Ukulingana ne Marko
12 E Yesu watalisile ukulanda nawo ukuwomvya ivilanjililo, watili: “Umonsi wumwi walimile icalo ca vikomwa swinya wazenzile ilinga aliwilizya. Mukasi, wawisilemo apakufinila ivikomwa pakuti awapanga waini swinya wazenzilemo nu lupungu. Asila awalimi icalo ukuti wacisakamala, aya ku nsi yinji. 2 Pano impindi yakusombola yafisile, watumile umuwomvi ukuti akasende ivikomwa ku walimi. 3 Lelo awalimi wamulemile awamuma nu kumunyosezyamo ukwasowa ivikomwa. 4 Watumile umuwomvi nawinji, nawe wayile awamuma ku mutwe nu kumupontela. 5 Swinya watumile umuwomvi na winjinye, lelo weni wayile awamukoma. Watumile awawomvi na wanji awavule, wamwi wayile awawuma ne wamwi wawakomile. 6 Mukulecelezya, watumile umwana wakwe wino wakunzile amuno watili, ‘Weni waliya wakamucindike.’ 7 Walile awalimi walola umwana, awalanzyanya wakuti, ‘We-e awino alipyana co-o icalo, lekani tumukome pakuti cize cisyale acitu.’ 8 Acino wamukomile nu kumusumbila kunzi ya calo ca vikomwa. 9 Avyani vino umweni wa calo alicita? Aliyiza nu kukoma awalimi wonsinye, ape ni calo kwe wanji. 10 Uzye mutawazya iwaliko lino likati, ‘iliwe lino wakazenga wakanile, alino liza lyawa pa kona. 11 Lyo-o iliwe lyafumile kwe Yehova* swinya co-o acizungusyo kwe sweswe’?”
12 Pano wivwile vyo-o, walondanga ukumulema lelo watinile awantu, amuno wamanyile ukuti awano walandangapo mu cilanjililo. Acino wafumileko nu kumusya.
13 Watumile Awafalisi ni wumba lino lyatunjililanga e Herodi kwe Yesu pakuti wakavwambilizye iviluwo mwe vino walandanga. 14 Pano wafisile, wamunenile ati: “Musambilizya, twamanya ukuti we wacisinka swinya usilonda ukuti awantu wakutemwe amuno usilola vino awantu wakuloleka ku londe lelo ukasambilizya icisinka pe Leza. Tunene, uzye isundo* lyazumilizya ukulipila umusonko kwe Kaisare nanti pole? 15 Uzye tungalipila nanti tutazipizile ukulipila?” Lelo pa mulandu wakuti e Yesu wamanyile iviwipe vino welenganyanga, wawanenile ukuti: “Mpani e Denali* njilole.” 16 Apano wayile awamuletela nu kumupa, nga wanena ati: “Uzye icikope na malembo vino vili pa-a, avye weni?” Nawo awati “avya kwe Kaisare.” 17 Nga Yesu awanena ati: “Mwapa ivya kwe Kaisare kwe Kaisare ni vya kwe Leza panji kwe Leza.” Co-o cawazungusizye nkaninye.
18 Apano awa Saduki wano watinji kutawa ukuzyulupuka wizile kwe weliwe nu kumukolowozya ati: 19 “Musambilizya, e Mozesi walemvile ukuti, ngu monsi wafwa ukwasowa ukukwata umwana, umunyina azipizile ukutwala mulamu wakwe, na wana wano alikwata waliwa awamunyina umuyazi. 20 Nomba kwalinji awanyina 7 wano wafumile ing’anda yonganye. E songo pe wonsinye, watwazile lelo wafwile ukwasowa ukukwata umwana. 21 Acino umunyina wasyazile twala wakwakwe, lelo nawenye wafwile ukwasowa ukukwata awana. Nu waciti tatunye nawenye calinji wonye. 22 Wonsinye 7 wafwile ukwasowa ukukwata awana. Namukulecelezya umwanaci wizile afwa. 23 Uzye nga wiza wazyulupuka aliwa we muka weni pe wonsinyene wa-a? Amuno wonsinyene 7 wamutwazilepo.” 24 E Yesu wawanenile ukuti: “Uzye mutaweni ukuti mwasowa nkaninye? Amuno mutamanya Amawaliko nanti amaka ya kwe Leza. 25 Pano awafwe waliwazyulupuka, wataliwatwala nanti ukutwalwa, lelo waliwavye ngati awangeli wa mwi yulu. 26 Uzye mutawazya vino Mozesi walemvile pi lyasi lyakuzyulupuka, vino Leza wamunenile pano icimpuza capyanga ukuti: ‘Ne Leza wa kwe Abrahamu, e Leza wa kwe Isaki swinya e Leza wa kwe Yakobi?’ 27 Asa we Leza wa wafwe, we Leza wa wantu wa wumi. Acino mwasowa nkaninye.
