Ġesù u d-​dixxipli tiegħu qattgħu tlett iljieli f’Betanja mindu waslu minn Ġeriko. Issa, kmieni filgħodu t-​Tnejn, 10 taʼ Nisan, huma sejrin lejn Ġerusalemm. Ġesù għandu l-​ġuħ. Allura meta jara siġra tat-​tin, hu jimxi lejha. Fiha tin?

Issa qegħdin lejn l-​aħħar taʼ Marzu, imma żmien it-​tin hu f’Ġunju. Minkejja dan, is-​siġra diġà fiha l-​weraq. B’hekk, Ġesù jħoss li forsi se jkun hemm xi tin bikri. Iżda ma jsibx frott fiha. Il-​weraq ta lis-​siġra dehra qarrieqa. Ġesù mbagħad jgħid: “Ħa ma jiekol ħadd iktar frott minnek għal dejjem.” (Marku 11:14) Is-​siġra minnufih tibda tinxef, u l-​għada filgħodu se jsiru jafu għala.

Ġesù u d-​dixxipli tiegħu ma jdumux ma jaslu Ġerusalemm. Hu jmur fit-​tempju, li l-​ġurnata taʼ qabel kien mar jispezzjona. Illum ma jmurx biex jispezzjonah, imma jagħmel xi ħaġa simili għal dak li għamel tliet snin qabel fil-​Qbiż tas-​sena 30 WK. (Ġwanni 2:14-​16) Din id-​darba Ġesù jkeċċi ’l barra ‘lil dawk li qed ibigħu u jixtru fit-​tempju.’ Ukoll, jaqleb ‘l-​imwejjed tas-​sarrafa tal-​flus u l-​bankijiet taʼ dawk li qed ibigħu l-​ħamiem.’ (Marku 11:15) Saħansitra ma jħalli lil ħadd li jkun mgħobbi b’xi ħaġa jqassar it-​triq billi jgħaddi mill-​bitħa tat-​tempju.

Ġesù għala qed jieħu azzjoni deċiżiva kontra dawk li qed isarrfu l-​flus u jbigħu l-​annimali fit-​tempju? Hu jgħid: “M’huwiex miktub, ‘Dari tissejjaħ dar tat-​talb għall-​ġnus kollha’? Imma intom għamiltuha għar tal-​ħallelin.” (Marku 11:17) Ir-​raġuni għala jsejjaħ lil dawn l-​irġiel ħallelin hi għax jitolbu prezzijiet esaġerati mingħand dawk li jkollhom jixtru annimali għas-​sagrifiċċji. Ġesù jqis dawn l-​għemejjel bħala serq.

M’għandniex xi ngħidu, il-​qassisin ewlenin, l-​iskribi, u l-​kbarat tal-​poplu jisimgħu x’għamel Ġesù, u huma jirreaġixxu billi jsaħħu l-​isforzi tagħhom biex joqtluh. Madankollu, huma jiffaċċjaw problema. Ma jafux kif se jeħilsu minn Ġesù, għax in-​nies qed jiffollaw biex jisimgħuh.

Għall-​Qbiż ma ġewx biss il-​Lhud naturali imma anki l-​proseliti, uħud li kkonvertew għar-​reliġjon tal-​Lhud. Fosthom hemm xi Griegi li ġew biex jagħtu qima fil-​festa. Dawn jersqu lejn Filippu, forsi minħabba li ismu hu Grieg, u jitolbuh biex jiltaqgħu maʼ Ġesù. Filippu għandu mnejn ma jafx jekk dan huwiex xieraq, allura jistaqsi lil Indrì. It-​tnejn li huma jmorru jgħidu lil Ġesù, li milli jidher għadu t-​tempju.

Ġesù jaf li fi ftit jiem se jmut, allura dan mhuwiex iż-​żmien li jaqtaʼ l-​kurżità tan-​nies jew li jfittex il-​popolarità. Hu jwieġeb liż-​żewġ appostli b’din it-​tixbiha: “Waslet is-​siegħa biex Bin il-​bniedem jiġi glorifikat. Tassew, tassew, ngħidilkom, Jekk qamħa ma taqax fl-​art u tmut, tibqaʼ waħedha; imma jekk tmut, tagħti ħafna frott.”—Ġwanni 12:23, 24.

