X’qatgħa jieħdu n-​nisa meta jaslu ħdejn il-​qabar li jidher li hu vojt! Marija l-​Maddalena titlaq tiġri “għand Xmun Pietru u għand id-​dixxiplu l-​ieħor, li Ġesù kellu affezzjoni lejh”—l-​appostlu Ġwanni. (Ġwanni 20:2) Madankollu, in-​nisa l-​oħra ħdejn il-​qabar jaraw anġlu. U ġewwa l-​qabar hemm anġlu ieħor, li “liebes libsa bajda.”—Marku 16:5.

Wieħed mill-​anġli jgħidilhom: “Tibżgħux, għax naf li qed tfittxu lil Ġesù li sammruh maʼ zokk. Mhux qiegħed hawnhekk għax ġie mqajjem bħalma qal. Ejjew, araw il-​post fejn kien qiegħed. U morru malajr għidu lid-​dixxipli tiegħu li ġie mqajjem mill-​imwiet, u, ara, hu sejjer qabilkom fil-​Galilija.” (Mattew 28:5-​7) Allura “maħkumin minn rogħda u emozzjoni qawwija,” in-​nisa jitilqu jiġru biex jgħidu lid-​dixxipli.—Marku 16:8.

Issa Marija laħqet sabet lil Pietru u lil Ġwanni. B’nifisha maqtugħ, hi tgħidilhom: “Lill-​Mulej ħaduh mill-​qabar tat-​tifkira, u ma nafux fejn qegħduh.” (Ġwanni 20:2) Pietru u Ġwanni jitilqu jiġru. Ġwanni jgħaġġel iktar u jasal l-​ewwel ħdejn il-​qabar. Hu jittawwal minn barra u jara l-​faxex, imma ma jidħolx ġewwa.

Xħin jasal Pietru, hu jibqaʼ dieħel dritt ġol-​qabar. Hu jara l-​faxex u ċ-​ċarruta li kienet fuq ras Ġesù. Ġwanni issa jidħol u jemmen dak li qalet Marija. Minkejja dak li Ġesù qal qabel, ħadd minnhom ma jirrealizza li ġie mqajjem mill-​mewt. (Mattew 16:21) Imħawdin huma jerħulha lejn id-​dar. Imma Marija, li ġiet lura ħdejn il-​qabar, tibqaʼ hemmhekk.

Sadanittant, in-​nisa l-​oħra huma fi triqithom biex jgħidu lid-​dixxipli li Ġesù ġie mqajjem mill-​mewt. Hekk kif huma qed jiġru biex jagħmlu dan, Ġesù jiltaqaʼ magħhom u jgħid: “L-​għodwa t-​tajba!” Huma jinxteħtu f’riġlejh u ‘jmilu quddiemu.’ Imbagħad Ġesù jgħid: “Tibżgħux! Morru, agħtu l-​aħbar lil ħuti, sabiex jitilqu lejn il-​Galilija; jarawni hemmhekk.”—Mattew 28:9, 10.

Iktar kmieni, meta seħħ it-​terremot u dehru l-​anġli, is-​suldati quddiem il-​qabar “triegħdu u saru qishom mejtin.” Xħin ġew f’tagħhom, huma daħlu l-​belt u “qalu b’dak kollu li kien ġara lill-​qassisin ewlenin.” Il-​qassisin imbagħad tkellmu max-​xjuħ tal-​Lhud u ttieħdet id-​deċiżjoni li jxaħħmu lis-​suldati biex jaħbu l-​kwistjoni u biex jgħidu: “Id-​dixxipli tiegħu ġew bil-​lejl u serquh waqt li konna reqdin.”—Mattew 28:4, 11, 13.

Is-​suldati Rumani jistgħu jiġu maqtulin jekk jorqdu meta suppost ikunu għassa, allura l-​qassisin iwegħduhom: ‘Jekk din [il-​gidba tagħhom li kienu reqdin] tasal f’widnejn il-​gvernatur, nipperswaduh aħna u neħilsukom mill-​inkwiet.’ (Mattew 28:14) Is-​suldati jaċċettaw it-​tixħim u jagħmlu kif jgħidulhom il-​qassisin. B’hekk, il-​gidba li l-​ġisem taʼ Ġesù ġie misruq tinfirex fost il-​Lhud.

