Mosè għex f’Midjan għal 40 sena. Hu żżewweġ u kellu t-​tfal. Darba waħda, waqt li kien qed jieħu ħsieb in-​nagħaġ tiegħu qrib il-​Muntanja Sinaj, hu ra xi ħaġa tal-​għaġeb. Siġra tal-​għollieq kienet qed taqbad, imma ma bdietx tinħaraq! Meta Mosè resaq viċin biex jara għala, hu semaʼ leħen minn ġos-​siġra jgħid: ‘Mosè! Tersaqx qrib. Neħħi s-​sandli minn saqajk, għax il-​post fejn int wieqaf hu art qaddisa.’ Kien Ġeħova li qed jitkellem permezz t’anġlu.

Mosè beda jibżaʼ, u għalhekk għatta wiċċu. Il-​leħen qal: ‘Jien rajt is-​sofferenza tal-​Iżraelin. Jien se nsalvahom mill-​Eġizzjani u niħodhom f’art tajba. Int se tkun il-​wieħed li se toħroġ lill-​poplu tiegħi mill-​Eġittu.’ Taħseb li Mosè kien sorpriż b’dan il-​kliem?

Mosè staqsa: ‘Meta n-​nies jistaqsuni min bagħatni, x’għandi ngħidilhom?’ Alla wieġbu: ‘Għidilhom li Ġeħova, l-​Alla t’Abraham, l-​Alla taʼ Iżakk, u l-​Alla taʼ Ġakobb bagħatni.’ Imbagħad, Mosè qallu: ‘U jekk in-​nies ma jisimgħux minni?’ Għal dan, Ġeħova ta prova lil Mosè li Hu kien se jgħinu. Hu qal lil Mosè biex jitfaʼ l-​bastun tiegħu mal-​art. Imbagħad, il-​bastun sar serp! Meta Mosè qabad is-​serp minn denbu, dan reġaʼ sar bastun. Ġeħova qallu: ‘Meta int tagħmel dan quddiemhom, se jkun prova li jien bgħattek.’

Mosè qal: “Jien m’iniex kelliemi tajjeb.” Ġeħova wiegħdu: ‘Jien se ngħidlek x’għandek tgħid, u se nibgħat lil ħuk Aron biex jgħinek.’ Billi kien jaf li Ġeħova kien miegħu, Mosè ħa lill-​mara u lit-​tfal tiegħu lura l-​Eġittu.

L-​Iżraelin, bħala lsiera, kienu mġegħlin jaħdmu iebes. Ġeħova bagħat lil Mosè u lil Aron għand il-​Fargħun b’dan il-​messaġġ: ‘Ħalli lin-​nies tiegħi jmorru ħalli jqimuni fid-​deżert.’ Il-​Fargħun bi kburija wieġeb: ‘Jien ma jimpurtanix x’jgħid Ġeħova, u jien m’iniex se nħalli lill-​Iżraelin jitilqu.’ Imbagħad, il-​Fargħun sforzahom jaħdmu aktar iebes. Ġeħova kien se jgħallem lill-​Fargħun lezzjoni. Int taf kif? Hu bagħat l-​Għaxar Kastigi fuq l-​Eġittu. Ġeħova qal lil Mosè: ‘Il-​Fargħun mhuwiex jismaʼ minni. Filgħodu, hu se jkun ħdejn ix-​Xmara Nil. Mur ħdejh u għidlu li peress li ma ħalliex lin-​nies tiegħi jitilqu, l-​ilma kollu tax-​Xmara Nil se jsir demm.’ Mosè obda u mar jiltaqaʼ mal-​Fargħun. Il-​Fargħun qagħad iħares hekk kif Aron mess il-​bastun max-​xmara, u l-​ilma nbidel f’demm. Ix-​xmara bdiet tinten, il-​ħut miet, u ma kienx hemm ilma tajjeb għax-​xorb. Imma, il-​Fargħun xorta ma ħalliex lill-​Iżraelin imorru.

Sebat ijiem wara, Ġeħova bagħat lura lil Mosè għand il-​Fargħun b’dan il-​messaġġ: ‘Jekk ma tibgħatx lill-​poplu tiegħi, l-​Eġittu se jimtela biż-​żrinġijiet.’ Aron għolla l-​bastun tiegħu, u ż-​żrinġijiet bdew jgħattu l-​art. In-​nies sabu ż-​żrinġijiet fid-​djar tagħhom, fis-​sodod tagħhom, u fir-​reċipjenti tagħhom. Kullimkien kien mimli żrinġijiet! Il-​Fargħun qal lil Mosè biex jitlob bil-​ħerqa lil Ġeħova ħalli jwaqqaf il-​kastig. Il-​Fargħun wiegħed li kien se jħalli lill-​Iżraelin imorru. Allura, Ġeħova waqqaf il-​kastig, u l-​Eġizzjani ġabru kwantità kbira taʼ żrinġijiet mejtin. L-​art bdiet tinten. Imma, għal darb’oħra, il-​Fargħun ma riedx iħalli lin-​nies imorru.

Imbagħad, Ġeħova qal lil Mosè: ‘Aron għandu jmiss l-​art bil-​bastun tiegħu, u t-​trab tal-​art jinbidel f’nemus irqiq li joqros.’ Minnufih l-​art imtliet kollha nemus. Xi wħud minn nies tal-​Fargħun qalulu: ‘Dan kastig minn Alla.’ Imma l-​Fargħun xorta ma riedx iħalli l-​Iżraelin jitilqu.