Ukulingana ne Mateyo
25 “Swinya, Uwufumu wa mwi yulu tungawukolanya kwa mwali 10 wano wasenzile amalampi yawo ukuya mu kusunkanya siwinga. 2 Awali 5 watalinji na mano, lelo awali 5 weni walinji na mano. 3 Wano watalinji na mano wasenzile amalampi yawo nukupita, lelo watasenzile amafuta ya pa mbali, 4 lelo awa mano weni wapayile amafuta mu vya kuwikamo amafuta, awasenda na malampi yawo. 5 Pano siwinga wazimvile ukwiza, wonsinye wivwile utulo awalala nu kulala. 6 Nomba uwusiku pakasi, wivwile wumwi wapunda wati: ‘Siwinga wiza! Yanji mukumusunkanya.’ 7 Wa-a wamwali wakatusile paponye nu kusenda amalampi yawo. 8 Nga wamwali wano watalinji na mano awanena wa mwali wa mano ukuti, ‘Tukulengako amafuta, amuno amalampi yitu yandi yazime.’ 9 Wa mwali wa mano wasusile awati: ‘Nasweswenye tutakweti amafuta amavule yano yangatukumana swensinye. Acino yanjivye mukakale kwe wano wakakazya.’ 10 Pano wacili wakuya mukukala amafuta, e siwinga wafisile. Wa mwali wano wayipekinye winjizile nawe mu ng’anda ya winga, ni cisakati aciyalwa. 11 Pansizi, wamwali wanji 5 nawo wafisile, awatalika ukupunda wakuti, ‘Tatakulu, Tatakulu, twiyulileko icisakati!’ 12 Ne nawe wawasusile ukuti, ‘Nkuminena icisinka nkuti, ntamimanyile.’
13 “Acino twalililani ukulola amuno mutamanya uwanda nanti ampindi.
14 Uwufumu wa mwi yulu, tungawukolanya na ku monsi wino walondanga ukuya ku nsi yinji. Nomba pano atani apite, wasizile awawomvi wakwe ukusakamala ivyuuma vyakwe. 15 Uwakutalicilapo, wamupile amatalanti 5, uwa citi wili wamupile yawili, ne uwakulecelezya wamupile lyonga. Wonsinyene wa-a wawapile ukulingana na vino cila muntu angakumanisya, apano apita. 16 Paponye, wino wapile amatalanti 5, watalisile umulimo wakukazya swinya wizile azanilapo amatalanti na yanji 5. 17 Nu muwomvi wa citi wili wino wapile amatalanti yawili, wazanizilepo na yanji yawili. 18 Lelo umuzya wino wapocelezile italanti lyonga wafumilepo, aya azicila indalama zye yisikulu mu musili.
19 “Palile pazimba, e yisukulu wa kwe wawo awazya wanyosile, mukulola vino wawomvile ni ndalama zyakwe. 20 Acino wino wapile amatalanti 5, wizile nukuleta amatalanti na yanji 5, nga alanda ukuti, ‘Tatakulu wansizile amatalanti 5; nomba, lola! nzanizilepo na yanji 5.’ 21 Nga yisikulu amunena ati: ‘Uwombesizye nkaninye, we muwomvi wacisinka swinya umusuwilwe. Pa mulandu wakuti walinji we wacisinka mu tuntu ututici, nandi nkusonte ukuti uwe we songo pa vintu ivivule. Injila muwasecelela ponga ne sokulu. 22 Wino wapile amatalanti yawili, wizile nukulanda ukuti, ‘Tatakulu wansizile amatalanti yawili; nomba, lola! nzanizilepo na yanji yawili.’ 23 Yisikulu amunena ati: ‘Uwombesizye nkaninye, we muwomvi wacisinka swinya umusuwilwe. Pa mulandu wakuti walinji we wacisinka mu tuntu ututici, nandi nkusonte ukuwa we songo pa vintu ivivule. Injila muwasecelela ponga ne sokulu.’
