L-​Iżraelin, għal darb’oħra, telqu lil Ġeħova u bdew iqimu allat foloz. Meta l-​Għammonin attakkaw u ġġieldu kontra l-​Iżraelin, l-​allat foloz tagħhom m’għamlu xejn biex jgħinuhom. Għal ħafna snin, l-​Iżraelin batew. Fl-​aħħar qalu lil Ġeħova: ‘Aħna għamilna ħafna dnubiet. Jekk jogħġbok salvana mill-​għedewwa tagħna.’ Imbagħad, l-​Iżraelin qerdu l-​idoli u reġgħu bdew iqimu lil Ġeħova. Hu ma riedx jarahom ibatu iktar.

Raġel gwerrier jismu Ġefta kien ġie magħżul biex imexxi lill-​Iżraelin fil-​battalja kontra l-​Għammonin. Hu qal lil Ġeħova: ‘Jekk tgħinna nirbħu din il-​battalja, jien inwiegħdek li meta mmur lura d-​dar, nagħtik l-​ewwel persuna li toħroġ mid-​dar tiegħi biex tilqagħni.’ Ġeħova semaʼ t-​talba taʼ Ġefta u għenu jirbaħ il-​battalja.

Meta Ġefta mar lura d-​dar, l-​ewwel persuna li ħarġet biex tilqgħu kienet bintu. Hu lilha biss kellu. Hi ħarġet tiżfen u ddoqq it-​tanburlin. Issa Ġefta x’kien se jagħmel? Hu ftakar fil-​wegħda li kien għamel u qal: ‘Jaħasra, binti! Kif qsamtli qalbi. Jien għamilt wegħda maʼ Ġeħova. Biex inżommha, jien se jkolli nibagħtek taqdi fit-​tabernaklu f’Silo.’ Imma bintu qaltlu: ‘Pa, jekk għamilt wegħda maʼ Ġeħova, int għandek iżżommha. Li nitolbok biss hu li tħallini mmur inqattaʼ xahrejn maʼ sħabi l-​bniet fuq il-​muntanji. Imbagħad immur.’ Bint Ġefta qdiet lealment fit-​tabernaklu għal kumplament taʼ ħajjitha. Kull sena, sħabha kienu jmorru Silo biex jarawha.

Il-​Qassis il-​Kbir Għeli kellu żewġt itfal subien li kienu jaqdu bħala qassisin fit-​tabernaklu. Dawn kien jisimhom Ħofni u Fineħas. Huma ma kinux qed jobdu l-​liġijiet taʼ Ġeħova, u lin-​nies kienu jittrattawhom ħażin ħafna. Meta l-​Iżraelin kienu jġibu s-​sagrifiċċji tagħhom quddiem Ġeħova, Ħofni u Fineħas kienu jieħdu l-​aħjar laħam għalihom stess. Għeli kien semaʼ dwar x’kienu qed jagħmlu wliedu, imma hu m’għamel xejn. Kien Ġeħova se jħalli dan jibqaʼ għaddej?

Għalkemm Samwel kien ħafna iżgħar minn Ħofni u Fineħas, hu m’għamilx bħalhom. Ġeħova kien ferħan b’Samwel. Darba waħda billejl, waqt li kien rieqed, Samwel semaʼ lil xi ħadd jgħajjatlu. Hu qam, u mar jiġri ħdejn Għeli, u qallu: ‘Hawn jien!’ Imma Għeli wieġbu: ‘Jien m’għajjatlekx. Erġaʼ mur orqod.’ Samwel reġaʼ mar fis-​sodda. Imbagħad, reġgħet ġrat l-​istess ħaġa. Mat-​tielet darba, Għeli induna li kien Ġeħova li qed jgħajjatlu. Hu qal lil Samwel li jekk jerġaʼ jismaʼ hekk, hu għandu jgħid: ‘Tkellem, Ġeħova. Il-​qaddej tiegħek qed jisimgħek.’

Samwel mar lura fis-​sodda. Imbagħad reġaʼ semaʼ: ‘Samwel! Samwel!’ Hu wieġeb: ‘Tkellem, għax il-​qaddej tiegħek qed jismaʼ.’ Ġeħova qallu: ‘Għid lil Għeli li se nikkastiga lilu u lill-​familja tiegħu. Hu jaf li t-​tfal tiegħu qed jagħmlu affarijiet ħżiena fit-​tabernaklu imma xorta ma qed jagħmel xejn dwar dan.’ L-​għada filgħodu, Samwel fetaħ il-​bibien tat-​tabernaklu bħas-​soltu. Hu kien qed jibżaʼ jgħid lill-​qassis il-​kbir dak li kien qallu Ġeħova. Imma Għeli bagħat għalih u staqsieh: ‘Ibni, Ġeħova x’qallek? Għidli kollox.’ Allura, Samwel qallu kollox.

Waqt li Samwel kien qed jikber, Ġeħova kompla jieħu ħsiebu. L-​Iżraelin kollha f’dak il-​pajjiż kienu jafu li Ġeħova kien għażel lil Samwel biex ikun profeta u mħallef.