1. Il-​profeziji tal-​Bibbja, x’jgħinuna nkunu nafu?

IN-​NIES taʼ Ġeħova, x’se jiġrilhom fil-​futur qarib? It-tweġiba nistgħu nkunu nafuha. Il-​profeziji tal-​Bibbja jgħidulna affarijiet importanti li se jiġru dalwaqt u li se jaffettwaw lilna lkoll. Profezija partikolari tgħinna naraw x’se jagħmlu xi wħud mill-​iktar gvernijiet b’saħħithom li hawn fuq l-​art. Din il-​profezija hi miktuba f’​Danjel kapitlu 11. Din titkellem dwar żewġ slaten li se jiġġieldu kontra xulxin, u dawn is-​slaten, jew mexxejja, huma msejħin is-​sultan tat-​tramuntana u s-​sultan tan-​nofsinhar. Il-​biċċa l-​kbira taʼ din il-​profezija diġà twettqet, għalhekk, nistgħu nkunu ċerti li l-​kumplament tagħha se jitwettaq ukoll.

2. Skont Ġenesi 3:15, Rivelazzjoni 11:7 u 12:17, liema affarijiet importanti għandna niftakru meta nistudjaw il-​profezija taʼ Danjel?

² Biex nifhmu l-​profezija miktuba f’​Danjel kapitlu 11, irridu niftakru li din titkellem biss dwar slaten li mexxew f’pajjiżi fejn ħafna min-​nies t’Alla għexu jew dwar slaten li ppersegwitaw in-​nies t’Alla. Minkejja li n-​nies t’Alla huma vera ftit meta mqabblin man-​nies tad-​dinja kollha, għala l-​mira taʼ dawn il-​gvernijiet hi li jattakkaw lin-​nies t’Alla? Għax il-​mira prinċipali taʼ Satana u s-​sistema kollha tiegħu hi li jeqirdu lil dawk li jaqdu lil Ġeħova u lil Ġesù. (Aqra Ġenesi 3:15 u Rivelazzjoni 11:7; 12:17.) Apparti minn hekk, il-​profezija miktuba minn Danjel għandha taqbel maʼ profeziji oħra fil-​Kelma t’Alla. Fil-​fatt, aħna nistgħu nifhmu tajjeb il-​profezija taʼ Danjel biss jekk inqabbluha maʼ partijiet oħra mill-​Bibbja.

3. X’se niddiskutu f’dan l-​artiklu u taʼ warajh?

³ B’dan f’moħħna, issa se neżaminaw Danjel 11:25-​39. Se naraw min kienu s-​sultan tat-​tramuntana u s-​sultan tan-​nofsinhar mill-​1870 sal-​1991. U se naraw għala għandna raġunijiet tajba biex nibdlu l-​mod kif nifhmu parti minn din il-​profezija. Fl-​artiklu li jmiss, aħna se niddiskutu Danjel 11:40 sa 12:1, u se nispjegaw aħjar x’tgħidilna din il-​parti tal-​profezija mill-​1991 sal-​gwerra taʼ Armageddon. Hekk kif tistudja dawn iż-​żewġ artikli, se jkun t’għajnuna għalik jekk tuża ċ-​ċart “Żewġ Slaten li Jiġġieldu Kontra Xulxin fi Żmien it-​Tmiem.” Però, l-​ewwel irridu nkunu nafu min huma ż-​żewġ slaten f’din il-​profezija.

KIF NISTGĦU NKUNU NAFU MIN HUMA Ż-​ŻEWĠ SLATEN?

4. Liema tliet affarijiet se jgħinuna nkunu nafu min huma s-​sultan tat-​tramuntana u s-​sultan tan-​nofsinhar?

⁴ Oriġinarjament, it-​titlu “sultan tat-​tramuntana” kien jirreferi għall-​mexxej tal-​inħawi tat-​tramuntana t’Iżrael u t-​titlu “sultan tan-​nofsinhar” kien jirreferi għall-​mexxej tal-​inħawi tan-​nofsinhar t’Iżrael. Għala ngħidu dan? Innota x’qal l-​anġlu lil Danjel: “U ġejt inġiegħlek tifhem x’se jiġrilu l-​poplu tiegħek [il-​poplu t’Alla] fl-​aħħar parti tal-​jiem.” (Dan. 10:14) Sa Pentekoste tas-​sena 33 wara Kristu (WK), il-​poplu t’Iżrael kien il-​poplu t’Alla. Imma minn dakinhar ʼl hawn, Ġeħova għamilha ċara li d-​dixxipli taʼ Kristu kienu n-​nies tiegħu. Allura, il-​biċċa l-​kbira tal-​profezija taʼ Danjel kapitlu 11 hi dwar id-​dixxipli taʼ Kristu, u mhux dwar il-​poplu t’Iżrael. (Atti 2:1-​4; Rum. 9:6-​8; Gal. 6:15, 16) U maż-​żmien, mexxejja u gvernijiet differenti saru s-​sultan tat-​tramuntana u s-​sultan tan-​nofsinhar. Imma dawn il-​mexxejja kellhom xi ħaġa komuni. L-​ewwel, dawn is-​slaten jew mexxew f’pajjiżi fejn ħafna min-​nies t’Alla għexu jew inkella ppersegwitaw in-​nies t’Alla. It-​tieni, bil-​mod kif trattaw lin-​nies t’Alla, huma wrew li jobogħdu lill-​Alla l-​veru, Ġeħova. U t-​tielet, iż-​żewġ slaten, ikkompetew kontra xulxin għall-​qawwa.

5. Bejn is-​sena 100 u l-​1870, kien hemm sultan tat-​tramuntana u sultan tan-​nofsinhar? Spjega.

⁵ Madwar 100 sena wara l-​mewt taʼ Ġesù, żdiedu ħafna Kristjani foloz fil-​kongregazzjoni Kristjana vera. Huma għallmu ideat reliġjużi foloz u ħbew veritajiet li hemm fil-​Kelma t’Alla. Minn dak iż-​żmien sal-​1870, Alla ma kellux organizzazzjoni fuq l-​art. Il-​Kristjani foloz żdiedu bħal sikrana f’għalqa. Minħabba dan, kien sar diffiċli ħafna biex tkun taf min huma l-​Kristjani veri. (Mt. 13:36-​43) Għala huwa importanti li nkunu nafu dan? Għax dan juri li s-​sultan tat-​tramuntana u s-​sultan tan-​nofsinhar ma kinux s-​slaten jew il-​gvernijiet li mexxew bejn is-​sena 100 u l-​1870. Dan minħabba li ma kienx hemm organizzazzjoni t’Alla biex jippersegwitaw fuq l-​art.b Però, kif nafu li ftit wara l-​1870 kien possibbli li jerġaʼ jkun hemm sultan tat-​tramuntana u sultan tan-​nofsinhar?

