Ukulingana ne Marko
11 Pano wayanga wakupalamila ku Yerusalemu, pa mwamba wa Miolife ku Betifage ne Betani, e Yesu watumile awasambi wakwe wawili, 2 wawawuzizye ati: “Yanji mukaya kano kali pa nkolelo yinu, nga mwinjilamo mukuyazana umwana wa ndokwe wino wanyefile wino umuntu asitela akwelepo. Apano mu musapule mundetele. 3 Swinya wensinye wino waminena ukuti, ‘Acani cino mukusapulila umwana wa ndokwe?’ muye muti, ‘E Tatakulu akuyilonda, nenawe wandi akamizumilizye.’” 4 Nawo wayile nu kuyazana umwana wa ndokwe wamunyepelezile pa mulyango wa ng’anda yino yawezile mu mbali ya musewo, acino wayile awamusapula. 5 Lelo wamwi wano wimilile papo wawakolowozizye ukuti: “Nga cani cino mukusapulila umwana wa ndokwe?” 6 Nawo wawanenile ukulingana na vino Yesu wawawuzizye, nga awawaleka awapita.
7 Nawo wamuletezile umwana wa ndokwe* awawikapo ni vizwalo vyawo ivyakunzi, nga Yesu akwelapo. 8 Awavule wanzile ivizwalo vyawo ivyakunzi mu nzila, ne wanji nawo wapambuzilevye insamba zya vimiti. 9 Wano walinji ku nkolelo na wano walinji ku nsizi wapundanga wakuti: “Tukupepa ukuti mupususyani! Wapalwa umuntu wino akwizila mwi zina lya kwe Yehova!* 10 Wapalwa Uwufumu wa kwe Devedi umukwasi witu wuno wukwiza! Tukupepa kwe wewe we muno wikala mwi yulu ukuti umupususye!” 11 Walile wafika mu Yerusalemu, winjizile mwi tempile. Walolecesizye vyonsinye vino vyalinjimo, lelo pa mulandu wakuti kwafisile, wizile aya ku Betani na watumwa wakwe 12.
12 Uwanda wuno wakonsilepo pano wafumanga mu Betani, e Yesu wivwile inzala. 13 Apano wizile alola icimuti ca makunyu apatali, acino wayile pakuti alole nga kuli ivikomwa. Lelo pano wafisile, wazanile amafwa matupunye, amuno yitalinji ampindi ya makunyu. 14 Acino wacinenile ukuti: “Umuntu nanti wumwi atize alye icikomwa kwe wewe,” lyo wasambi wakwe wakwivwa.
15 Pano wafisile mu Yerusalemu, e Yesu winjizile mwi tempile nu kuwinga wonsinye wano wakazyangamo nu kukala, swinya wapenulinye amatebulo ye wano wakawulanga indalama, apenulanya ni vilimba vye wano wakazyanga inkunda. 16 Atazumilizyanga uwili wensinye ukwinjila ni ciya mwi tempile. 17 Swinya wanenile na wantu ukuti: “Uzye mutamanya vino calembwa ukuti, ‘Ing’anda yane yiliwakwitwa ukuti ing’anda yakupepelamo awantu wa mu nko zyonsinye?’ Lelo mwemwe mwayipilula yawa ayakuvwamamo awang’o.” 18 Pano intunguluzi zya wasimapepo na kasambilizya wa masundo wivwile wo-o, watalisile ukulanzyanya vino walinji nu kukoma Yesu amuno wamutinanga pa mulandu wakuti awantu awavule wazungukanga pe vino wasambilizyanga.
19 Pano kwafisile, wafumile mu Yerusalemu. 20 Lelo pano wapitanga umutondo tondo, wazanile icimuti ca mukunyu cikazile kumwi ni misisinye. 21 Pano Petro wizusile, wamunenile ati: “Musambilizya icimuti cino watifile cikazile.” 22 Ne Yesu wamwasusile ukuti: “Suwila Leza. 23 Nkuminena icisinkanye nkuti, uwili wensinye wino wanena wo-o umwamba ukuti, ‘katuka pa-a kayisumbile mwe sumbi’ swinya ali ni suwilo asakuvwilika ukuti cingacitika, vyowalanda vilicitika. 24 Awuli umulandu wuno nkuminenela nkuti, vyonsinye vino mukupepelapo nu kulenga, mwasuwila ukuti mupocelezile kali, apano Leza alimipa. 25 Swinya pano mukupepa mwatetela wano wamiluvyanya, apakuti nu Mukwasi winu uwa kwi yulu ayize mitetele pe vino mukaluvyanya.” 26* ——
27 Wayile naswinya ku Yerusalemu, nomba pano wapitanga mwi tempile, intunguluzi zya simapepo, wakasambilizya wa masundo na wasongo awaya kwe weliwe, 28 awamunena ati: “Uzye ukawomvya amaka ya kwe weni, nanti weweni wino wakupa amaka yakucita vyonsinyene vyo-o?” 29 Ne Yesu awanena ati: “Namikolowozya iwuzyo lyonga, nga mwanjasuka, apano nandi minene kuno nkafumya amaka yakucitila vyonsinyene vyo-o. 30 Njasukani, uzye ulubadizyo lwa kwe Yohani lwafumile kwi yulu nanti ku wantu?” 31 Acino watalisile ukulanzyanya aweneco wakuti: “Nga twati kwi yulu, wandi ati, nga cani cino mutamusuwilizile? 32 Lelo watalondanga ukulanda ukuti aku wantu, pa mulandu wakuti watinanga awantu, amuno wonsinye wamanyile ukuti e Yohani walinji we kasesema. 33 Acino wamwasusile ukuti: “Tutamanyile.” Ne Yesu nawe awanena ukuti: “Nanenenye ntakuminena kuno nkafumya amaka yakucitila vyonsinyene vyo-o.”