Is-​“simbolu tal-​għira” setaʼ kien liema ħaġa, u għala qanqal lil Jehovah għall-​għira?

⁷ L-​idolatrija tal-​Kristjaneżmu kienet iffigurata bil-​quddiem mill-​affarijiet moqżieża li Eżekjel ra fil-​viżjoni. Per eżempju, hu qal: “Ħares! lejn it-​Tramuntana tax-​xatba tal-​artal kien hemm dan is-​simbolu tal-​għira fid-​daħla. U [Alla Jehovah] [i]ssokta jgħidli: ‘Bin il-​bniedem, qiegħed tara x’affarijiet moqżieża kbar qegħdin jagħmlu, l-​affarijiet li d-​dar taʼ Iżrael qegħdin jagħmlu hawn għalija biex insir ’il bogħod mis-​santwarju tiegħi?’”—Eżekjel 8:1-6.

⁸ Is-​simbolu idolatruż tal-​għira setaʼ kien arblu sagru li jirrappreżenta l-​alla mara falza li l-​Kangħaniti kienu jqisuha bħala l-​mara tal-​alla tagħhom Baal. Kien x’kien is-​simbolu, qanqal lil Jehovah għall-​għira għaliex qasam id-​devozzjoni esklussiva t’Iżrael lejh bi ksur tal-​kmandamenti tiegħu: “Jien Jehovah Alla tiegħek . . . Ma jrid ikollok ebda allat oħra kontra wiċċi. Ma tridx tagħmel għalik innifsek xbiha minquxa jew xi forma bħal xi ħaġa li qiegħda fis-​smewwiet fuq jew li qiegħda fuq l-​art taħt jew li qiegħda fl-​ilmijiet taħt l-​art. Ma tridx tmil lejhom lanqas tiġi mħajjar taqdihom, għaliex jien Jehovah Alla tiegħek Alla li nesiġi devozzjoni esklussiva.”—Eżodu 20:2-5.

9. Il-​Kristjaneżmu kif ipprovoka lil Alla għall-​għira?

⁹ Li jqimu s-​simbolu tal-​għira fit-​tempju t’Alla kienet waħda mill-​affarijiet moqżieża kbar li kienu qegħdin isiru minn Iżraeliti apostati. Bl-​istess mod, il-​knejjes tal-​Kristjaneżmu huma mniġġsin b’simboli u xbihat li jiddiżonoraw lil Alla u li jaqsmu d-​devozzjoni esklussiva li huma jsostnu li jagħtu lil Dak li lilu jgħidu li jaqdu. Alla huwa wkoll ipprovokat għall-​għira għaliex in-​nies tal-​kleru jirrifjutaw is-​Saltna tiegħu bħala l-​unika tama tal-​bnedmin u jżommu bħala idolu lill-​Ġnus Magħquda—“[i]l-ħaġa mistmerra . . . wieqfa f’post qaddis,” fejn m’għandhiex tieqaf.—Mattew 24:​15, 16; Mark 13:14.

10. Eżekjel x’ra ġewwa t-​tempju, u dan kif jaqbel maʼ dak li jiġi nnotat fil-​Kristjaneżmu?

¹⁰ Billi jidħol fit-​tempju, Eżekjel jirrapporta: “Ħares! kien hemm kull rappreżentazzjoni taʼ affarijiet li jitkaxkru u bhejjem moqżieża, u l-​idoli maħmuġin kollha tad-​dar taʼ Iżrael, bit-​tinqix fuq il-​ħajt mad-​dawra kollha. U sebgħin raġel mix-​xjuħ tad-​dar taʼ Iżrael . . . kienu bil-​wieqfa quddiemhom, kull wieħed minnhom biċ-​ċensier tiegħu f’idu, u l-​fwieħa tas-​sħaba tal-​inċens kienet tielaʼ.” Aħseb ftit! Anzjani Iżraeliti fit-​tempju taʼ Jehovah, qegħdin joffru l-​inċens lil allat foloz, irrappreżentati minn tinqix moqżież fuq il-​ħajt. (Eżekjel 8:10-12) Bl-​istess mod, għasafar u annimali selvaġġi huma wżati biex jissimbolizzaw il-​pajjiżi tal-​Kristjaneżmu, li lilhom in-​nies jagħtu devozzjoni. Barra minn hekk, ħafna mill-​kleru huma ħatja taʼ li jgħinu biex jiżżvijaw lin-​nies billi jirriklamaw it-​teorija żballjata tal-​evoluzzjoni tal-​bniedem minn forom taʼ ħajja annimaleski u sotto-umani minflok ma jappoġġjaw ir-​rakkont veru tal-​ħolqien tal-​Bibbja permezz taʼ Alla Jehovah.—Atti 17:24-28.