6. In-​nies t’Alla meta reġgħu bdew jingħaqdu bħala grupp? Spjega.

⁶ Mill-​1870 ʼil quddiem, in-​nies t’Alla bdew jingħaqdu bħala grupp. Kien f’dik is-​sena li Charles T. Russell u sħabu fformaw klassi biex jistudjaw il-​Bibbja. Ħuna Russell u sħabu aġixxew bħala l-​messaġġier li ħejja t-​triq qabel is-​Saltna Messjanika kienet twaqqfet. (Mal. 3:1) Għal darba oħra kien hemm grupp organizzat li kien qed jaqdi lil Ġeħova b’mod tajjeb! Dak iż-​żmien, kien hemm gvernijiet li mexxew fejn ħafna min-​nies t’Alla għexu jew inkella ppersegwitawhom? Ejja naraw.

MIN HU S-​SULTAN TAN-​NOFSINHAR?

7. Matul l-​Ewwel Gwerra Dinjija, min kien is-​sultan tan-​nofsinhar?

⁷ Sal-​1870, il-​Brittanja mexxiet fuq ħafna pajjiżi iktar minn kull pajjiż ieħor u kellha l-​iktar qawwa militari b’saħħitha fid-​dinja. Il-​profezija taʼ Danjel titkellem dwar qarn żgħir li ħa post tlett iqrun oħra. Il-​qarn iż-​żgħir jirrappreżenta lill-​Brittanja u l-​qrun l-​oħrajn jirrappreżentaw lil Spanja, lil Franza, u lin-​Netherlands. (Dan. 7:7, 8) Il-​Brittanja kienet is-​sultan tan-​nofsinhar matul l-​Ewwel Gwerra Dinjija. Matul l-​istess żmien, l-​Istati Uniti tal-​Amerka kienet saret l-​iktar pajjiż sinjur fid-​dinja u bdiet taħdem mill-​qrib mal-​Brittanja.

8. Min kien is-​sultan tan-​nofsinhar matul l-​aħħar jiem?

⁸ Matul l-​Ewwel Gwerra Dinjija, l-​Istati Uniti u l-​Brittanja ngħaqdu flimkien u saru b’saħħithom ħafna. F’dak iż-​żmien, il-​Brittanja u l-​Istati Uniti saru l-​Qawwa Dinjija Anglo-​Amerikana. Bħalma kien bassar Danjel, dan is-​sultan kien ġabar “qawwa militari kbira u setgħana wisq.” (Dan. 11:25) Matul l-​aħħar jiem, is-​sultan tan-​nofsinhar dejjem kien l-​Anglo-​Amerikan.c Imma min sar is-​sultan tat-​tramuntana?

MIN HU S-​SULTAN TAT-​TRAMUNTANA?

9. Meta kien hemm sultan ġdid tat-​tramuntana, u l-​kliem taʼ Danjel 11:25 kif twettaq?

⁹ Fl-​1871, sena wara li Russell u sħabu fformaw grupp biex jistudjaw il-​Bibbja, kien hemm sultan tat-​tramuntana ġdid. Dik is-​sena, Otto von Bismarck għaqqad diversi territorji flimkien u dawn saru nazzjon b’saħħtu, il-​Ġermanja. Wilhelm I sar is-​sultan tal-​Ġermanja u kien għażel lil Bismarck biex ikun il-​mexxej taʼ dan il-​pajjiż.d Mas-​snin, il-​Ġermanja ħadet taħt idejha xi pajjiżi fl-​Afrika u l-​Oċean Paċifiku, u ppruvat issir iktar b’saħħitha mill-​Brittanja. (Aqra Danjel 11:25.) Il-​Ġermanja rnexxielha tibni qawwa militari b’saħħitha kważi daqs tal-​Brittanja. Fl-​Ewwel Gwerra Dinjija, il-​Ġermanja użat din il-​qawwa militari biex tiġġieled kontra l-​għedewwa tagħha.

10. Dak li hemm miktub f’​Danjel 11:25b, 26, kif twettaq?

¹⁰ Danjel bassar ukoll x’kien se jiġri lill-​gvern Ġermaniż u lill-​qawwa militari li kellu. Il-​profezija qalet li s-​sultan tat-​tramuntana “ma jżommx wieqaf.” Għala? “Għaliex huma jfasslu proġetti kontrih. U jkissruh dawk stess li jieklu l-​ikel mill-​aqwa tiegħu.” (Dan. 11:25b, 26a) Fi żmien Danjel, dawk li kienu jieklu “mill-​ikel mill-​aqwa tas-​sultan” kien jinkludi lill-​uffiċjali rjali li kienu jaqdu fil-​palazz. (Dan. 1:5) Din il-​profezija, għal min tirreferi hawn? Din tirreferi għan-​nies taʼ poter fil-​gvern Ġermaniż u uffiċjali militari li ħadmu mill-​qrib mas-​sultan. Minħabba dak li għamlu dawn in-​nies taʼ poter, is-​sultan tilef il-​qawwa tiegħu u ġie ffurmat gvern ġdid fil-​Ġermanja.e Il-​profezija bassret ukoll x’kien se jkun ir-​riżultat tal-​gwerra mas-​sultan tan-​nofsinhar. Meta l-​profezija semmiet is-​sultan tat-​tramuntana, din qalet: “Inkwantu għall-​qawwa militari tiegħu, din tiġi mgħarrqa, u ħafna jaqgħu maqtulin.” (Dan. 11:26b) Fl-​Ewwel Gwerra Dinjija, kif kien ġie mbassar, l-​armata Ġermaniża ġiet megħluba u ħafna nies ġew maqtula. Qatt qabel ma kienu mietu daqshekk nies fi gwerra.

