Ukulingana ne Marko
8 Naswinyanye awantu wayile kuno Yesu walinji, nomba watakweti ivyakulya. Acino wisile awasambi wakwe nu kuwanena ukuti: 2 “Nivwila awantu uluse, amuno wikala na nene amanda yatatu, ivyakulya vyawo vyasila. 3 Nga nawanena nati wapite ku mang’anda yawo ni nzala, wangapona mu nzila amuno wamwi wafumile ukutali nkaninye.” 4 Lelo awasambi wakwe wasusile awati: “Pa-a pano tuli apa mpanga, nga twandi tufumye kwinye imikate iyakuti awantu wonsinye wa-a walye?” 5 Nga awakolowozya ukuti: “Amikate yinga yino muli nayo?” Nawo awati: “Tuli niyili 7.” 6 Wanenile awantu ukuti wikale pansi, apano asenda imikate iyili 7, apepa, amontolanya nga apa awasambi, nawo awatalika ukupa awantu. 7 Swinya walinjivye nu tunswi ututici, acino wapefile, anena na wasambi wakwe ukuti wape awantu. 8 Walile nu kwikuta, swinya kwasyazile na vimwi vino awasambi walonzile mu vise* ivikulu 7. 9 Awonsi wano walile walinji 4,000. Nga Yesu awaleka ukuti wapite.
10 Paponye e Yesu na wasambi wakwe, awakwela uwato nu kuya ku citungu ca Dalamanuta. 11 Nakonye Awafalisi wayile kwe weliwe nu kutalika ukumupanzika ukuti acite icimanyilo ukufuma mwi yulu pakuti wamwelezye. 12 E Yesu wivwile nkaninye uwulanda mu mwezo wakwe. Acino walanzile ukuti: “Amulandu ci wuno mukalondela icimanyilo? Nkuminena icisinkanye nkuti, awantu wa pe yo-o impindi watalitela walolepo icimanyilo.” 13 Paponye e Yesu asya Awafalisi akwela uwato, nu kulambila ku mbalama yinji.
14 Lelo awasambi wiwilizile ukusenda umukate, walinjivye na wonga wuno walinji nawo mu wato. 15 Acino Yesu watalisile ukuwasoka ukuti: “Cenjelani kwe yisiti yino yawa mu Wafalisi ne Herodi.” 16 Acino watalisile ukupanzinkana pe wowo vino watasenzile umukate. 17 Walile e Yesu wivwa vino walandanga, wawanenile ati: “ Acani cino mukupanzinkana pa mukate? Uzye mutilusile nu kwivwicisya cino nkulandapo? Uzye cimitalizile ukwivwicisya mu myezo yinu? 18 Mwawa na minso lelo musilola, swinya mwawa na makutwi lelo musikwivwa. Uzye mutakwizuka 19 pano namontolinye imikate 5 nu kupa awonsi 5,000, avise vinga vino mwalonzilemo vino vyasyazile?” Nawo awati: “12.” 20 Swinya watwalilizile ukulanda ati: “Pano namontolinye imikate 7 nalisizye awonsi 4,000, avise* vinga vino mwalonzilemo vino vyasyazile? Nawo watili: “ivili 7.” 21 Apano wawanenile ati: “Uzye na panye mutivwicisizye?”
22 Apano wafisile mu Betisaida, swinya awantu wamutwalizile umonsi intonko nu kulambilizya Yesu ukuti amulememo. 23 Nga Yesu amulema ikasa, amusenda amufumya mu kaya. Pano wamuswilizile amati mu minso, wamulemile nga amunena ati; “Uzye ukulolapo icili consinye?” 24 Umonsi wakontamusile nga alanda ati: “Cili nge nkulola awantu, amuno kuli vimwi vino vikuloleka ngati avimuti nomba vyeni vikupita.” 25 Naswinyanye e Yesu wamulemile mu minso nu monsi wapozile atalika nu kulola icetenye. 26 Acino wamunenile ukuti aye ku ng’anda, lelo wamuwuzizye nu kuti: “Utakinjile mwe ka-a akaya.”
27 E Yesu na wasambi wakwe, wafumile koko awaya mu twaya twa ku Kaisariya Filipi. Mu nzila e Yesu watalisile ukukolowozya awasambi wakwe ukuti: “Uzye awantu wakati ne weni?” 28 Nawo wamunenile ati: “Wakati we Yohani Kabadizya, ne wamwi wakati we Eliya, wanji nawo wakati we wumwi pakasesema.” 29 Nga Yesu awakolowozya ati: “Nga mwemwe mukati ne weni? Nge Petro ayasuka ati: “We Klistu.” 30 Acino wawanenile ukuti watakanenepo uwili wensinye pe weliwe. 31 Swinya watalisile nu kuwasambilizya ukuti, umwana wa muntu walimucuzya, nu kumukana kwa songo, ku ntunguluzi zya simapepo na kwa kasambilizya wa masundo swinya walimukoma, lelo pa nsizi ya manda yatatu alizyulupuka. 32 Wawanenile vyo-o pakuti wivwicisye. Lelo Petro wasenzile Yesu pambali nu kutalika ukumukalipila. 33 Acino wapiliwucizile ku wasambi wakwe nga akalipila Petro, amunena ati: “Fuma pa-a, Satana! Amuno usikwelenganya ivya kwe Lesa, suka ivya wantu.”
34 Apano wapunzile awantu na wasambi wakwe nu kuwanena ati: “Wensinye wino akulonda ukunkonka, ayikane umweneco nu kusenda icimuti* cakwe icakuculilapo, apano ankonka. 35 Amuno wensinye wino akulonda ukupususya uwumi wakwe aliwusovya, lelo wensinye wino wasovya uwumi wakwe pa mulandu wane na pa mulandu wi lyasi ilizima, aliwupususya. 36 Avizima ci vino umuntu angazanamo nga cakuti wawa na vyonsinye ivya munsi lelo wasovya uwumi wakwe? 37 Nanti acakuti umuntu angapa vyonsinye vino wakwata, uzye angapususya uwumi wakwe? 38 Amuno wonsinye wano wanjivwila insoni ponga na mazwi yane ku wantu wa pe yo-o impindi wano watawa ni cisinka* kwe Leza, Umwana wa muntu nawe aliwivwila insoni nga wiza mu wucindami wa kwe Yisi ponga na wangeli.”