11. Nisa Iżraeliti apostati għala kienu qegħdin jibku minħabba Tammuż?

¹¹ Fid-​daħla tax-​xatba tad-​dar taʼ Jehovah, Eżekjel ra nisa Iżraeliti apostati qegħdin jibku minħabba Tammuż. (Eżekjel 8:13, 14) Il-​Babilonjani u s-​Sirjani kienu jqisu lil Tammuż bħala l-​alla tal-​ħxejjex li jikbru fl-​istaġun tax-​xita u jmutu matul il-​perijodu tan-​nixfa. Il-​mewt tagħhom tat stampa taʼ dik taʼ Tammuż, mibki kull sena mill-​adoraturi tiegħu fi żmien l-​akbar sħana. Bid-​dehra mill-​ġdid tal-​ħxejjex matul l-​istaġun tax-​xita, Tammuż kien maħsub li ġie lura minn taħt l-​art. Hu kien irrappreżentat mill-​ewwel ittra taʼ ismu, it-​tau antika li kienet il-​forma tas-​salib. Dan jistaʼ jfakkarna sewwa dwar ir-​reverenza idolatruża tal-​Kristjaneżmu lejn is-​salib.

12. Eżekjel x’rahom jagħmlu lil 25 raġel Iżraelit apostat, u liema azzjoni simili sseħħ fil-​Kristjaneżmu?

¹² Fil-​bitħa ġewwinija tat-​tempju, Eżekjel imbagħad ra 25 raġel Iżraelit apostata qegħdin iqimu lix-​xemx—ksur tal-​kmand taʼ Jehovah kontra idolatrija bħal din. (Dewteronomju 4:15-19) Dawk l-​idolaturi wkoll żammew maʼ mnieħer Alla rimja oxxena, li forsi kienet tirrappreżenta lill-​organu maskil tal-​bniedem. Mhux taʼ b’xejn li Alla ma kienx iwieġeb it-​talb tagħhom, saħansitra bħalma l-​Kristjaneżmu se jfittex il-​għajnuna tiegħu matul it-​“tribulazzjoni kbira,” imma għalxejn. (Mattew 24:21) Bħalma dawk l-​Iżraeliti apostati qiemu lix-​xemx li tagħti d-​dawl b’daharhom lejn it-​tempju taʼ Jehovah, hekk ukoll il-​Kristjaneżmu jagħti dahru lid-​dawl mingħand Alla, igħallem duttrini foloz, jagħmel bħala idolu lill-​għerf dinji, u jagħlaq għajn waħda lejn l-​immoralità.—Eżekjel 8:15-18.

13. Ix-​Xhieda taʼ Jehovah b’liema modi jevitaw il-​forom taʼ idolatrija li dehru fil-​viżjoni taʼ Eżekjel?

¹³ Ix-​Xhieda taʼ Jehovah jevitaw il-​forom taʼ idolatrija pprattikati fil-​Kristjaneżmu, jew Ġerusalemm anti-tipika, kif Eżekjel ra bil-​quddiem. Aħna ma nagħmlux bħala idoli lil simboli li jiddiżonoraw lil Alla. Għalkemm nuru rispett lejn “awtoritajiet superjuri” governattivi, is-​sottomissjoni tagħna lejhom hija relattiva. (Rumani 13:1-7; Mark 12:17; Atti 5:29) Id-​devozzjoni tal-​qalb tagħna hija mogħtija lil Alla u lis-​Saltna tiegħu. Aħna ma nissostitwux it-​teorija tal-​evoluzzjoni mal-​Ħallieq u l-​ħolqien tiegħu. (Rivelazzjoni 4:11) Qatt ma naduraw is-​salib jew nagħmlu bħala idolu l-​intellettwaliżmu, il-​filosofija, jew xi xorta oħra taʼ għerf dinji. (1 Timotew 6:20, 21) Aħna noqogħdu għassa wkoll kontra l-​forom l-​oħra kollha taʼ idolatrija. X’inhuma xi wħud minn dawn?

