‘Komplu Mexjin fil-​Verità’

1. Kif nibbenefikaw meta nitkellmu mal-​aħwa dwar kif sibna “l-​verità”?

“KIF sibt il-​verità?” Bla dubju int weġibt din il-​mistoqsija ħafna drabi. Din hi waħda mill-​ewwel mistoqsijiet li nsaqsu lill-​aħwa meta nkunu rridu nsiru nafuhom aħjar. Aħna nieħdu pjaċir inkunu nafu kif l-​aħwa saru jafu lil Ġeħova u bdew iħobbuh, u nieħdu pjaċir ngħidulhom għala kuntenti li aħna Xhieda taʼ Ġeħova. (Rum. 1:11) Dawn il-​konversazzjonijiet jgħinuna nibqgħu niftakru għala nħobbu l-​verità. Se nsiru wkoll iktar determinati li ‘nkomplu mexjin fil-​verità.’ Dan ifisser li nkomplu ngħixu ħajjitna b‘mod li jogħġob lil Ġeħova u li jkollna l-​barka tiegħu.—3 Ġw. 4.

2. X’se nikkunsidraw f’dan l-​artiklu?

² F’dan l-​artiklu se naraw xi raġunijiet għala nħobbu l-​verità. Imbagħad se nikkunsidraw kif nistgħu nkomplu nuru l-​imħabba tagħna għal dan ir-​rigal prezzjuż. Bla dubju, dan se jgħinna napprezzaw iktar li Ġeħova ġibidna lejh. (Ġw. 6:44) Dan se jsaħħaħ ukoll ix-​xewqa tagħna li ngħallmu l-​veritajiet tal-​Bibbja lil oħrajn.

GĦALA NĦOBBU “L-​VERITÀ”?

3. Liema hi l-​iktar raġuni importanti għala nħobbu l-​verità?

³ Aħna nħobbu l-​verità għal ħafna raġunijiet. L-​iktar raġuni importanti hi li nħobbu lil Alla Ġeħova li minnu ġejja l-​verità. Permezz tal-​Kelma tiegħu, il-​Bibbja, aħna mhux biss sirna nafuh bħala l-​iktar Persuna b’saħħitha fis-​sema u fuq l-​art, imma wkoll bħala Missier kollu mħabba li jimpurtah minna. (1 Pt. 5:7) Aħna nafu li Alla tagħna hu “ħanin u grazzjuż, bil-​mod biex jirrabja u għani fil-​qalb tajba bl-​imħabba u l-​verità.” (Eżo. 34:6) Ġeħova jħobb il-​ġustizzja. (Is. 61:8) Hu jweġġaʼ meta jarana nbatu, u jħares ’il quddiem għal dak iż-​żmien meta se jneħħi t-​tbatija kollha. (Ġer. 29:11) Aħna wkoll inħarsu ’l quddiem għal dan iż-​żmien sabiħ! Din hi waħda mir-​raġunijiet għala nħobbu ħafna lil Ġeħova!

4-5. L-​appostlu Pawlu għala qabbel it-​tama li għandna m’ankra?

⁴ X’inhi raġuni oħra għala nħobbu l-​verità? Il-​verità ġġibilna ħafna barkiet. Ejja naraw eżempju. Il-​verità fil-​Bibbja tinkludi t-​tama tagħna għall-​futur. Biex nifhmu kemm hi prezzjuża din it-​tama, l-​appostlu Pawlu kiteb: “Din it-​tama li għandna hi bħal ankra għal ruħna, żgura u soda.” (Ebr. 6:19) Bħalma ankra żżomm dgħajsa f’postha, it-​tama tagħna se tgħinna nħossuna kalmi meta jkollna l-​problemi.

⁵ F’dawn il-​versi, Pawlu kien qed jitkellem dwar it-​tama għas-​sema li għandhom il-​midlukin. Imma dak li qal japplika wkoll għall-​Kristjani li jħarsu ’l quddiem biex jgħixu għal dejjem f’ġenna tal-​art. (Ġw. 3:16) Bla dubju, issa li għandna t-​tama li nistgħu ngħixu għal dejjem jagħtina skop f’ħajjitna.

6-7. Yvonne kif ibbenefikat meta tgħallmet il-​verità dwar il-​futur?

⁶ Aħseb dwar l-​esperjenza taʼ oħt jisimha Yvonne. Hi ma twilditx fil-​verità u meta kienet żgħira kienet tibżaʼ mill-​mewt. Hi tiftakar li qrat frażi li qatt ma setgħet tinsa: “Xi darba mhux se jkun hemm l-​għada.” Hi tgħid: “Dan il-​kliem ma kienx iħallini norqod billejl għax kont noqgħod naħseb fuq il-​futur. Ma kontx nifhem għala ngħixu għal ftit żmien u mbagħad immutu. Kont nistaqsi, ‘Għala qiegħda hawn?’ Jien ma ridtx immut!”

