Kun Kuraġġuż bħal Sadok

1-2. Sadok min kien? (1 Kronaki 12:​22, 26-28)

IMMAĠINA 340,000 raġel qed jifirħu, jieklu, jixorbu, u jkantaw lil Ġeħova. Huma qegħdin fil-muntanji taʼ Ħebron u ilhom tlett ijiem hemmhekk. Huma marru hemm biex jagħmlu lil David ir-re taʼ Iżrael. (1 Kron. 12:39) Wieħed minnhom kien żagħżugħ jismu Sadok, li kien jidher li ma kellu xejn speċjali. Imma Ġeħova nnotah u riedna nkunu nafu li kien qiegħed hemm. (Aqra l​-1 Kronaki 12:​22, 26-28.) Min kien Sadok?

² Sadok kien qassis u kien jaħdem ħafna mal-Qassis il-Kbir Abjatar. Hu kien ukoll profeta. Ġeħova tah ħafna għerf u b’hekk setaʼ jifhem xi jrid Ġeħova. (2 Sam. 15:27) In-nies kienu jmorru għandu meta jkollhom bżonn xi parir. Imma minbarra dawn il-kwalitajiet, hu kien kuraġġuż. F’dan l-artiklu se niffokaw fuq kif wera din il-kwalità.

3. (a) Għala għandna bżonn il-kuraġġ? (b) X’se nitgħallmu f’dan l-artiklu?

³ Illum Satana qed jattakkana aktar minn qatt qabel biex ma nibqgħux leali. (1 Pt. 5:8) Hemm bżonn li nkunu kuraġġużi sakemm Ġeħova jeqred lil Satana u s-sistema ħażina tiegħu. (Salm 31:24) Issa se naraw tliet modi kif nistgħu nimitaw il-kuraġġ li kellu Sadok.

ISSAPPORTJA S-SALTNA T’ALLA

4. Għala għandna bżonn il-kuraġġ biex nissapportjaw is-Saltna t’Alla? (Ara l-istampa.)

⁴ Peress li aħna nħobbu lil Ġeħova, nissapportjaw is-Saltna tiegħu. Imma għandna bżonn il-kuraġġ. (Mt. 6:33) Pereżempju, għandna bżonn il-kuraġġ biex ngħixu skont dak li jgħidilna Ġeħova u nippritkaw dwar is-Saltna tiegħu. (1 Tess. 2:2) Għandna bżonn il-kuraġġ ukoll għax id-dinja hi maqsuma minħabba l-politika, u allura hu importanti li aħna nibqgħu newtrali u ma nżommu maʼ ħadd. (Ġw. 18:36) Minħabba li l-aħwa ma jiħdux sehem fil-politika u ma jsirux suldati, ħafna drabi jkollhom problemi taʼ flus, jintefgħu l-ħabs, u jistaʼ jkun jiġu msawtin.

5. Sadok għala kellu bżonn il-kuraġġ biex jissapportja lil David?

⁵ Sadok mar Ħebron meta David sar re biex jiċċelebra, imma kien lest ukoll biex jiġġieled u allura ħa l-armi tiegħu. (1 Kron. 12:38) Sadok kien lest li jekk David imur għall-gwerra hu jmur miegħu biex jipproteġi lill-Iżraelin ukoll. Sadok jistaʼ jkun ma kellux esperjenza bħala suldat, imma hu kien kuraġġuż ħafna.

6. David kif kien taʼ eżempju għal Sadok? (Salm 138:3)

⁶ Sadok kif sar daqshekk kuraġġuż? Hu kien jaf ħafna rġiel kuraġġużi u żgur tgħallem ħafna minnhom. David kien wieħed minnhom. Meta kien imur għall-gwerer hu kien juri kuraġġ kbir u b’hekk kien t’eżempju tajjeb għall-Iżraelin kollha. (1 Kron. 11:​1, 2) David kellu dan il-kuraġġ għax għamel lil Ġeħova ‘t-tarka tiegħu’ u kien jafda fih. (Salm 28:7; aqra Salm 138:3.) Kien hemm nies oħra li kienu taʼ eżempju għal Sadok, bħal pereżempju Ġeħojada u t-tifel tiegħu Benaja, li kien suldat. Barra minn hekk, kien hemm 22 kap f’Iżrael li dejjem kienu jissapportjaw lil David. (1 Kron. 11:​22-25; 12:​26-28) Dawn l-irġiel kollha riedu li David ikun ir-re tagħhom u kienu lesti li jipproteġuh.