Xorta Oħra taʼ Idolatrija

14. Il-​qaddejja taʼ Jehovah jieħdu liema pożizzjoni dwar il-​“bhima selvaġġa” taʼ Rivelazzjoni 13:1?

¹⁴ Il-​Kristjani ma jiħdux sehem mal-​umanità f’li jagħmlu bħala idolu lil “bhima selvaġġa” simbolika. Qal l-​appostlu Ġwanni: “Jien rajt bhima selvaġġa tielaʼ mill-​baħar, b’għaxart iqran u sebat irjus, u fuq l-​iqran tagħha għaxar dijademi . . . Dawk kollha li jgħammru fuq l-​art se jqimuha.” (Rivelazzjoni 13:​1, 8) Il-​bhejjem jistgħu jissimbolizzaw lil “slaten,” jew qawwiet politiċi. (Danjel 7:17; 8:3-8, 20-25) Mela s-​sebat irjus tal-​bhima selvaġġa simbolika jirrappreżentaw qawwiet dinjin—l-​Eġittu, l-​Assirja, il-​Babilonja, il-​Medo-Persja, il-​Greċja, Ruma, u l-​għaqda Anglo-​Amerikana tal-​Britannja u l-​Istati Uniti tal-​Amerka. Il-​kleru tal-​Kristjaneżmu juru nuqqas kbir taʼ rispett lejn Alla u Kristu billi jmexxu lill-​umanità f’li jagħmlu bħala idolu lis-​sistema politika taʼ Satana, “[i]l-ħakkiem taʼ din id-​dinja.” (Ġwann 12:31) Bħala Kristjani newtrali u wħud li jappoġġjaw lis-​Saltna, madankollu, il-​qaddejja taʼ Jehovah jirrifjutaw idolatrija bħal din.—Ġakbu 1:27.

15. In-​nies taʼ Jehovah kif iħarsu lejn l-​istilel tad-​dinja, u wieħed Xhud x’qal f’dan ir-​rigward?

¹⁵ In-​nies t’Alla jżommu lura wkoll milli jagħmlu bħala idolu lill-​istilel tad-​divertiment u tal-​isports tad-​dinja. Wara li sar Xhud taʼ Jehovah, wieħed mużiċist qal: “Il-​mużika għad-​divertiment u għaż-​żfin tistaʼ tqanqal xewqat ħżiena . . . Il-​kantant ikanta dwar il-​hena u l-​ħlewwa li ħafna semmiegħa jistgħu jħossu li huma neqsin fis-​sieħeb jew sieħba tagħhom. L-​artist spiss jiġi identifikat minn dak li qiegħed ikanta dwaru. Xi mużiċisti u kantanti professjonali li jien naf huma għal din ir-​raġuni favoriti veri man-​nisa. Ladarba wieħed huwa mgħaddas f’din id-​dinja taʼ fantasija, dan jistaʼ jwassal għal li hu jagħmel bħala idolu lill-​kantant. Jistaʼ jibda b’mod li ma jagħmilx ħsara billi wieħed jitlob awtografu bħala rikordju. Imma xi wħud jibdew iħarsu lejn l-​artist bħala l-​ideal tagħhom, u billi jpoġġuh fuq pedestall, idawruh f’idolu. Huma jistgħu jdendlu l-​istampa tal-​istilla mal-​ħajt u jibdew jilbsu u jomxtu bħalma jagħmel hu. Il-​Kristjani għandhom bżonn iżommu f’moħħhom li l-​adorazzjoni tappartjeni biss lil Alla.”

16. Liema ħaġa turi li anġli twajbin ma jaċċettawx l-​idolatrija?

¹⁶ Iva, Alla biss jixraqlu l-​adorazzjoni jew il-​qima. Meta Ġwanni ‘waqaʼ ’l isfel biex iqim quddiem saqajn l-​anġlu’ li wrieh affarijiet tal-​għaġeb, dak il-​ħlejqa spirtu ma riedx jiġi idolizzat b’xi mod imma qal: “Oqgħod attent! Tagħmilx hekk! Kulma jien hu rsir sieħeb tiegħek u taʼ ħutek li huma profeti u taʼ dawk li qegħdin josservaw il-​kliem taʼ dan ir-​romblu. Qim ’l Alla.” (Rivelazzjoni 22:​8, 9) Il-​biżaʼ taʼ Jehovah, jew ir-​reverenza profonda għalih, tagħmilna nqimu lilu waħdu. (Rivelazzjoni 14:7) B’hekk, id-​devozzjoni vera lejn Alla tissalvagwardjana mill-​idolatrija.—1 Timotew 4:8.

