Ukulingana ne Mateyo
26 Nomba walile pano Yesu wamala ukulanda vyonsinye vyo-o, wanenile awasambi wakwe ukuti: 2 “Mumanyile ukuti kwasyala vye amanda yawili lyo kwawa Icakupitiliwa, Umwana wa muntu walimulema nu kumutwala ku walwani wakwe pakuti wize wamupamantile pa cimuti.”
3 Nga pano intunguluzi zya simapepo na wasongo wa wantu, awaya awalongana ponga mu luwanza lwa kwe simapepo mukulu, wino witanga ukuti Kayafa, 4 watalisile ukulola inzila yakuti walemelemo e Yesu nu kumukoma. 5 Lelo, walandanga ukuti: “Tutakamulemele pa mpindi ya kuzevya amuno awantu wangakatusya ivyongo.
6 Yesu walinji mu Betani mu ng’anda ya kwe Simoni, wino wapozizye amambombo, 7 pano akulya, umwanaci wumwi wizile kwe weliwe lyo asenzile ni botolo lya mafuta amanuncile nkaninye, atalika ukumwitila pa mutwe. 8 Awasambi walile walola vyo-o, wativwile icete, walanzile ukuti: “Acani cino akononela amafuta? 9 Amuno nga tewakazizye pa mutengo uwukulu nu kupa awapina indalama.” 10 Walile Yesu wivwa vino wakulanda, wawanenile ukuti: “Acani cino mukulandila wowo pe we-e umwanaci? Ancitizile icintu icizima nkaninye. 11 Amuno awapina mulilanga muli nawo lyonsinye, nomba nene mutalitwalilila ukuwa nani. 12 Pano tewanjitila ya-a amafuta amanuncile pa muwili, tekupekanizizya umuwili wane ku kuzikwa. 13 Nkuminena nkuti, pano waliwawizya ilyasi lizima mu nsi yonsinye, waliwalanda na pe vyonye vino we-e umwanaci acisile ku kumwizucila.”
14 Nga apano wumwi pa wasambi wakwe 12, uwizina lyakuti Yuda Skarioti, wayile kwa simapepo 15 nu kuwanena ukuti: “Mulimpa vyani nga namilemeka Yesu?” Ne nawo wamulaile ukumupa indalama zye silva 30. 16 Ukufuma palyanye, watalisile ukuvwamba impindi inzima iyakuti alemecele Yesu ku walwani.
17 Pa wanda wakutalicilapo uwa kuzevya kwa Mukate Wuno Wutatutumuka, awasambi wizile kwe Yesu nu kumunena ukuti: “Akwinye kuno ukulonda tukakupekanizizye Icakulya Cakupitililwa?” 18 Nawe wawanenile ukuti: “Yanji mu musumba, mwandi mukazane umonsi wumwi, mumunene muti, ‘Umusambilizya wati: “Impindi yane iyakufwa yipalamizile; ku mwako akuno nakwiza ndile Icakupitililwa na wasambi wane.”’” 19 Awasambi wayile awacita wulyanyene vino Yesu wawanenile swinya wapekinye vyonsinye vino vyalondekwanga pa Cakupitililwa.
20 Pano cafisile amanguzi, e Yesu wisile na wasambi wakwe pi tebulo akulya. 21 Nomba pano walyanga wawanenile ukuti: “Nkuminena icisinka nkuti, wumwi pe mwemwe wandi ankazye.” 22 Wonsinye wivwile uwulanda pe vyo-o vino walanzile, cila muntu watalisile ukumukolowozya ukuti: “Tatakulu, uzye anene?” 23 Yesu wawasusile ukuti: “Wino wandi asomfezye ponga nani mu mbale, awino wandi ankazye ku walwani wane. 24 Acisinka ukuti, Umwana wa muntu wandi afwe, wulyanye vino Amawaliko yakalanda pe weliwe, nomba aca wulanda kwe wino wandi akazye Umwana wa muntu! Nga cazifile vye atakwatwa.” 25 Nge Yuda wino walinji nu kumukazya ku walwani, amwasuka ati: “Rabi, asa nene vwile?” Yesu amunena ati: “Umanyile ni casuko.”
26 Pano wacili wakulya, e Yesu wasenzile umukate, apepa, nga awumontola, apano apa awasambi wakwe awanena ati: “Lyani wo-o umukate, wukwimililako umuwili wane.” 27 Wanyosile asenda e kapu muno mwalinji waini, apepa, nga apa awasambi wakwe, awanena ukuti: “Mwanimo mwensinye, 28 amuno yikwimililako uwazi wane uwa cipangano, wuno wukwitululwa pakuti awavule wize watetelwe ku membu zyawo. 29 Nomba nkuminena nkuti: Ntalitela imwepo yo-o waini naswinya, mpaka njize mwele ponga na mwemwe iyipya mu Wufumu wa kwe Tata.” 30 Pa nsizi yakwimbila indwimbo zyakulumbanya Leza, wayile ku Mwamba wa Miolife.
