Ukulingana ne Mateyo
15 Awafalisi wamwi na wakasambilizya wa masundo, wafumile ku Yerusalemu nu kuya kwe Yesu ukuti walande nawe. Wamunenile ukuti: 2 “Amulandu ci wuno awasambi wako wasikoncela intambi zya vikolwe vitu? Ku cakulolelako, wasisamba ku makasa pa kulya.”
3 Yesu awasuka ukuti: “Acani cino mukakanila ukukonka amasundo ya kwe Leza pa kuti vye mukonke intambi zinu? 4 Amasundo ya kwe Leza, yakati, ‘Uwacindika e Baba wako ne Mama wako’* swinya, ‘wensinye wino watuka Baba wakwe nanti e Mama wakwe, mufwile ukumukoma.’ 5 Nomba mwemwe mukati, ‘Wensinye wino wanena Baba wakwe nanti e Mama wakwe ukuti: “Nalayile ukupa Leza vino nanga mbomvye ku kumyavwa,” 6 lyo atazipizile ukuwomvya vino wakwata ukupa awakwasi wakwe.’ Acino mwalenga vino Leza walanda vyaleka ukuwomba pa mulandu ni ntambi zinu. 7 Mwe wa cawufi mwe! e kasesema Ezaya wamilondolozile icete sana, pano walandizile lya nkani ukuti: 8 ‘Wa-a awantu wakancindika vye mwe vino wakalanda, lelo imyezo yawo yafuma kwe nene. 9 Ukupepa kwawo kuno wakampepa akwavye amuno wakasambilizya amasundo ya wantu.’” 10 Nga Yesu apunda awantu ukuti wapalamile kwe weliwe, nga awanena ukuti: “Yivwicisyani vyo nkulanda: 11 Ivya kulya visikombezya umuntu, suka vino vikafuma mu mulomo wakwe avino vikamukombezya.”
12 Apano awasambi wizile kwe weliwe nu kumunena ukuti: “Uzye umanyile kuno Awafalisi tewafulwa pe vyo tewalanda?” 13 Nga Yesu awanena ukuti: “Umukwasi wane uwa mwi yulu aliwakana wulyanye vino awantu wakanyunkula icilimwa nu kucisumba. 14 Walekani wawange. Antunguluzi intonko. Nga cakuti intonko ikutungulula intonko imbuye, lyo wonsinye waliponela mu cizinji.” 15 Nga e Petro alanda ukuti: “Tutivwicisizye icilanjililo cino walanda.” 16 Yesu awawuzya ukuti: “Uzye nanombanye, mutivwicisizye? 17 Uzye mutamanya ukuti icili consinye cino umuntu walya cikaya munda nga apano aciya mu cimbusu? 18 Lelo, vyonsinye vino umuntu akalanda vikafuma mu mwezo, swinya vyovyonye avino vikamukombezya. 19 Ku cakulolelako, mu mwezo amuno mukafuma amelenganyo mawipe ndi vino: wucikoma, uwuzelele, uwucende, uwung’o, uwufi, ni miponto. 20 Vyo-o avili ivintu vino vikakombezya umuntu; lelo ukulya ukwasowa ukusamba ku makasa kusikombezya umuntu.”
21 Walile Yesu wafuma koko, wayile ku musumba wa Turi ne Sidoni. 22 Swinya, lolani! umwanaci umwina Foiniki wino wikalanga koko wizile, afuma akupunda akuti: “Njivwilako uluse Tatakulu Mwana wa kwe Devedi. Umwana wane umukazyana ali nu muzimu uwuwipe wuno wumucuzizye nkaninye.” 23 Lelo e Yesu atamwasusile nanti cimwi. Acino awasambi wakwe wizile, awatalika ukumunena ukuti: “Muwinge uleke apite, amuno alanzile akutupundilila nu kutulambilizya.” 24 Nga Yesu ayasuka ukuti: “E Leza wantumile ukwiza mukwavwa vye awa mu Israeli, wano wawa ngati ang’onzi insowe.” 25 Lelo umwanaci wizile amufukamila, nu kumunena ukuti: “Tatakulu, nazina njavwa!” 26 Ne Yesu wamwasusile ukuti: “Citange cizipe ukusenda ivya kulya vya wana ukusumbila twa simbwa.” 27 Nga umwanaci amwasuka ukuti: “Acisinka Tatakulu, lelo natwasimbwanye tukalya ku nvongonyo zino zikapona pi tebulo lya kwa yisikulu.” 28 Nga Yesu amunena ati: “We mwanaci wi suwilo ilikulu; kaciwe wowonye vino ukulonda.” Umwana wakwe wapozile pe yilyanye impindi.
29 Walile e Yesu wafuma koko wayile mupipi ne Sumbi wa Galili, swinya wakwezile umwamba, ayikala na pa mwamba. 30 Nga apano awantu awavule awaya kwe weliwe, awamutwalila awalemale, intonko, wano wasilanda, na wanji awavule, wayile awawateka ku matamba yakwe, nawe wawapozizye. 31 Awantu wazungusile nkaninye ukulola kuno awalemale wakupita, intonko zikulola, waciwulu wakulanda, swinya watalisile ukulumbanya Leza wa wina Israeli.
32 Yesu wisile awasambi wakwe nu kuwanena ukuti: “Nivwila wa-a awantu uluse amuno nomba wikala nanene amanda yatatu ukwasowa ukulya nanti kamwi. Ntakulonda wapite ni nzala, amuno wangapona mu nzila.” 33 Lelo awasambi wakwe wamunenile ukuti: “Pa-a pano tuli apa mpanga, akwinye kuno twandi tufumye imikate yino awantu awavula wo-o wangalya nu kwikuta?” 34 Nga Yesu awakolowozya ukuti: “Muli ni mikate yinga?” Nawo watili: “Tuli ni mikate 7, nu tunswi vye tutici.” 35 Walile wanena awantu ukuti wikale, 36 wasenzile imikate 7 nu tunswi, pa nsizi ya kupepa, wayimontolinye atalika ukupa awasambi wakwe, ne wasambi nawo wapile awantu. 37 Swinya wonsinye walile nu kwikuta na vino vyasyazile vizwile ivise* 7. 38 Nomba awantu wano walile walinji awonsi 4,000, ukwasowa ukupendelako awanaci na wana. 39 Walile awantu wapita, wakwezile uwato nu kuya ku citungu ca Magadani.