Ukulingana ne Luka

24 Pa wanda wakutalicilapo mwe sabata, wapulusile nu kuya ku manda swinya wasenzile ni vinucile vino wapekinye. 2 Nomba pano wafisile, wazanile pa nkungwe ya kwe Yesu pasi liwe walikunkulusizye. 3 Walile winjila mu nkungwe, wazanile umuwili wa kwe Tatakulu e Yesu musi. 4 Pano wacili wakuzunguka pe vino waweni, paponye awonsi wawili wano wazwite ivizwalo vino vyazikimilanga, wimilile pano walinji. 5 Wivwile nkaninye intete icakuti watinile nukulolecesya wa-a awonsi. Ne nawo wawanenile ukuti: “Amulandu ci wuno mukuvwambila umuntu wa wumi mu nkungwe? 6 Wamuzyulupuzile mo-o asimo. Uzye mutakwizuka vino waminenile pano walinji mu Galili, 7 ukuti Umwana wa muntu walimupa mu makasa ya wawembu nu kumupamantila pa cimuti, lelo pa wanda wa citi tatu alizyulupuka?” 8 Apano wizusile vino wawanenile, 9 acino wanyosile nu kuyanena awatumwa 11 na wantu wanji pe vyonsinyene vino vyacitisile. 10 Pe wa-a awanaci palinji e Mariya umwina Magadala, e Joana ne Mariya e mama wa kwe Jemusi. Na wanaci wanji wano walinji nawo, nawonye wayile awanena awatumwa vyo-o ivintu. 11 Lelo awatumwa walolanga ngati wa-a awanaci wakuwipavye, acino watawasuwizile.

12 E Petro wasamazile aya ku nkungwe, pano winjizile, wazanilevye imyenda mitupunye, acino wanyocezilemo aya akwelenganya cino cacitisile.

13 Pe wulyanye uwanda, awasambi wakwe wawili wafumanga ku Yerusalemu wakuya ku kaya kano witanga ukuti Emawusi. Patalimfile ama kilomita 11.* 14 Swinya walanzyanyanga pa vintu vyonsinye vino vyacitisile.

15 Nomba pano walanzyanyanga pe vyonye vyo-o ivintu, e Yesu wawazanile, atalika ukupitila ponga nawo, 16 lelo watamumanyile. 17 Acino Yesu wawakolowozizye ati: “Avyani vino mukulandapo?” Nawo wimililevye lyo wali nu wulanda. 18 Nge Kleopasi amwasuka ati: “Uzye apano uyizile mu Yerusalemu uwakuti ukane ukumanya vino vikucitika mwe ya-a amanda?” 19 Ne Yesu awakolowozya ati: “Avyani vyovyonye?” Nawo awamunena ukuti: “Avintu vino vyaciticizile Yesu umwina Nazareti, wino walanjizizye pankolelo pa kwe Leza na wantu ukuti we kasesema wa maka mwe vino walandanga nu kucita. 20 Intunguluzi zya simapepo na wakateka wamupinguzile ukuti wamukome swinya wamupamantizile pa cimuti. 21 Sweswe twenecelanga ukuti we-e umuntu awino alipususya awina Israeli. Nomba papita na manda yatatu ukufumilila pano vyo-o vyaciticila. 22 Lelo vino awanaci wamwi tewalanda vituzungusizye nkaninye amuno tewayile ku manda umutondotondo, 23 wazana mu nkungwe ya kwe Yesu musi umuwili wakwe. Acino tewanyoka walanda ukuti tewalola awangeli wano tewawanena ukuti azyulupusile. 24 Apano wamwi pe sweswe tewaya ku nkungwe, waya wazana wulyanye vino awanaci tewalanzile, lelo Yesu watamuweni.”

