Ukulingana ne Mateyo
20 Uwufumu wa mwi yulu tungawukolanya ku mweni calo, wino wapulusile umutondotondo ukuya mukuvwamba awakuwomba mu calo.* 2 Walile wivwana na wawomvi ukuti wandi awalipile e denari* yonga pa wanda, wawatumile ukuti waye mukuwomba mu calo cakwe. 3 Swinya ku ma 9 awazi* wayile ku maliketi mukuvwamba awawomvi na wanji, wazanile wamwi wimilizile vye wasi ni vyakuwomba, 4 awanena ukuti: ‘Namwenye yanji mu calo mukuwomba, nkwiza nkumilipila ukulingana na vino mufwile ukulipilwa.’ 5 Awapita mukuwomba. Swinya apita mukuvwamba na wanji ku ma 12 awazi* na ku ma 15 awazi,* wonsinye akuwanena ivili vyonganye. 6 Mukulecelezya, pano cikufika ku ma 17 awazi,* aya ku maliketi mukuvwamba awawomvi na wanji, azana na wanji wimilile vye ukwasowa incito, awakolowozya ati: ‘Nga cani cino mwimilile vye pa-a impindi yonsinye yo-o ukwasowa icakuwomba?’ 7 Awamwasuka awati: ‘Amuno kusi nanti wumwi nye wino atupile incito.’ Ne umweni calo awanena ati, ‘Yanji namwenye kawombanji mu calo.’
8 “Pano cafikanga amanguzi, umweni calo wanenile umonsi wino walolecesyanga pa wawomvi ati, ‘Yita wonsinye wano tewakuwomba, uwalipile indalama zyawo, utalicile wano tewiza munsizi, ulecelezye na wano tewatalicizilepo ukuwomba.’ 9 Pano wano watalisile ukuwomba ku ma 17 awazi wizile, wawapile denari* yonga. 10 Acino pano wano watalicizilepo ukuwomba wafisile, walolanga ngati wandi wa wafolesye imvule, lelo nawonye wawapile denari* yonga. 11 Walile wafola zyo-o indalama, watalisile ukuyilizyanya pe vino umweni calo wacisile 12 awamunena ukuti, ‘Wa-a awonsi wano tewiza mukulecelezya wawomvile iwala vye lyonga; lelo watufolesya indalama izili zyonganye na swewano tetutalicizilepo ukuwomba tukupya nu musanya!’ 13 Lelo umweni calo wanenile wumwi pe wa-a awawomvi ukuti, ‘We wane, ntakucenjezizye. Uzye tutate twivwine ukuti nandi nkulipile denari* yonga? 14 Senda vye indalama zyako upite. Nkulonda ukupa nu wakulecelezya ndi vino nakupa nawewenye. 15 Uzye intawa ni nsambu zyakucita ivili vyonsinye vino nkulonda ku ndalama zyane? Nanti pamwi mwanjivwila vye akaso pa mulandu wakuti nacitila awawuyo ivizima?’* 16 Wonye wo-o avyo ciliwa, awakulecelezya waliwa awakutalicila, ne awakutalicila waliwa awakulecelezya.”
17 Pano wali pa wulendo wakuya ku Yerusalemu, e Yesu wasenzile awasambi wakwe 12 pa mbali nukuwanena ukuti: 18 “Yivwani. Tukuya ku Yerusalemu, swinya Umwana wa muntu walimulema nu kumutwala ku ntunguluzi zya simapepo na wa kasambilizya wa masundo. Nawo walimupingula ukufwa 19 swinya walimupa ku wantu wa mu nko zinji, pakuti wize wamusyowole,* wamume ivikoti nu kumupamantila pa cimuti. Lelo pa wanda waciti tatu e Leza ayize amuzyulupule.”
20 Nge muka Zebedi na wana wakwe wawili awaya kwe Yesu, afika afukama.* Pakuti alenge vimwi. 21 Yesu amunena ati: “Acani cino ukulonda nkucitile?” Nawe ayasuka ati: “Nkulenga ukuti awana wane wawili wize wikale nawewe mu Wufumu wako. Wenga ayize awe kwe ndilo nu muwuye kwe kamani.” 22 E Yesu amwasuka ukuti: “Mutamanyile cino mukulenga. Uzye mungamwela mwe kapu yino indi nu kumwelamo?” Nawo awamwasuka awati: “Tungamwela.” 23 Nga awanena ati: “Acisinka, mulimwela mwe kapu yane. Nomba asa nemuno nkasonta wino afwile ukwikala kwi kasa lyane ilya kwe ndilo ni lye kamani. E Tata alipa vyovyo ivilimba, kwe wano wapekanizizya.”
24 Walile awasambi 10 wivwa vino vyacitisile, wafulizilwe wa-a wawili. 25 Nomba e Yesu wisile awasambi wakwe nu kuwanena ati: “Mwamanya ukuti intunguluzi zya mu nko, zikateka awantu nge awazya, ne awantu awalumbuke nawo wakawomvya amaka yawo kukutiticizya awantu. 26 Mwemwe asa vino muzipizile ukuwa; lelo wensinye wino akulonda ukuwa wesongo azipizile awombela awawuye, 27 swinya wensinye wino akalonda ukuwa awakutalicilapo pe mwemwe azipizile amiwombela nge amuzya. 28 Wulyanye vino nu Mwana wa muntu atizizile ukuti awantu wamuwombela, lelo wizile mukuwawombela, nu kupa uwumi wakwe pakuti apususye awavule.”
29 Nomba pano Yesu na wasambi wakwe wafumanga mu Jeriko, awantu awavule wamukonsile. 30 Lolani! intonko ziwili zino zisile mu mbali ya musewo zivwile ukuti we Yesu akupita, zyatalisile ukupunda ukuti: “Tatakulu, twivwile uluse, Mwana wa kwe Devedi!” 31 Nomba awantu wazikalipizile ukuti zimyalale; apano nazyo azipundisya ukuti: “Tatakulu, twivwile uluse, Mwana wa kwe Devedi!” 32 Nga Yesu ayimilila, awita nu kuwakolowozya ukuti: “Avyani vino mukulonda micitile?” 33 Nawo awamwasuka awati: “Tatakulu, leka tutalike ukulola.” 34 E Yesu wivwile uluse, acino wawalemile mu minso. Awatalika nu kulola paponye, swinya awatalika ukumukonka.