⁷ Iktar tard, Yvonne, meta kienet teenager, iltaqgħet max-​Xhieda taʼ Ġeħova. Hi tgħid: “Jien bdejt nemmen li jistaʼ jkolli t-​tama li ngħix għal dejjem f’Ġenna tal-​art.” Yvonne kif ibbenefikat meta tgħallmet il-​verità? Hi tkompli tgħid: “Issa billejl bdejt norqod u ma bqajtx ninkwieta dwar il-​futur jew il-​mewt.” Kif tistaʼ timmaġina, il-​verità hi prezzjuża ħafna għal Yvonne, u hi vera tieħu pjaċir taqsam it-​tama tagħha dwar il-​futur m’oħrajn.—1 Tim. 4:16.

8-9. (a) F’wieħed mill-​eżempji li ta Ġesù, ir-​raġel kemm qiesu prezzjuż it-​teżor li sab? (b) Kemm hi prezzjuża l-​verità għalik?

⁸ Il-​verità tal-​Bibbja tinkludi wkoll l-​aħbar tajba dwar is-​Saltna t’Alla. Ġesù qabbel il-​verità dwar is-​Saltna maʼ teżor moħbi. F’​Mattew 13:44, Ġesù qal: “Is-​saltna tas-​smewwiet hi bħal teżor moħbi f’għalqa li sabu wieħed raġel u ħbieh; u tant jifraħ li jmur u jbigħ kulma għandu u jixtri dik l-​għalqa.” Innota li r-​raġel ma kienx qed ifittex it-​teżor. Imma meta sabu għamel sagrifiċċji kbar biex jakkwistah. Fil-​fatt, hu biegħ kulma kellu. Għala? Għax hu kien jaf li t-​teżor li sab kien vera prezzjuż. Kien jiswa ħafna iktar mill-​affarijiet kollha li biegħ.

⁹ Int tħossok hekk dwar il-​verità? Bla dubju li iva! Aħna nafu li xejn mhu iktar prezzjuż mill-​ferħ li ngawdu għax naqdu lil Ġeħova, bit-​tama li ngħixu ħajja taʼ dejjem taħt is-​Saltna t’Alla. Il-​privileġġ li għandna li nistgħu ngawdu ħbiberija mill-​qrib maʼ Ġeħova jiswa iktar minn kull sagrifiċċju li nagħmlu. L-​iktar ħaġa li nieħdu pjaċir nagħmlu hi li ‘nogħġbuh għalkollox.’—Kol. 1:10.

10-11. X’ġiegħel lil Michael jagħmel bidliet kbar f’ħajtu?

¹⁰ Ħafna minna għamilna sagrifiċċji kbar biex nogħġbu lil Ġeħova. Xi wħud telqu x-​xogħol li kellhom li minnu kienu jaqilgħu ħafna flus. Oħrajn ma baqgħux jipprovaw isiru sinjuri. U oħrajn biddlu l-​mod taʼ ħajja li kienu jgħixu meta tgħallmu dwar Ġeħova. Michael hekk għamel. Hu ma twilidx fil-​verità. Meta kien żagħżugħ kien jittrennja l-​karatè. Hu jgħid: “It-​trejning kien importanti ħafna għalija. Xi kultant kont inħoss li ħadd ma jistaʼ jirbaħli.” Imma meta beda jistudja l-​Bibbja, Michael tgħallem dwar kif Ġeħova jqis il-​vjolenza. (Salm 11:5) Dwar il-​koppja li studjaw miegħu, Michael jgħid: “Huma qatt ma qaluli biex inwaqqaf il-​karatè, imma komplew jgħallmuni l-​veritajiet tal-​Bibbja.”

¹¹ Iktar ma Michael sar jaf lil Ġeħova, iktar sar iħobbu. L-​iktar ħaġa li messitlu qalbu kienet li Ġeħova jħoss għall-​qaddejja tiegħu. Maż-​żmien, Michael irrealizza li kellu jieħu deċiżjoni. Hu jgħid: “Jien kont naf li biex nieqaf mill-​karatè kienet se tkun l-​iktar ħaġa diffiċli li qatt għamilt. Imma kont naf ukoll li Ġeħova kien se jkun kuntent bija. Kont konvint illi li naqdi lilu kienet l-​aħjar ħaġa.” Michael kien jaf li l-​verità li sab kienet prezzjuża ħafna, u għalhekk kien lest li jagħmel bidliet kbar fil-​ħajja tiegħu.—Ġak. 1:25.

12-13. Il-​veritajiet tal-​Bibbja kif għenu lil Mayli?

¹² Biex turi kemm hi importanti l-​verità, il-​Bibbja tqabbilha maʼ lampa mixgħula fid-​dlam. (Salm 119:105; Efes. 5:8) Mayli, mill-​Ażerbajġan, vera tapprezza l-​għajnuna li rċiviet mill-​Kelma t’Alla. Il-​ġenituri tagħha kellhom reliġjon differenti. Missierha kien Musulman, u ommha kienet Lhudija. Hi tgħid: “Minkejja li kont nemmen li Alla jeżisti, kelli ħafna mistoqsijiet. Kont nistaqsi, ‘Alla għala ħalaqna? Għala nbatu ħajjitna kollha u wara nkomplu nbatu għal dejjem fl-​infern?’ Minħabba li n-​nies jgħidu li dak kollu li jiġri ġej minn Alla, kont ngħid, ‘Alla jikkontrolla lin-​nies u jieħu pjaċir jarahom ibatu?’”

