Ħu bħala mudell lill-profeti—Naħum

1. X’nitgħallmu mill-​ktieb taʼ Naħum?

¹ Il-​fdalijiet taʼ Ninwe tal-​qedem jagħtu prova li Ġeħova jaġixxi kontra l-​għedewwa Tiegħu u li lanqas l-​iktar għadu kiefer ma jistaʼ jiqaflu. Dan jaqbel maʼ dak li pprofetizza Naħum. (Naħ. 1:2, 6) Studju iktar bir-​reqqa tal-​profezija taʼ Naħum jgħallimna lezzjonijiet għal meta nkunu fil-​ministeru.

2. X’inhu mod wieħed kif nistgħu nimitaw lil Naħum fil-​ministeru?

² Offri faraġ u tama: Mad-​daqqa t’għajn, il-​ktieb taʼ Naħum jidher li ma fih xejn ħlief stqarrija taʼ kundanna kontra Ninwe, il-​belt kapitali tal-​Assirja tal-​qedem, li n-​nies tagħha kienu kburin. (Naħ. 1:1; 3:7) Madankollu, din l-​istqarrija kienet aħbar tajba għan-​nies taʼ Ġeħova. Naħum, li ismu jfisser “Farraġ,” aċċerta lil-​Lhud li l-​għadu tagħhom kien se jinqered! Naħum ikkonferma li Ġeħova hu “post taʼ sigurtà f’jum l-​hemm.” (Naħ. 1:7) Hekk kif nippritkaw, aħna wkoll nitkellmu dwar aħbar tajba u ninkuraġġixxu lil oħrajn ifittxu kenn f’Ġeħova.—Naħ. 1:15.

3. Kif nistgħu nimitaw lil Naħum billi nużaw eżempji jew tixbihat?

³ Uża eżempji u tixbihat: Ġeħova nebbaħ lil Naħum biex iqabbel it-​tmiem taʼ Ninwe maʼ dak tal-​belt Eġizzjana taʼ Tebe (No-​amon), li qabel kienet ġiet meqruda mill-​Assirjani stess. (Naħ. 3:8-​10) Hekk kif nitkellmu maʼ individwi dwar it-​tmiem taʼ din is-​sistema mill-​agħar, nistgħu nenfasizzaw profeziji Bibliċi li jagħtu prova li Ġeħova jwettaq kelmtu sal-​inqas dettall. Pereżempju, meta l-​Babiloniżi u l-​Medin marru biex jiggwerraw kontra l-​belt taʼ Ninwe fis-​sena 632 QEK, xita qalila fawret lix-​Xmara Tigri, u dan wassal biex taqaʼ parti mis-​swar b’saħħithom tal-​belt. Imbagħad Ninwe ma damitx ma ntrebħet, eżatt bħalma bassar Ġeħova.—Naħ. 1:8; 2:6.

4. Kif nistgħu nitkellmu b’mod ċar u b’mod li jinftiehem fil-​ministeru?

⁴ Tkellem b’mod ċar u b’mod li jinftiehem: L-​istil tal-​kitba taʼ Naħum kien dettaljat u drammatiku. Dak li kiteb kien ċar. (Naħ. 1:14; 3:1) B’mod simili, irridu nużaw lingwaġġ li jinftiehem b’mod faċli. (1 Kor. 14:9) Meta tkun fil-​ministeru, spjega lin-​nies għala mort tħabbtilhom. Hekk kif tistudja l-​Bibbja maʼ individwi, għinhom jiżviluppaw fidi f’Ġeħova u fil-​Kelma tiegħu u biex jifhmu kif l-​informazzjoni tapplika għalihom personalment.—Rum. 10:14.

5. Liema ċertezza nsibu fil-​profezija taʼ Naħum?

⁵ Il-​fiduċja taʼ Naħum fit-​twettiq li ma tistax tiċħdu tal-​kelma taʼ Ġeħova tidher ċara daqs il-​kristall fil-​ktieb tal-​Bibbja li hu msemmi għalih. Hekk kif it-​tmiem tas-​sistema taʼ Satana qed joqrob, insibu faraġ mill-​istqarrija t’Alla: “L-​inkwiet ma jerġax iqum it-​tieni darba.”—Naħ. 1:9.