Ukulingana ne Marko
1 Wo-o avino ilyasi lizima lino likalanda pe Yesu Klistu umwana wa kwe Leza lyatalika: 2 Ndi wulyanye vino e kasesema Ezaya walemvile ukuti: “(Ndituma umuntu uwakukukolelela* nu kukuyanizya inzila.) 3 Izwi lya kwe wumwi likupunda mu mpanga likuti: ‘Pekanyani inzila yino yili pa nkolelo ya kwe Yehova!* Zifyani inzila zyakwe ukuti zyololoke.’” 4 E Yohani Kabadizya walinji mu mpanga, wawizizyanga awantu ukuti wabadizwe pakulanjizya ukuti walapizile swinya na pakuti e Leza awatetele imembu zyawo. 5 Awantu wonsinye awa mu Yudeya na mu Yerusalemu wayanga kwe weliwe, nawe wawabadizyanga* mu luzi lwa Yordani, swinya nawo wasokololanga imembu zyawo pa minso ya wantu wonsinye. 6 Nomba e Yohani wazwalanga icizwalo ca meya ya ngamila* ne bewoti mu mutembeleko, swinya ivyakulya vino walyanga ampanzi nu wuci. 7 Wawizyanga ukuti: “Wino akwiza pa nsizi yane awa maka ukundusya, wino ntawa ni nsambu zya kukontama nu kusapula intambo zya ku ndyatu zyakwe. 8 Nene nkumibadizyavye mu minzi, lelo weni alimibadizizya ku muzimu wa kwe Leza.”
9 Mwe yalyanye amanda e Yesu wafumile ku Nazareti aya ku Galili nu kuya kuno Yohani walinji, nawe wamubadizizye mu luzi lwa Yordani. 10 Walile e Yesu wafumavye mu minzi, waweni iyulu liyuka, nu muzimu wa kwe Leza awiza pe weliwe ngati ankunda. 11 Ni zwi alivwika ukufuma mwi yulu aliti: “We mwana wane wino nakunda, ukansecelesya nkaninye.”
12 Paponye umuzimu wa kwe Leza awumutungulula ukuya mu mpanga. 13 Watwalilizile ukuwa mu mpanga pa manda 40, wikalanga ni nyama zya mu mpanga swinya e Satana wamwelezyanga. Lelo awangeli wayanga mu kumuwomelezya.
14 Nomba pano walemile e Yohani, e Yesu wayile ku Galili mu kuwizya ilyasi lizima ilya kwe Leza 15 watinji: “Impindi yino yalandizilwe lyankani yafika, nu Wufumu wa kwe Leza nawo wupalamizile. Lapilani, nu kusuwila ilyasi lizima.”
16 Pano wapitanga mu mbali ye sumbi we Galili, waweni e Simoni nu munyina e Andreya, wakuteya amakonde mwe sumbi amuno walinji awalondo wa nswi. 17 Apano Yesu awanena ati: “Nkonkani, ndimilenga ukuwa awalondo wa wantu.” 18 Nawo paponye wasile amakonde yawo nu kumukonka. 19 Ukufuma papo, waweni wamwana Zebedi wawili, e Jemusi ne Yohani umunyina lyo wali mu wato wakumenda amakonde, 20 paponye Yesu wawisile ukuti wamukonke. Acino wasile yisi e Zebedi na wawomvi nu kumukonka. 21 Wayile nawe ku Kapernahumu.
Pano isabata lyatalisilevye, e Yesu winjizile mwi sinagogi nu kutalika ukusambilizya. 22 Swinya awantu wazungusile nkaninye pe vino wasambilizyanga, amuno vyafumanga kwe Leza ukupusanako na wakasambilizya wa masundo. 23 Pe yilyanye impindi, mwi sinagogi mwalinji umonsi wino walinji nu muzimu uwuwipe, wapundilizile e Yesu ati: 24 “Ngu kulonda cani kwe sweswe we Yesu umwina Nazareti? Uzye wiza mu kutonona? Nkumanyile we muwomvi wa kwe Leza.” 25 Lelo Yesu wakalipizile wo-o umuzimu uwuwipe nu kuwunena ati: “Myalala! fuma na mwe weyo umuntu.” 26 We-e umonsi wizile apunda nkaninye, acino umuzimu uwuwipe wamuponizye pansi atalika ukusalamanta, apano awufuma mwe weliwe. 27 Awantu wazungusile nkaninye, awatalika nu kulanzyanya wakuti: “Nga vyonye vyo-o avyani? Imisambilizizye yakwe ayipya! Swinya akukalipila ni mizimu imiwipe nayo yikumutontela.” 28 Paponye ilyasi lyakwe lyasalangine mu musumba wonsinye uwa Galili.
29 Walile wafuma mwi sinagogi, e Yesu, e Jemusi ne Yohani wayile kwe Simoni ne Andreya. 30 Lelo wazanile e nyinavyala Simoni alazile pa mulandu wakuti walwile e malelya,* acino wanenile Yesu ukuti amulwale. 31 Pano Yesu wayile kwe weliwe, wayile amulema pi kasa amukatusya. Nawe paponye apola atalika nu kuwapekanizizya ivyakulya.
32 Pano cafikanga amanguzi, lyo ni lanzi linjila, awantu awatwalila Yesu wonsinye wano walinji ni mizimu miwipe, na wano walwile. 33 Awantu wonsinye awa mu musumba wayile awakolongana pa mulyango wa ng’anda muno Yesu walinji. 34 Nawe wapozizye wonsinye wano walwile indwala indekane ndekane, swinya wafumizye ni mizimu miwipe imivule. Lelo walesizye imizimu miwipe ukulanda pe weliwe, amuno yamumanyile ukuti we Klistu.*
35 Umutondo tondo nkaninye, lyo kucili kufisile, Yesu wakatusile nu kuya ku cifulo kuno kutalinji awantu. Kulyanye wayile atalika ukupepa. 36 Lelo, e Simoni na wasambi wanji wayile mukumuvwamba. 37 Pano wamuzanile, wamunenile ukuti: “Awantu wonsinye wakukuvwamba.” 38 Nawe wawasusile ukuti: “Lekani tuye kunji mu misumba yino yawela mupipi, pakuti nakonye inje nkawizye ilyasi lizima, amuno awuli umulandu wuno nizila.” 39 Wayile mu kuwizya mu ma sinagogi mu Galili monsinye swinya wafumyanga ni mizimu miwipe.
40 Umonsi wino walwile amambombo* wayile kwe welilwe, afukama, nga atalika ukumulambilizya ati: “Ngu kulonda ungampozya.” 41 Acino wamwivwizile uluse, wamulemile nu kumunena ati: “Nkulonda! Pola.”* 42 Swinya paponye we-e umonsi wapozile* amambombo. 43 Acino wamulesile ukuti apite, lelo wamusosile 44 amunena ati: “Utakanene uwili wensinye pe vyo-o vino vyacitika, yanga kwe simapepo akakulole. Uye ukape icawupe, wulyanye vino Mozesi walanzile pakuti wasimapepo wakasinincizye ukuti upozile.” 45 Lelo pano we-e umonsi wapisile, wayile atalika ukusalanganya lyo-o ilyasi nu kulanda pe vino vyacitisile monsinye. Icakuti mu musumba wonsinye wuno Yesu winjilamo, awantu wamukonkanga. Acino wayanga mukwikala kuno kusi awantu, lelo nakonye wamukonkanga ukufuma mu ncende impusane-pusane.