Ukulingana ne Mateyo

13 Pe wowo uwanda, e Yesu wafumile mwe yoyo ing’anda ayayikala mupipi ne sumbi. 2 Awantu awavule wayile kwe weliwe kuno walinji, icakuti Yesu winjizile muwato amuno ayikala, lyo awantu wimilile mu mbali ye sumbi. 3 Apano watalisile ukuwanena ivintu ivivule ukuwomvya ivilanjililo, wawanenile ukuti: “Lolani! Umuntu wayile mu kutanda imbeyu. 4 Pano akutanda, zimwi zyaponezile pa musewo, ni vinyunyi vizile nu kusompa zyozyo imbeyu. 5 Zimwi nazyo zyaponezile mu mawe, lelo pa mulandu wakuti patalinji nkani umusili zyamezile zuwanye. 6 Nomba pano umusanya wawazile zyakazile amuno zitalinji nu kwakutwala imisisi. 7 Zinji zyaponezile pa myunga, ni myunga yakuzile nu kuzitawilila. 8 Ne zinji zyaponezile pa musili uwuzima, swinya zyakuzile icete nu kutalika ukufumya imbeyu na zinji izizima, zimwi zyafumizye 100, zimwi 60 ne zinji 30. 9 Wino angivwa, lekani ayivwe.”

10 Acino awasambi wizile kwe weliwe nu kumunena ukuti: “Acani cino ukuwomvezya ivilanjililo pa kulanda na wantu?” 11 Nga Yesu awasuka ati: “Mwemwe mwawa nu longo amuno Leza wamisokololela inkama ya mu Wufumu wa mwi yulu. Lelo wa-a weni watakwata lo-o ulongo. 12 Amuno wensinye wino wakwata, walimulundilapo na vinji swinya aliwa ni vivule nkaninye; lelo wensinye wino atawa na cimwi, walimupoka nu tutici tuno wakwata. 13 Awuli umulandu wuno nkawomvezya ivilanjililo nga nkulanda nawo; amuno ukulola wakalola, lelo wasimanya nanti cimwi, nu kwivwanye wakakwivwa, lelo wasikwiluka. 14 Swinya uwusesemo wakwe Ezaya wukuficiliswa kwe wa-a awantu. Wukati: ‘Ukwivwa muliyivwa lelo mutaliyiluka, nu kulola mulilola lelo mutalimanya nanti cimwi 15 Amuno imyezo ye wa-a awantu yakunkuma. Ukwivwa kweni wakakwivwa lelo wasicitapo cimwi. Wakaziwata aminso yawo pakuti watalola cimwi, swinya wakakwiyala amakutwi yawo pakuti wativwa, ni myezo yawo yitiluka nu kwiza kwe nene pakuti mbapozye.’

16 “Lelo mwe wa nsansa amuno aminso yinu yakalola na makutwi yinu yakakwivwa. 17 Nkuminena nkuti, wakasesema na wantu awalungamane wano walinjiko walondesyanga ukulola vyo-o ivintu vino mukulola, lelo wataviweni swinya walondesyanga ukuvivwa lelo watavivwile.

18 “Nomba, yivwani uwupiliwulo wa cilanjililo ce katanda wa mbeyu. 19 Imbeyu zino zyaponezile mu musewo; amuntu wino wivwa ilyasi lizima ilya Wufumu ukwasowa ukwivwicisya, nga umulwani ayiza nukusompola izwi lino lyatanzilwe mu mwezo wakwe. 20 Nomba zino zyaponezile mu mawe, amuntu wino wivwa ilyasi lizima nu kulipocelela ni nsansa. 21 Lelo pa mulandu wakuti izwi lya kwe Leza litamufisile pa mwezo, wasuwizile vye pa mpindi ntici, swinya pano wawa ni ntazi nanti watalika ukumucuzya pa mulandu wi zwi lya Wufumu, aleka ukusuwila mwi zwi. 22 Ne luno lwaponezile pa myunga, amuntu wino wivwa izwi lya kwe Leza, nomba pa mulandu wa masakamika ya mu nsi, nu kuzembelekwa ni vyuma, nu kuvwambisya ukuwa ni vintu ivivule ivya mwe yo-o insi, avituzya izwi swinya apotwa ukukoma ivikomwa. 23 Lelo luno lwaponezile pa musili uwuzima, amuntu uwakuti wivwa izwi nu kwiluka, akoma ni vikomwa ivivule ukucila pa mbeyu zino watanzile. Wenga akoma imbeyu 100, winji 60, ne winji 30.”

24 Yesu wawanenile icilanjililo na cinji watili: “Uwufumu wa mwi yulu wawa ngati amuntu wino wakomezile imbeyu izizima mu calo. 25 Uwusiku pano awantu walazile, umulwani wakwe wayile nu kutandamo isote* mu ngano. 26 Pano ingano zyakuzile nu kufumya utumitwe, apano isote lizile aliloleka. 27 Nga wawomvi awaya ku mweni calo awamunena awati, ‘Tatakulu uzye mutakomezilevye ingano mu calo? Nomba acani cino mwawela ni sote?’ 28 Ne awanena ukuti, ‘Umuntu wino wampata awino acisile wowo.’ Awawomvi awamunena awati, ‘Uzye tuye tukavinyunkule?’ 29 Ne umweni wa calo akana ati, ‘Awe pamwi munganyunkulila kumwi ni ngano. 30 Lekani vikulile ponga mpaka impindi yakusombola yize yifike, ndinena wano waliwasombola ukuti: Talicilanipo ukufumya isote mulinyepe mu myanzi nu kulyoca, apano mulonganike ingano muzitwale muno nkasunjila ivyakulya.’”