Marija l-​Maddalena għadha qed tibki ħdejn il-​qabar. Hi tittawwal ġewwa l-​qabar u tara żewġ anġli lebsin l-​abjad! Wieħed qiegħed bilqiegħda fejn kien hemm ras Ġesù u l-​ieħor fejn kienu saqajh. Huma jistaqsu: “Mara, għalfejn qed tibki?” Marija twieġeb: “Ħadu lill-​Mulej tiegħi, u ma nafx fejn qegħduh.” Marija ddur u tara lil xi ħadd ieħor. Hu jirripeti l-​mistoqsija li għamlulha l-​anġli u jżid jgħid: “Lil min qed tfittex?” Billi taħseb li hu l-​ġardinar, hi tgħid: “Sinjur, jekk ħadtu minn hawn, għidli fejn qegħedtu, u niġi nieħdu.”—Ġwanni 20:13-​15.

Fil-​fatt, Marija qed titkellem maʼ Ġesù rxoxtat, imma bħalissa mhijiex qed tagħrfu. Madankollu, meta jgħid, “Marija!” hi tinduna li dan hu Ġesù, għax tagħrfu mill-​mod kif ikellimha. Marija b’ferħ tgħid: “Rabboni!” (li jfisser “Għalliem!”). Però, peress li tibżaʼ li se jitlaʼ s-​sema dak il-​ħin stess, hi tibqaʼ mqabbda miegħu. Għalhekk, Ġesù jħeġġiġha: “Tibqax imqabbda miegħi. Għax għadni ma tlajtx għand il-​Missier. Imma mur għand ħuti u għidilhom, ‘Jien tielaʼ għand Missieri u Missierkom, Alla tiegħi u Alla tagħkom.’”—Ġwanni 20:16, 17.

Marija titlaq tiġri lejn il-​post fejn hemm l-​appostli u dixxipli oħra miġburin. Hi tgħidilhom: “Rajt lill-​Mulej!” u tirrakkontalhom dak li ġara, kif għamlu diġà n-​nisa l-​oħra. (Ġwanni 20:18) Iżda dan il-​kliem ‘ma jagħmilx sens għalihom.’—Luqa 24:11.

Huwa l-​Ħadd, 16 taʼ Nisan, u d-​dixxipli qed iħossuhom imdejqin. Huma ma jistgħux jifhmu għala l-​qabar hu vojt. (Mattew 28:9, 10; Luqa 24:11) Iktar tard fil-​ġurnata, Kleofa u dixxiplu ieħor jitilqu minn Ġerusalemm u jaqbdu mexjin lejn Għemmaws, li hu xi 11-​il kilometru ’l bogħod.

Huma u mexjin jitkellmu dwar dak li ġara. Imbagħad jingħaqad magħhom raġel li ma jafuhx u dan jistaqsi: “Fuqiex qed tiddiskutu bejnietkom intom u mexjin?” Kleofa jwieġeb: “Int xi barrani li qed tgħix għalik waħdek f’Ġerusalemm, u b’hekk ma tafx x’ġara fiha f’dawn il-​jiem?” Ir-​raġel jistaqsi: “X’ġara?”—Luqa 24:17-​19.

“Dak li ġara lil Ġesù n-​Nazzarenu,” jgħidu huma. “Aħna konna qed nittamaw li dan ir-​raġel kien dak li kellu jeħles lil Israel.”—Luqa 24:19-​21.

Kleofa u sieħbu jkomplu billi jirrakkontaw affarijiet li seħħew dakinhar stess. Huma jgħidu li xi nisa li marru ħdejn il-​qabar fejn Ġesù kien midfun sabuh vojt. Barra minn hekk, dawn in-​nisa raw xi ħaġa sopranaturali—dehrulhom anġli li qalu li Ġesù hu ħaj. Huma jgħidu li anki oħrajn marru ħdejn il-​qabar u “sabu kollox eżatt kif kienu qalu n-​nisa.”—Luqa 24:24.

Jidher ċar li ż-​żewġ dixxipli jħossuhom imħawdin minħabba dak li ġara. Ir-​raġel iwieġeb bl-​awtorità biex jikkoreġi l-​ħsieb żbaljat tagħhom, li qed jeffettwa lil qalbhom: “Kemm intom boloh u ddumu biex temmnu dak kollu li qalu l-​profeti! Ma kellux il-​Kristu jsofri dan u jidħol fil-​glorja tiegħu?” (Luqa 24:25, 26) Hu jkompli billi jfissrilhom ħafna siltiet mill-​Iskrittura rigward il-​Kristu.

Sa fl-​aħħar it-​tlett irġiel jaslu viċin Għemmaws. Iż-​żewġ dixxipli jridu jkomplu jisimgħuh, allura lir-​raġel iħeġġuh: “Ibqaʼ magħna, għax sar ħafna ħin u l-​jum kważi spiċċa.” Hu jaqbel li jibqaʼ magħhom u jieklu xi ħaġa flimkien. Hekk kif ir-​raġel jitlob, jaqsam il-​ħobża, u jnewwilhielhom, huma jagħrfuh, imma mbagħad jgħib minn quddiemhom. (Luqa 24:29-​31) Issa m’għandhom l-​ebda dubju li Ġesù hu ħaj.

