Ukulingana ne Marko

13 Pano wafumanga pi tempile,* umusambi wumwi wamunenile ati: “Musambilizya lola ivikulwa ukuzipa na mawe yano wazenjezile!” 2 Lelo e Yesu wamunenile ukuti: “Wavilola ivikulwa vyonsinye vyo-o? Kusi iliwe nanti limwinye lino lilisyala paliwuye, yonsinye yalisumbwa pansi.”

3 Pano Yesu wisile pa Mwamba wa Miolife lyo lozizye kuno kwawezile itempile, e Petro, Jemusi, Yohani ne Andreya wayile awamukolowozya kumbali awati: 4 “Tunene ampindi ci pano vyonsinyene vyo-o vilicitika swinya avyani vino tulimanyilako ukuti ivintu vyonsinye vyo-o vili ku nsilo?” 5 Nawe Yesu watalisile ukuwalondololela ati: “Mwacenjela pakuti umuntu nanti wumwi atiza amiwipe. 6 Awavule waliyiza nu kuwomvya izina lyane waliwalanda ati, ‘anene,’ swinya walisovya awavule. 7 Muliwa mwakwivwa inkondo mupipi nu kutali, lelo mutize mwatina amuno vyonsinyene vyo-o vifwile ukucitika pano insilo yitani yize.

8 Amuno uluko lulikatucila uluko luwuye nu Wufumu wulikatucila Uwufumu wuwuye; kuliwa imvinzumanzi mu ncende impusane mpusane; swinya kuliwa ni vipowe. Vyonsinye vyo-o viliwa antalicilo yakucula kuno kuliwa ngati awulumila wapakupapa.

9 Lelo mwemwe mwacenjela. Awantu walimitwala kumakoti swinya walimyuma mu ma sinagogi* walimitwala kwa kateka na ku zya mfumu pa mulandu wane, swinya yo-o iliwa ampindi iyakuti mwize muwanene pe vino mwazumilamo. 10 Lelo walitacila ukuwizya ilyasi lizima mu nko zyonsinye pano insilo itani yize. 11 Pano waliwa mitwala ku wamawuteko mutize mwasakamala pe vino mulilanda; amuno Leza aliminena ivyakulanda pe yilyanye impindi. Asamwewano muliwa mwalanda, lelo amuzimu wa kwe Leza. 12 Swinya umunyina alikomesya umunyina, e yisi alikomesya umwana wakwe ne awana walipilucila awakwasi wawo nu kuwakomesya. 13 Awantu wonsinye walimipata pa mulandu ni zina lyane lelo wino alisipicizya ukufika na kunsilo awino alipusuka.

14 “Lelo nga mwiza mwalola icintu iciwipisye cino cikaleta uwononi cimilile pano citazipizile ukuwa (wino akuwazya ayiluke), wano waliwa mu Yudeya wize watalike ukusamalila ku myamba. 15 Umuntu wino aliwa pa musonje atize ayike nanti ukuya mukusenda icili consinye mu ng’anda; 16 nu muntu wino aliwa mu calo atize anyocele mukusenda icizwalo cakwe icakulonde. 17 Acawulanda ku wanaci wano waliwa na mafumo na wano waliwakonsya awana mwe yayo amanda! 18 Mwapepa ukuti vyo-o vitize vicitike mu mpindi ya mpepo; 19 mwe yayo amanda kuliwa uwucuzi wuno wusitela wuweko ukufumilila pano Leza wapanjizile insi ukufika na pe yo-o impindi swinya wutalitela wuweko naswinya. 20 E Yehova* nga tafupizizye ya-a amanda pasi wino angapusuka. Lelo pa mulandu wa wantu wano wasola, wayafupizya.

21 “Naswinya uwili wensinye nga wiza waminena ukuti, ‘Lolani e Klistu ali ko-o,’ nanti ‘Alikoko,’ mutize musuwile. 22 Amuno kulikatuka wa Klistu na wakasesema wa wufi swinya waliwacita ivimanyilo ni vizungusyo pakuti wasovye awantu wano Leza wasola. 23 Acino mwemwe mwacenjela amuno namisocela lyankani pe vyo-o ivintu.

24 “Lelo mwe yayo amanda, uwucuzi nga wasilavye umusanya wulifita, umwezi wulileka ukuwala, 25 intanda zilipona ukufuma mwi yulu, ni vintu vya maka ivya mwi yulu viliyingana. 26 Apano awantu walilola Umwana wa muntu akwika mu mawingo lyo ali na maka nu wucindami. 27 Swinya e Yesu alituma awangeli mukulonganika awasolwe wakwe ukufuma mu makona 4 aya nsi ukufuma ku nsilo yansi ukuyafika ku nsilo yi yulu.

28 “Sambililani ku cilanjililo ca mukunyu: nga mwalola amafwa yalemba ku nsamba, mukamanya ukuti icisiku capalamila. 29 Avino na mwemwenye nga mwiza mwalola vyo-o ivintu vyatalika ukucitika, mwize mumanye ukuti Umwana wa muntu apalamizile ali pa mulyango. 30 Nkuminena icisinkanye nkuti, yo-o inkulo italipita mpaka vyonsinyene vyo-o vize vicitike. 31 Iyulu ni nsi vilifumapo, lelo amazwi yane yeni, yaliwako umuyayaya.

32 “Kusi nanti wumwinye wino wamanya pano wo-o uwanda wulifika ni mpindi nanti awangeli wamwi yulu nanti amwananye, suka vye e Tata awino wamanya. 33 Twalililani ukulola swinya mwacenjela, amuno mutamanya impindi yino Leza wasola. 34 Cawa ngati amuntu wumwi wino wayile ku nsi yinji nu kusila awawomvi wakwe ing’anda pa kuti wayisakamala. Swinya wapile na wawomvi wakwe wonsinye imilimo yakuwomba, wakonkomecezizye na wamalonda ukuti watwalilila ukulola. 35 Acino twalililani ukulola, amuno mutamanya impindi yino umweni wa ng’anda aliyiza, nga manguzi, uwusiku pakasi, pano kukuya kukuca* nanti umutondo tondo, 36 pakuti nga wiza mukupumincizya atiza azane mulazile. 37 Lelo vyo-o vino nkuminena, nkunena na wonsinyene nkuti twalililani ukuwalola.”