17. Kif nistgħu noqogħdu għassa kontra l-​immoralità sesswali idolatruża?

¹⁷ L-​immoralità sesswali hija forma oħra taʼ idolatrija rrifjutata mill-​qaddejja taʼ Jehovah. Huma jafu li “ebda żieni jew wieħed li mhux nadif jew wieħed rgħib—li jfisser li tkun idolatur—​ma għandu xi wirt fis-​saltna tal-​Kristu u t’Alla.” (Efesin 5:5) L-​idolatrija hija nvoluta għaliex ix-​xenqa għal gost illeċtu ssir oġġett taʼ devozzjoni. Kwalitajiet devoti jitpoġġew fil-​periklu minn xewqat sesswali m’humiex xierqa. Billi jixħet għajnejh u widnejh fuq il-​pornografija, wieħed jipperikola kull relazzjoni li jistaʼ jkollu maʼ dak Alla qaddis, Jehovah. (Isaija 6:3) Biex joqogħdu għassa kontra idolatrija bħal din, allura, il-​qaddejja t’Alla jridu jevitaw il-​pornografija u l-​mużika li tikkorrompi. Għandhom bżonn jaqbdu sewwa mal-​valuri spiritwali b’saħħithom ibbażati fuq l-​Iskrittura, u jridu jibqgħu jilbsu “l-​personalità ġdida li kienet maħluqa skond ir-​rieda t’Alla fit-​tjieba vera u l-​lealtà.”—Efesin 4:22-24.

Evita r-​Regħba u x-​Xenqa

18, 19. (a) X’inhuma r-​regħba u x-​xenqa? (b) Kif nistgħu noqogħdu għassa kontra r-​regħba u x-​xenqa idolatrużi?

¹⁸ Il-​Kristjani joqogħdu għassa wkoll kontra r-​regħba u x-​xenqa, li huma forom relatati mill-​qrib taʼ idolatrija. Ir-​regħba hija xewqa eċċessiva jew kilba, u x-​xenqa hija regħba għal xi ħaġa li tappartjeni lil ħaddieħor. Ġesù wissa kontra x-​xenqa u tkellem dwar raġel għani mxennaq li ma setax jibbenefika mill-​ġid tiegħu fil-​mewt u kien fl-​istat imnikket taʼ li ma kienx “għani lejn Alla.” (Luqa 12:15-21) Pawlu b’mod xieraq ta parir lil sħabu fit-​twemmin: “Mewtu . . . lill-​membri taʼ ġisimkom li qegħdin fuq l-​art rigward . . . [i]x-xenqa, li hi idolatrija.”—Kolossin 3:5.

¹⁹ Dawk li huma ossessjonati b’imħabba għall-​flus, b’kilba għall-​ikel u għax-​xorb, jew b’ambizzjoni għall-​poter jagħmlu lil xewqat bħal dawn l-​idoli tagħhom. Bħalma indika Pawlu, persuna rgħiba hija idolatra u mhix se tiret is-​Saltna t’Alla. (1 Korintin 6:​9, 10; Efesin 5:5) Għalhekk, individwi mgħammdin li jipprattikaw l-​idolatrija bħala persuni rgħibin jistgħu jiġu mkeċċijin mis-​sħubija mill-​kongregazzjoni Kristjana. Billi napplikaw l-​Iskrittura u nitolbu bil-​ħerqa, madankollu, nistgħu nevitaw ir-​regħba. Igħid Proverbji 30:7-9: “Żewġ affarijiet tlabt mingħandek [Alla Jehovah]. Iżżommhomx lura minni qabel ma mmut. In-​nuqqas taʼ verità u l-​kelma giddieba poġġihom ’il bogħod minni. Agħtini la faqar u lanqas rikkezzi. Ħallini niblaʼ l-​ikel preskritt għalija, biex jalla ma nsirx imxebbaʼ u attwalment niċħad lilek u ngħid: ‘Min hu Jehovah?’ u biex jalla ma niġix fil-​faqar u attwalment nisraq u nħebb għall-​isem t’Alla tiegħi.” Spirtu bħal dan jistaʼ jgħinna biex noqogħdu għassa kontra r-​regħba u x-​xenqa idolatrużi.

