Iżakk kellu 40 sena meta żżewweġ lil Rebekka. Hu kien iħobbha ħafna. Maż-​żmien, huma kellhom żewġ subien li kienu tewmin.

Il-​kbir mit-​tewmin kien jismu Għesaw, u ż-​żgħir, Ġakobb. Għesaw ma kienx iħobb joqgħod ġewwa, u kien kapaċi jikkaċċja l-​annimali. Imma Ġakobb kien iħobb joqgħod ġewwa.

F’dak iż-​żmien, meta jmut il-​missier, l-​iben il-​kbir kien jingħata kważi l-​art u l-​flus kollha. Dan kien jissejjaħ wirt. Fil-​familja taʼ Iżakk, il-​wirt kien jinkludi wkoll il-​wegħdi li Ġeħova kien għamel lil Abraham. Għesaw ma tantx kien jimpurtah minn dawn il-​wegħdi, imma Ġakobb kien jaf li dawn kienu importanti ħafna.

Darba waħda, Għesaw ġie lura d-​dar għajjien mejjet wara ġurnata twila jikkaċċja. Hu xamm ir-​riħa tfuħ tal-​ikel li Ġakobb kien qed isajjar, u qallu: ‘Għandi l-​ġuħ! Agħtini naqra minn dik is-​soppa l-​ħamra!’ Ġakobb qallu: ‘Mela le, imma l-​ewwel wegħedni li nistaʼ nieħu l-​wirt tiegħek.’ Għesaw qallu: ‘Jien ma jimpurtanix mill-​wirt! Tistaʼ tieħdu. L-​aqwa li niekol.’ Taħseb li d-​deċiżjoni li ħa Għesaw kienet tajba? Le, ma kinitx. Għesaw bidel xi ħaġa prezzjuża ħafna maʼ naqra soppa.

Meta Iżakk xjaħ ħafna, kien wasal iż-​żmien biex ibierek lill-​iben il-​kbir. Imma Rebekka għenet lil Ġakobb, l-​iben iż-​żgħir, biex jiħodha hu l-​barka. Meta Għesaw sar jaf b’dan, irrabja ħafna u ppjana biex joqtol lil ħuh. Iżakk u Rebekka riedu jipproteġu lil Ġakobb, u allura qalulu: ‘Mur u oqgħod għand zijuk, Laban, sakemm Għesaw jikkalma.’ Ġakobb semaʼ mill-​parir tal-​ġenituri tiegħu u telaq ħalli jsalva ħajtu.

Ġeħova wiegħed lil Ġakobb li kien se jipproteġih bħalma kien ipproteġa lil Abraham u Iżakk. Ġakobb issetilja f’post jismu Ħaran. Hemmhekk hu żżewweġ, kellu familja kbira, u sar sinjur ħafna.

Maż-​żmien, Ġeħova qal lil Ġakobb: ‘Erġaʼ lura f’art twelidek.’ Allura, Ġakobb u l-​familja tiegħu bdew il-​vjaġġ twil tagħhom lura. Fi triqithom, il-​qaddejja taʼ Ġakobb ġew fuqu u qalulu: ‘Ġej ħuk Għesaw, u miegħu għandu 400 raġel!’ Ġakobb beda jibżaʼ li Għesaw ried iweġġaʼ lilu u lil familtu. Għalhekk hu talab lil Ġeħova: ‘Jekk jogħġbok, ipproteġini minn ħija.’ L-​għada, Ġakobb bagħat bħala rigal lil Għesaw ħafna nagħaġ, mogħoż, baqar, iġmla, u ħmir.

Dak il-​lejl, meta Ġakobb kien waħdu, ra anġlu! L-​anġlu beda jissara miegħu. Huma ssaraw flimkien sa filgħodu. Għalkemm Ġakobb kien imweġġaʼ, hu ma riedx iċedi. L-​anġlu qallu: ‘Itlaqni.’ Imma biex ikun ċert li Ġeħova kien se jgħinu, Ġakobb qallu: ‘Le, mhux qabel ma tberikni.’

L-​anġlu fl-​aħħar bierek lil Ġakobb. Issa Ġakobb kien jaf li Ġeħova ma kienx se jħalli lil Għesaw iweġġgħu.

Dakinhar filgħodu, Ġakobb ħares fil-​bogħod u ra lil Għesaw u l-​400 raġel. Ġakobb mar fuq in-​naħa taʼ quddiem tal-​familja u miel quddiem ħuh sebaʼ darbiet. Għesaw ġera lejn Ġakobb u għannqu. Iż-​żewġ aħwa nfaqgħu jibku u għamlu paċi. Kif taħseb li ħassu Ġeħova għal mod kif Ġakobb aġixxa f’din is-​sitwazzjoni?

Iktar tard, Għesaw mar lura lejn daru, u Ġakobb kompla bil-​vjaġġ tiegħu. Ġakobb kellu b’kollox 12-​il tifel. L-​ismijiet tagħhom kienu Ruben, Simegħon, Levi, Ġuda, Dan, Naftali, Gad, Aser, Issakar, Żebulun, Ġużeppi, u Benjamin. Wieħed minnhom—Ġużeppi—Ġeħova użah biex isalva lill-​poplu Tiegħu. Taf kif? Ejja naraw.