31 Nga Yesu anena awasambi wakwe ati: “Pa mulandu na vino vyandi vinciticile, mwensinye mwandi munsamale ilelo lyo-o uwusiku, amuno Amawaliko yakati: ‘Ndikoma kacema, ni ng’onzi zilisalangana.’ 32 Lelo ndila nazyulupuka, ndikolela ukuya ku Galili, akuno mulizana nkumilindilila.” 33 Nga Petro anena Yesu ati: “Nanti wonsinyene wa-a wangakusamala pa mulandu na vino vyandi vikuciticile, nene ntakutela nkusye!” 34 Nga Yesu amunena ukuti: “Nkukunena nkuti, ilelonye lyo-o uwusiku pano mukolwe atani alamule, wandi unkane imiku yitatu ukuti utamanya.” 35 Petro amwasuka ukuti: “Cazipa ukuti mfwile ponga nawewe, ukucila ukuti nkukane.” Awasambi wanji wano wasyala nawonye awalanda icili conganye.
36 Nga Yesu asenda awasambi wakwe awaya ku cifulo cino wakakwita ukuti Getisemani, anena awasambi wakwe ati: “Yikalani panye pa-a, nene naya papo mukupepa.” 37 Nga asenda Petro na wa mwana Zebedi wawili, Yesu watalisile ukwivwa uwulanda swinya wasakamisilwe nkaninye. 38 Nga awanena ukuti: “Ndi nu wulanda nkaninye, cikangavye imfwe nu kufwa. Yikalani panye mutalala, mutwalililevye ukulola ndi vino nanenenye indi.” 39 Walile wafumavye akatalamucila, wafukime, afisya ni mpumi pansi, atalika ukupepa ukuti: “Tata nga cingacitika fumya yo-o e kapu pe nene. Lelo asavyo nkulonda ukuti vicitike, suka ukulonda kwako.”
40 Pano Yesu wanyocezile ku wasambi watatu wano wapisile nawo, wazanile walazile, nga anena Petro ati: “Uzye kweni mutanga mutwalililevye ukulola ponga na nene pi awala lyongavye ndi vino naninye indi? 41 Lolanji swinya mutaleka ukupepa pakuti mutaponela mukwelezwa. Umwezo wukulondesya lelo umuwili wutonsile.” 42 Wanyocezile mu kupepa pa muku waciti wili, watili: “Tata, nga cakuti kusi inzila yinji suka vye ukuti imwemo yo-o e kapu, lyo leka ukulonda kwako kucitwe.” 43 Walile wanyoka na swinya, wazanile walazile, amuno utulo twawacimvizye. 44 Acino wawasile, anyocela mu kupepa pa muku waciti tatu, akulanda ivili vyonganye. 45 Wanyocezile ku wasambi wakwe nu kuwanena ukuti: “Amulandu ci wuno mulalizile swinya mukupuza pa mpindi ya musango wo-o? Lolani! Impindi yafika iyakuti Umwana wa muntu wamupe mu makasa ya walwani wakwe. 46 Katukani, tupite. Lolani! Wino akunkazya wapalamila.” 47 Pano Yesu acili akulanda, lolani! e Yuda wino walinji pa wasambi wakwe 12 wafisile, lyo ali ni wumba lya wantu wano wasenzile wapanga ni nsonzo. Intunguluzi zya simapepo na wasongo wa wantu awano wawatumile.