7. (a) Illum x’eżempji taʼ kuraġġ għandna? (b) Bħalma hemm fil-vidjow, x’titgħallem mill-esperjenza taʼ Ħuna Nsilu?

⁷ Meta naħsbu kif oħrajn urew kuraġġ biex jibqgħu leali lejn Ġeħova u s-Saltna tiegħu, jistaʼ jgħinna ħafna biex inkunu kuraġġużi. Ir-Re tagħna Kristu Ġesù baqaʼ sod meta kien fid-dinja u ma ħax sehem fil-politika. (Mt. 4:​8-11; Ġw. 6:​14, 15) Hu dejjem kien ifittex lil Ġeħova biex itih il-kuraġġ u s-saħħa ħalli jibqaʼ jobdih. Illum ukoll hemm ħafna aħwa żgħażagħ li ma jsirux suldati u ma jiħdux sehem fil-politika. Ninkuraġġuk biex tara l-esperjenzi tagħhom fuq jw.org.a

GĦIN LILL-AĦWA

8. L-anzjani meta jistaʼ jkollhom bżonn il-kuraġġ biex jgħinu lill-aħwa?

⁸ In-nies taʼ Ġeħova jħobbu jgħinu lil xulxin. (2 Kor. 8:4) Imma biex jagħmlu hekk, ġieli jkollhom bżonn il-kuraġġ. Pereżempju, meta tinqalaʼ xi gwerra, l-anzjani jkunu jafu li l-aħwa għandhom bżonn l-inkuraġġiment u l-għajnuna. Allura, ituhom dak li jkollhom bżonn bħal fejn joqogħdu u xi ikel. Barra minn hekk, jaraw li jipprovdulhom l-għajnuna spiritwali. L-anzjani jħobbuhom ħafna lill-aħwa, u allura jagħmlu kulma jistgħu biex ituhom dak li jkollhom bżonn anke meta jkun perikoluż għalihom. (Ġw. 15:​12, 13) Meta l-anzjani jagħmlu hekk, ikunu qed jimitaw il-kuraġġ taʼ Sadok.

9. Skont it-​2 Samwel 15:​27-29, David x’qallu jagħmel lil Sadok? (Ara l-istampa.)

⁹ David kien fil-periklu għax it-tifel tiegħu Absalom ipprova jsir re minfloku. (2 Sam. 15:​12, 13) Allura hu kellu jaħrab minn Ġerusalemm malajr kemm jistaʼ jkun! Hu qal lill-qaddejja tiegħu: “Ejja naħarbu, għax ħadd minna mhu se jeħlisha minn Absalom!” (2 Sam. 15:14) Waqt li kulħadd kien ħiereġ mill-belt, David irrealizza li xi ħadd kellu jibqaʼ hemmhekk ħalli jkun jistaʼ jgħidlu x’se jagħmel Absalom. Allura hu qal lil Sadok u lil xi qassisin oħra biex jerġgħu jmorru lura. (Aqra t-​2 Samwel 15:​27-29.) Huma kellhom joqogħdu attenti għax din kienet xi ħaġa perikoluża. Absalom ried joqtol lil missieru u kien raġel vjolenti u egoist. Mela immaġina x’kien jagħmlilhom kieku qabadhom!

10. Sadok u oħrajn kif ipproteġew lil David?

¹⁰ David għamel pjan maʼ Sadok u ħabib ieħor tiegħu jismu Ħusaj. (2 Sam. 15:​32-37) Ħusaj kellu jagħmilha taparsi qed jissapportja lil Absalom u jagħtih parir taʼ kif jistaʼ jattakka lil David. Dan il-pjan kien se jgħin lil David biex ikollu biżżejjed żmien ħalli jattakkah. Imbagħad Ħusaj qal lil Sadok u Abjatar x’kien se jiġri. (2 Sam. 17:​8-16) Allura, Sadok u Ħusaj qalu lil David bil-pjan. (2 Sam. 17:17) B’hekk, bl-għajnuna taʼ Ġeħova, Sadok u l-qassisin l-oħra setgħu jipproteġu lil David.—2 Sam. 17:​21, 22.