11. X’għamlu s-​sultan tat-​tramuntana u s-​sultan tan-​nofsinhar?

¹¹ Danjel 11:27, 28 jiddeskrivu l-​affarijiet li ġraw qabel l-​Ewwel Gwerra Dinjija. Hemm jgħid li s-​sultan tat-​tramuntana u s-​sultan tan-​nofsinhar kienu se jkunu ‘fuq mejda waħda jgħidu l-​gideb.’ Jgħid ukoll li s-​sultan tat-​tramuntana kien se jiġbor “ammont kbir taʼ ġid.” Dan hu eżatt dak li ġara. Il-​Ġermanja u l-​Brittanja qalu lil xulxin li riedu l-​paċi, imma meta bdew jiġġieldu kontra xulxin fl-​1914, deher ċar li kienet gidba. U sal-​1914, il-​Ġermanja kienet saret it-​tieni l-​iktar pajjiż sinjur fid-​dinja. Imbagħad, biex jitwettaq Danjel 11:29 u l-​ewwel parti taʼ vers 30, il-​Ġermanja, jiġifieri s-​sultan tat-​tramuntana, iġġieldet mas-​sultan tan-​nofsinhar u tilfet telfa kbira.

IS-​SLATEN JIĠĠIELDU KONTRA N-​NIES T’ALLA

12. Fl-​Ewwel Gwerra Dinjija, x’għamlu s-​sultan tat-​tramuntana u s-​sultan tan-​nofsinhar?

¹² Mill-​1914 ʼl hawn, iż-​żewġ slaten komplew jiġġieldu kontra xulxin u l-​iktar kontra n-​nies t’Alla. Pereżempju, il-​gvern Ġermaniż u l-​gvern tal-​Brittanja ppersegwitaw lill-​qaddejja t’Alla għax dawn irrifjutaw li jiġġieldu fil-​gwerer. U l-​gvern tal-​Istati Uniti, tefaʼ fil-​ħabs lil dawk li kienu qed jieħdu t-​tmexxija fix-​xogħol tal-​ippritkar. Din il-​persekuzzjoni wettqet il-​profezija mniżżla f’​Rivelazzjoni 11:7-​10.

13. Wara l-​1930 u matul it-​Tieni Gwerra Dinjija, x’għamel is-​sultan tat-​tramuntana?

¹³ Imbagħad, wara l-​1930 u speċjalment matul it-​Tieni Gwerra Dinjija, is-​sultan tat-​tramuntana ppersegwita bl-​aħrax lin-​nies taʼ Ġeħova. Meta n-​Nazisti ħadu l-​kontroll tal-​Ġermanja, Hitler u dawk li appoġġjawh ma ħallewx ix-​xogħol tan-​nies t’Alla jsir. Is-​sultan tat-​tramuntana qatel mijiet taʼ Xhieda u bagħat eluf oħrajn fil-​kampijiet tal-​konċentrament. Dawn il-​ġrajjiet kienu mbassrin minn Danjel. Meta s-​sultan tat-​tramuntana ma ħalliex ix-​xogħol tal-​ippritkar isir, hu ‘pprofana s-​santwarju’ u ‘neħħa s-​sagrifiċċju offrut regolarment.’ (Dan. 11:30b, 31a) Hitler, il-​mexxej tal-​Ġermanja, wiegħed ukoll li kien se joqtol lin-​nies t’Alla kollha li kien hemm fil-​Ġermanja.

SULTAN ĠDID TAT-​TRAMUNTANA

14. Min sar is-​sultan tat-​tramuntana wara t-​Tieni Gwerra Dinjija? Spjega.

¹⁴ Wara t-​Tieni Gwerra Dinjija, l-​Unjoni Sovjetika saret is-​sultan tat-​tramuntana. Din bdiet tmexxi fuq territorji kbar li qabel kienu tal-​Ġermanja. Bħal gvern Nazist, l-​Unjoni Sovjetika ppersegwitat bl-​aħrax lil dawk kollha li poġġew il-​qima tal-​Alla l-​veru l-​ewwel f’ħajjithom.

15. Wara li spiċċat it-​Tieni Gwerra Dinjija, x’għamel is-​sultan tat-​tramuntana?

¹⁵ Ftit wara li spiċċat it-​Tieni Gwerra Dinjija, is-​sultan il-​ġdid tat-​tramuntana, l-​Unjoni Sovjetika, attakka lin-​nies t’Alla. Rivelazzjoni 12:15-​17 tqabbel il-​persekuzzjoni tan-​nies t’Alla maʼ “xmara.” Fi qbil maʼ din il-​profezija, is-​sultan tat-​tramuntana ma ħalliex ix-​xogħol tal-​ippritkar isir, u ġiegħel lil eluf taʼ Xhieda jmorru s-​Siberja. Għalhekk, minn meta bdew l-​aħħar jiem, is-​sultan tat-​tramuntana kompla jippersegwita lin-​nies t’Alla, imma qatt ma rnexxielu jwaqqaf għalkollox ix-​xogħol tagħhom.f

16. L-​Unjoni Sovjetika kif wettqet Danjel 11:37-​39?

¹⁶ Aqra Danjel 11:37-​39. Is-​sultan tat-​tramuntana kif ma wera ebda konsiderazzjoni “lill-​Alla taʼ missirijietu”? L-​Unjoni Sovjetika riedet teqred ir-​reliġjonijiet kollha, għalhekk pruvat tiħdilhom il-​qawwa tagħhom. Biex il-​gvern tal-​Unjoni Sovjetika jilħaq din il-​mira, fl-​1918, kien diġà ordna biex l-​iskejjel jgħallmu li Alla ma jeżistix. Is-​sultan tat-​tramuntana kif ta “glorja lill-​alla tal-​fortizzi”? L-​Unjoni Sovjetika nefqet ammont kbir taʼ flus biex ikollha armata kbira u pproduċiet eluf taʼ armi nukleari biex tkompli ssir b’saħħitha. Kemm is-​sultan tat-​tramuntana u kemm is-​sultan tan-​nofsinhar kellhom biżżejjed armi biex joqtlu biljuni taʼ nies!

