Ukulingana ne Mateyo

19 Walile e Yesu wamala ukulanda vyo-o ivintu, wafumile mu Galili nu kuya mu mupaka wa Yudeya ku mbalama ya luzi lwa Yordani. 2 Awantu awavule wamukonsile, ne nawe wayile apozya wonsinye wano walwile.

3 Awafalisi wayile kwe Yesu ukuti wamwelezye, acino wamuwuzizye ukuti: “Uzye umonsi angaleka umuci pa mulandu uwuli wonsinye?” 4 Ne Yesu awasuka ukuti: “Uzye mutawazya ukuti pakutalika e Leza wapanzile umonsi nu mwanaci 5 swinya watili: ‘Awuli umulandu wuno umonsi alisila awakwasi wakwe nu kutwalilila ukuwa ponga* nu muci, swinya wa-a wawili waliwa umuwili wonga’? 6 Acino wasi wawili, lelo wali umuwili wonga. Fwandi cino Leza wawika ponga,* umuntu atacipawunkanya.” 7 Nawo awamuwuzya awati: “Nomba amulandu ci wuno e Mozesi wapezile isundo lyakuti umonsi azipizile ukulembela umuci e kalata yakumulecelapo?” 8 Ne Yesu awasuka ati: “Wacisile wo-o pa mulandu wakuti avino mweweneco mwalondanga ukuti mwayicitila vyo mukulonda. Nomba wo-o asa vino calinji pano Leza wapanzile umonsi nu mwanaci wakutalicilapo. 9 Pe wo-o umulandu, nkuminena nkuti, wensinye wino waleka umuci pano pasi umulandu wa wucende,* watwala na winji, lyo wacita uwucende.”

10 Awasambi awamunena awati: “Fwandi nga avino ukutwala kwawa, lyo cazipa vye ukwikala ukwasowa ukutwala.” 11 Yesu awasuka ati: “Ase wonsi wano wangakumanisya ukwikala ukwasowa ukutwala, suka vye wano Leza wapa coco icawila. 12 Awonsi wamwi wasitwala pa mulandu wakuti avino wakwasilwe. Ne wamwi wa wafumya ivilundwa vimwi* pakuti watatwala. Ne wanji wasolapo ukukanatwala pa mulandu wa Wufumu wamwi yulu. Wino angakumanisya ukwikala uwusimbe, ayikale wowonye.”

13 Awantu watalisile ukuleta awana kwe Yesu pa kuti awapaale nu kuwapepelako, lelo awasambi wa wakalipizile. 14 Nomba e Yesu wa wanenile ukuti: “Lekani awana wize kwe nene, mutawalesya. Amuno Uwufumu wa mwi yulu awa wantu wano wawa ngati awanye awana.” 15 Avino wawapazile afumako nu kufuma.

16 Umuntu wumwi wayile kwe Yesu nu kumunena ati: “Musambilizya, avizima ci vino nzipizile ukucita pakuti njize mbe nu wumi wamuyayaya?” 17 Nga Yesu amwasuka ati: “Acani cino wankolowozezya pa vizima? E Leza mutupunye, awili umuzima. Lelo nga ukulonda uyize uwe nu wumi wamuyayaya uwakonka amasundo ya kwe Leza lyonsinye.” 18 Ne umonsi alanda ati: “Amasundo ci yayonyene?” Yesu amunena ati: “Utakoma, utacita uwucende, utakwiwa, utawa wekamboni wa wufi, 19 uwacindika e Baba wako ne mama wako,* swinya uwatemwa umuwuyo ndi vino wayitemwa.” 20 Umulumendo amunena ukuti: “Vyonsinyene vyo-o nkakonka. Acani cinji cino nzipizile ukucita?” 21 Yesu ati: “Nga ukulonda ukukumanisya vyonsinye,* pitanga kakazye vyonsinye vino wawa na vyo, upe indalama awapina. Nga wacita wo-o uliwa ni cuma icikulu mwi yulu. Uyize uwankonka.” 22 Walile umulumendo wivwa ya-a amazwi, wafumile penepo lyo ali nu wulanda nkaninye, amuno wakweti ivyuma ivivule. 23 Yesu anena awasambi wakwe ati: “Nkuwanena nkuti, cilisyupa ku wa vyuma ukwinjila mu Wufumu uwa mwi yulu. 24 Swinya nkunyocezyapo nkuti, capepukapo ku ngamila ukupulunkana pi linso lya nsindano, ukucila uwa vyuma ukwinjila mu Wufumu wa kwe Leza.”

25 Walile awasambi wivwa ya-a amazwi, awazunguka nkaninye, awati: “Lyo weweni wino angapusuka?” 26 Walile Yesu wawalolecesya, wawanenile ukuti: “Ku wantu asa cipepuke, lelo e Leza weni angacita vyonsinye.”

27 Nga apano Petro alanda ukuti: “Lola! Twasya vyonsinye pakuti tuwakukonka, lyo sweswe tuliwa na vyani?” 28 Yesu anena awasambi wakwe ukuti: “Nkuwanena nkuti, pano ivintu viliwa avipya,* swinya Umwana wa muntu wikala na pa cilimba cakwe icicindame, na mwemwenye mwe wano mukankonka, muliyikala pa vilimba 12 muwapingula imyiko 12 iya wina Israeli. 29 Swinya wensinye wino wasya ing’anda, nanti umuzuna wakwe, nanti umukulu wakwe,* nanti inkazi zyakwe, nanti e yisi, nanti e mama wakwe, nanti awana, nanti avyalo vyakwe pa mulandu wane, alipocelela ivivule ukucila na pe vino wasya, nu wumi wamuyayaya.

30 Lelo awavule wano wali kunkolelo waliwa ku nsizi, ne wano wali ku nsizi waliwa kunkolelo.