28 Pano wumwi pa wakasambilizya wa masundo wivwile vino wapanzinkananga na vino Yesu wasusile icete, wamukolowozizye ati: “Alisundo ci ilyakutalicila* pa masundo yonsinye?” 29 Nga Yesu ayasuka ati: “Ilyakutalicila alyolyo lino Mozesi walanzile ukuti, ‘Yivwani mwe wina Israeli, e Yehova* e Leza witu, we Yehova* wenganye, 30 uwakunda Yehova* e Leza wako nu mwezo wako wonsinye, nu wumi* wako wonsinye, na melenganyo yako yonsinye, na maka yako yonsinye.’ 31 Nilya citi wili alyakuti, ‘uwakunda umuwuyo ndi vino wayikunda.’ Kutawa isundo linji lino lyalusya ya-a.” 32 Apano e kasambilizya wa masundo amunena ati: “Musambilizya, walanda icete swinya cino walanda acisinka, ‘wawavye wenga swinya kutawa Leza wino walingana nawe.’ 33 Ukumukunda nu mwezo wonsinye, na mano yonsinye, na maka yonsinye nu kukunda wanji ndi vino twayikunda, kwacindama ukucila ukupa inyama zya koca.” 34 Pano Yesu waweni ukuti wasuka icete, wamunenile ukuti: “Usi ukutali nkani nu Wufumu wa kwe Leza.” Lelo wonsinye watinile ukumukolowozya naswinya.
35 Nomba pano Yesu watwalilizile ukusambilizya mwi tempile, wawanenile ukuti: “Amulandu ci wuno wakasambilizya wa masundo wakalandila ukuti e Klistu amwana wa kwe Devedi? 36 Pano e Devedi wapocelezile umuzimu wa kwe Leza, watili, ‘E Yehova* wanenile e Tatakulu ati: “Yikala kwi kasa lyane ilya kwe ndilo mpaka njize mbike awalwani wako pansi ya matamba yako.”’ 37 E Devedi wamwisile ukuti tatakulu, nomba lyo angawa wuli amwana wakwe?”
Awantu wivwile icete pano wasambilizyanga. 38 Swinya watwalilizile ukuwasambilizya ati: “Mwacenjela kwa kasambilizya wa masundo wano wakalanga wakupitana wazwite ni vizwalo ivitali, wakalonda awantu wawalamuka pa ma maliketi, 39 swinya wakunda ukwikala pa vilimba vyakunkolelo* mu ma sinagogi na pa vilimba ivicindame pano wakulya ivyakulya vya manguzi. 40 Awano wakapoka wa mukamfwilwa amang’anda* swinya wakapepa amapepo amatali pakutivye awantu wawalole.* Wa-a waliwapingula nkaninye ukucila wanji.”
41 E Yesu wayile ayikala mupipi na kabokosi ka musangulo pakuti awalola indalama zino awantu wakusangula. Awakankala awavule wasumbilangamo amakoini amavule. 42 Nomba kwizile e mukamfwilwa wumwi umupina, wizile asumbilamovye utuma koini tuwili ututici tuno tutacindime na nkani.* 43 Acino Yesu wisile awasambi wakwe nu kuwanena ati: “Nkuminena icisinkanye nkuti, we-e mukamfwilwa tewawikamo indalama izivule ukulusya wanji wano tewakusumbila mu kabokosi ka musangulo. 44 Amuno zino wonsinye tewakusangula, tewakufumya pa vyuma vyawo, lelo weni ayikundizile ukuwikamo zyonsinye zino tekweti izyakuwomvya.”