IŻ-​ŻEWĠ SLATEN JAĦDMU FLIMKIEN

17. X’inhi “l-​ħaġa moqżieża li qed iġġib ħerba”?

¹⁷ Is-​sultan tat-​tramuntana ħadem mas-​sultan tan-​nofsinhar biex jagħmlu xi ħaġa importanti. Huma ħadmu biex “ipoġġu f’postha l-​ħaġa moqżieża li qed iġġib ħerba.” (Danjel 11:31) Din “il-​ħaġa moqżieża” hija l-​Ġnus Magħquda.

18. Il-​Ġnus Magħquda għala hija deskritta bħala “l-​ħaġa moqżieża”?

¹⁸ L-​organizzazzjoni tal-​Ġnus Magħquda hija deskritta bħala “l-​ħaġa moqżieża” għaliex hi tgħid li tistaʼ ġġib il-​paċi fid-​dinja, xi ħaġa li s-​Saltna t’Alla biss tistaʼ tagħmel. U l-​profezija tgħid li l-​ħaġa moqżieża “ġġib ħerba” minħabba li se tattakka u teqred ir-​reliġjonijiet foloz kollha.—Ara ċ-​ċart “Żewġ Slaten li Jiġġieldu Kontra Xulxin fi Żmien it-​Tmiem.”

GĦALA GĦANDNA BŻONN DIN L-​INFORMAZZJONI?

19-20. (a) Għala għandna bżonn inkunu nafu din l-​informazzjoni? (b) Liema mistoqsija se nwieġbu fl-​artiklu li jmiss?

¹⁹ Għandna bżonn din l-​informazzjoni għax din tagħti prova li mill-​1870 sal-​1991, il-​profezija taʼ Danjel dwar is-​sultan tat-​tramuntana u s-​sultan tan-​nofsinhar twettqet. Għalhekk, aħna nistgħu nkunu fiduċjużi li l-​kumplament tal-​profezija se titwettaq ukoll.

²⁰ Fl-​1991, l-​Unjoni Sovjetika waqgħet. Allura, min hu s-​sultan tat-​tramuntana llum? L-​artiklu li jmiss se jwieġeb din il-​mistoqsija.

1-2. X’se niddiskutu f’dan l-​artiklu?

IKTAR minn qatt qabel, aħna għandna evidenza ċara li qegħdin ngħixu fl-​aħħar jiem taʼ din is-​sistema. Dalwaqt, Ġeħova u Ġesù Kristu se jeqirdu l-​gvernijiet kollha li jopponu s-​Saltna. Imma qabel iseħħ dan, is-​sultan tat-​tramuntana u s-​sultan tan-​nofsinhar se jkomplu jiġġieldu kontra xulxin u kontra n-​nies t’Alla.

² F’dan l-​artiklu se niddiskutu l-​profezija mniżżla f’​Danjel 11:40-​45 u 12:1. Aħna se nitgħallmu min hu s-​sultan tat-​tramuntana llum, u se niddiskutu wkoll għala nistgħu nibqgħu kalmi u nkunu ċerti li Ġeħova se jsalvana jiġri x’jiġri.

SULTAN ĠDID TAT-​TRAMUNTANA

3-4. Min hu s-​sultan tat-​tramuntana llum? Spjega.

³ Wara li l-​Unjoni Sovjetika waqgħet fl-​1991, in-​nies t’Alla li kienu taħt it-​tmexxija tagħha kellhom il-​libertà għal xi żmien. Danjel jiddeskrivi din il-​libertà bħala “ftit għajnuna.” (Dan. 11:34) B’riżultat taʼ dan, huma setgħu jippritkaw bil-​libertà, u malajr kien hemm mijiet taʼ eluf taʼ pubblikaturi fil-​pajjiżi li qabel kienu jagħmlu parti mill-​Unjoni Sovjetika. Imma wara xi snin, ir-​Russja u l-​pajjiżi li appoġġjawha saru s-​sultan tat-​tramuntana. Kif iddiskutejna fl-​artiklu taʼ qabel, gvern kellu jagħmel tlett affarijiet biex ikun is-​sultan tat-​tramuntana jew is-​sultan tan-​nofsinhar: (1) imexxi f’pajjiż fejn ħafna min-​nies t’Alla jgħixu jew jippersegwita n-​nies t’Alla, (2) bl-​azzjonijiet tiegħu juri li jobgħod lil Ġeħova u lin-​nies tiegħu, u (3) kellu jiġġieled kontra s-​sultan l-​ieħor.

⁴ Dawn huma r-​raġunijiet għala nistgħu ngħidu li r-​Russja u l-​pajjiżi li jappoġġjawha huma s-​sultan tat-​tramuntana. (1) Huma attakkaw lin-​nies t’Alla meta ma ħallewhomx jippritkaw u ppersegwitaw lill-​mijiet t’eluf t’aħwa li jgħixu taħt it-​tmexxija tagħhom. (2) B’dawn l-​azzjonijiet juru li jobogħdu lil Ġeħova u lin-​nies tiegħu. (3) Huma qed jipprovaw isiru iktar b’saħħithom mis-​sultan tan-​nofsinhar, jiġifieri l-​Brittanja u l-​Istati Uniti. Ejja naraw x’għamlu r-​Russja u l-​pajjiżi li jappoġġjawha u għala dan jagħti prova li huma s-​sultan tat-​tramuntana.

IS-​SULTAN TAT-​TRAMUNTANA U TAN-​NOFSINHAR IKOMPLU JOPPONU LIL XULXIN

5. Dwar liema perjodu titkellem il-​profezija taʼ Danjel 11:40-​43?

⁵ Aqra Danjel 11:40-​43. Dil-​parti tal-​profezija titkellem dwar il-​perjodu tal-​aħħar żminijiet. Din tiddeskrivi kif is-​sultan tat-​tramuntana u s-​sultan tan-​nofsinhar jiġġieldu kontra xulxin. Danjel bassar, li fi żmien it-​tmiem, is-​sultan tan-​nofsinhar kien se jkollu “konfront,” jiġifieri jiġġieled, mas-​sultan tat-​tramuntana.—Dan. 11:40.