11. Kif nistgħu nkunu kuraġġużi bħal Sadok meta ngħinu lill-aħwa?

¹¹ Jekk fi żminijiet diffiċli jgħidulna biex ngħinu lill-aħwa, kif nistgħu nkunu kuraġġużi bħal Sadok? (1) Obdi d-direzzjoni. Dan hu importanti biex inkunu nistgħu nibqgħu magħqudin. Obdi l-istruzzjonijiet li jiġu mill-uffiċċju tal-fergħa. (Ebr. 13:17) L-anzjani b’mod regolari għandhom jirrivedu l-istruzzjonijiet għal meta jinqalaʼ xi diżastru biex b’hekk ikunu preparati. (1 Kor. 14:​33, 40) (2) Kun kuraġġuż imma oqgħod attent. (Prov. 22:3) Aħseb qabel tagħmel xi ħaġa u ibqaʼ safe. Allura tiħux riskji għalxejn. (3) Afda f’Ġeħova. Tinsiex li hu jrid li kemm int u kemm l-aħwa tibqgħu safe, għalhekk hu se jgħinek.

12-13. X’titgħallem mill-esperjenza taʼ Viktor u Vitalii? (Ara l-istampa.)

¹² Fl-Ukrajna, żewġ anzjani jisimhom Viktor u Vitalii, għenu biex jieħdu l-ikel lill-aħwa. Viktor jgħid: “Fittixna kullimkien għall-ikel. Ħafna drabi konna nisimgħu n-nies jisparaw fil-viċin. Imma ħu tana xi ikel minn tiegħu u dan għen lill-aħwa għal xi żmien. Waqt li konna qed inpoġġu l-affarijiet fit-trakk, waqgħet bomba xi 20 metru ’l bogħod biss minna. Jien għamilt il-ġurnata kollha nitlob lil Ġeħova biex itini l-kuraġġ ħalli nkompli ngħin lill-aħwa.”

¹³ Vitalii jgħid: “Kellna bżonn ħafna kuraġġ. L-ewwel vjaġġ li għamilt biex ngħin lill-aħwa dam 12-il siegħa u jien għamilt triq sħiħa nitlob.” Hu kien kuraġġuż imma qagħad attent ukoll. Vitalii jkompli jgħid: “Jien tlabt ħafna drabi lil Ġeħova biex jgħinni nkun modest u nara x’għandi nagħmel. Soqna biss f’toroq li l-awtoritajiet qalulna li kienu safe. Il-fidi tiegħi vera ssaħħet meta rajt kif l-aħwa ħadmu flimkien. Pereżempju, huma neħħew il-ġebel u l-affarijiet li waqgħu fit-triq. Għenu wkoll biex niġbru l-ikel u affarijiet oħra li kellna bżonn u npoġġuhom fit-trakk u ħadu ħsieb lili u lil Viktor ukoll.”

IBQAʼ LEALI LEJN ĠEĦOVA

14. Kif nistgħu nħossuna jekk xi ħadd li nħobbu jieqaf jaqdi lil Ġeħova?

¹⁴ Waħda mill-iktar affarijiet diffiċli li jistaʼ jiġrilek hi li xi ħabib jew xi ħadd tal-familja jieqaf jaqdi lil Ġeħova. (Salm 78:40; Prov. 24:10) Iktar ma tkun tħobb lil din il-persuna, iktar se jkun diffiċli. L-eżempju taʼ Sadok se jgħinek ħafna.

