Ukulingana ne Luka

22 Nomba amanda yayanga yakupalamila aya Kuzevya kwa Mukate Uwasowa Ukututumuka kuno kukakwitwa ukuti Icakupitililwa. 2 Intunguluzi zya simapepo na wakasambilizya wa masundo, walolanga inzila yakulemelamo Yesu amuno watinanga awantu. 3 Apano e Satana watalisile ukutungulula e Yuda Skarioti wino walinji pa wasambi 12. 4 Wayile mukunena intunguluzi zya simapepo na wasongo wa wamalonda wa pi tempile vino walinji nu kuwavwa ukulema Yesu. 5 Nawo pano wivwile vyo-o, wakunzile nkaninye swinya wamulayile nu kuti walinji nu kumupa indalama zye silva. 6 Acino e Yuda watalisile ukuvwambilizya inzila yino walinji nu kukazizyamo Yesu. Lelo atalondanga ukucita wo-o pano kuli awantu.

7 Nomba uwanda wakuzevya kwa Mukate Uwasowa Ukututumuka wafisile, pano walinji nu kupa inzuwi ya Cakupitililwa; 8 Acino e Yesu watumile e Petro ne Yohani awanena ati: “Yanji katupekanizizyani icakulya Cakupitililwa.” 9 Nawo wamukolowozizye ukuti: “Akwinye kuno ukulonda tukapekanizizye?” 10 Nawe wawanenile ukuti: “Nga mwinjila mu musumba, umonsi wino asenzile insembo ya minzi wandi akamisunkanye. Mukamukonke mu ng’anda yino wandi akinjilemo. 11 Mukanene umweni wa ng’anda muti, ‘Umusambilizya akuti: “Wulikwinye umuputule wuno ningalilamo Icakupitililwa na wasambi wane?”’ 12 Nawe wandi akamilanjizye umuputule wapapela uwukulu, wuno apekinye icete muno muli vyonsinye vino vikulondekwa. Mulyanye amuno mwandi muye mukapekanizizye Icakupitililwa.” 13 Nawo wayile mu musumba, nu kuyazana vyonsinye vino Yesu wawanenile, swinya wapekinye Icakupitililwa.

14 Pano impindi yafisile, e Yesu wisile pi tebulo na watumwa wakwe. 15 Nga awanena ati: “Nalondesyanga nkaninye ukulila ponga namwemwe icakulya ca Kupitililwa pano ntani ncule, 16 amuno nkuminena nkuti ntalilyapo na swinya mpaka pano vilificiliswa mu Wufumu wa kwe Leza.” 17 Apano wasenzile e kapu muno mwalinji waini, apepa, nga wanena ati: “Sendani yo-o kapu ye waini nu kupisyamo pakuti mwensinye mumwemo. 18 Nkuminena icisinkanye nkuti, Ntalitela mwepo naswinya yo-o waini, mpaka pano Uwufumu wa kwe Leza wuliyiza.”

19 E Yesu wasenzile nu mukate apepa, nga awumontolanya apano apa awasambi wakwe awanena ati: “Wukwimililako umuwili wane wuno nandi impe pa mulandu winu. Mwacita wo-o pakulanjizya ukuti mukanjizuka.” 20 Wacisile wonye nakwe waini pano walya icakulya ca manguzi, nga awanena ati: “Yo-o waini mwe kapu yikwimililako icipangano cane icipya ica wazi wuno wandi witululwe pa mulandu winu.

21 “Lelo wino akunkazya njisile nawe pi tebulo pa-a. 22 Amuno vyonsinye vino vyalandwa pa Mwana wa muntu vili nu kumuciticila; lelo acawulanda kwe wino wandi amukazye.” 23 Acino awasambi watalisile ukukolowozyanya wino walinji nu kucita wo-o.

24 Nomba watalisile nu kupanzinkana pe wino walinji nu kuwa we songo pe wonsinye. 25 Lelo e Yesu wawanenile ati: “Mwamanya ukuti izya mfumu zya mu nsi zikateka awantu nge awazya, ne wano wakatungulula wakaloleka ngati wakakwavwilizya awantu. 26 Nomba mwemwe asa vyo muzipizile ukuwa. Lelo e songo pe mwemwe azipizile ukuwa amutici, na wensinye wino akutungulula azipizile amiwombela. 27 Uzye e songo weweni, pe wino ayisile pi tebulo akulya na wino akupekanya? Uzye asa wino ayisile akulya? Lelo nene ndi ngati amuntu wino akumiwombela.

28 “Amwe wano mwatwalilila ukuwa na nene mu ntazi zyonsinye zino nkapitamo; 29 acino napangana na mwemwe icipangano ndi wulyanyene vino ne Tata wapangana icipangano ca Wufumu na nene, 30 pakuti mwize mulye nu kumwa pi tebulo lyane mu Wufumu wane nu kwikala pa vilimba vya Wufumu pakuti mwize mupingule imyiko 12 iya wina Israeli.

31 “Simoni! Simoni! E Satana akulonda ukumyeela ndi wulyanye vino wakakwela ingano pakufumya ivipapa. 32 Lelo nkupepezileko pakuti isuwilo lyako litatonta; nomba nga wiza walapila ku viluwo vyako, uyize uwomelezye awanyonko.” 33 Nawe wanenile Yesu ati: “Tatakulu, njipekinye ukukukonka konsinye, mu cifungo nu kufwila ponga nawe.” 34 Ne Yesu wamunenile ati: “Nkukunena Petro nkuti, ilelonye lyo-o pano mukolwe atani alamule, wandi unkane imiku yitatu.”

