Ukulingana ne Marko
3 Swinyanye wayile ayinjila mwi sinagogi muno wazanile umonsi wino ikasa lyakalizile.* 2 Acino Awafalisi wawisileko sana amano kwe Yesu pakuti walole nga wandi apozye weyo umonsi pa wanda wisabata pakuti wamupe umulandu. 3 Wanenile umonsi wino ikasa lyakalizile* ukuti: “Katuka nzanga pakasi.” 4 Apano Yesu wanenile Awafalisi ati: “Uzye amasundo yazumilizya ukucita icizima nanti iciwipe pa wanda wisabata, ukupususya nanti ukukoma?” Lelo wamyalilevye. 5 Pano Yesu wawalolecesizye nu wukali, wivwile uwulanda nkaninye, pa mulandu wakuti watalinji nu luse. Acino wanenile we-e umonsi ati: “Tambalika ikasa lyako.” Nawe walitambalisile alipola nu kupola. 6 Paponye Awafalisi wayile kwe wano watunjililanga Herodi mukulanzyanya pe vino walinji nu kukoma Yesu.
7 Lelo e Yesu na wasambi wakwe wafumileko nu kuya kwe sumbi, swinya awantu awavule ukufuma mu Galili na mu Yudeya wamukonsile. 8 Wamwi wafumile ku Yerusalemu, ku Idumeya nu kulamba Yordani. Ne wamwi wafumile ku Turi na ku Sidoni swinya awantu awavule wizile kwe Yesu pano wivwile ivintu vino wacitanga. 9 Acino wawuzizye awasambi wakwe ukuti wamuvwambile uwato uwutici pa kuti awantu watamutiticizya. 10 Pa mulandu wakuti wapozizye awantu awavule, wonsinye wano walinji ni ndwala imbipisye wayanga kwe weliwe pakuti wamulememo. 11 Na wano walinji ni mizimu miwipenye nga wamulola wafukamanga swinya imizimu miwipe yapundanga ukuti: “We Mwana wa kwe Leza.” 12 Lelo e Yesu wakonkomecezizye imizimu miwipe ukuti yitamulandapo ku wili wensinye.
13 Wakwezile umwamba nu kwita wamwi pa wasambi wakwe, nawo wayile kwe weliwe. 14 E Yesu wasozile* awonsi 12 wano watalisile nu kwita ukuti awatumwa. Wanye awano walinji nu kulapita nawo swinya awano walinji nu kutuma mukuwizya 15 wawapile na maka yakufumya imizimu miwipe.
16 Pe wa-a awonsi 12 wano wasozile* palinji e Simoni wino wapile izina lya kuti Petro, 17 e Jemusi nu munyina e Yohani wamwana Zebedi (wano winisile izina lya kuti Boanerge, akuli ukuti awana wano wawa ngati akuwuluma kwa mvula”), 18 E Andreya, Filipu, Bartolomeyo, Mateyo, Tomasi, e Jemusi umwana Alifeyo, e Tadeyu, e Simoni umwina Kenani* 19 ne Yuda Skarioti wino wizile akazya e Yesu.
Winjizile mu ng’anda, 20 Swinya iwumba lya wantu wamukonsile icakuti Yesu waposilwe nu kulya. 21 Lelo pano walupwa lwakwe wivwile vyo-o, wayile mukumulema amuno watinji: “Apenile.” 22 Na wakasambilizya wamasundo wano wafumile ku Yerusalemu walandanga wakuti: “Wawa ne Belizebuli* swinya akafumya imizimu miwipe ukuwomvya e kateka wa viwa.” 23 Pano wawisile, walanzile nawo ukuwomvya ivilanjililo, watili: “Uzye e Satana angafumya wuli e Satana? 24 Nga cakuti Uwufumu wapawunkana, wutange wutwalilile ukuwako; 25 ne nga cakuti ulupwa lwapawunkana lutange lutwalilile ukulemenkana. 26 Swinya nga cakuti e Satana wayikatucila nu kuyipawunkanya umweneco, atange atwalilile ukuwako. 27 Uwiliwensinye wino akulonda ukwinjila mu ng’anda ya muntu wa maka nu kwiwa iviya, azipizile ukumunyepa amakasa na manama. Apano anginjila nu kusenda vino vili mu ng’anda. 28 Nkuminena icisinka nkuti, awantu waliwatetela pe vino wakaluvyanya na pe vyonsinye vino wakaponta. 29 Lelo wensinye wino wapontela umuzimu wa kwe Leza watalimutetela, lyo wawembuka umuyayaya.” 30 Walanzile wo-o amuno awantu wamunenanga ukuti: “Wawa nu muzimu uwuwipe.”
31 E mama wakwe na wanyina wizile kuno walinji awimilila panzi, nga awatuma uwakuti amwite. 32 Pano awantu awavule wisile wamuzingulusile, wamunenile ukuti: “Lola! E mama wako na wanyonko wali panzi wakukuvwamba.” 33 Lelo wawasusile ukuti: “Uzye mwamanya e mama wane na wanyina wane?” 34 Apano aloleceya awantu wano wisile wamuzingulusile, nga landa ati: “Wa-a awali wamama wane na wanyina wane! 35 Wensinye wino akacita ukulonda kwa kwe Leza awili umunyina wane, e nkazi yane swinya e mama wane.”