Wasal iż-​Żmien għal Sodda Ġdida?

Minn korrispondent taʼ Stenbaħ! fil-​Britannja

Jiġrilek taʼ spiss li jkollok lejl imfarrak, iddur u titqalleb biex forsi ssib pożizzjoni tajba, u mbagħad fil-​għodu tqum iebes u muġugħ? Jekk iva, il-​problema tiegħek tistaʼ tkun is-​sodda li torqod fuqha.

DIN il-​biċċa għamara tistaʼ sserrħek u tistaʼ wkoll tkissrek. Jekk tgħix f’post fejn jintużaw is-​sodod, int x’aktarx li tqattaʼ terz minn ħajtek mimdud fuq waħda minnhom. Imma s-​sodda tiegħek m’hijiex se sservi għal dejjem. Qiegħed issibha komda s-​sodda li qed tuża bħalissa?

Għandek Bżonn Sodda Ġdida?

Normalment sodda tibqaʼ tajba għal madwar għaxar snin. Bniedem li fih il-​piż jgħarraqha iktar malajr is-​sodda. Żomm f’moħħok ukoll li iktar ma tikber fl-​età, il-​bżonnijiet u l-​preferenzi tiegħek ma jibqgħux l-​istess. Biex tiddeċiedi jekk għandekx bżonn sodda ġdida, staqsi lilek innifsek dawn il-​mistoqsijiet. ‘Inqum b’għonqi iebes jew b’dahri juġgħani? Is-​sodda tiegħi żgħira wisq? Nistaʼ nħoss xi molol jew ħotob? Meta nitqalleb nismaʼ żaqżiq jew xi ħaġa tħokk m’oħra? Jien u s-​sieħba tiegħi jiġrilna li nispiċċaw niżżerżqu lejn in-​naħa taʼ xulxin mingħajr ma rridu? Huwa l-​bażi tas-​sodda fejn iserraħ is-​saqqu kollu ħotob jew ħofor? Is-​saqajn u r-​roti tas-​sodda għadhom tajbin?’ It-​tweġibiet tiegħek għal dawn il-​mistoqsijiet jistgħu jgħinuk biex tkun taf jekk wasalx iż-​żmien li tixtri sodda ġdida.

X’Ikollha Sodda Tajba?

Sodda tajba tipprovdi kumdità u sodizza u tissodisfa l-​bżonnijiet u l-​preferenzi tiegħek. Il-​biċċa l-​kbira tas-​sodod ikun fihom saqqu u qafas fuqiex iserraħ, imma huwa s-​saqqu li l-​iktar jgħinek tħossok komdu. Is-​saqqu huwa magħmul minn diversi partijiet. L-​ewwel insibu l-​kisja taʼ barra tas-​saqqu, li żżomm il-​materjal taʼ ġewwa ħaġa waħda. Imbagħad ikun hemm saffi taʼ tapizzerija ratba biex dak li jkun iħossu komdu. Dan il-​materjal iħalli l-​għaraq tal-​ġisem jgħaddi. It-​tielet parti, dik li ssaħħaħ lis-​saqqu, ġeneralment ikun fiha ċrieki jew molol taʼ l-​azzar ittemprat. Minn ġewwa s-​saqqu jistaʼ jkun magħmul b’diversi modi, imma bħala regola ġenerali, iktar ma jkun fih molol u iktar ma dawn ikunu ħoxnin, iktar ikun sod is-​saqqu. Daż-żmien sar popolari ħafna s-​saqqu tal-​poliuretejn jew tal-​fowm tal-​latex. Dan it-​tip taʼ saqqu huwa eħfef mis-​saqqu tal-​molol.

Madankollu, saqqu tajjeb ikun tajjeb biss jekk ikollu bażi tajba fuqiex iserraħ. X’aktarx li l-​aħjar bażi tkun dik li nħadmet apposta għalih. Is-​sodda divan taʼ spiss tinbiegħ bħala sett, bis-​saqqu u l-​bażi b’kollox. Il-​bażi tkun forma taʼ kaxxa bil-​ġnub fondi. B’hekk il-​bażi tieħu l-​iskossi kollha u tħalli s-​saqqu jieħu n-​nifs biex b’hekk iservi iktar. Għażla oħra hija s-​sodda bil-​qafas tal-​ħadid jew taʼ l-​injam. Din is-​sodda ġeneralment ikollha qiegħ bit-​twavel taʼ l-​injam u tkun miftuħa minn taħt. B’hekk is-​saqqu li jmur magħha jkollu arja biżżejjed. Twavel ibsin jipprovdu qiegħ sod, filwaqt li twavel li jimmollaw huma iktar flessibbli.

Kif Tagħżel is-​Sodda t-​Tajba

X’għandek iżżomm f’moħħok meta tixtri sodda? Sodda b’saqqu wżat, tkun xorbot l-​għaraq taʼ nies oħra u jkun fiha xi qxur tal-​ġilda. Tistaʼ tkun mimlija wkoll bid-​dud (dust mites) li jistgħu jikkaġunaw allerġiji, ażżma, jew ekżema. Din tistaʼ wkoll tkun taʼ ħsara għalik u għal saħħtek jekk ma taqbilx mal-​ħtiġijiet sanitarji.