Qamħa waħda forsi titqies bħala li ma tantx hi taʼ valur. Però, jekk titpoġġa fil-​ħamrija u “tmut,” din tistaʼ ssir żerriegħa li tinbet u li maż-​żmien tikber u ssir zokk b’ħafna qmuħ. B’mod simili, Ġesù hu bniedem perfett wieħed. Xorta waħda, billi jkun leali lejn Alla sal-​mewt, hu se jsir il-​mezz li bih ħafna jkunu jistgħu jiksbu l-​ħajja taʼ dejjem. Dawn il-​ħafna huma wħud li għandhom spirtu simili taʼ sagrifiċċju persunali. B’hekk, Ġesù jgħid: “Min jgħożż lil ruħu jeqridha, imma min jobgħod lil ruħu f’din id-​dinja jħarisha għall-​ħajja taʼ dejjem.”—Ġwanni 12:25.

Ġesù mhuwiex jaħseb biss fih innifsu, għax jgħid: “Jekk xi ħadd irid jaqdini, ħa jiġi warajja, u fejn inkun jien hemm ukoll ikun il-​qaddej tiegħi. Jekk xi ħadd irid jaqdini, il-​Missier jonorah.” (Ġwanni 12:26) Xi premju dan! Dawk li jiġu onorati mill-​Missier se jsiru mseħbin maʼ Kristu fis-​Saltna.

Billi f’moħħu għandu t-​tbatija kbira u l-​mewta taʼ wġigħ li se jġarrab, Ġesù jgħid: “Issa ruħi mnikkta, u x’naqbad ngħid? Missier, salvani minn din is-​siegħa.” Imma Ġesù ma jridx jevita li jwettaq ir-​rieda t’Alla. Hu jżid jgħid: “Madankollu, għalhekk wasalt għal din is-​siegħa.” (Ġwanni 12:27) Ġesù jaqbel mal-​iskop kollu t’Alla, inkluż il-​mewta tiegħu bħala sagrifiċċju.

Huwa t-​Tnejn, 10 taʼ Nisan, u Ġesù qiegħed fit-​tempju jitkellem dwar il-​mewta tiegħu li hi riesqa. Peress li hu konċernat dwar kif ir-​reputazzjoni t’Alla se tiġi effettwata, Ġesù jgħid: “Missier, igglorifika lil ismek.” Imbagħad, leħen qawwi mis-​sema jgħid: “Jien igglorifikajtu u nerġaʼ nigglorifikah.”—Ġwanni 12:27, 28.

In-​nies li hemm fil-​viċin iħossuhom imħawdin. Xi wħud jaħsbu li semgħu r-​ragħad. Oħrajn jgħidu: “Kellmu xi anġlu.” (Ġwanni 12:29) Madankollu, dak li għadu kemm tkellem hu Ġeħova! U din mhijiex l-​ewwel darba li l-​bnedmin semgħu l-​leħen t’Alla f’konnessjoni maʼ Ġesù.

Tliet snin u nofs qabel, fil-​magħmudija taʼ Ġesù, Ġwanni l-​Battista semaʼ lil Alla jgħid hekk dwar Ġesù: “Dan hu Ibni, il-​maħbub, li lilu jien approvajt.” Iktar tard, wara l-​Qbiż tas-​sena 32 WK, Ġesù tbiddel, jew ġie trasfigurat, quddiem Ġakbu, Ġwanni, u Pietru. Dawn it-​tlett irġiel semgħu lil Alla jiddikjara: “Dan hu Ibni, il-​maħbub, li lilu jien approvajt; isimgħu minnu.” (Mattew 3:17; 17:5) Imma issa, f’din it-​tielet darba, Ġeħova qed jitkellem b’tali mod li ħafna jistgħu jisimgħuh!

Ġesù jgħid: “Dan il-​leħen ma nstemax minħabba fija, imma minħabba fikom.” (Ġwanni 12:30) Dan jagħti prova li hu verament l-​Iben t’Alla, il-​Messija mbassar.

Barra minn hekk, il-​ħajja leali taʼ Ġesù sservi bħala eżempju taʼ kif għandhom jgħixu l-​bnedmin u wkoll tikkonferma li Satana x-​Xitan, il-​ħakkiem tad-​dinja, ħaqqu jinqered. Ġesù jgħid: “Issa din id-​dinja qed tiġi ġudikata; issa l-​ħakkiem taʼ din id-​dinja se jitkeċċa ’l barra.” Minkejja li Ġesù dalwaqt se jmut, il-​mewta tiegħu mhijiex se tkun telfa imma rebħa. B’liema mod? Hu jispjega: “Meta nitgħolla ’l fuq mill-​art, niġbed lejja lil kull xorta taʼ bnedmin.” (Ġwanni 12:31, 32) Permezz taʼ mewtu fuq zokk, Ġesù se jiġbed lil oħrajn lejh, u b’hekk jiftaħ it-​triq għall-​ħajja taʼ dejjem.

