Uża Alla l-Evoluzzjoni Biex Joħloq Kollox?
It-tweġiba tal-Bibbja
Le. Il-Bibbja tgħid b’mod ċar li Alla ħalaq lin-nies u anke lil tipi differenti t’annimali u pjanti.a (Ġenesi 1:12, 21, 25, 27; Rivelazzjoni 4:11) Tgħid ukoll li n-nies kollha ġew mill-ewwel ġenituri tagħna, Adam u Eva. (Ġenesi 3:20; 4:1) Ir-rakkont tal-Bibbja ma jaqbilx mat-teorija li Alla uża l-evoluzzjoni biex joħloq it-tipi differenti t’annimali u pjanti. Imma l-Bibbja ma tgħid xejn dwar dak li jgħidu xi xjentisti li tipi t’annimali u pjanti jistgħu jaddattaw u jvarjaw.
Uża Alla l-evoluzzjoni?
Nies li jemmnu li Alla uża l-evoluzzjoni biex joħloq kollox għandhom ħafna ideat fuq kif għamel dan. L-Encyclopædia Britannica tgħid li xi nies jemmnu li Alla juża n-natural selection biex jidderieġi n-natura.b
Nies li jemmnu li Alla ħalaq kollox bl-evoluzzjoni għandhom ideat bħal:
Kull ħaġa ħajja li teżisti llum ġiet minn ħaġa ħajja waħda ħafna snin ilu.
Tip taʼ ħajja tistaʼ tevolvi f’ħajja oħra kompletament differenti. Pereżempju, ħafna jemmnu li x-xadini jistgħu jevolvu f’nies.
Alla huwa responsabbli għal dawn it-tipi t’evoluzzjoni.
L-evoluzzjoni taqbel mal-Bibbja?
Li Alla uża l-evoluzzjoni biex joħloq kollox ma jaqbilx mar-rakkont tal-ħolqien li hemm fil-ktieb taʼ Ġenesi fil-Bibbja. Meta Ġesù kien fuq l-art, hu wera li r-rakkont taʼ Ġenesi hu veru. (Ġenesi 1:26, 27; 2:18-24; Mattew 19:4-6) Il-Bibbja tgħid li qabel Ġesù ġie fuq l-art, hu kien jgħix fis-sema m’Alla. Hu għen lil Alla biex joħloq kollox. (Ġwanni 1:3) Allura, l-idea li Alla uża l-evoluzzjoni biex joħloq kollox ma taqbilx maʼ dak li tgħallem il-Bibbja.
Hija parti mill-evoluzzjoni meta l-pjanti u l-annimali jinbidlu biex jibqgħu ħajjin?
Il-Bibbja ma tispjegax kemm tip t’annimal jew pjanta jistaʼ jinbidel. Ukoll, ma tgħidx li t-tipi t’annimali u pjanti li ħalaq Alla ma jistgħux jinbidlu hekk kif jiżdiedu jew jaddattaw għal ambjenti differenti. Għalkemm xi nies jaraw dan it-tibdil bħala evoluzzjoni, fir-realtà mhux qed tinħoloq xi ħajja ġdida.
a Ħafna drabi, meta x-xjentisti jgħidu li evolva tip t’annimal jew pjanta ġdida, fil-verità din tkun varjat mill-istess tip.
b Natural selection hi l-idea li l-iżjed tip t’annimal jew pjanta b’saħħitha tibqaʼ tgħix.