Ukulingana ne Marko

15 Kwalile kwaca umutondo tondo, intunguluzi zya simapepo, wasongo, wakasambilizya wa masundo na wonsinye awa mu cilye ca Sanihedrini, wawungine ponga nu kulanzyanya, swinya wanyefile Yesu nu kumutwala kwe Pilato. 2 Nge Pilato akolowozya Yesu ati: “Uzye we Mfumu ya wa Yuda?” Ne Yesu amwasuka ati: “Wayilandila we mweneco.” 3 Nomba intunguluzi zya simapepo zyamupanga imilandu imivule, 4 nge Pilato amukolowozya ati: “Uzye usakuwasuka? Lola imilandu ukuvula yino wakukupa.” 5 Lelo e Yesu atasusile nanti cimwinye, icakuti e Pilato wazungusile nkaninye.

6 Cila mwaka nga kuli ukuzevya, e kateka wafumizyanga awantu umufungwa wenga wino aweneco wakulonda. 7 Peyilyanye impindi, kwalinji umufungwa wino witanga ukuti Baraba. Wamunyefile na wawuye pa mulandu wakuti wakatucizile uwuteko swinya walinji nu mulandu wa wucikoma. 8 Acino awantu wayile kwe Pilato nu kumulenga ukuti awacitile vino wacitanga lyonsinye. 9 Wawanenile ukuti: “Uzye mukulonda misapulile Imfumu ya wa Yuda?” 10 Amuno e Pilato wamanyile ukuti cino awantu watwalizile Yesu kwe weliwe apamulandu wa lupato. 11 Lelo intunguluzi zya simapepo zyatwalilizile ukunena awantu ukuti walenge Pilato ukuwasapulila Baraba. 12 Nge Pilato awanena swinyanye ukuti: “Nga mukulonda ncite cani kwe we-e umuntu wino mukati Amfumu ya wa Yuda?” 13 Nga wantu awapunda na swinya ukuti: “Mupamantilani pa cimuti!” 14 Nge Pilato awasuka ukuti, “Amulandu ci? Nenani iciwipe cino acisile.” Lelo awantu watwalilizile ukupunda wakuti: “Mupamantilani pa cimuti!” 15 Pa mulandu wakuti e Pilato walondanga ukusecelesya awantu, wawasapulizile e Baraba; lelo wawanenile ukuti wume Yesu ivikoti nu kumupamantila pa cimuti.

16 Nga wasilika awasenda Yesu nu kumutwala mu luwanza lwa ng’anda ya kwe kateka na wasilika wonsinye awamuzinguluka. 17 Wamuzwisile icizwalo iciwenzu, awapanga ni cisote ca myunga awamuzwika. 18 Watalisile nu kumutumfya wakuti: “Uli wuli* we Mfumu ya wa Yuda!” 19 Wamumanga ni tete mu mutwe nu kumuswilila amati, awamukontamila* na pansi. 20 Walile waleka ukumutumfya, wamuzuzile icizwalo iciwenzu cino wamuzwisile, awamuzwika ivizwalo vyakwe ivyakulonde, awamusenda awaya na mukumupamantila pa cimuti. 21 Pano wafumanga mu musumba, wazanile umonsi uwi zina lyakuti Simoni umwina Kureni e baba wa kwe Alekizanda ne Rufasi. Wamupaticizizye ukunyamula icimuti icakupamantililapo* Yesu.

22 Wamulesile pa cifulo cino wakakwita ukuti Golgota, cino cikapiliwula ukuti “Ipanga.” 23 Swinya wamupile e waini yino wasanzizyemo ne muri, lelo wakanile ukumwa. 24 Wamupamantizile pa cimuti, awasenda ni vizwalo vya kulonde, awapenduzya pakuti wamanye vino cila muntu walinji nu kusenda. 25 Pano cafisile ku ma 9 umutondo tondo,* wapamantizile Yesu pa cimuti. 26 Swinya pa cipampa walemvilepo umulandu wuno wamupamantilizile, watili: “Imfumu ya wa Yuda.” 27 Wapamantizile ni vipondo viwili pa vimiti, conga calinji kwi kasa lyakwe ilya kwe ndilo, ne cinji kwi kasa lya kwe kamani. 28* —— 29 Wano wapitanga wamupontelanga nu kupunzya imitwe wakuti: “Watinji ungamongola itempile nu kulizenga mu manda yatatu, 30 yika pa cimuti* uyipususye tulole.” 31 Wakasambilizya wa masundo na wasongo nawonye watalisile ukumutumfya wakuti: “Wapususyanga wanji, lelo weni wapotwa ukuyipususya. 32 Nge Klistu Imfumu ya wina Israeli, kayike pa cimuti* pakuti tumusuwile.” Wano wapamantizilwe ponga nawe, nawonye wamupontelanga.

33 Pano cafikanga ku ma 12 ya musanya,* munsi monsinye mwalinji imfinzi ukufika ku ma 15.* 34 Swinya ku ma 15 nye, e Yesu wapunzile ukuti: “Eʹli, Eʹli, lama sabakitani?” cino cikapiliwula ukuti: “Leza wane Leza wane, acani cino wandecelezya?” 35 Wano walinji mupipi walile wivwa wo-o, watili: “mwivwe, akupunda Eliya.” 36 Paponye umonsi wumwi wasamazile aya senda pamba atumpika mwe waini iyikantuke, awika kwi tete, nga apa Yesu ukuti amwe, watili: “Mulekani tulole e Eliya nga wandi ayize amupususye.” 37 Lelo e Yesu wizile apunda nkaninye, afwa nu kufwa. 38 Ni ketani lino lyalinji mwi tempile lyalepusile pakasi ukufuma papela mpaka pansi. 39 Nomba e songo wa wasoja wino waweniko pano vyonsinyene vyo-o vikucitika, walanzile ukuti: “Mwelimonye we-e walinji Amwana wa kwe Leza.”

40 Swinya kwalinji awanaci wano walolanga akatalamucila pano vyo-o vikucitika. Pe wa-a palinji, e Mariya umwina Magadala e Mariya e mama wa kwe Jemusi ne Jose apano ne Salome, 41 wano wakonkanga Yesu pakuti wamwavwa imilimo pano walinji mu Galili na wanaci awavule wano wafumile ku Yerusalemu.

42 Pano cafisile amanguzi, pa mulandu wakuti walinji awanda wakupekanya Isabata, 43 kwizile e Jozefu umwina Arimatiya wino walinji we songo mu cilye cikulu ica wa Yuda, nawe walindililanga Uwufumu wa kwe Leza. Wasifile aya kwe Pilato nu kumulenga ukuti amupe icitumbi ca kwe Yesu. 44 Lelo e Pilato wavwilikanga nga cakuti e Yesu afwile. Acino wisile e songo wa wasilika amukolowozya nga cakuti e Yesu afwile. 45 Pa nsizi yakukolowozya e songo wa wasilika, e Pilato wazumilizizye e Jozefu ukusenda icitumbi ca kwe Yesu. 46 Wakazile umwenda uwuzima, nga sawula Yesu, amupombamo, amuwika na munkungwe nga kunkulusizyapo ni ciliwe. 47 Lelo e Mariya umwina Magadala ne Mariya mama wa kwe Jozefu ne Jose, wasyazile wakulolecesya inkungwe pano wamuzisile.