Ukulingana ne Luka
7 Walile Yesu wamala ukulanda vyonsinye vyo-o ku wantu, wayile ku Kapernahumu. 2 Nomba kwalinji e songo wa wasoja wumwi, wino walinji nu muwomvi wakwe umulwale swinya walinji mukufwa, wamukunzile nkaninye. 3 Walile wivwa vino wamwi walanzile pe Yesu, watumile wasongo wa wa Yuda ukuti wakamwite pakuti ayize apozye umuwomvi wakwe. 4 Pano wayile kwe Yesu wamulambilizizye awati: “Twazina tuye umwavwe, 5 amuno amuntu umuzima nkaninye, watukunda swe wa Yuda swinya awino watuzenjela ni sinagogi.” 6 Acino Yesu wayile nawo. Lelo pano kwasyazilevye katici ukuti wafike pa ng’anda, e songo wa wasoja watumile iviwuza vyakwe mukunena Yesu ukuti: “Musambilizya utasakamala, nga neweni uwakuti uyize uyinjile na mu ng’anda yane. 7 Awuli umulandu wuno tenapotwa nu kwiza kwe wewe, amuno manyile ukuti ntacindama. Landavye izwi, umuwomvi wane wandi apole. 8 Amuno naninye nawa na wano wakantungulula, nani nawa na wasoja wano nkatungulula, nga nanena wumwi nati ‘Yanga koko!’ Nawe akaya, ne winji imunena inti ‘Nzanga!’ ayiza swinya nga nanena umuwomvi wane nati ‘Womba co-o!’ akawomba.” 9 Walile Yesu wivwa ya-a amazwi wazungusile nkaninye, swinya wapiliwusile anena awantu awavule wano wamukonsile ati: “Nsitela ndolepo umuntu wino wawa ni suwilo ilikulu ndi vino lyo-o mu Israeli.” 10 Pano wano e songo wa wasoja watumile wanyosile ku ng’anda, wazanile umuwomvi apozile.
11 Uwanda wuno wakonsilepo Yesu wayile mu musumba wuno wakakwita ukuti Naini, swinya walinji na wasambi wakwe na wantu awavule wano wamukonsile. 12 Pano walinji mupipi nu kufika pe geti ya musumba, waweni awantu wanyamuzile icitumbi ca mwana wenganye umonsi wino mukamfwilwa wakweti. Swinya ni wumba itici ilya wantu wa mu musumba walinji ponga na we-e umwanaci. 13 Pano Yesu waweni we-e umwanaci, wamwivwizile uluse, wamunenile ati: “Myalala, leka ukulila.” 14 Acino Yesu wayile lema kwe cino wamunyamulizilepo, na wano wanyamuzile wimilile. Apano alanda ati: “Mulumendo, nkukunena nkuti katuka!” 15 Nawe paponye wakatusile atalika nu kulanda, nga Yesu amutwala kwe mama wakwe. 16 Awantu wivwile nkaninye intete, acino watalisile ukulumbanya Leza, wakuti: “E Leza watukatusizya kasesema mukulu,” swinya “Wizuka awantu wakwe.” 17 Ilyasi pe weliwe, lyasalangine mu Yudeya monsinye na mu twaya tonsinye tuno twalinji mu mbali.
18 Na wasambi wa kwe Yohani wayile awamunena vyonsinye vino vyacitisile. 19 Acino e Yohani watumile awasambi wakwe wawili ukuti wakakolowozye Tatakulu ukuti: “Uzye we Mesiya wino tukalindilila ukuti aliyiza nanti kuli winji?” 20 Pano wayile kwe Yesu wamunenile ukuti: “E Yohani kabadizya watutuma ukukolowozya ukuti, ‘Uzye awemuno walanzilwepo ukuti uliyiza nanti kuli winji?’” 21 Pe yilyanyene impindi wapozizye awalwale awavule na wano walinji ni mizimu miwipe, wapozizye na wano watalolanga awatalika ukulola. 22 Acino wawanenile ukuti: “Yanji kwe Yohani mukamunene vyonsinye vino mwivile nu kulola: Intonko zikulola, awalemale wakupita, awa mambombo wakupola, wa kutwi wakwivwa, awafwe wakuzyulupuka na wapina wakwivwa ilyasi lizima. 23 Awansansa wino akansuwila ukwasowa ukuvwilika.”