31 Yesu awanena icilanjililo na cinji ati: “Uwufumu wamwi yulu wawa ngati akalupumba akatici* kano umuntu wakomezile mu calo. 32 Akano kacepesya pa mpumba zyonsinye, lelo kakakula nkaninye nu kuwa icimuti icikulu, icakuti ni vinyunyi vyamupela vikaya mukwikala kwe co-o icimuti.”

33 Wawanenile icilanjililo na cinji icakuti: “Uwufumu wa mwi yulu wawa ngati we yisiti yino umwanaci wasenzile nu kusanzinkanya mwe fulaulo yino yalinji mu ciya icikulu,* mpaka yonsinye ayitutumuka.

34 E Yesu wawomvizye ivilanjililo ndi vino vyo-o pa kulanda ku wantu. Atalandanga nawo ukwasowa ukuwomvya ivilanjililo, 35 pakuti aficilisye vino kasesema walanzile ukuti: “Ndiwomvya ivilanjililo pa kusambilizya; Ndilanda pa vintu vino vyavwama ukufumilila pano insi yatalicizile.”*

36 Walile Yesu wanena awantu ukupita, winjizile mu ng’anda. Nga awasambi wakwe awaya kwe weliwe nu kulanda ukuti: “Tulondololele uwupiliwulo wacilanjililo ci sote lino lyamezile mu calo.” 37 Nawe ayasuka ukuti: “Wino watanzile imbeyu nzima, Amwana wa muntu; 38 icalo ansi. Ne imbeyu inzima awana wa Wufumu, lelo isote, awana wa kwe Satana, 39 Swinya umulwani wino watanzile isote we Ciwa. Ukusombola, ansilo ya kwe yo-o insi, awakusombola nawo awangeli. 40 Acino, wulyanyene vino wakalonganika isote nu kulyoca, avyo ciliwa na kunsilo ya kwe yo-o insi. 41 Umwana wa muntu alituma awangeli wakwe, ukwiza mukufumya mu Wufumu wonsinye wano wakasovya wanji,* na wano wakacita iviwipe, 42 nu kuwasumbila mwi lungu lya mulilo. Mulyanye amuno waliwalilila nu kulumanya amino. 43 Pe yoyo impindi wonsinye wano Leza wazumilizya waliwala ngati alilanzi mu Wufumu wa Mukwasi wawo. Wino angivwa, lekani ayivwe.

44 “Uwufumu wa mwi yulu wawa ngati acuma, cino wafisile mu calo, cino winji wayile azana nu kucifisa panji; pa mulandu wakuti walinji ni nsansa wayilekazya vyonsinye vino wakweti nu kukalamo coco icalo.

45 “Naswinyanye Uwufumu wamwi yulu wawa ngati we kakazya wino wavwambanga amawe ya mutengo.* 46 Walile walizana, wapisile paponye nu kuyakazya vyonsinye vino wakweti nu kukalamo lyo-o iliwe.

47 “Naswinya Uwufumu wa mwi yulu wawa ngati alikonde lino wasumbizile mwe sumbi apano alilema inswi zya misango yonsinye. 48 Lyalile ikonde lizula walikwemezile ku cituntu, nga awikala pansi, awasolowolamo inswi inzima nu kuziwika mu viya, lelo imbipe zyeni wazisumvile. 49 Wonye wo-o avino ciliwa na ku nsilo ya kwe yo-o insi. Awangeli waliyiza apano wize wafumye awawipe mu walungamane 50 swinya awawipe waliwasumbila mwi lungu lya mulilo. Mulyanye amuno waliwalilila nu kulumanya amino.

51 Apano Yesu awakolowozya ukuti: “Uzye mwivwicisizye muno vyonsinye vyo-o vyasula?” Ne wasambi wakwe awati: “Eta, Tatakulu.” 52 Nga awanena ukuti: “Acino wensinye wino akasambilizya awantu, wino wasambilizya pa Wufumu wa mwi yulu, wawa ngati amweni wa ng’anda wino akafumya ivyuma umwakusunjila ivipya ni vikali.”

53 Pano Yesu wamazilevye ukulanda vyo-o ivilanjililo, wafumileko nu kuya kunji. 54 Pano wayile kumwawo kuno wakulizile, watalisile ukusambilizya awantu mwi Sinagogi, icakuti awantu watalisile ukuzunguka nu kulanda ukuti: “Weweni wino wamupa amaka yakucitila ivizungusyo? 55 Uzye we-e ase mwana kawaza wa miti? Uzye e mama wakwe ase Mariya, na wanyina ase Jemusi, Jozefu, Simoni ne Yuda? 56 Uzye na wankazi zyakwe tutawa nawo ko-o? Nomba akwinye kuno wafumizye vyonsinye vyo-o?” 57 Acino wakanile ukumusuwila.* Lelo e Yesu wawanenile ukuti: “E kasesema wakamucindika kunji, lelo ku citungu ca ku mwawo na kwa lupwa lwakwe, kweni wasimucindika.” 58 Acino atacisileko ivizunguzyo ivivule pa mulandu wakuti watamusuwizile.