Tħossok Stressat Iżżejjed?

MADWAR id-​dinja, it-​taqbida bejn ix-​xogħol u l-​ħajja tal-​familja hi kwistjoni kbira. Bħalma jindika sors wieħed, ‘il-​globalizzazzjoni, it-​teknoloġija ġdida, u l-​ekonomija kompetittiva bla waqfien għamluha diffiċli biex dak li jkun iżomm is-​separazzjoni tradizzjonali bejn id-​dar u x-​xogħol.’ Dawn il-​bidliet ħalqu għana li qatt ma kien hawn bħalu. Imma dan is-​suċċess ġie bi prezz. Awtur wieħed jgħid: “Miljuni minna ninsabu mgħobbijin iżżejjed bix-​xogħol, għandna skeda mborġata, u nħossuna magħkusin. Aħna sempliċement stressati żżejjed.”

Issa żid maʼ dan l-​effetti skuraġġanti tar-​reċessjoni ekonomika reċenti. Ħaddiema madwar id-​dinja, kemm dawk li jagħmlu xogħol manwali kif ukoll dawk li jaħdmu f’xi uffiċċju, tilfu l-​impjiegi u d-​djar tagħhom. Wisq probabbli huma jixtiequ li jistgħu jaħdmu iebes.

Ejja nikkunsidraw kemm huma kbar dawn il-​problemi:

▶ Fost il-​ħaddiema Ewropej, 6 minn kull 10 jsofru minn stress minħabba x-​xogħol.

▶ Fost l-​impjegati tal-​Istati Uniti, 1 minn kull 3 jħoss li jaħdem iżżejjed il-​ħin kollu.

▶ Minn kull 3 Kanadiżi iktar minn 2 isibuha diffiċli biex jibbilanċjaw il-​ħajja tal-​familja max-​xogħol.

▶ Huwa stmat li iktar minn 600 miljun ħaddiem, jew 22 fil-​mija mill-​ħaddiema madwar id-​dinja, iqattgħu iktar minn 48 siegħa fil-​ġimgħa fuq il-​post tax-​xogħol.

Dawn l-​istatistiki juru traġedja umana kbira ħafna. Xi studji jassoċjaw sigħat twal u irregulari taʼ xogħol maʼ saħħa batuta, relazzjonijiet mimlijin tensjoni, trobbija fqira tat-​tfal, separazzjoni, u divorzju.

Xi ngħidu għalik? Qed taħdem iebes wisq? Jew int fost il-​miljuni li bħalissa m’għandhomx xogħol? Tixxennaq għal bilanċ aħjar bejn ix-​xogħol u l-​ħajja tal-​familja? Jekk inhu hekk, kif tistaʼ ssibu?

[Kaxxa/Stampa f’paġna 3]

“IT-​TIENI IMPJIEG”

“Meta nasal id-​dar,” tgħid waħda mara li taħdem, “irrid nipprepara l-​ikel, innaddaf id-​dar, naħsel il-​ħwejjeġ, immur għat-​tfal wara l-​attivitajiet tagħhom taʼ kuljum, ngħinhom fil-​ħowmwerk, u nara li jinħaslu u jidħlu jorqdu. Sa dak il-​ħin inkun għajjiena mejta.” Huwa stmat li jaħdmu 1.2 biljun mara madwar id-​dinja u miljuni minnhom jiffaċċjaw dan “it-​tieni impjieg” li jaqtagħlek qalbek, bħalma jagħmlu wkoll ħafna rġiel. Madankollu, stħarriġ juri li spiss l-​irġiel ma jagħmlux ix-​xogħol tad-​dar. Ġeneralment in-​nisa jġorru l-​piż taʼ dan kollu, kemm jekk jaħdmu barra d-​dar u kemm jekk le.