24 Pano awasambi wa kwe Yohani wapisile, e Yesu wasyazile akunena awantu pe Yohani ukuti: “Uzye acani cino mwayile mukulola mu mpanga? Uzye alitete lino lyayingananga ku muza? 25 Avyani fwandi vino mwayile mukulola? Uzye amuntu wino akazwala ivizwalo vyamutengo?* Awe, amuno awantu wano wakazwala ivizwalo vyamutengo nu kwikala icete, wakakwikala mu mang’anda ya zya mfumu. 26 Lyo weweni wino mwayile mukulola? Uzye we kasesema? Nkuminena nkuti wino mwayile mukulola walusya na pe kasesema. 27 Wenye we-e awino amawaliko yalandapo ukuti: ‘Nkutuma umuntu uwakukukolelela, wino alikupekanizizya inzila.’ 28 Nkuminena icisinka nkuti, pe wonsinye wano wakwatwa ku wanaci pasi nanti wenganye wino wacindama ukulusya Yohani kabadizya, lelo wino wawa ni cifulo icitici mu Wufumu wa kwe Leza wamulusya.” 29 (Walile awantu wonsinye wano walinjipo na wakasoncezya wa misonko wivwa pe vyo-o, walanzile ukuti vyonsinye vino Leza akacita avizima, amuno wabadizizwe ulubadizyo lwa kwe Yohani. 30 Lelo Awafalisi na wano wamanyicisizye Amasundo wakanile ukukonka ukusunda kwa kwe Leza amuno watabadizizwe kwe Yohani.)
31 E Yesu walanzile ukuti “Weweni wino ningakolanyako wa-a wantu wa pe yo-o impindi, uzye wakolana naweni? 32 Wawa ngati awana wano wisile pa maliketi wakupundilila awawuye wakuti: ‘Tetwamilizizya indwimbo, musakucina; tetwalosya, lelo mutalilizile ponga nasweswe.’ 33 Wonye avino cawa na kwe Yohani Kabadizya, wiza, nomba asilya nanti akumwa waini, lelo mukati: ‘Wawa nu muzimu uwuwipe.’ 34 Umwana wa muntu weni akalya nu kumwa, lelo mukati: ‘Mulole! Wamilicisya swinya we cakolwa, akakwizya na wakasoncezya wa misonko na wawembu!’ 35 Lelo umuntu akalanjizya ukuti wawa na mano mwe vino akacita.”
36 Nomba wumwi pa Wafalisi walambilizizye Yesu ukuti walye nawe. Acino winjizile mu ng’anda ya kwe we-e Umufalisi nu kwikala pi tebulo awatalika ukulya. 37 Mu musumba mwalinji umwanaci wumwi wino walinji amuwembu, lelo pano wivwile ukuti e Yesu ali mu ng’anda ya mu Falisi akulya, wayile ni wotolo lya mafuta amanuncile. 38 Aya afukama ku matamba ya kwe Yesu atalika ukulila, ni vilamba vyaponelanga pa matamba, nga apano atalika ukumupuputa ukuwomvya inyele zyakwe. Nga amufyompa ku matamba nu kumwitilako amafuta amanuncile. 39 Pano Umufalisi wino wisile Yesu waweni vyo-o, watalisile ukwelenganya ukuti: “Nga cakuti acisinkanye we-e umuntu we kasesema, nge manyile ukuti we-e umwanaci wino akumulema amuwembu.” 40 Ne Yesu wamunenile ati: “Simoni pali vyo nkulonda nkunene.” Ne mwasuka ati, “Musambilizya landa!”
41 “Kwalinji awonsi wawili wano wakongozile indalama ku muntu wumwi; wenga wakongozile ama denali* 500, ne winji 50. 42 Nomba pano waposilwe ukunyosya, wino wawakongolesizye, wasuzilekovye. Uzye ukwelenganya ukuti weweni pe wa-a wino angamukundisya?” 43 E Simoni wasusile ati: “Nkulola ngati aweyo wino wakweti inkongole imvule.” Ne wamunenile ati: “Acisinka cino wasuka.” 44 Acino wapiliwucizile ku mwanaci nga anena Simoni ati: “Wamulola we-e umwanaci? Njinjizile mu ng’anda yako; lelo untampile nanti aminzi ayakuti mpizye amatamba yane. Lelo we-e umwanaci wapizya amatamba yane ukuwomvya ivilamba vyakwe swinya wayapuputa ukuwomvya inyele zyakwe. 45 Ukufuma pano njizizile mo-o utatezile umfyompe, lelo we-e umwanaci atatezile aleke ukufyompa amatamba yane. 46 Utanjitizilepo amafuta ku mutwe, lelo we-e umwanaci ayitizile amafuta amanuncile ku matamba yane. 47 Nkuminena nkuti, nanti acakuti we-e umwanaci wacita imembu imvule atetezilwe, amuno alanjizizye ulukundo. Acino nkukunena nkuti, nanti acakuti we-e umwanaci wacita imembu imvule,* imembu zyakwe zitetezilwe, awuli umulandu wuno akundizile nkaninye. Lelo wino watetela imembu zitici, akalanjizya ulukundo lutici.” 48 Acino Yesu wanenile we-e umwanaci ati: “Imembu zyako zyatetelwa.” 49 Nga wantu wanji wano walyanga nawo awatalika ukulanda ukuti: “Nga wenye we-e umuntu weweni uwakuti atetela ni membu?” 50 Lelo Yesu wanenile we-e umwanaci ati: “Isuwilo lyako lyakupususya; upite umutende.”