6. Is-​sultan tat-​tramuntana u s-​sultan tan-​nofsinhar kif jopponu lil xulxin?

⁶ Is-​sultan tat-​tramuntana u s-​sultan tan-​nofsinhar jiġġieldu kontra xulxin għax it-​tnejn iridu jkunu l-​iktar gvern b’saħħitu fid-​dinja. Pereżempju, aħseb x’ġara wara t-​Tieni Gwerra Dinjija, l-​Unjoni Sovjetika bdiet tiddomina parti kbira tal-​Ewropa. Għalhekk, is-​sultan tan-​nofsinhar ftiehem maʼ pajjiżi oħra biex jużaw l-​armati tagħhom flimkien kontra s-​sultan tat-​tramuntana. Din l-​organizzazzjoni hi magħrufa bħala n-​NATO. Ukoll, is-​sultan tat-​tramuntana u s-​sultan tan-​nofsinhar nefqu ħafna flus biex ikollhom l-​iktar armata b’saħħitha. Barra minn hekk, huma ġġieldu kontra xulxin b’mod indirett billi użaw nazzjonijiet oħra biex jiġġieldu kontra l-​għadu tagħhom. Dan ġara fl-​Afrika, fl-​Asja u f’partijiet tal-​Amerika t’Isfel. Fi snin riċenti, ir-​Russja u l-​pajjiżi li jappoġġjawha komplew jiksbu l-​poter mad-​dinja kollha. Dawn qed jiġġieldu mas-​sultan tan-​nofsinhar ukoll permezz tat-​teknoloġija (cyber warfare). Is-​slaten akkużaw lil xulxin li użaw programmi tal-​kompjuters biex itellfu l-​flus u jagħmlu ħsara lill-​gvern tagħhom. U kif bassar Danjel, is-​sultan tat-​tramuntana kompla l-​attakk tiegħu fuq in-​nies t’Alla.—Dan. 11:41.

IS-​SULTAN TAT-​TRAMUNTANA “JIDĦOL UKOLL FIL-​PAJJIŻ TAD-​DEKORAZZJONI”

7. X’inhu “l-​pajjiż tad-​Dekorazzjoni”?

⁷ Danjel 11:41 jgħid li s-​sultan tat-​tramuntana se “jidħol ukoll fil-​pajjiż tad-​Dekorazzjoni.” X’inhu dan il-​pajjiż? Fi żminijiet Bibliċi, Iżrael kien ikkunsidrat l-​isbaħ pajjiż. Huwa għalhekk li fil-​Bibbja kien jissejjaħ “id-​dekorazzjoni taʼ l-​artijiet kollha.” (Eżek. 20:6) Imma dan il-​pajjiż kien speċjali ħafna għax kien il-​post fejn in-​nies qdew lil Ġeħova. Minn Pentekoste tas-​sena 33 WK, “il-​pajjiż tad-​Dekorazzjoni” ma baqax pajjiż speċifiku fuq l-​art. Illum, dan jagħmel sens għax in-​nies taʼ Ġeħova huma madwar id-​dinja kollha. Minflok, illum, “il-​pajjiż tad-​Dekorazzjoni” huwa l-​attivitajiet spiritwali tan-​nies taʼ Ġeħova li jinkludu affarijiet bħall-​qima tagħhom lejh fil-​laqgħat u fil-​ministeru.

8. Is-​sultan tat-​tramuntana kif daħal “fil-​pajjiż tad-​Dekorazzjoni”?

⁸ Matul l-​aħħar jiem, is-​sultan tat-​tramuntana daħal ħafna drabi “fil-​pajjiż tad-​Dekorazzjoni.” Pereżempju, meta n-​Nazi Ġermaniża kienet is-​sultan tat-​tramuntana, speċjalment matul it-​Tieni Gwerra Dinjija, is-​sultan daħal “fil-​pajjiż tad-​Dekorazzjoni” billi ppersegwita u qatel lin-​nies t’Alla. Wara t-​Tieni Gwerra Dinjija, meta l-​Unjoni Sovjetika saret is-​sultan tat-​tramuntana, is-​sultan daħal “fil-​pajjiż tad-​Dekorazzjoni” meta ppersegwita lin-​nies t’Alla u sforzahom biex jitilqu minn pajjiżhom.

9. Fi snin riċenti, ir-​Russja u l-​pajjiżi li jappoġġjawha kif daħlu “fil-​pajjiż tad-​Dekorazzjoni”?

⁹ Fi snin riċenti, anki r-​Russja u l-​pajjiżi li jappoġġjawha daħlu “fil-​pajjiż tad-​Dekorazzjoni.” Kif? Fl-​2017, dan is-​sultan tat-​tramuntana ma ħalliex lin-​nies taʼ Ġeħova jagħmlu x-​xogħol u tefaʼ lil xi wħud minn ħutna rġiel u nisa fil-​ħabs. Hu anki pprojbixxa l-​pubblikazzjonijiet tagħna, inkluż it-​Traduzzjoni tad-​Dinja l-​Ġdida. Ħa wkoll l-​uffiċċju tal-​fergħa tagħna fir-​Russja u anki s-​Swali tas-​Saltna u l-​Swali tal-​Assembleat. Wara dawn l-​azzjonijiet, fl-​2018 il-​Ġemgħa li Tiggverna qalet li r-​Russja u l-​pajjiżi li jappoġġjawha huma s-​sultan tat-​tramuntana. Madankollu, in-​nies taʼ Ġeħova ma jagħmlux ħsara lill-​gvern jew jipprovaw ibiddluh meta dan il-​gvern jippersegwitahom. Minflok, huma jimxu fuq il-​parir tal-​Bibbja u jitolbu “għal kull min għandu pożizzjoni għolja,” speċjalment meta dawn ikunu se jieħdu deċiżjonijiet li jistgħu jeffettwaw il-​libertà tal-​qima tagħna.—1 Tim. 2:1, 2.

IS-​SULTAN TAT-​TRAMUNTANA SE JEQRED LIS-​SULTAN TAN-​NOFSINHAR?