35 Wa wanenile nu kuti: “Uzye mwasowezizyepo cimwi pano namitumile mukuwizya ukwasowa utuvyola twakusendelamo indalama, ivyakulya ni ndyatu?” Nawo wasusile ukuti: “Awe” 36 Nga awanena ati: “Lelo nga muli nu tuvyola twa ndalama ni vyakulya, musende swinya wino atakweti e panga, akazye icizwalo cakwe icakulonde akalemo e panga. 37 Amuno nkuminena nkuti Amawaliko yazipizile ukuficiliswa yano yakalanda pe nene ukuti, ‘Wamucisile ngati acipondo.’ Vyo-o vikuficiliswa pe nene.” 38 Nawo watili: “Tatakulu, tuli na wapanga wa-a wawili.” Nawe awanena ati: “Wawonye wavuzile.”

39 Pano wafumileko, wayile ku mwamba wa Miolife ndi vino wacitanga swinya awasambi wakwe wamukonsile. 40 Walile wafika, Yesu wawanenile ukuti: “Pepanji pakuti nga mwelezwa, mutatonta.”* 41 E Yesu wafumile pano walinji aya akatalamucila, apano afukama atalika ukupepa, 42 watili: “Tata ngu kulonda fumya yo-o kapu pe nene. Lelo asa vino nkulonda ukuti vicitike, suka ukulonda kwako.” 43 Apano umungeli wafumile kwi yulu aya kwe weliwe atalika ukumuwomelezya. 44 Lelo pa mulandu wakuti walinji nu wulanda watwalilizilevye ukupepa, icakuti ni twinsi lyakonkolocelanga pansi ngati awazi. 45 Walile wamala ukupepa, wayile ku wasambi wakwe, lelo wazanile walazile amuno watonsile swinya wivwile nkaninye uwulanda. 46 Acino wawanenile ukuti: “Acani cino mulalizile? Katukani swinya twalililani ukupepa pakuti mutakelezwe.”

47 Pano acili akulanda, paponye akwiza awantu awavule swinya e Yuda wino walinji pa wasambi 12 awino wawatungululanga. Wayile kwe Yesu nu kumufyompa. 48 Nga Yesu amunena ati: “Yuda, uzye wafyompa Umwana wa muntu pakuti umukazye?” 49 Nomba walile wano walinji ne Yesu walola vino vyalinji nu kucitika, wamukolowozizye ukuti: “Tatakulu, uzye tuwakome na wapanga?” 50 Wenga wasenzile e panga nu kuputula ikutwi lya muwomvi wa kwe simapepo mukulu. 51 Lelo e Yesu wamunenile ati: “Leka,” Nga alema ikutwi nu kumupozya. 52 Apano e Yesu anena intunguluzi zya simapepo na wasongo wa wamalonda wa pi tempile na wasongo wano wayile mukumulema ukuti: “Uzye ne cipondo uwakuti mwize mukundema na wapanga ni zya nsonzo. 53 Cila wanda nawanga namwe mwi tempile, lelo mutizanga mukundema. Nomba yo-o ampindi yinu swinya ampindi yakuti wano wawa mu mfinzi walanjizye amaka yawo.”

54 Apano wamulemile nu kumutwala ku ng’anda ya kwe simapepo mukulu, lelo e Petro wawakonkanga akatalamucila. 55 Wamwi wakozizye umulilo mu luwanza nga awikala ponga. E Petro nawenye wayile yikala ponga nawo. 56 Nomba umuwomvi wumwi umukazyana walile walola Petro akota umulilo, wamulolecesizye nga munena ati: “Nawenye walinji ponga nawe.” 57 Lelo wakanile, alanda ati: “Ntamumanya.” 58 Palile papitavye akampindi katici, umonsi wumwi wamuweni nga munena ati: “Nawewenye walinji ponga nawe.” Lelo Petro watili: “Ntamumanyile.” 59 Swinya papisilevye iawala lyonga, umonsi winji watalisile ukumusinila ati: “Nawenye walinji ponga nawo, amuno amwina Galili.” 60 Nomba e Petro watili: “We muntu we, ntamanyile cino ukulandapo.” Swinya paponye, pano acili akulanda, ne mukolwe walamuzile. 61 Paponye e Tatakulu wizile apiliwuka alolecesya Petro, nawe wizusile vino Tatakulu wamunenile ukuti: “Ilelo pano mukolwe atani alamule, wandi unkane imiku yitatu.” 62 Nga apano afumila palonde nu kulila nkaninye.

63 Awonsi wano walemile Yesu watalisile ukumutumfya nu kumuma. 64 Walile wamuvwimba pa minso, wamunenile ukuti: “Tunene, weni wakuma? Nke ukati ne kasesema!” 65 Swinya walanzile amazwi amawipe aya misango yonsinye pe Yesu yano yakwelenguzile Leza.

66 Kwalile kwaca, wasongo, intunguluzi zya simapepo na wakasambilizya wa masundo wawungine ponga, awamutwala mu Sanihedrini nga wamunena ati: 67 “Tunene nga we Klistu.” Ne Yesu wawanenile ati: “Nanti ningaminenanye, mutange munsuwile. 68 Nanti namikolowozyanye mutange munjasuke. 69 Ukufumilila ilelo lyo-o, Umwana wa muntu aliyikala kwi kasa lya kwe ndilo ilya maka ilya kwe Leza.” 70 Pano walanzile vyo-o, wamunenile ati: “Lyo we Mwana wa kwe Leza?” Nawe wawasusile ukuti: “Ee, anenenye.”* 71 Nawo watili: “Uzye tukulondekwa na wakamboni na wanji? Amuno twayivwila vino umweneconye walanda.”