X’inhuma l-fatti dwar il-Milied?

Madwar id-​dinja, miljuni taʼ nies jiċċelebraw il-​Milied għal diversi raġunijiet. Xi wħud jieħdu pjaċir igawdu żminijiet taʼ festa mal-​ħbieb u l-​familja. Oħrajn jaħsbu dwar Alla jew jiddedikaw ħin biex jgħinu lill-​fqar jew lil dawk fil-​bżonn. Bla dubju, fihom infushom dawn l-​affarijiet huma taʼ min ifaħħarhom. Madankollu, huma mtappnin bl-​aspetti negattivi taʼ din il-​festa.

L-​ewwel, ħafna ċelebranti jemmnu li l-​Milied huwa ċelebrazzjoni għal Ġesù f’jum twelidu. Iżda, l-​istorjografi jaqblu kompletament bejniethom li d-​data tat-​twelid tiegħu mhix magħrufa. Il-​ktieb The Christian Book of Why jgħid li “l-​Kristjani tal-​bidu rrifjutaw li jwarrbu data li timmarka t-​twelid taʼ Ġesù” għaliex riedu “jisseparaw ruħhom mill-​prattiki pagani kollha.” Taʼ interess, il-​Bibbja ma tagħti ebda indikazzjoni li xi darba Ġesù ċċelebra jum it-​twelid tiegħu stess jew taʼ xi ħadd ieħor. B’kuntrast, hu kkmanda lis-​segwaċi tiegħu biex jikkommemoraw il-​mewt tiegħu.—Luqa 22:19.

It-​tieni, ħafna studjużi jaqblu li l-​biċċa l-​kbira mit-​tradizzjonijiet tal-​Milied għandhom l-​oriġini tagħhom fi drawwiet mhumiex Kristjani u pagani. Dawn jinkludu lil Santa Klaws, kif ukoll l-​użu tal-​mistletoe u s-​siġra tal-​Milied, għoti taʼ rigali, xemgħat jixegħlu, girlandi dekorattivi mdendlin, u kant tal-​Milied. Il-​ktieb The Externals of the Catholic Church qal dan rigward uħud minn dawn id-​drawwiet: “Meta nagħtu jew naqilgħu rigali tal-​Milied, u ndendlu girlandi ħodor fi djarna u fil-​knejjes, kemm minna jafu li probabbilment inkunu qed nosservaw drawwiet pagani?”

Iżda int għandek mnejn tistaqsi x’hemm ħażin f’li ssegwi dawk li qishom drawwiet innoċenti. Ikkunsidra x’jgħid it-​tielet punt bħala tweġiba. Alla ma japprovax it-​taħlit taʼ drawwiet pagani mal-​qima pura. Permezz tal-​profeta Tiegħu, Għamos, Alla Ġeħova qal lill-​aduraturi stinati Tiegħu f’Iżrael tal-​qedem: “Jien bgħadt il-​festi tagħkom, ma lqajthomx . . . Neħħili l-​konfużjoni taʼ l-​għanjiet tiegħek.”—Għamos 5:21, 23.

Għala dan il-​kliem qawwi? Ikkunsidra x’kienu qed jagħmlu n-​nies fis-​saltna taʼ Iżrael fit-​Tramuntana tal-​qedem. L-​ewwel sultan tagħhom, Ġerobogħam, poġġa għoġiela tad-​deheb fil-​bliet taʼ Dan u Betel u influwenza lin-​nies biex iqimu lilhom minflok ma jqimu lil Alla Ġeħova kif jixraq fit-​tempju f’Ġerusalemm. Ukoll, is-​sultan introduċa festi u ħatar qassisin biex jgħinu lin-​nies jiċċelebrawhom.—1 Slaten 12:26-​33.

Dak li għamlu l-​Iżraelin deher li kien tajjeb. Wara kollox, ma kinux huma qed jagħmlu dawn l-​affarijiet biex iqimu lil Alla u jogħġbuh? Il-​kliem qawwi li Alla qal permezz taʼ Għamos u l-​profeti l-​oħra jindika ċar kif ħassu Alla dwar prattiki bħal dawn. Permezz tal-​profeta Malakija, Alla qal: “Jien Ġeħova; jien ma nbdiltx.” (Malakija 3:6) Ma jgħidilniex dan kif iħossu Alla dwar il-​ħafna ċelebrazzjonijiet tal-​Milied illum?

Wara li kkunsidraw il-​fatti li semmejna, miljuni taʼ nies iddeċidew li ma jiċċelebrawx il-​Milied. Minflok, huma jieħdu pjaċir u għandhom sodisfazzjon veru f’li jqattgħu l-​ħin maʼ ħbiebhom u familthom u f’li jgħinu lill-​foqra u lil dawk fil-​bżonn kull meta jixtiequ matul is-​sena kollha.