10. Is-​sultan tat-​tramuntana se jeqirdu lis-​sultan tan-​nofsinhar? Spjega.

¹⁰ Il-​profezija f’​Danjel 11:40-​45 titkellem l-​iktar dwar is-​sultan tat-​tramuntana. Ifisser dan li hu se jeqred lis-​sultan tan-​nofsinhar? Le. Is-​sultan tan-​nofsinhar se jkun ‘għadu ħaj,’ jiġifieri, hu se jkun għadu jeżisti meta Ġeħova u Ġesù se jeqirdu lill-​gvernijiet umani kollha fil-​gwerra t’Armageddon. (Riv. 19:20) Għala nistgħu nkunu daqshekk ċerti? Ikkunsidra x’jindikaw il-​profeziji taʼ Danjel u Rivelazzjoni.

11. X’turi l-​profezija taʼ Danjel 2:43-​45? (Ara l-​istampa tal-​qoxra.)

¹¹ Aqra Danjel 2:43-​45. Il-​profeta Danjel iddeskriva xbieha enormi li l-​partijiet tal-​ġisem tagħha kienu magħmula b’metalli differenti. Kull parti tirrappreżenta gvern differenti li mexxa fejn ħafna min-​nies t’Alla kienu jgħixu. Dawn il-​gvernijiet mexxew fi żminijiet differenti. Is-​saqajn taʼ din ix-​xbieha kienu magħmulin mill-​ħadid u t-​tafal. Dawn jirrappreżentaw il-​Qawwa Dinjija Anglo-​Amerikana. Din il-​profezija turi li l-​Brittanja u l-​Amerka se jkunu għadhom imexxu meta s-​Saltna t’Alla se teqred lill-​gvernijiet umani kollha.

12. Lil min tirrappreżenta s-​sebaʼ ras tal-​bhima salvaġġa, u għala hu importanti li nkunu nafu dan?

¹² L-​appostlu Ġwanni wkoll tkellem dwar il-​gvernijiet li mexxew fuq in-​nies taʼ Ġeħova. Fil-​profezija taʼ Ġwanni, dawn il-​gvernijiet huma rrappreżentati minn bhima salvaġġa b’sebat irjus. Is-​sebaʼ ras tirrappreżenta l-​Qawwa Dinjija Anglo-​Amerikana. Dan hu importanti għax m’hemmx irjus oħra wara din. Is-​sebaʼ ras taʼ din il-​bhima se tkun għadha qed tmexxi meta Kristu u l-​armata li għandu fis-​sema se jeqirduha mal-​kumplament tal-​bhima.b—Riv. 13:1, 2; 17:13, 14.

X’SE JAGĦMEL IS-​SULTAN TAT-​TRAMUNTANA FIL-​FUTUR QARIB?

13-14. Min hu “Gog taʼ l-​art taʼ Magog,” u x’jistaʼ jkun li se jġiegħlu jattakka lin-​nies t’Alla?

¹³ Il-​profezija f’​Eżekjel 38:10-​23 tgħidilna dwar dak li jistaʼ jiġri qabel is-​sultan tat-​tramuntana u s-​sultan tan-​nofsinhar jiġu meqruda. Jidher li l-​profezija taʼ Eżekjel u l-​profeziji miktubin f’​Danjel 2:43-​45; 11:44, 45; 12:1 u Rivelazzjoni 16:13-​16, 21, isemmu l-​istess żmien u ġrajjiet. Jekk dan hu minnu, jidher li nistgħu nistennew li jseħħu dawn l-​affarijiet.

¹⁴ Xi żmien wara li tibda t-​tribulazzjoni l-​kbira, “is-​slaten taʼ l-​art abitata kollha” se jingħaqdu flimkien biex jifformaw grupp taʼ nazzjonijiet. (Riv. 16:13, 14; 19:19) Il-​Bibbja ssejjaħ dan il-​grupp taʼ nazzjonijiet “Gog taʼ l-​art taʼ Magog.” (Eżek. 38:2) Dan il-​grupp taʼ nazzjonijiet se jattakka lin-​nies t’Alla kollha u jipprova jeqridhom għalkollox. X’se jġiegħlu jagħmel dan? Fi profezija dwar dan iż-​żmien, l-​appostlu Ġwanni qal li silġ oħxon ħafna kien se jinżel fuq l-​għedewwa t’Alla. Din il-​maltempata bis-​silġ jistaʼ jkun li tirrappreżenta l-​messaġġ qawwi taʼ ġudizzju li se jippritkaw in-​nies taʼ Ġeħova. Jistaʼ jkun li dan il-​messaġġ iġiegħel lil Gog taʼ Magog jattakka lin-​nies t’Alla biex jipprova jeqridhom kollha.—Riv. 16:21.

15-16. (a) Danjel 11:44, 45, għal liema ġrajjiet jistaʼ jkun li qed jirreferu? (b) X’se jiġrilu s-​sultan tat-​tramuntana flimkien man-​nazzjonijiet l-​oħra li jagħmlu parti minn Gog taʼ Magog?

¹⁵ Dal-​messaġġ qawwi u l-​attakk finali mill-​għedewwa t’Alla jistaʼ jkun li jirreferu għall-​istess ġrajjiet li jsemmi Danjel 11:44, 45. (Aqra.) Hemm, Danjel jgħid li “jkun hemm rapporti . . . , minn tlugħ ix-​xemx u mit-​tramuntana,” li jħawdu lis-​sultan tat-​tramuntana u “hu joħroġ b’dagħdigħa kbira.” Is-​sultan tat-​tramuntana jippjana biex “jeqred lil ħafna.” Milli jidher “lil ħafna” tirreferi għan-​nies taʼ Ġeħova.c Jistaʼ jkun li hawnhekk Danjel qed jiddeskrivi l-​attakk finali fuq in-​nies t’Alla.

¹⁶ Meta s-​sultan tat-​tramuntana u l-​gvernijiet l-​oħra jattakkaw lin-​nies t’Alla, dan se jirrabja ħafna lil Alla li Jistaʼ Kollox, u mbagħad tibda l-​gwerra t’Armageddon. (Riv. 16:14, 16) F’dak iż-​żmien, is-​sultan tat-​tramuntana se jinqered u “ma jkunx hemm min jgħinu.” Miegħu se jinqerdu wkoll in-​nazzjonijiet l-​oħra li jagħmlu parti minn Gog taʼ Magog.—Dan. 11:45.