Qabel ma tmur tixtri sodda ġdida, ikun tajjeb li tiddeċiedi x’jgħodd l-​iktar għalik, u tikkunsidra ċerti affarijiet bħal per eżempju l-​prezz, xi raġunijiet taʼ saħħa, jew id-​daqs tas-​sodda. Ipprova warrab ħafna ħin biex iżżur il-​ħwienet li għandhom isem tajjeb, u itlob kemm tistaʼ tagħrif fuq kull sodda jew saqqu. Peress li s-​sodod ġeneralment jiswew il-​flus, tħalli lil ħadd jgħaġġlek biex tieħu deċiżjoni.

Għandek mnejn issibha iktar diffiċli biex tagħmel l-​għażla t-​tajba jekk tkun għajjien. Ilbes ħwejjeġ komdi. Toqgħodx tistħi biex tipprova sodda. Neħħi l-​ġakketta u ż-​żarbun u mtedd fuq kull sodda għal ftit minuti. Oqgħod f’pożizzjonijiet differenti minn kif torqod is-​soltu. Agħti kas b’mod partikulari x’differenza tħoss fuq spallejk, ġenbejk u n-​naħa t’isfel taʼ dahrek.—Ara l-​kaxxa hawn taħt.

Kif Tieħu Ħsieb is-​Sodda

Jekk is-​sodda tieħu ħsiebha sew, isservik iktar. Staqsi lill-​bejjiegħa tal-​ħanut għall-​parir tagħhom, u aqra sew l-​istruzzjonijiet tal-​manifattur dwar kif tieħu ħsieb is-​saqqu. Meta tieħu s-​sodda divan jew is-​saqqu li xtrajt id-​dar, neħħi l-​borża tal-​plastik li jkunu imkebbin fiha malajr kemm jistaʼ jkun. B’hekk tevita li dawn jagħmlu l-​għaraq u forsi jumdaw, jimmoffaw jew jitmermru. Dawn li ġejjin huma xi suġġerimenti oħra.

● Dawwar il-​pożizzjoni taʼ saqqu ġdid tal-​molol, billi taqilbu taʼ taħt fuq, u ddawwar in-​naħa tas-​saqajn għan-​naħa tar-​ras. Għall-​ewwel ftit xhur dan għandu jsir darba f’ġimgħa jew darbtejn f’xahar, u mbagħad kull tliet xhur. Dan jgħin biex il-​materjal taʼ ġewwa joqgħod, u jintuża l-​istess minn kullimkien. Jekk tbati b’dahrek, ikun għaqli li tinvesti f’saqqu tal-​fowm, peress li m’għandekx għalfejn iddawru taʼ spiss.

● M’għandek qatt tilwi, tirrombla jew tgħaffeġ is-​saqqu. Biex ma tagħmilx ħsara lid-​drapp, uża l-​mankijiet tas-​saqqu sempliċement biex tirranġalu l-​pożizzjoni, u mhux biex tqandlu minnhom.

● Kull fil-​għodu ikxef il-​lożor għall-​inqas 20 minuta biex tperreċ is-​sodda u tħalli l-​għaraq tal-​ġisem jevapora.

● Żomm is-​saqqu nadif billi qabel il-​liżar taʼ taħt, tifrex tip taʼ liżar protettiv li jistaʼ jinħasel. Uża vacuum cleaner regolarment biex tnaddaf is-​saqqu u l-​bażi tas-​sodda mis-​suf tal-​ħwejjeġ u t-​trab. Imsaħ it-​tbajjaʼ malajr bl-​ilma kiesaħ u sapuna delikata.

● Kulmeta tpoġġi bil-​qegħda fit-​tarf tas-​sodda, toqgħodx dejjem fl-​istess post. Tħallix lit-​tfal jew lil xi ħaddieħor jaqbeż fuq is-​sodda.

Is-sodda tiegħek hija iktar minn investiment taʼ flus. Hija investiment għal terz minn ħajtek, investiment li jistaʼ jħalli effett konsiderevoli fuq iż-​żewġ terzi l-​oħra. Jekk tagħżel is-​sodda tiegħek bil-​għaqal u tieħu ħsiebha, hi wkoll se tieħu ħsiebek.

[Kaxxa f’paġna 22]

Liema Sodda Tgħodd Għalik?

Kumdità u sodizza. Biex tagħżel saqqu tajjeb għalik, m’hemmx għalfejn ikun iebes ġebla. Fil-​fatt, huwa maħsub li sodda iebsa żżejjed tistaʼ żżid l-​uġigħ taʼ dahar. Ħalli lil ġismek jgħidlek x’inhu l-​aħjar għalik. Imtedd wiċċek ’il fuq. Jekk jirnexxilek iddaħħal idek fil-​ħofra taʼ dahrek mingħajr ma tħossok skomdu, u jekk tistaʼ titqalleb bil-​kumdità, is-​saqqu huwa iebes biżżejjed għalik. B’saqqu sod, is-​sinsla taʼ dahrek għandha tibqaʼ dritta meta torqod fuq ġenbek. Bniedem li fih il-​piż ikollu bżonn sodda iktar iebsa.