Bħala tweġiba għal dak li Ġesù qal dwar li ‘jitgħolla ’l fuq,’ il-​folla tgħid: “Mil-​Liġi smajna li l-​Kristu jibqaʼ għal dejjem; kif qed tgħid li Bin il-​bniedem irid jitgħolla ’l fuq? Min hu dan Bin il-​bniedem?” (Ġwanni 12:34) Minkejja l-​evidenza kollha, inkluż il-​fatt li semgħu l-​leħen t’Alla nnifsu, il-​biċċa l-​kbira minnhom ma jaċċettawx li Ġesù hu verament Bin il-​bniedem, il-​Messija mwiegħed.

Kif ġieli għamel fil-​passat, Ġesù jirreferi għalih innifsu bħala “d-​dawl.” (Ġwanni 8:12; 9:5) Hu jħeġġeġ lill-​folla: “Id-​dawl se jkun fostkom ftit ieħor. Imxu waqt li għandkom id-​dawl, biex id-​dlam ma jegħlibkomx . . . Waqt li għandkom id-​dawl, eżerċitaw il-​fidi fid-​dawl sabiex issiru wlied id-​dawl.” (Ġwanni 12:35, 36) Imbagħad Ġesù jitlaq minn hemmhekk, għax l-​10 taʼ Nisan mhuwiex il-​jum li fih għandu jmut. Il-​Qbiż tal-​14 taʼ Nisan hu l-​jum li fih se ‘jitgħolla ’l fuq’—jiġifieri jiġi msammar maʼ zokk.—Galatin 3:13.

Hekk kif inħarsu lura lejn il-​ministeru taʼ Ġesù, jidher ċar li meta l-​Lhud ma poġġewx fidi fih kienu qed iwettqu profezija. Isaija kien bassar li l-​għajnejn tan-​nies kienu se jkunu għomja u li qalbhom kienet se tkun iebsa, u b’hekk ma kinux se jduru lura biex jiġu mfejqin. (Isaija 6:10; Ġwanni 12:40) Iva, il-​biċċa l-​kbira tal-​Lhud b’ras iebsa jirrifjutaw l-​evidenza li Ġesù hu l-​Ħellies imwiegħed tagħhom, it-​triq tal-​ħajja.

Nikodemu, Ġużeppi tal-​Arimatija, u ħafna ħakkiema oħrajn “poġġew il-​fidi” f’Ġesù. Imma se jaġixxu fi qbil mal-​fidi tagħhom, jew se jżommu lura, forsi għax jibżgħu li jitkeċċew mis-​sinagoga jew għax “iħobbu l-​glorja tal-​bnedmin”?—Ġwanni 12:42, 43.

Ġesù nnifsu jispjega x’jinvolvi li wieħed ipoġġi l-​fidi fih: “Min ipoġġi l-​fidi fija ma jpoġġix il-​fidi fija biss, imma wkoll f’dak li bagħatni; u min jara lili jara wkoll lil dak li bagħatni.” Il-​veritajiet li Alla qal lil Ġesù biex jgħallem u li Ġesù jkompli jħabbar huma vitali, tant li hu jistaʼ jgħid: “Min ma jagħtix kasi u ma jilqax kliemi hemm wieħed li jiġġudikah. Tkun il-​kelma li għedt jien li tiġġudikah fl-​aħħar jum.”—Ġwanni 12:44, 45, 48.

Ġesù mbagħad jikkonkludi: “Ma tkellimtx minn jeddi, imma l-​Missier li bagħatni, hu stess ordnali x’għandi ngħid u x’għandi nitkellem. Ukoll, jien naf li l-​kmand tiegħu jfisser ħajja taʼ dejjem.” (Ġwanni 12:49, 50) Ġesù jaf li dalwaqt se jxerred demmu stess bħala sagrifiċċju għall-​bnedmin li jeżerċitaw il-​fidi fih.—Rumani 5:8, 9.