17. Min hu Mikiel, “il-​prinċep il-​kbir” li jissemma f’​Danjel 12:1, u x’se jagħmel?

¹⁷ Il-​vers taʼ wara fir-​rakkont taʼ Danjel jagħti iktar informazzjoni dwar kif is-​sultan tat-​tramuntana u l-​gvernijiet l-​oħra li jappoġġjawh se jiġu meqrudin. Jgħid ukoll kif aħna se niġu salvati. (Aqra Danjel 12:1.) Xi jfisser dan il-​vers? Mikiel huwa isem ieħor għas-​Sultan tagħna, Kristu Ġesù, li qed imexxi. Hu ilu “wieqaf għan-​nom” tan-​nies t’Alla mill-​1914 meta sar is-​Sultan tas-​Saltna t’Alla fis-​sema. Fil-​futur qarib, hu se “jqum,” jew se jeqred lill-​għedewwa tiegħu, fil-​gwerra t’Armageddon. Din il-​gwerra se tkun il-​ġrajja finali li Danjel sejħilha l-​akbar “żmien taʼ niket” li qatt kien hawn fid-​dinja. Ukoll, il-​profezija taʼ Ġwanni mniżżla f’​Rivelazzjoni tirreferi għaż-​żmien eżatt qabel il-​gwerra taʼ Armageddon bħala “t-​tribulazzjoni l-​kbira.”—Riv. 6:2; 7:14.

SE JKUN ISMEK “MIKTUB FIL-​KTIEB”?

18. Jiġri x’jiġri fil-​futur, għala nistgħu nibqgħu kalmi?

¹⁸ Kemm Danjel u kif ukoll Ġwanni qalu li Ġeħova u Ġesù se jsalvaw lill-​qaddejja tagħhom matul it-​tribulazzjoni l-​kbira. Allura, jiġri x’jiġri, aħna nistgħu nibqgħu kalmi. Danjel jgħid li dawk li se jiġu salvati se jkunu n-​nies li isimhom se “jinstab miktub fil-​ktieb.” (Dan. 12:1) X’nistgħu nagħmlu biex isimna jkun miktub f’dan il-​ktieb? Irridu nagħtu prova li għandna fidi f’Ġesù, il-​Ħaruf t’Alla. (Ġw. 1:29) Irridu niddedikaw ħajjitna lil Alla u nitgħammdu. (1 Pt. 3:21) U rridu nuru li nappoġġjaw is-​Saltna t’Alla billi nagħmlu dak kollu li nistgħu biex oħrajn jitgħallmu dwar Ġeħova.

19. X’għandna nagħmlu issa, u għala?

¹⁹ Issa hu ż-​żmien li nsaħħu l-​fiduċja tagħna f’Ġeħova u fil-​qaddejja leali li għandu fl-​organizzazzjoni. Issa hu l-​ħin li nappoġġjaw is-​Saltna t’Alla. Jekk nagħmlu dan, se niġu salvati meta s-​Saltna t’Alla teqred lis-​sultan tat-​tramuntana u s-​sultan tan-​nofsinhar.

Xi profeziji li huma mniżżlin fiċ-​ċart jiddeskrivu ġrajjiet li seħħew fl-​istess żmien. Kollha kemm huma jagħtu prova li qed ngħixu fi “żmien it-​tmiem.”—Dan. 12:4.

• 

  

  Skrittura(i) Riv. 11:7; 12:13, 17; 13:1-8, 12

  Profezija “Il-​bhima salvaġġa” ħakmet fuq in-​nies tad-​dinja għal iktar minn 3,000 sena. Fi żmien it-​tmiem, is-​sebaʼ ras ġiet midruba. Iktar tard, ir-​ras fieqet u “l-​art kollha marret wara l-​bhima”. Satana juża l-​bhima salvaġġa biex “jiggwerra kontra l-​bqija taʼ nisilha.”

  Twettiq Wara d-​Dulluvju, gvernijiet umani li kienu għedewwa taʼ Ġeħova ħakmu fuq in-​nies. Iktar minn 3,000 sena wara, wieħed minn dawn il-​gvernijiet b’saħħithom, il-​Brittanja, tilef ħafna mill-​qawwa tiegħu matul l-​Ewwel Gwerra Dinjija. Il-​Brittanja reġgħet saret b’saħħitha meta ngħaqdet mal-​Istati Uniti. Matul l-​aħħar żminijiet, Satana qed juża l-​gvernijiet kollha fuq l-​art biex jippersegwita lin-​nies t’Alla.

• 

  Skrittura(i) Dan. 11:25-45

  Profezija Fi żmien it-​tmiem, is-​sultan tat-​tramuntana u s-​sultan tan-​nofsinhar iġġieldu kontra xulxin għall-​poter.

  Twettiq Il-​Ġermanja ġġieldet mal-​Brittanja u l-​Istati Uniti. Fl-​1945, l-​Unjoni Sovjetika u l-​pajjiżi li jappoġġjawha saru s-​sultan tat-​tramuntana. Fl-​1991, l-​Unjoni Sovjetika waqgħet, u iktar tard, ir-​Russja u l-​pajjiżi li jappoġġjawha saru s-​sultan tat-​tramuntana.

• 

  Skrittura(i) Is. 61:1; Mal. 3:1; Lq. 4:18

  Profezija Ġeħova jibgħat “il-​messaġġier” tiegħu biex “iħejji triq” qabel is-​Saltna Messjanika tiġi stabbilità. Dan il-​grupp beda jipprietka l-​“aħbar tajba lill-​ġwejdin.”

  Twettiq Mill-​1870 ’il quddiem, C.  T.  Russell u oħrajn miegħu studjaw ħafna l-​Bibbja biex isibu x’tgħallem verament. Fl-​1881, huma rrealizzaw li hu importanti ħafna li l-​qaddejja t’Alla jippritkaw. Huma ħarġu artikli bħal “Jinħtieġu 1,000 predikatur” u “Midlukin biex nippritkaw.”

• 

  Skrittura(i) Mt. 13:24-30, 36-43

  Profezija Raġel żeraʼ żerriegħa tajba f’għalqa. Imbagħad, għadu żeraʼ s-​sikrana fl-​istess għalqa. Is-​sikrana kibret u għattiet il-​qamħ. Fi żmien il-​ħsad, is-​sikrana ġiet separata minn mal-​qamħ.