Daqs. Agħżel sodda li tagħtik biżżejjed spazju. Jekk se jorqdu tnejn min-​nies fuqha, żomm f’moħħok li jekk żewġ persuni adulti jorqdu f’sodda taʼ tnejn u taʼ daqs normali, kull wieħed minnhom se jkollu l-​istess spazju li jkollha tarbija f’benniena.

Sodda u saqqu li jmorru flimkien. Jekk hu possibbli, ixtri sodda u saqqu li jmorru flimkien u li ntgħamlu biex it-​tnejn li huma jipprovdulek kumdità u sodizza. Sodda qadima tistaʼ tgħarraq saqqu ġdid, kif ukoll teffettwalu l-​garanzija.

Valur. Ġeneralment, taʼ li tħallas tieħu. Mela ixtri sodda taʼ l-​aħjar kwalità li tistaʼ taffordja.

Spazju. Jekk l-​ispazju huwa limitat, ikun għaqli li tara jekk jaqbillekx tixtri sodda Murphy, jiġifieri sodda li tingħalaq u tidħol fi gwardarobba. Għażla oħra hija l-​futon, tip taʼ saqqu rqiq magħmul minn saffi taʼ tajjâr ikkuttunat li malajr jistaʼ jinfirex maʼ l-​art għal-​lejl. Dawn is-​saqqijiet jistgħu jinbiegħu wkoll bħala sufan sodda. Dan ikollu l-​qiegħ magħmul minn diversi strixxi u jkun jinfetaħ u jingħalaq.

Problemi taʼ saħħa. Jekk m’intix komdu f’sodda normali, sodda li togħla jew tinżel minn quddiem u minn wara toffrilek varjetà taʼ pożizzjonijiet differenti kif torqod. Hemm ukoll is-​sodda bis-​saqqu taʼ l-​ilma. Din twieżen u tqassam it-​toqol tal-​ġisem indaqs, u tistaʼ tgħin lil dawk li ma jkunux jistgħu jagħfsu fuq partijiet sensittivi taʼ ġisimhom.

Min ibati bl-​allerġiji. Jekk int allerġiku għat-​trab jew għal materjal naturali, saqqu li jkun fih fibri sintetiċi jew fowm jistaʼ jkun għażla tajba. Madankollu, taʼ min wieħed jinnota li mhux kull sodda tiġmaʼ malajr l-​affarijiet li jikkaġunaw l-​allerġiji. Dan japplika għas-​sodod bil-​qafas tal-​ħadid jew taʼ l-​injam u b’qiegħ tat-​twavel, u s-​sodod bis-​saqqijiet taʼ l-​ilma.

Nies anzjani. Kun ċert li tistaʼ tmiss l-​art bil-​qiegħ taʼ saqajk meta tpoġġi bil-​qegħda fit-​tarf tas-​sodda. Jekk it-​tarf tal-​bażi tas-​sodda jkun sod, iktar ikun faċli biex tidħol u toħroġ mis-​sodda x’ħin tkun bil-​qegħda.

[Kaxxa f’paġna 23]

Suġġerimenti taʼ Protezzjoni

◼ Għal matul il-​lejl, ilbes ħwejjeġ li jifilħu għan-​nar.

◼ Kun ċert li l-​friex ikun ’il bogħod sew minn xi nar jew heaters.

◼ Kultant żmien, iċċekkja jekk il-​kutra taʼ l-​elettriku għandhiex drapp imżarrat jew maqrus, marki taʼ ħruq, u jekk il-​wajer tad-​dawl qdiemx. Jekk il-​kutra tkun imxarrba tużahiex, imma ħalliha tinxef waħedha. Titfax affarijiet tqal fuq is-​sodda meta l-​kutra tkun mixgħula.

◼ M’għandek qatt timla hot-water bottle bil-​misħun jagħli, jew tużah meta jkollok il-​kutra taʼ l-​elettriku. Neħħih mis-​sodda qabel ma t-​tfal jidħlu jorqdu.

[Dijagramma f’paġna 23]

(Għall-formazzjoni sħiħa tat-​test, ara pubblikazzjoni) Il-​kisja taʼ barra tas-​saqqu

Il-​kisja taʼ barra tas-​saqqu

Disinn għamla taʼ djamant, b’ponti fondi

Microquilting

Trapuntar

Saffi taʼ tapizzerija ratba

Is-​saff li jissoda s-​saqqu

Fowm

Continuous springs

Open springs

Pocket springs

[Sors]

Reproduced by courtesy of the Sleep Council

[Sors tal-​istampa f’paġna 23]

Reproduced by courtesy of the Sleep Council