Ġeħova qal lil Samwel: ‘Mur fid-​dar taʼ Ġesse. Wieħed mit-​tfal subien tiegħu se jkun is-​sultan li jmiss taʼ Iżrael.’ Għalhekk, Samwel mar għand Ġesse. Meta ra lit-​tifel il-​kbir, hu ħaseb: ‘Żgur li dan hu l-​wieħed li Ġeħova għażel.’ Imma Ġeħova qal lil Samwel li dan ma kienx il-​wieħed. Ġeħova qallu: ‘Jien nara x’hemm fil-​qalb u mhux biss dak li jidher minn barra.’

Ġesse mbagħad ġab sitt subien oħra quddiem Samwel. Imma Samwel qallu: ‘Ġeħova ma għażel l-​ebda wieħed minnhom. Int għandek iktar subien?’ Ġesse wieġbu: ‘Għandi ieħor, iż-​żgħir, David. Hu qiegħed jiħodli ħsieb in-​nagħaġ.’ Xħin ġie David, Ġeħova qal lil Samwel: ‘Dan hu l-​wieħed!’ Minnufih, Samwel ferraʼ ż-​żejt fuq ras David biex juri li ’l quddiem hu kellu jkun is-​sultan taʼ Iżrael.

Ftit taż-​żmien wara, l-​Iżraelin kienu fi gwerra mal-​Filistin. Dawn kellhom ġgant jismu Gulija li kien jiġġieled għalihom. Jum wara jum, Gulija kien iwaqqaʼ għaċ-​ċajt lill-​Iżraelin. Kien jgħajjat: ‘Ġibuli raġel ħalli jiġġilidli. Jekk jirbaħli, aħna nkunu l-​ilsiera tagħkom, imma jekk nirbaħ jien, intom tkunu l-​ilsiera tagħna.’

David mar jieħu l-​ikel lil ħutu li kienu suldati fil-​kampijiet tal-​armata. Hu semaʼ lil Gulija u qal: ‘Ħa niġġilidlu jien!’ Is-​Sultan Sawl qallu: ‘Int għadek żgħir.’ David wieġbu: ‘Ġeħova se jgħinni żgur.’

Sawl ta l-​libsa taʼ suldat tiegħu lil David, imma David qallu: ‘Jien ma nistax niġġieled b’din il-​libsa.’ David ħa l-​iżbandola tiegħu, arma li kienet tintuża biex iwaddbu l-​ġebel, u mar fil-​wied. Hu għażel ħames ġebliet lixxi, u poġġiehom fil-​basket tiegħu. Imbagħad, David telaq jiġri għal Gulija. Il-​ġgant għajjat: ‘Ejja ’l hawn, ja naqra taʼ tifel. Jien se nagħti laħmek lill-​għasafar tas-​sema u lill-​annimali salvaġġi.’ David ma beżax. Hu għajjat lura: ‘Int ġej għalija b’xabla u b’lanza, imma jien ġej bl-​isem taʼ Ġeħova. Int mhux kontrina qed tiġġieled imma kontra Alla. Kulħadd se jara li Ġeħova hu iktar b’saħħtu minn xabla jew lanza. Hu se jagħtikom f’idejna.’

David qabad ġebla, poġġieha fl-​iżbandola u dawwarha b’kemm kellu saħħa. Bl-​għajnuna taʼ Ġeħova, il-​ġebla sparat ’il barra u baqgħet dieħla ġo nofs moħħ Gulija. Il-​ġgant waqaʼ mejjet fl-​art. Imbagħad, il-​Filistin bdew jaħarbu biex isalvaw. Għandek int fiduċja f’Ġeħova bħalma kellu David?

Wara li David qatel lil Gulija, is-​Sultan Sawl qabbad lilu jieħu ħsieb l-​armata tiegħu. David rebaħ ħafna battalji, u għalhekk sar popolari. Kull meta kien jiġi lura mill-​gwerra, in-​nisa kienu joħorġu jiżfnu u jkantaw: ‘Sawl qatel l-​eluf, imma David qatel l-​għaxriet t’eluf!’ Minħabba f’hekk, Sawl beda jgħir għal David u ried joqtlu.

David kien jaf idoqq l-​arpa sew. Darba waħda, waqt li kien qed idoqqlu l-​arpa, Sawl waddablu l-​lanza. David irnexxielu jersaq bl-​eżatt, u għalhekk il-​lanza baqgħet dieħla ġol-​ħajt. Kemm-​il darba Sawl ipprova joqtol lil David. Fl-​aħħar, David ħarab u mar jistaħba fid-​deżert.

Sawl, flimkien m’armata taʼ 3,000 raġel, mar ifittex lil David biex joqtlu. Hu, bla ma kien jaf, daħal ġol-​għar fejn kienu qed jistaħbew David u l-​irġiel tiegħu. L-​irġiel qalu lil David b’leħen baxx: ‘Issa ċ-​ċans biex toqtol lil Sawl.’ Imma minflok, David resaq bil-​mod lejn Sawl u qatagħlu biċċa mit-​tarf tal-​libsa. Sawl lanqas biss induna. Imma wara, David beda jħoss li kien għamel xi ħaġa ħażina, li ma kienx wera rispett lejn il-​wieħed li Ġeħova kien għażel bħala sultan. Għalhekk, ma ħalliex lill-​irġiel tiegħu jattakkaw lil Sawl. Wara li Sawl ħareġ mill-​għar, David għajjatlu u qallu li hu setaʼ qatlu. Kien Sawl ħa jbiddel fehmtu u ma joqtolx lil David? Le.

Lejl minnhom, David u n-​neputi tiegħu Abisaj daħlu nkiss inkiss fil-​kamp taʼ Sawl. Anki Abner, il-​bodyguard taʼ Sawl kien rieqed. Allura, Abisaj qal lil David: ‘Issa ċ-​ċans! Ħallini noqtlu.’ David qallu: ‘Ġeħova qiegħed jara x’qed jagħmel Sawl. Ejja niħdulu l-​lanza u l-​buqar tal-​ilma u nitilqu.’

David telaʼ fuq muntanja li kienet fil-​viċin biex ikun jistaʼ jara l-​kamp taʼ Sawl. Hu għajjat: ‘Abner, għala ma pproteġejtux lis-​sultan? Il-​buqar u l-​lanza taʼ Sawl fejnhom?’ Sawl għaraf leħen David u qal: ‘Kieku ridt stajt qtiltni. Naf li int se tkun is-​sultan li jmiss taʼ Iżrael.’ Imbagħad, Sawl mar lura fil-​palazz tiegħu. Mhux kull membru tal-​familja taʼ Sawl kien jobgħod lil David.