  Twettiq Mill-​1870 ’il quddiem, id-​differenza bejn il-​Kristjani veri u l-​Kristjani foloz bdiet tidher iktar u iktar ċara. Matul żmien it-​tmiem, il-​Kristjani veri nġabru f’kongregazzjonijiet u ġew separati mill-​Kristjani foloz.

• 

  Skrittura(i) Dan. 2:31-33, 41-43

  Profezija Is-​saqajn tal-​ħadid u t-​tafal huma taʼ xbieha magħmula minn metall differenti.

  Twettiq It-​tafal jirrappreżenta nies komuni li huma taħt it-​tmexxija tal-​Brittanja u l-​Istati Uniti u li jirribellaw kontra dawn il-​gvernijiet. Minħabba n-​nies, dawn il-​gvernijiet ma jistgħux jużaw il-​qawwa kollha tagħhom.

• 

  

  Skrittura(i) Mt. 13:30; 24:14, 45; 28:19, 20

  Profezija “Il-​qamħ” jinġabar “fil-​maħżen” u “l-​ilsir leali u għaqli” jiġi maħtur fuq “il-​qaddejja taʼ daru.” “L-​aħbar tajba tas-​saltna” bdiet tiġi ppritkata “fl-​art abitata kollha.”

  Twettiq Fl-​1919 l-​ilsir leali u għaqli ġie maħtur fuq in-​nies t’Alla. Minn dak iż-​żmien ’l hawn, l-​Istudenti tal-​Bibbja bdew jippritkaw ħafna iktar. Illum, ix-​Xhieda taʼ Ġeħova jippritkaw f’iktar minn 200 pajjiż u jippubblikaw letteratura bbażata fuq l-​Bibbja b’iktar minn 1,000 lingwa.

• 

  Skrittura(i) Dan. 12:11; Riv. 13:11, 14, 15

  Profezija Bhima salvaġġa b’żewġt iqrun tgħid lin-​nies biex “jagħmlu xbieha tal-​bhima salvaġġa” b’sebat irjus u din “tagħti n-​nifs lix-​xbieha.”

  Twettiq Il-​Qawwa Dinjija Anglo-​Amerikana bdiet il-​Lega tan-​Nazzjonijiet. Nazzjonijiet oħra ngħaqdu maʼ din l-​organizzazzjoni. Mill-​1926 sal-​1933, is-​sultan tat-​tramuntana kien membru wkoll tal-​Lega tan-​Nazzjonijiet. In-​nies emmnu li l-​Lega setet iġġib il-​paċi fid-​dinja, xi ħaġa li s-​Saltna t’Alla biss tistaʼ tagħmel. In-​nies emmnu wkoll li l-​Ġnus Magħquda setgħet tagħmel dan.

• 

  

  Skrittura(i) Dan. 8:23, 24

  Profezija Sultan li jidher feroċi “b’mod taʼ l-​għaġeb se jikkaġuna rovina.”

  Twettiq Il-​Qawwa Dinjija Anglo-​Amerikana qatlet ħafna nies u għamlet ħafna ħsara. Pereżempju, fit-​Tieni Gwerra Dinjija, l-​Istati Uniti waddbet żewġ bombi atomiċi fuq pajjiż li kien kontra l-​Brittanja u l-​Istati Uniti. Dawn il-​bombi għamlu ħsara enormi li qatt ma kienet saret qabel.

• 

  Skrittura(i) Dan. 11:31; Riv. 17:3, 7-11

  Profezija Il-​“bhima salvaġġa lewn l-​iskarlat” b’għaxart iqrun telgħet mill-​abbiss u hi t-​tmien sultan. Il-​ktieb taʼ Danjel jirreferi għal dan is-​sultan bħala “l-​ħaġa moqżieża li qed iġġib ħerba.”

  Twettiq Matul it-​Tieni Gwerra Dinjija, il-​Lega tan-​Nazzjonijiet spiċċat. Wara l-​gwerra, twaqqfet il-​Ġnus Magħquda. Bħal-​Lega, il-​Ġnus Magħquda ħadet unur li jixraq lis-​Saltna t’Alla. Il-​Ġnus Magħquda se tattakka lir-​reliġjon.

• 

  

  Skrittura(i) 1 Tess. 5:3; Riv. 17:16

  Profezija Il-​mexxejja tad-​dinja se jgħidu “paċi u sigurtà,” u “l-​għaxart iqrun” u “l-​bhima salvaġġa” tattakka “lill-​prostituta” u jeqirduha. Wara dan, il-​mexxejja tad-​dinja jiġu meqruda.

  Twettiq Il-​mexxejja tad-​dinja se jgħidu li ġabu paċi u sigurtà fid-​dinja. Imbagħad, il-​mexxejja li jagħmlu parti mill-​Ġnus Magħquda se jeqirdu l-​organizzazzjonijiet reliġjużi. Dan se jkun il-​bidu tat-​tribulazzjoni l-​kbira. Din it-​tribulazzjoni se tispiċċa meta Ġesù jeqred għalkollox id-​dinja taʼ Satana.

• 

  Skrittura(i) Eżek. 38:11, 14-17; Mt. 24:31

  Profezija Gog se jattakka l-​pajjiż t’Alla. Imbagħad, l-​anġli se jiġbru “l-​magħżulin.”

  Twettiq Is-​sultan tat-​tramuntana flimkien mal-​gvernijiet tad-​dinja se jattakkaw lin-​nies t’Alla. Wara li jibda dan l-​attakk, il-​midlukin li jkun għad fadal fuq l-​art, jittieħdu fis-​sema.

• 

  Skrittura(i) Eżek. 38:18-23; Dan. 2:34, 35, 44, 45; Riv. 6:2; 16:14, 16; 17:14; 19:20

  Profezija Dak “riekeb” fuq “żiemel abjad” itemm “ir-​rebħa tiegħu” billi jeqred lil Gog u l-​armata tiegħu. “Il-​bhima salvaġġa” tiġi mixħuta “fl-​għadira tan-​nar,” u l-​ġebla tfarrak ix-​xbieha enormi.

  Twettiq Ġesù, il-​144,000, u l-​anġli se jeqirdu lill-​grupp taʼ nazzjonijiet li jattakkaw lin-​nies t’Alla. Dan ikun it-​tmiem għad-​dinja taʼ Satana.