Wara li Salamun sar sultan taʼ Iżrael, Ġeħova staqsieh: ‘Xi tridni nagħtik?’ Salamun qallu: ‘Jien għadni żgħir, u ma nafx xi rrid nagħmel. Jekk jogħġbok, agħtini l-​għerf biex nieħu ħsieb in-​nies tiegħek.’ Ġeħova qallu: ‘Talli tlabtni biex tkun għaref, jien nagħmlek l-​iktar bniedem għaref fuq l-​art. Nagħmlek ukoll sinjur ħafna. U jekk tobdini, ikollok ħajja twila.’

Salamun beda jibni t-​tempju. Hu uża l-​aqwa deheb, fidda, injam, u ħaġar prezzjuż. Eluf taʼ rġiel u nisa tas-​sengħa ħadmu fit-​tempju. Wara sebaʼ snin, it-​tempju kien lest biex jiġi ddedikat lil Ġeħova. Kien fih artal, u fuqu kien hemm l-​offerti. Salamun niżel għarkopptejh quddiem l-​artal u talab: ‘O Ġeħova, dan it-​tempju mhux kbir jew sabiħ biżżejjed għalik, imma jekk jogħġbok aċċetta l-​qima tagħna u ismaʼ t-​talb tagħna.’ Ġeħova kif ħassu dwar it-​tempju u t-​talba taʼ Salamun? Eżatt malli Salamun spiċċa t-​talba tiegħu, Ġeħova bagħat nar mis-​sema u ħaraq l-​offerti li kien hemm fuq l-​artal. B’dan il-​mod, Ġeħova wera li aċċetta t-​tempju. Meta l-​Iżraelin raw dan, t’għidx kemm ferħu!

Is-​Sultan Salamun kien magħruf għall-​għerf tiegħu maʼ Iżrael kollu u wkoll man-​nies taʼ pajjiżi oħra li kienu ’l bogħod. In-​nies kienu jmorru għand Salamun biex jgħinhom fil-​problemi tagħhom. Anka s-​sultana taʼ Xeba ġiet biex tittestjah b’mistoqsijiet diffiċli. Meta semgħet dak li qalilha, hi qaltlu: ‘Jien m’emmintx il-​kliem li n-​nies qaluli dwarek, imma issa qed nara li l-​għerf tiegħek huwa ħafna iktar milli qalu. Ġeħova, Alla tiegħek, bierkek.’ L-​Iżraelin kienu qed jgħixu ħajja kuntenta. Imma l-​affarijiet dalwaqt kienu se jinbidlu.

Sakemm Salamun baqaʼ jqim lil Ġeħova, kien hemm il-​paċi f’Iżrael. Imma Salamun iżżewweġ ħafna nisa minn pajjiżi oħra li kienu jqimu l-​idoli. Bil-​mod il-​mod, Salamun inbidel, u hu beda jqim l-​idoli wkoll. Ġeħova rrabja, u qallu: ‘Jien se nieħu t-​tmexxija mingħandek u mingħand il-​familja tiegħek, u naqsamha fi tnejn. Il-​parti l-​kbira se nagħtiha lil wieħed mill-​qaddejja tiegħek, u l-​familja tiegħek se tmexxi biss il-​parti ż-​żgħira.’

Imbagħad, Ġeħova wera ċar b’mod ieħor id-​deċiżjoni tiegħu. Wieħed mill-​qaddejja tiegħu, Ġerobogħam, kien qed jivvjaġġa meta ltaqaʼ mal-​profeta Aħija. Aħija ċarrat il-​libsa tiegħu fi 12-​il biċċa u qal lil Ġerobogħam: ‘Ġeħova se jieħu t-​tmexxija t’Iżrael mingħand il-​familja taʼ Salamun u jaqsamha fi tnejn. Ħu għaxar biċċiet minn dawn għax int se tkun sultan fuq għaxar tribujiet.’ Is-​Sultan Salamun sema’ b’dan u ried joqtol lil Ġerobogħam! Għalhekk Ġerobogħam ħarab lejn l-​Eġittu. Maż-​żmien, Salamun miet u t-​tifel tiegħu, Reħobogħam, sar sultan. Imbagħad, Ġerobogħam mar lura Iżrael peress li ra li ma kienx għad hemm periklu għalih.

Irġiel t’awtorità f’Iżrael qalu lil Reħobogħam: ‘Jekk tittratta lin-​nies sew, huma jkunu leali lejk.’ Imma minflok, Reħobogħam ħa l-​parir taʼ sħabu li kien trabba magħhom li qalulu: ‘Trid tkun kattiv man-​nies! Ġegħelhom jaħdmu iktar!’ Għalhekk, hu ttrattahom ħażin ħafna lin-​nies, u l-​10 tribujiet taʼ Iżrael irribellaw. Huma għamlu lil Ġerobogħam sultan tal-​għaxar tribujiet, li saru magħrufin bħala s-​saltna taʼ Iżrael. Iż-​żewġ tribujiet l-​oħra saru magħrufin bħala s-​saltna taʼ Ġuda, u dawn baqgħu leali lejn Reħobogħam. It-​12-​il tribù taʼ Iżrael issa ġew maqsumin.

Ġerobogħam ma riedx li n-​nies tiegħu jmorru jqimu f’Ġerusalemm, fis-​saltna taʼ Reħobogħam. Taf għala? Għax beda jibżaʼ li huma jitilquh u jmorru maʼ Reħobogħam. Għalhekk hu għamel żewġ għoġiela tad-​deheb u qal lin-​nies tiegħu: ‘Ġerusalemm hi ’l bogħod wisq. Intom tistgħu tqimu hawn.’ In-​nies bdew iqimu l-​għoġiela tad-​deheb u dawn reġgħu nsew lil Ġeħova.