24 “Mukulecelezya, wino wapile italanti lyonga wizile nukulanda ukuti: ‘Tatakulu namanya ukuti wewe wasyupa, ukasombola ivyakulya vino utalimile swinya ukalonganika vino utezile. 25 Acino pa mulandu wa ntete, nasenzile lyo-o italanti nu kuyazika mu musili. Italanti lyako lyo-o nanyosya’ 26 Nga yisikulu amunena ukuti: “We muzya muwipe swinya umukata, wamanyile ukuti nkasombola vino ntalimile nu kulonga ingano zino ntela, 27 nomba acani cino utawicizile indalama zyane mu banki pakuti pano nkunyoka nzane wawicizilepo na kapapela?
28 “‘Acino mupokani italanti lino namusizile mupe wino akweti amatalanti 10. 29 Amuno wensinye wino wakwata, walimulundilapo na vinji ivivule, na wensinye wino atakwata, walimupoka na tuno wawa natonye. 30 Acino sumbilani co-o iciwelewele ca muzya palonde mu mfinzi. Palyanye apano wandi alila nu kulumanya amino.’
31 “Pano Umwana wa muntu aliyiza na maka amakulu, ponga na wangeli wonsinye, aliyikala pa cilimba cakwe ica Wufumu icicindame. 32 Na wantu wonsinyene awa mu nsi, walilonganikwa pa nkolelo yakwe, swinya alipawunkanya awantu mu mawumba yawili, wulyanye vino e kacema akapawunkanya ing’onzi ku mbuzi. 33 Swinya aliwika ing’onzi kwi kasa lyakwe ilya kwe ndilo, ne imbuzi kwe kamani.
34 “Nga pano Imfumu yilinena wano waliwa kwi kasa lya kwe ndilo ukuti: ‘Ndanji mwensinye mwe wano Tata wapaala, yinjilani mu Wufumu wuno wamipekanizizya ukufumilila pakutalika kwa nsi.* 35 Amuno pano inzala yandumile, mwampile ivyakulya, pano nivwile ulusala, mwampile aminzi yakumwa. Mutamanyile, swinya ntalinji nu kwakwikala, lelo mwampocelezile mu ng’anda mu mwinu; 36 pano ntalinji ni vizwalo, mwampile ivizwalo. Pano nalwile, mwansakamile, pano nalinji mu cifungo, mwizile mukumpempula.’ 37 Nga awalungamane walimuwuzya ukuti: ‘Tatakulu akwinye kuno twakuweni uli ni nzala, atukupa ivyakulya, nanti uli nu lusala atukupa minzi ya kumwa? 38 Ampindi ci pano twakuweni we mweni, atukupocelela icete, nanti pano utalinji ni vizwalo atukupa ivizwalo? 39 Ampindi ci pano twakuweni we mulwale nanti uli mucifungo, apano atwiza mukukupempula?’ 40 Ni Mfumu yiliwasuka ukuti, ‘Nkuminena icisinka nkuti, ‘Vyonsinye vino mwacisile kukwavwa wenga pa wanyina wane awacepesye, lyo mwacitizile nene.’
41 “Apano Imfumu yilinena wano waliwa kwe kamani ukuti: ‘Fumani pa-a mwe wano Leza watipa, yanji mu mulilo wuno wapekanizizya Satana na wangeli wakwe. 42 Amuno pano inzala yandumile, mutampile ivyakulya, swinya pano nivwile ulusala, mutampile aminzi yakumwa. 43 Nalinji ne mweni, mutampocelezile mu ng’anda zinu, ntakweti ivizwalo, lelo mutampile ivizwalo. Pano nalwile na pano nalinji mu cifungo, mutanjavwizye.’ 44 Apano nawo walimwasuka ukuti: ‘Tatakulu ampindi ci pano twaweni uli ni nzala, nanti uli nu lusala, nanti we mweni, nanti usi ni vizwalo, nanti we mulwale, nanti uli mu cifungo atukana ukukwavwa?’ 45 Apano Imfumu yiliwasuka ati: ‘Nkuminena icisinka nkuti, pa mulandu wakuti mwakanile ukwavwa wenga pe wa-a awanyina wane awacepesye, lyo mwakanile ukwavwa nene.’ 46 Wa-a wano waliwa kwe kamani, waliwonona umuyayaya, lelo awalungamane walipocelela uwumi wa muyayaya.”