B’eċċitament, iż-​żewġ dixxipli jitkellmu dwar dak li għaddew minnu: “Ma kinux qlubna mkebbsin fina meta beda jkellimna fit-​triq, hu u jispjegalna ċar l-​Iskrittura?” (Luqa 24:32) Huma jiġru lura lejn Ġerusalemm fejn isibu l-​appostli u oħrajn. Qabel ma Kleofa u sieħbu jilħqu jgħidulhom x’ġara, huma jisimgħu lil oħrajn jgħidu: “Il-​Mulej il-​veru ġie mqajjem u deher lil Xmun!” (Luqa 24:34) Imbagħad iż-​żewġt irġiel jirrakkontaw kif Ġesù dehrilhom. Iva, anki dawn raw lil Ġesù b’għajnejhom stess.

Issa lkoll jinħasdu—Ġesù jidher fil-​kamra! Ma jistgħux jemmnu ’l għajnejhom għax huma sakkru l-​bibien minħabba li qed jibżgħu mil-​Lhud. Minkejja dan, Ġesù qiegħed wieqaf f’nofshom. Bil-​kalma kollha jgħid: “Is-​sliem għalikom.” Imma huma qed jibżgħu. Kif diġà għamlu fil-​passat, ‘qed jimmaġinaw li qed jaraw xi spirtu.’—Luqa 24:36, 37; Mattew 14:25-​27.

Biex juri li mhuwiex xi dehra jew xi ħaġa li sempliċement qed jimmaġinaw imma, minflok, li veru għandu ġisem uman, Ġesù jurihom idejh u saqajh u jgħid: “Għala qed titħawdu, u għala qed tiddubitaw fi qlubkom? Araw idejja u saqajja, kif dan hu jien; missuni u araw, għax spirtu m’għandux laħam u għadam kif qed taraw li għandi jien.” (Luqa 24:36-​39) Huma jħossuhom ferħanin se jtiru u mgħaġġbin imma xorta qed isibuha xi ftit bi tqila biex jemmnuh.

Biex jipprova jkompli jgħinhom jaraw li hu reali, hu jistaqsi: “Għandkom xi ħaġa x’niekol hemmhekk?” Huma jagħtuh biċċa ħuta mixwija u hu jikolha. Imbagħad jgħid: “Dan hu l-​kliem li għedtilkom waqt li kont għadni magħkom [qabel il-​mewt tiegħi], li kulma hemm miktub dwari fil-​liġi taʼ Mosè u fil-​Profeti u fis-​Salmi jrid jitwettaq.”—Luqa 24:41-​44.

Ġesù kien għen lil Kleofa u lil sieħbu jifhmu l-​Iskrittura, u issa jagħmel l-​istess għal dawk kollha miġburin hawnhekk: “Hekk hu miktub li l-​Kristu kellu jbati u jqum mill-​imwiet fit-​tielet jum, u f’ismu l-​indiema għall-​maħfra tad-​dnubiet kellha tiġi pridkata fil-​ġnus kollha; billi tibdew minn Ġerusalemm intom tridu tkunu xhieda taʼ dan.”—Luqa 24:46-​48.

Għal xi raġuni jew oħra, l-​appostlu Tumas mhuwiex preżenti. Fil-​jiem taʼ wara, oħrajn b’ferħ jgħidulu: “Rajna lill-​Mulej!” Tumas iwieġeb: “Jekk ma narax il-​marka taʼ l-​imsiemer f’idejh u ma nqegħedx sebgħi ġol-​marka taʼ l-​imsiemer u idi ġo ġenbu, żgur ma nemminx.”—Ġwanni 20:25.

Tmint ijiem wara, id-​dixxipli reġgħu qed jiltaqgħu f’kamra msakkra imma din id-​darba hemm Tumas magħhom. Ġesù jidher f’nofshom b’ġisem uman u jilqagħhom billi jgħid: “Is-​sliem għalikom.” Ġesù jdur lejn Tumas u jgħidlu: “Poġġi sebgħek hawn, u ara idejja, u ġib idek u daħħalha f’ġenbi, u tibqax ma temminx iżda emmen.” Tumas jgħid: “Mulej tiegħi u Alla tiegħi!” (Ġwanni 20:26-​28) Iva, issa m’għandu l-​ebda dubju li Ġesù hu ħaj bħala ħliqa spirtu setgħan li hu r-​rappreżentant t’Alla Ġeħova.

“Emmint għax rajtni?” jistaqsi Ġesù. “Henjin dawk li ma jarawx u xorta jemmnu.”—Ġwanni 20:29.