¹³ Mayli baqgħet tfittex it-​tweġibiet għall-​mistoqsijiet li kellha. Maż-​żmien, hi aċċettat studju tal-​Bibbja u saret waħda mix-​Xhieda taʼ Ġeħova. Hi tgħid: “Dak li tgħid il-​Bibbja kien jagħmel sens għalija, u dan għenni biex inkun iktar ferħana. L-​ispjegazzjonijiet li sibt fil-​Bibbja huma taʼ min joqgħod fuqhom u għenuni biex ma nibqax inħossni mħawda.” Bħal Mayli, aħna wkoll infaħħru lil Ġeħova, ‘dak li sejħilna mid-​dlam għal ġod-​dawl tiegħu taʼ l-​għaġeb.’—1 Pt. 2:9.

14. Kif nistgħu nħobbu iktar il-​verità? (Ara l-​kaxxa “Affarijiet Oħra li Nistgħu Nqabblu mal-​Verità tal-​Bibbja.”)

¹⁴ Dawn huma ftit eżempji li juru kemm hi prezzjuża l-​verità. Żgur li tistaʼ taħseb f’ħafna eżempji oħra. Tistaʼ tagħmel studju persunali biex issib raġunijiet oħra għala għandna nħobbu l-​verità? Iżjed ma nħobbu l-​verità, iżjed se nsibu modi kif nuru kemm hi prezzjuża għalina.

KIF NURU LI NĦOBBU L-​VERITÀ?

15. B’liema mod nistgħu nuru li nħobbu l-​verità?

¹⁵ Aħna nistgħu nuru li nħobbu l-​verità billi nistudjaw il-​Bibbja u l-​pubblikazzjonijiet tagħna b’mod regulari. Wara kollox, ilna kemm ilna fil-​verità, dejjem hemm xi ħaġa x’nitgħallmu. L-​ewwel ħarġa taʼ din ir-​rivista qalet: “Tant hawn tagħlim falz fid-​dinja li jistaʼ jkun diffiċli ssib il-​verità. Biex issibha trid dejjem tkun attent u tagħmel sforz. Tkunx kuntent b’verità waħda, imma dejjem fittex veritajiet oħra fil-​Bibbja.” Mhux dejjem faċli li tistudja, imma l-​isforz li tagħmel huwa worth it.

16. Int x’tagħmel biex tibbenefika l-​iżjed meta tistudja? (Proverbji 2:4-​6)

¹⁶ Mhux kulħadd iħobb jaqra u jistudja. Imma Ġeħova jixtieqna ‘nibqgħu nfittxu u nibqgħu nħaffru’ biex nifhmu l-​verità aħjar. (Aqra Proverbji 2:4-​6.) Meta nagħmlu dan l-​isforz, aħna dejjem se nibbenefikaw. Corey jgħid li meta jaqra l-​Bibbja jiffoka fuq vers wieħed biss. Hu jispjega: “Jien naqra l-​footnotes kollha, nara l-​cross references li jkun hemm, u nagħmel riċerka. . . . B’dan il-​mod inkun nistaʼ nitgħallem iktar!” Hu x’inhu l-​mod kif nistudjaw, meta nagħmlu sforz inkunu qed nuru li napprezzaw il-​verità.—Salm 1:1-​3.

17. Xi jfisser li tgħix il-​verità? (Ġakbu 1:25)

¹⁷ Bla dubju, aħna nafu li mhux biżżejjed nistudjaw il-​verità. Biex nibbenefikaw bl-​aħjar mod irridu ngħixu l-​verità, jiġifieri napplikaw dak li nitgħallmu fil-​ħajja tagħna. B’dan il-​mod biss il-​verità se ġġibilna ferħ veru. (Aqra Ġakbu 1:25.) Kif nistgħu nkunu ċerti li qed ngħixu l-​verità? Ħu jissuġġerixxi li naraw jekk hux qed napplikaw dak li qed nitgħallmu u fejn nistgħu ntejbu. L-​appostlu Pawlu qal: “Għamilna kemm għamilna progress, ejjew inkomplu mexjin bl-​ordni b’din l-​istess rutina.”—Flp. 3:16.

18. Liema affarijiet tajbin se ngawdu meta ‘nkomplu mexjin fil-​verità’?

¹⁸ Aħseb fuq l-​affarijiet tajbin li ngawdu meta ‘nkomplu mexjin fil-​verità’! Mhux biss se jkollna ħajja aħjar imma wkoll se nferrħu lil Ġeħova u lil ħutna. (Prov. 27:11; 3 Ġw. 4) Dawn huma l-​aqwa raġunijiet biex inħobbu l-​verità u ngħixuha.