Ukulingana ne Luka
12 Pe yoyo impindi, pano awantu awavule wawungine ponga icakuti awatalika nu kulyatana, Yesu watalisile ukunena awasambi wakwe ukuti: “Cenjelani kwe yisiti yino yawa mu Wafalisi, akuli ukuti uwufi. 2 Amuno kutawa icili consinye cino cavwama cino citalisokoloka, ni vya nkama vyonsinye vino vitalimanyikwa. 3 Vyonsinye vino mukalanda ku mbali vilimanyikwa ku wavule, na vyonsinye vino mukatokotezya mu nkama waliviwilizya pa misonje. 4 Nomba mwe viwuza vyane, nkuminena nkuti, mutatina wano wangamikoma wano pansizi yakumikoma watange wacitepo cimwi. 5 Lelo, muwatina Leza wino angamikoma amisumbile na mu Gehena.* Nkuminena naswinyanye nkuti, Wenye awino muwatina. 6 Awantu wakakazya utunyunyi ututici* 5 mu ma koini vye yawili? Lelo Leza asikwiwilila nanti konganye. 7 Wapenda ni nyele zya ku mitwe yinunye. Mutatina, amuno mwacindama ukulusya to-o utunyunyi.
8 Nkuminena nkuti, wensinye wino walanda pa wantu awavule ukuti amusambi wane, Umwana wa muntu alilandila pa wangeli na pe Leza ukuti amusambi wakwe. 9 Lelo wensinye wino wankanila pa wantu ukuti atamanya, naninye ndimukanila pa wangeli wa kwe Leza ukuti ntamumanya. 10 Wensinye wino wapontela Umwana wa muntu, walimutetela, lelo wensinye wino wapontela umuzimu wa kwe Leza watalimutetela. 11 Nga wiza wamitwala pa wantu awavule wano wawungine ponga,* ku wa muwuteko na ku wasoja, mutize muwasakamala pe vino mulilanda pakuti muyicinjilile, 12 amuno umuzimu wa kwe Leza wulimisambilizya pe yoyonye impindi vino muzipizile ukulanda.”
13 Paponye wumwi mwi wumba wanenile Yesu ukuti: “Musambilizya, tata afwile, acino nena e songo wane ukuti anjankanyeko vyonsinye vino tata watusila.” 14 Ne Yesu wamunenile ati: “Kusi uwili wensinye wino wampa umulimo wakumipingula nu kumyankanya ivyuma.” 15 Nga pano awanena ati: “Cenjelani nu kuyicinjilila ku kulondesya ukuwa ni vivule,* amuno umuntu nanti angawa ni vivule, uwumi wakwe wusiwa mwe vino wakwata.” 16 Pa nsizi ye vyo-o, wawanenile icilanjililo cakuti: “Umuntu wumwi uwa vyuma wasombozile ivyakulya ivivule mu calo cakwe. 17 Acino watalisile ukwelenganya ukuti, ‘nacita wuli wo-o vyo ntakweti apakuwika ivyakulya?’ 18 Apano watili, ‘Nandi ncite wo-o: Namongola muno nkasunjila ivyakulya nzenge ivikulu, swinya momonye amuno ndiwika ivyakulya vyane vyonsinye, 19 alanda nu kuti: “Wo-o vino nkweti ivyakulya ivivule nkaninye vino vilimfisyako imyaka yino yikwiza; ndiwapuzavye, nalya nu kumwa.”’ 20 Lelo Leza wamunenile ukuti, we muntu umusowe amano we, wandi ufwe uwusiku. Weweni wino alisyala ni vintu vyonsinye vyo-o vino ukweti? 21 Wonye avino cawa na ku muntu wino akayilonganicila ivintu ivivule lelo wino atacindama kwe Leza.”
22 Acino wanenile awasambi wakwe ukuti: “Awuli umulandu wuno nkuminenela nkuti mutasakamala pe vino mwandi mulye, vino mwandi mumwe na vino mwandi muzwale. 23 Amuno uwumi winu wacindama nkaninye ukulusya ivyakulya, nu muwili winu walusya ivizwalo. 24 Teyelenganyani pa cingowe: Wasikomela imbeyu, ukusombola nanti akusunga ivyakulya; lelo Leza akawalisya. Uzye mutacindama ukulusya ivinyunyi? 25 Weweni pa kwe mwemwe wino angalundako nanti ali awala* lyonga ku wumi wakwe nga akusakamala? 26 Nga cakuti mutange mucite nanti akantu vye ka-a akatici, lyo amulandu ci wuno mukasakamalila? 27 Lolani vino amaluwa ya mu mpanga yakakula, yasiwombesya nanti ukupanga ivizwalo; lelo nkuminena nkuti ni Mfumu Solomoni nye, nanti yalinji ni vyuma wulyanye swinya yacindime, yisitela izwalepo ndi vino amaluwa yakaloleka ukuyemba. 28 Wo-o nga avino Leza akazwika amaluwa ya mu mpanga yano yakawako vye pa wanda wonga, uwaca ayakala awayoca na mu mulilo, lyo alicilapo ukumisakamala nanti acakuti isuwilo linu litawoma. 29 Acino mutati mwasakamala pe vino mwandi mulye na vino mwandi mumwe, swinya mutati mwasakamala nkani; 30 amuno vyo-o avino awantu wano watamanya Leza wakalondesya. Lelo Umukwasi winu wamanya ukuti mukalondekwa vyonsinye vyo-o. 31 Acino muwakolezya Uwufumu wa kwe Leza, na vyonsinye vino mukalonda alimipa.