15. Sadok għala kellu bżonn il-kuraġġ biex jibqaʼ leali lejn Ġeħova? (1 Slaten 1:​5-8)

¹⁵ Sadok baqaʼ leali lejn Ġeħova anke meta l-ħabib tiegħu Abjatar ma baqax leali. Meta David kiber u wasal biex imut, it-tifel tiegħu Adonija pprova jsir re avolja Ġeħova ried li r-re li jmiss ikun Salamun. (1 Kron. 22:​9, 10) Abjatar beda jissapportja lil Adonija. (Aqra l​-1 Slaten 1:​5-8.) B’hekk, hu la baqaʼ leali lejn David u lanqas lejn Ġeħova! Immaġina kemm setaʼ ħassu mdejjaq Sadok. Huma kienu ħadmu flimkien bħala qassisin għal iktar minn erbgħin sena. (2 Sam. 8:17) Huma kienu ħadu ħsieb ukoll “l-Arka tal-Alla l-veru” flimkien. (2 Sam. 15:29) Għall-ewwel, it-tnejn li huma kienu leali lejn David u qdew lil Ġeħova flimkien.—2 Sam. 19:​11-14.

16. X’għen lil Sadok biex jibqaʼ leali?

¹⁶ Sadok baqaʼ leali avolja Abjatar dar kontra Ġeħova. David kien ċert li dejjem jistaʼ jafda lil Sadok. Fil-fatt, meta nduna b’dak li pprova jagħmel Adonija, David qabbad lil Sadok, Natan, u Benaja biex jagħmlu lil Salamun re. (1 Slat. 1:​32-34) Peress li Sadok kien ikun maʼ nies leali lejn Ġeħova u David, bħal Natan, żgur li kien inkuraġġit ħafna biex jagħmel dak li hu tajjeb. (1 Slat. 1:38, 39) Meta Salamun sar re, inkariga “lil Sadok il-qassis minflok Abjatar.”—1 Slat. 2:35.

17. Kif tistaʼ timita lil Sadok jekk xi ħadd li tħobb ma jibqax leali lejn Ġeħova?

¹⁷ X’ħa tagħmel jekk xi ħadd li tħobb ma jibqax leali lejn Ġeħova? Uri lil Ġeħova li se tibqaʼ leali lejh. (Ġoż. 24:15) Hu se jtik il-kuraġġ biex tagħmel dak li hu sew. Itlob lil Ġeħova u kun maʼ nies li huma leali lejh. Hu japprezza ħafna l-lealtà tiegħek u se jbierkek taʼ dak li tagħmel.—2 Sam. 22:26.

18. X’titgħallem mill-esperjenza taʼ Marco u Sidse?

¹⁸ Aħseb dwar l-esperjenza taʼ Marco u Sidse. Iż-żewġt itfal tagħhom ma baqgħux jaqdu lil Ġeħova. Marco jgħid: “Mill-ġurnata li jitwieldu t-tfal, tant tkun tħobbhom li tkun lest li tagħmel minn kollox biex tipproteġihom mill-affarijiet ħżiena. Allura meta ma jibqgħux jaqdu lil Ġeħova jkun vera taʼ wġigħ. Imma Ġeħova għenna ħafna biex nissaportu. Hu dejjem għamel ċert li meta jien inkun imdejjaq, il-mara tiegħi tkun b’saħħitha u tinkuraġġini, u meta hi tkun imdejqa jien ninkuraġġiha.” Sidse tgħid: “Kieku Ġeħova ma taniex is-saħħa li kellna bżonn, ma kienx jirnexxilna nissaportu. Jien kont inħoss li kien it-tort tiegħi li t-tfal ma baqgħux jaqdu lil Ġeħova. Allura tlabtu ħafna biex jgħinni. Xi ġranet wara, iltqajt maʼ oħt li kont ilni ma naraha ħafna snin. Hi poġġiet idha fuq spallti u qaltli: ‘Tinsiex. Mhux it-tort tiegħek!’ Bl-għajnuna taʼ Ġeħova, jien bqajt naqdih bil-ferħ.”

19. X’int determinat li tagħmel?

¹⁹ Ġeħova jrid li n-nies tiegħu jkunu kuraġġużi bħalma kien Sadok. (2 Tim. 1:7) Imma hu ma jridx nagħmlu dan waħedna. Hu jridna li nfittxu lilu għall-għajnuna. Allura meta tiġi f’xi sitwazzjoni li jkollok bżonn il-kuraġġ fittex lil Ġeħova. Kun ċert li hu se jagħtik il-kuraġġ bħalma ta lil Sadok!—1 Pt. 5:10.