25 E Yesu wawanenile ati: “Mwe wantu wano wasikwivwicisya mwee! swinya wano wasisuwila zuwa vino wakasesema walanda. 26 E Klistu wazipizile ukucula ndi wonye wo-o pakuti acindamikwe.” 27 Swinya Yesu watalisile ukuwalondololela vyonsinye vino Amawaliko yalanzile pe weliwe, ukufumilila kwe vino Mozesi walemvile ukufika na kwa kasesema wonsinye.

28 Acino wapalamizile ukufika mu kaya kano wayangamo, lelo e Yesu wakozile ngati akupitilila. 29 Nomba wamunenile ukuti: “Utapita yikala naswe amuno ilanzi lyati lyakwinjila, kwandi kufite nombanye.” Nawe wazumizile nu kwikala nawo. 30 Nomba pano wisile pi tebulo, wasenzile umukate, apepa, nga awumontolanya nu kuwapa. 31 Paponye aminso yawo yiyusile, awamumanya; lelo wizile aleka ukuloleka, afuma pe woliwo. 32 Nga awatalika ukulanzyanya wakuti: “Awuli umulandu wuno amazwi yakwe teyakutufika sana pa mwezo pano tekulanda na sweswe munzila nu kutulondololela muno Amawaliko yakasula.” 33 Pe yilyanye impindi wakatusile nu kunyocela ku Yerusalemu swinya wazanile awatumwa 11 na wanji wano walinji ponga nawo. 34 Wawanenile ukuti: “Acisinka azyulupusile swinya tewalolecela kwe Simoni.” 35 Nga wasambi wawili nawo awatalika ukuwalondololela vino vyacitisile mu nzila na vino wayimanyisizye kwe woliwo pano wamontolinye umukate.

36 Pano wacilinji wakulanda vyo-o, e Yesu wizile ayimilila pakasi kawo nga awanena ati: “Umutende wuwe namwe.” 37 Nomba pa mulandu wakuti awasambi walinji nkaninye ni ntete, watalisile ukwelenganya ukuti walola umuzimu. 38 Nga awanena ati: “Nga cani cino mwivwila intete swinya amulandu ci wuno mukuvwilicila? 39 Ndolani ku makasa na ku matamba! Anenenyene! Ndemani mulole, amuno umuzimu wutawa nu muwili na mafupa ndi vino nene nkweti.” 40 Pano walanzile wo-o, wawalanjizizye amakasa na matamba yakwe. 41 Nomba pa mulandu wakuti wazungusile swinya wakunzile nkaninye pano wawanenile vyo-o, waposilwe ukumusuwila. Yesu wa wakolowozizye ukuti: “Uzye mukweti ivyakulya?” 42 Nawo wamupile inswi injoce, 43 nawe wasenzile alya, lyo wakulolako nu kulola.

44 Apano e Yesu wawanenile ukuti: “Pano nalinji namwe, naminenile ukuti vyonsinye vino vyalembwa penene, mu Masundo ya kwe Mozesi, mu Malumbo na vino wakasesema walemvile vizipizile ukuficiliswa.” 45 Apano wawavwizye ukwiluka vino Amawaliko yalandanga. 46 Swinya wawanenile ukuti: “Wo-o avino Amawaliko yakalanda pe Klistu ukuti alicula nu kukatuka ku wafwe pa nsizi ya manda yatatu. 47 Swinya pa mulandu ni zina lyakwe, ukulapila nu kutetela imembu kuliwizwa ku wantu wonsinye ukutalicila mu Yerusalemu. 48 Muliwa mwe wakamboni we vyo-o ivintu. 49 Ndimitumila cino Tata wamilaya, mwemwe mwize mutwalililevye ukwikala mu musumba mpaka pano mulipocelela amaka ukufuma mwi yulu.”

50 Apano wawasenzile awatwala mupipi na ku Betani, anyamula amakasa yakwe apepa kwe Leza ukuti awawapala. 51 Walile wamala ukuwapala, Leza amusenda kwi yulu. 52 Acino wamufukamizile* swinya wanyocezile ku Yerusalemu lyo wali ni nsansa. 53 Cila wanda wawanga pi tempile wakulumbanya Leza.