32 “Mutatina mwe wumba litici, amuno Umukwasi winu akalonda ukumipa Uwufumu. 33 Kazyani vyonsinye vino mwakwata nu kucitila awapina ivizima.* Muwapanga utwakuwicilamo indalama tuno tutange tononeke, swinya muwasunjila ivyuma vinu kwi yulu kuno umung’o atange aye, swinya kuno e kolokoswa atange alye. 34 Amuno kuno kuli icuma akuno kukawa nu mwezo.
35 “Zwalilani lyankani nu kuyipekanya, swinya mutaleka ama lampi yinu yazima. 36 Mufwile ukuwa ngati awonsi wano wakulindilila yisikulu ukuti awele ukufuma ku winga, pakuti nga wafika wakong’onsyavye, wamwiyulile paponye. 37 Awa nsansa wa-a awazya wano pano yisikulu akuwela, aliwazana wakulola! Nkuminena nkuti aliyipekanya pakuti awawombele. Swinya aliwanena ukwikala pi tebulo, apano aliyiza nu kuwapekanizizya ivyakulya. 38 Swinya waliwa awa nsansa na pano wanyoka uwusiku pakasi* nanti pano kukuya kukuca* nga wazana wacili wakulola. 39 Teyelenganyani pe co-o, nga cakuti umweni wa ng’anda akalanga amanyile impindi yino umung’o akwizilapo, atange alale swinya atange aleke umung’o amwinjilile mu ng’anda. 40 Namwemwenye mwayipekanya, amuno impindi yino mutakwenecela, ayino Umwana wa muntu aliyiza.”
41 Nga Petro amunena ati: “Tatakulu, uzye ukunenavye sweswe co-o icilanjililo nanti ukunena wonsinye?” 42 Nga Yesu alanda ati: “Uzye umuzya* wa cisinka swinya uwa mano weweni, wino e yisikulu wasonta ukuti asakamala awa mu ng’anda* yakwe nu kuwapa ivyakulya pa mpindi iyizima? 43 Awa nsansa weyo umuzya nga cakuti pano yisikulu aliyiza wiza wamuzana akuwomba umulimo wakwe! 44 Nkuminena nkuti, alimusonta ukuwalolecesya pa vyuma vyakwe vyonsinye. 45 Nomba nga cakuti weyo umuzya watalika ukulanda mu mwezo wakwe ukuti, ‘Tatakulu wazimba ukwiza’, swinya watalika ukuma awawomvi wawuye awanaci na wonsi, watalika nu kulya nu kukolwa, 46 e yisikulu wa kwe weyo umuzya aliyiza pa mpindi nu wanda wuno atakwenecela, alimusunda nkaninye swinya alimuwika ponga na wa cawufi. 47 Ne umuwomvi wino wivwicisizye vino yisikulu wamunenile lelo wakana ukuyipekanya nanti akucita vino wamunenile, walimuma ivikoti ivivule kwe yisikulu. 48 Lelo wino ativwicisizye ukulonda kwa kwe yisikulu swinya wacita ni vintu vino wangamumilapo ivikoti, walimumavye vitici. Acino umuntu wino wapa ivivule walimupinda ivivule, nu muntu wino wamupa ukulolecesya pa vivule walimupinda ivivule.
49 “Niza mukusonteka umulilo mu nsi. Ulupya lwatalika kali swinya kusi cinji cino ningacita. 50 Kuli ulubadizyo luno nzipizile ukubadizwa, nomba ndi nu wulanda mpaka lwize luficiliswe. 51 Uzye mukulola ngati niza mukuleta umutende mu nsi? Awe, niza mukupusanya awantu. 52 Amuno ukufumilila pe yo-o impindi, mu lupwa muno muli awantu 5, mwandi mwawa ukupusana, watatu walikatucila wawili, ne wawili walikatucila watatu. 53 Waliwakatucilana, e yisi nu mwana umonsi, umwana umonsi ne yisi, e nyina nu mwana umwanaci, nu mwana umwanaci ne mama wakwe, e nyinavyala ne nyinavyala.”
54 Apano wanenile na wantu ukuti: “Nga mwalola amawingo yaloleka kasika mukati, ‘Imvula ya cimuza yandi yize,’ swinya wowonye avyo cikawa. 55 Nga mwivwa umuza wapupa ku kambazwa ke ndilo, mukati, ‘Kwandi kupye,’ swinya avyo cikakwiza mukuwa. 56 Mwe wa cawufi mwe! Mukamanya vino kwandi kuce nga mwalolavye mu nsi, nanti mupela. Nomba amulandu ci wuno mukapotelwa ukumanya yo-o impindi yino tulipo? 57 Acani cino mukapotelwa ukumanya ukuti muzipizile ukucita ivizima? 58 Pano wumwi akukutwala ku koti mukuluwulula, uwapanga zuwa umutende nawe pano mucili muli mu nzila, pakuti atakakupe mu makasa ya kwe kapingula, e kapingula nawe atakakupe ku musoja, nu musoja nawe atakakutwale mu cifungo. 59 Nkuminena nkuti mutalitela mufume, mpaka mwize mulipile indalama zyonsinye zino mwawa nazyo, ukufika na ku kandalama akatici nkaninye.”*