48 Nomba e Yuda wapile wano wizile mukulema Yesu icimanyilo, cakuti: “Wino nandi mfyompe pi tama, lyo awili weyonye wino mukuvwamba; mukamuleme nu kumusenda.” 49 Acino Yuda wayile kwe Yesu afika amulamuka ati: “Umutende Rabi!” Nga amufyompa pi tama. 50 Lelo Yesu wamukolowozizye ukuti: “Nga wiza mukucita cani ko-o?” Apano wano walinji ne Yuda awalema Yesu nu kumusenda. 51 Lelo wenga pe wano walinji ne Yesu, asenda panga nu kuputula ikutwi lya muwomvi wa kwe simapepo mukulu. 52 Nga Yesu amunena ukuti: “Nyocezya panga wako muno afwile ukuwa, amuno wonsinye wano wakalwila ku lupanga, waliwakomela ku lupanga. 53 Uzye ukulola ngati ningapotwa ukulenga Tata ukuti antumile nombanye imintapendwa ya wangeli?* 54 Nomba nga nacita wowo, lyo Amawaliko yano yakalanda ukuti vyo-o vifwile ukucitika yangaficiliswa wuli?” 55 Nga apano Yesu anena wano wayile mukumulema ukuti: “Uzye ne cipondo uwa kuti mwize mukulema na wapanga ni zya nsonzo? Mwamanya kuno cila wanda nawanga mwi tempile nkusambilizya, acani cino mutizanga mukundemela? 56 Lelo vyonsinyene vyo-o vyacitika pakuti amazwi yano wakasesema walemvile yaficiliswe.” Nga awasambi wakwe wonsinye awamusya nu kumusamala.
57 Awantu wano walemile Yesu wamutwite kwe simapepo mukulu e Kayafa, kuno wakasambilizya wa masundo na wasongo wawungine ponga. 58 Lelo Petro watwalilizile ukukonka Yesu akatalamucila, icakuti wafisile na mu luwanza lwa kwe simapepo mukulu. Walile winjila mukasi, wisile na wawomvi wa mu ng’anda pakuti alola vino vikucitika.
59 Intunguluzi zya simapepo na wa mucilye consinye ca Sanhedrini wavwambilizyanga wakamboni wano wangiza wawipizye e Yesu uwufi pakuti wamukome. 60 Nanti acakuti kwizanga wakamboni awavule awawufi, watamuzanilepo nu mulandu nanti wumwi. Mukulecelezya, kwizile wakamboni wawili, 61 walanzile ukuti: “We-e umuntu walanzile ukuti, ‘Ningamongola itempile lya kwe Leza nu kulizenga mu manda yatatu.’” 62 Apano e simapepo mukulu akatuka nu kunena Yesu ati: “Uzye usakulandapo ivili vyonsinye pe vino wakukusinila?” 63 Lelo e Yesu atasusile nanti cimwi. Acino e simapepo mukulu wamunenile ukuti: “Landa icisinka, nga utalanzile icisinka lyo watalika ukuwipa Leza wa wumi. Uzye we Klistu, Umwana wa kwe Leza?” 64 Yesu amwasuka ukuti: “We mweneco uyilandizile. Lelo nkuminena mwensinye nkuti: Ukufumilila ilelo lyo-o, mulilola Umwana wa muntu ayisile kwi kasa lya kwe ndilo ilya maka swinya akwiza mu mawingo ya mwi yulu.” 65 Nge simapepo mukulu alepula icizwalo cakwe icakulonde, nu kulanda ukuti: “Wapontela Leza! Nga wakamboni awacani? Mwalola! Nomba mwayivwila mwe weneco vino waponta. 66 Mukutipo wuli pe wo-o umulandu?” Nawo wamwasusile ukuti: “Azipizile ukufwa.” 67 Wamuswilizile amati pa minso nu kumuma amakofi. Ne wamwi wamumile amapi pa minso, 68 wamunenanga wakuti: “Ukati ne Klistu, ale tunene, weni wakuma?”
69 Nomba pano Petro wisile palonde mu luwanza, umuwomvi umukazyana wizile kwe weliwe nu kumunena ukuti: “Na wewenye walinji ponga ne Yesu umwina Galili!” 70 Lelo wakanile pa minso ye wonsinye wano walinjipo, alanda ukuti: “Wankolanya vye.” 71 Walile waya ku mulyango wa pa luwanza, umukazyana winji wamuweni, anena wonsinye wano walinjipo ukuti: “We-e umuntu walinji ne Yesu umwina Nazareti.” 72 Swinyanye e Petro wakanile alanda ukuti: “Nkulanda pa minso ya kwe Leza nkuti, ntamumanyile we-e umuntu!” 73 Papisile vye akampindi katici, awantu wano wimilile mupipi, wapalamizile Petro nu kumunena ukuti: “Nawewenye wawanga ponga nawo, amuno ukulanda nge vyo awa ku Galili wakalanda.” 74 Nga atalika ukulanda ukuti: “Nkulapa ukuti nga nsakulanda icisinka lyo ne mutipwe, ntamumanya we-e umuntu! Paponye e mukolwe alamula. 75 Nga Petro ayizuka amazwi yano Yesu wamunenile ayakuti: “Pano mukolwe atani alamule, wandi unkane imiku yitatu ukuti utamanya.” Nga apano afumila palonde nu kulila nkaninye.