Ukulingana ne Marko
7 Nomba Awafalisi na wakasambilizya wa masundo wamwi wano wafumile ku Yerusalemu wayile kwe Yesu. 2 Awalola awasambi wakwe wamwi wakulya ni viko ukwasowa ukusamba* ku makasa. 3 (Awafalisi na waYuda wonsinye pakulya wakasamba ku makasa ukufika na munkonci, amuno wakakonka intambi zya wakwasi wawo awa ku kali. 4 Na pano wakufuma ku maliketinye, wasitalika ukulya ukwasowa ukusamba. Kwawa intambi na zinjinye zino watwalilila ukukonka ponga ngati akubadizwa ukuwomvya amakapu, amaja, apano ni vidishi vino wapanjila ne kopa.) 5 Awafalisi na wakasambilizya wa masundo awamukolowozya ati: “Acani cino awasambi wako wasikoncela intambi zya wantu wa ku kali, wakalya ivyakulya ni viko ku makasa?” 6 Nawe wawanenile ati: “E Ezaya wasesemile pe mwemwe mwe wacawufi, ndi wulyanyene vino amawaliko yakati, ‘Wakancindika ni milomo yawo lelo mu myezo yawo watankunda. 7 Ukupepa kuno wakampepa akwavye kwe nene, amuno wakasambilizya amasundo ya wantu.’ 8 Mwasya amasundo ya kwe Leza nu kukonka intambi zya wantu.”
9 Wawanenile nu kuti: “Mukavwambilizya umwakuwipicizya pakuti mutakonka amasundo ya kwe Leza, lelo mwakonka intambi zinu. 10 Kucakulolelako e Mozesi watili, ‘Wacindika e baba wako ne mama wako’ swinya, ‘wensinye wino wapontela e mama wakwe, azipizile ukufwa.’ 11 Lelo mukalanda mukuti: ‘Wensinye wino wanena baba wakwe nanti e mama wakwe ukuti: “Vyonsinye vino nakwata vino nalinji nu kumisakamalilamo napa ivya wupe kwe Leza.”’ 12 Musileka acitila e baba wakwe nanti e mama wakwe ivizima. 13 Mwalenga ni zwi lya kwe Leza ukuloleka ngati litacindama pa mulandu ni ntambi zino mukasambilizya, swinya mukacita ivintu ivivule ndi vino vyonye vyo-o.” 14 Swinyanye wisile awantu awavule nga wanena ati: “Yivwani vino nkulanda nu kwivwicisya muno vikusula. 15 Kusi nanti cimwinye cino cikakwinjila mu muntu cino cingamukombezya; lelo vino vikafuma mwe weliwe, avino vikamukombezya.” 16* ——
17 Pano Yesu wafumile pa wantu winjila mu ng’anda, awasambi wakwe watalisile ukumukolowozya muno icilanjililo casulanga. 18 Wawanenile ati: “Uzye namwemwenye muposilwe ukwivwicisya? Uzye mutamanya ukuti kusi icili consinye cino cikakwinjila mu muntu cino cingamukombezya? 19 Amuno pakwinjila visipita mu mwezo lelo vikapita munda nga viya ku cimbusu.” Acino watili ivyakulya vyonsinye visikombezya. 20 Watwalilizile ukulanda ukuti: “Vino vikafuma mu mwezo wa muntu avino vikamukombezya. 21 Amuno mu mwezo wa muntu amuno mukafuma amelenganyo mawipe: uwuzelele,* ukwiwa, ukukoma, 22 uwucende, ukulondesya ukuwa ni vivule, ukulondesya ukucita iviwipe, uwucenjezi, imiwele yinji imiwipe iya nsoni,* uwuzuwa, imiponto, icilumba nu kukanawa na mano. 23 Yonsinyene yo-o imiwele, yikafuma mu mwezo wa muntu swinya ayino yikamukombezya.”
24 Wafumile koko nu kuya ku citungu ce Turi ne Sidoni. Wayile ayinjila mu nga’nda, amuno atalondanga awantu wamanye ukuti ayizile, lelo wizile awamanya. 25 Pano Yesu wafisilevye, umwanaci wino wakweti umwana umukazyana wino walinji nu muzimu wuwipe, wivwile pe weliwe. Acino wayile kwe weliwe asokowala ku matamba yakwe. 26 We-e umwanaci walinji amu Griki wa ku Foiniki* swinya watwalilizile ukulambilizya Yesu ukuti apozye umwana wakwe wino walinji nu muzimu wuwipe. 27 Nga Yesu amunena ati: “Leka awana te walye wikute, amuno citange cizipe ukusenda ivyakulya vya wana nu kusumbila twasimbwa.” 28 Nawe wasusile ukuti: “Mwelimonye tatakulu, lelo na twasimbwanye tukalya imvongonyo zino zikapona pi tebulo lya wana.” 29 Nawe wamunenile ati: “Pa mulandu na mazwi yano walanda, nyocelamo ku ng’anda ku mwako, amuno umuzimu wuwipe wufumile mu mwana wako umukazyana.” 30 Pano wafisile ku ng’anda, wazanile umwana wakwe alazile lyo nu muzimu wuwipe wufumile.
31 Pano Yesu wafumile mu citungu ca Turi, wayile pita mu Sidoni na mu citungu ca Dekapolisi* pakuya kwe sumbi we Galili. 32 Awantu wamuletezile e puli* wino wasyupikwanga nu kulanda swinya walambilizizye Yesu ukuti awikevye ikasa pe weliwe. 33 Acino Yesu wamusenzile pa mbali amufumya pa wantu, apano amulema mu makutwi nga swila amati amulema pa lulimi. 34 Apano alolecesya mu pela, afuta nga munena ati: “Efafata,” cino cikapiliwula ukuti “Yiyuka.” 35 Paponye watalisile ukwivwa nu lulimi lwakwe lwapepusile atalika nu kulanda icete. 36 E Yesu wakonkomecezizye awantu ukuti watize wanenepo uwili wensinye, lelo pano wawakanyanga, apano wacizilemo ukusalanganya ilyasi. 37 Awantu wazungusile nkaninye swinya walandanga wakuti: “Vyonsinye vino kucita, avizima nkaninye. Akulenga na wapuli ukwivwa na waciwulu ukulanda.”