Ukulingana ne Mateyo
16 Ko-o ku ma Gadani Awafalisi na Wasaduki wayile kwe Yesu ukuti wamwelezye, wamunenile ukuti awalanjizye icimanyilo ukufuma kwi yulu. 2 Lelo e Yesu wa wasusile ukuti: “Nga cafika amanguzi, mukati mutondo kulica icete amuno mupeela muwenzile,’ 3 ne umutontondo tondo nga mwalola vye vyo amawingo yafisile mupela, mukati, ilelo kusakuca icete, kukuwa imvula. Mukamanya vino kwandi kuce nga mwalola mupeela, nomba vino vikucitika pe yo-o impindi mukapotwa ukwiluka muno vikusula. 4 Mwe wantu awawipe mwee! Mwe wano musikwivwila Leza. Lyonsinye mukalonda vye ukulola icimanyilo, lelo nkuminena nkuti, mutalitela mulole icimanyilo ukucila pa ca kwe Yona, e kasesema.” Paponye Yesu afumapo nu kuwasya.
5 Walile awasambi walamba sumbi, awiwilila ukusenda umukate. 6 Yesu awanena ati: “Cenjelani kwe yisiti* ya wa Wafalisi na Wasaduki.” 7 Awasambi awatalika ukuti: “Pamwi cino Yesu walandila wo-o, amikate yino twiwilizile ukusenda. 8 Walile Yesu wivwa kuno wakulanzyanya, awanena ukuti: “Mukulandila cani pa mikate, mwe wisuwilo litici! 9 Uzye mutilusile cino nkulandapo? Uzye musakwizuka pa mikate 5 yino awonsi 5,000 walile, awasya na yimwi amulonga na mu vise?* 10 Nanti pe yoyo imikate 7 yino awonsi 4,000 walile, ni vise ivikulu vino mwalonganisile pe yino yasyazile? 11 Acani cino mutilucizile ukuti nsakulanda pa mikate? Lelo ntili mucenjele kwe yisiti ya Wafalisi na Wasaduki.” 12 Apano awasambi awiluka ukuti cino Yesu akulandapo ase yisiti yakupanjila umukate, lelo ape vino Awafalisi na Wasaduki wasambilizyanga.
13 Pano Yesu winjizile mu citungu ca Kaisariya—Filipi, wakolowozizye awasambi wakwe ukuti: “Uzye awantu wakati umwana wa muntu weweni?” 14 Nawo wamwasusile ukuti: “Wamwi wakati we Yohani Kabadizya. Wanji wakati we Eliya, ne wanji wakati we Yeremiya nanti wumwi pe wakasesema.” 15 Ne nawe awakolowozya ukuti: “Nga mwemwe mukati neweni?” 16 Simoni Petro ayasuka ukuti: “We Klistu umwana wa kwe Leza, wino wawako umuyayaya.” 17 Nga Yesu amunena ati: “We walongo, Simoni mwana wa kwe Yona, amuno asa muntu wino wakusokololezile co-o, lelo a Mukwasi wane uwa mwi yulu. 18 Swinya nkukunena nkuti: Wewe we Petro. Ndizenga iwungwe lyane pa ciliwe ni visakati vya ku nkungwe vitaliwa na maka yakulicimvya. 19 Ndikupa amakii ya Wufumu wa mwi yulu. Consinye cino wamanga munsi, lyo na mwi yulunye wacimanzile kaali, na consinye cino wiyula munsi, lyo na mwi yulunye waciyuzile kaali.” 20 Nga akonkomecezya awasambi wakwe ukuti watize wanene uwili wensinye ukuti we Klistu.
21 Ukufuma pa mpindi yilyanye, e Yesu watalisile ukulondololela awasambi wakwe ukuti, azipizile ukuya ku Yerusalemu swinya wasongo, intunguluzi zya simapepo na wakalemba walimucuzya nkaninye nu kumukoma. Ne pa wanda waciti tatu, e Leza ayize amuzyulupule. 22 Apano Petro asenda Yesu ku mbali atalika ukumukalipila ukuti: “Tatakulu! Nga cani cino ungalandila wo-o? Vyonsinye vyo-o vitalitela vikuciticile.” 23 Nga Yesu apiliwuka nu kunena Petro ati: “Pelela paponye, Satana! Ukundesya ukucita ukulonda kwa kwe Leza, amuno vino ukwelenganya asa vya kwe Leza, lelo avya wantu.”
24 Nga pano Yesu anena awasambi wakwe ati: “Wensinye wino akulonda ukuwa amusambi wane, azipizile ukuyikana nukusenda icimuti cakwe ica kumucuzizyapo apano awankonka. 25 Wensinye wino akalonda ukupususya uwumi wakwe aliwusovya, na wensinye wino wafwa pa mulandu wane, alizyulupuka. 26 Awuzima ci wuno umuntu angazanamo nga wawa na vyonsinye ivya mwe yo-o insi, lelo wasovya uwumi wakwe? Nanti acani cino umuntu angalipila pa kuti awe nu wumi? 27 Amuno Umwana wa muntu aliyiza nu wucindami* wa kwe Yisi ponga na wangeli wakwe, swinya alilambula cila muntu ukulingana na vino wacitanga. 28 Nkuminena icisinka nkuti, kuli wamwi pe mwemwe wano watalifwa mpaka wize waloleko kuno Umwana wa muntu akwiza mu Wufumu wakwe.”