Oqgħod Għassa Kontra li Tagħmel Lilek Innifsek Idolu

20, 21. In-​nies taʼ Jehovah kif igħassu kontra li jagħmlu lilhom infushom idoli?

²⁰ In-​nies taʼ Jehovah joqogħdu għassa wkoll kontra li jagħmlu lilhom infushom idoli. F’din id-​dinja hija ħaġa komuni li wieħed jagħmel idolu lilu nnifsu u lir-​rieda tiegħu stess. Ix-​xewqa għall-​fama u l-​glorja ġġiegħel lil ħafna biex jaġixxu b’modi qarrieqa. Huma jridu li ssir ir-​rieda tagħhom, mhux t’Alla. Imma ma jistaʼ jkollna ebda relazzjoni m’Alla jekk inċedu għal li nagħmlu idolu lilna nfusna billi nfittxu bil-​qerq li tgħaddi tagħna u nipprovaw nagħmluha taʼ sidien fuq oħrajn. (Proverbji 3:32; Mattew 20:20-28; 1 Pietru 5:2, 3) Bħala s-​segwaċi taʼ Ġesù, aħna rrinunzjajna l-​affarijiet qarrieqa tad-​dinja.—2 Korintin 4:1, 2.

²¹ Minflok ma jfittxu l-​fama, in-​nies t’Alla jaqblu mat-​twissija taʼ Pawlu: “Kemm jekk qegħdin tieklu jew tixorbu jew tagħmlu xi ħaġa oħra, agħmlu l-​affarijiet kollha għall-​glorja t’Alla.” (1 Korintin 10:31) Billi aħna l-​qaddejja taʼ Jehovah, ma ninsistux b’mod idolatruż li tgħaddi tagħna imma mimlijin ferħ nagħmlu r-​rieda divina, billi naċċettaw id-​direzzjoni mingħand “l-​irsir fidil u diskret” u nikkoperaw bis-​sħiħ mal-​organizzazzjoni taʼ Jehovah.—Mattew 24:45-47.

Ibqaʼ Għassa!

22, 23. B’liema mod nistgħu nibqgħu għassa kontra l-​idolatrija taʼ kull xorta?

²² Bħala n-​nies taʼ Jehovah, aħna ma mmilux quddiem idoli materjali. Aħna noqogħdu għassa wkoll kontra forom sottili taʼ idolatrija. Fil-​fatt, irridu nkomplu nevitaw l-​idolatrija taʼ kull xorta. Għalhekk naqblu mal-​parir taʼ Ġwanni: “Għassu rwieħkom mill-​idoli.”—1 Ġwann 5:21.

²³ Jekk inti wieħed jew waħda mill-​qaddejja taʼ Jehovah, eżerċita dejjem il-​kuxjenza u l-​qawwiet tas-​sensi tiegħek imħarrġin fuq il-​Bibbja. (Ebrej 5:14) Allura m’intix se tkun imniġġes mill-​ispirtu idolatruż tad-​dinja imma se tkun bħat-​tliet Ebrej leali u l-​Kristjani leali bikrin. Int se tagħti lil Jehovah devozzjoni esklussiva, u hu se jgħinek biex tibqaʼ toqgħod għassa kontra l-​idolatrija taʼ kull xorta.

X’Inhuma l-​Ħsibijiet Tiegħek?

◻ Ix-​Xhieda taʼ Jehovah kif jevitaw forom taʼ idolatrija li dehru fil-​viżjoni taʼ Eżekjel?

◻ X’inhi l-​“bhima selvaġġa” taʼ Rivelazzjoni 13:1, u x-​Xhieda taʼ Jehovah liema pożizzjoni jieħdu dwarha?

◻ Għala rridu noqogħdu għassa kontra li nagħmlu bħala idolu lid-​divertiment u lill-​istilel tal-​isports?

◻ Kif nistgħu noqogħdu għassa kontra li nagħmlu lilna nfusna idoli?

◻ Għala rridu nibqgħu għassa kontra l-​idolatrija taʼ kull xorta?